CXIII.
1
In outegate ofe Iraele,
Oute ofe Egipte come swa wele;
Iacob hous—was glad for-þie—
Ofe þe folke ofe barberie:
2
Made es Iude his halinesse,
Irael his might he esse.
3
Þe see segh, and flegh onane,
Hindeward turned es Iordane;
4
Hilles als wetheres fained þare,
And knolles als lambes ofe schepe þate are.
5
What es þe, see, þat þou flegh nou?
And þou, Iordan, obake þat went eretou?
6
Hilles, als wetheres gladed ye?
And, knolles, als lambes ofe schepe þat be?
7
Ofe face ofe lauerd þe erthe stired isse,
Ofe face ofe god ofe Iacob blisse;
8
In weres ofe watres þat turnes stane,
And kliffes in welles ofe watres to gane.—
1
Noghte til vs, lauerd, noght til vs nou,
Bote til þi name blisse gife þou,
2
Ouer þi merci and þi sothnesse;
Leswhen sai genge: “þair god whare esse?”
3
Oure god sothlike in heuen es kid;
Alle þat euer he wald he did.
4
Lickenes ofe genge, siluer and gold,
Werkes ofe men hend ofe mold.
5
Þai haue mouth, and sal noght speke with-al;
Eghen þai haue, and se þai ne sal.
6
Þai haue eres, and here ne sal þai oghte;
Nese-thirles þai haue, and smel sal noghte.
7
Hend þai haue, and noght sal þai
Grape with þam, night ne dai;
Fete þai haue, and sal noghte ga;
In þaire throte noght crie sal þa.
8
Like be to þam þate make am swa,
And alle þat traistes in þam ma.
9
Israel hous hoped in lauerd ofe blisse;
Þar helper and þar forhiler he isse.
10
Aaron hous in lauerd hoped þai;
Þar helper and þar forhiler he es ai.
11
Þat dredes lauerd, in lau[er]d hoped ma;
Helper and forhiler es he ofe þa.
12
Lauerd ofe vs was minand,
And vs he blissed with his hand.
He blissed þe hous ofe Irael;
He blissed þe hous ofe Aaron wel.
14
Þat dredes lauerd, al blissed he,
Þe littel with þe mare to be.
15
Eke mote lauerd ouer yhou,
Ouer yhou and ouer yhour sones nou!
16
Blissed ofe lauerd be yhe ma,
Þat maked heuen, erthe als-swa.
17
Heuen ofe heuen to lauerd be;
And erthe to mensones gafe he.
18
Noghte dede, lauerd, sal looue þe alle,
Ne in to helle þa þat doune falle.
19
Bot we þate liuen, lauerd we blisse,
Fra hethen and in to werld þate isse.
