CIII.
[1]
Blisse, mi saule, lauerd nou!
Lauerd mi gode, swith mikel ertou.
2
Schrifte and fairehed schred þou righte;
Vmlapped als kleþinge with lighte.
3
Strekand heuen als fel with blis;
Þat hiles with watres ouerestes his,
4
Þat settes þin vpsteghinge kloude,
Þate gaas ouer fetheres of wyndes loude;
5
Þat makes þine aungels gastes fligh-and,
And þin hine fire brinnand.
6
Þat grounde[d] land ouer staþelnes his—
Noghte helde sal in werld ofe werld þis.
7
Depnes als schroude his hilinge alle;
Ouer hilles his watres stande salle.
8
Fra þi snibbinge sal þai fle,
For steuen ofe þi thoner fered be.
9
Vpsteghes hilles, and feldes doungas
In stede whilke þou grounded to þas.
10
Mere sete þou whilke ouerga þai ne sal,
Ne turne to hile þe lande with-al.
11
Þat outsendes welles in dales ma;
Bitwix mid hilles sal watres ga.
12
Drinke sal alle bestes of felde wide;
Wilde asses in þar thriste sal abide.
13
Ouer þa wone sal foghles ofe heuen;
Fra mid of stanes gife sal þai steuen.
14
Fra his ouermastes hilles watrand;
Of fruite ofe his werkes filled bes þe lande;
15
Forthledand hai to meres ma,
And gresse to hinehede of men swa;
16
Þat þou outelede fra erthe brede,
And herte of man faines wyne rede;
17
Þat he glade likam in oyele beste,
And brede þe herte ofe man sal feste.
18
Be fullefilled sal trees ofe felde ilkan,
And þe cedres of Yban
Whilke he planted with his hand;
Þare sal sparwes be nestland,
19
Wilde haukes hous [es] leder of þa.
Hilles hegh til hertes ma,
And þe stane bi dai and nighte
Vntil irchones es toflighte.
20
He made þe mone in times lange;
Þe sunne, it knew his setelgange.
21
Þou sete mirkenesses, and made es nighte gode;
In ite sal forthfare alle bestes ofe wode:
22
Lyoun whelpes romiand þat þai reue swa,
And seke fra god mete vnto þa.
23
Sprungen es sunne, and samened ere þai,
And in þar dennes bilouked sal be al dai.
24
Oute sal man ga vnto his werke,
And til his wirkeinge til euen merke.
25
Hou mikeled ere, lauerd, þine werkes; ma
Alle in wisedome made þou þa;
Ilka land fulfilled es ite
With þine aghte thurgh þi wite.
26
Þis see mikel and roume til hende:
Þar wormes ofe whilke es nan ende,
27
Bestes smaller with þe mare.
Þider schippes sal ouerfare;
28
Þis dragoun þat þou made biforn
For to plaie with him in skorn.
Alle, fra þe þai abide
Þat þou gife þam mete in tide.
29
Giueand þe to þam, gedre þai sal;
Þe oppenand þi hand, with-al
Alle sal þai mare and lesse
Be fulfilled with þi godenesse.
30
Þe sothlike turnand þi likam,
Þai sal be dreued; þe gaste ofe þam
Þou salte outbere and wane sal þai,
And in þair duste sal turne for ai.
31
Outsend þi gaste and made þai sal bene,
And new saltou þe face of erthe bidene.
32
Be blis of lauerd in werlde þis;
And faine sal lauerd in werkes his.
33
Þat bihaldes land and to qwake makes ite;
Þat neghes hilles and þai smoke yhite.
34
.I. sal singe to lauerd in mi life for-þi,
.I. sal salme to mi god hou lange am .i..
35
Winsome to him be mi speche al;
.I. sothlike, in lauerd like sal.
36
Wane sinful fra erthe, and wike þat isse,
Swa þat þai noght be. mi saule, lauerd blisse!
