XCV.
[1]
Singes to lauerd a newe sange,
Singes to lauerd alle erthe amange.
2
Singes to lauerd, and his name ye blisse;
Schewes fra dai in dai hele hisse.
3
Bitwix genge his blis schewe ye;
In alle folke þat his wondres be.
4
For mikel lauerd, swith looflike to se;
Aghfulle ouer alle goddes es he;
5
For alle goddes of genge deuelnesses ere þa,
Lauerd sothlike heuens made ma.
6
Schrift in his sighte, and fairenes;
Halines and miklehed in his halihingnes.
7
Bringes to lauerd, genge of contre,
Bringes to lauerd blisse, þate be,
And worschip als-swa; þe same
Bringes to lauerd blisse to his name.
8
Beres offerandes, and ingas in porches his;
Biddes lauerd in porche hali hisse.
9
Stired fra his face alle erthe be;
Þat god riked, in genge sai yhe.
10
For he righted werld, noght stired sal be;
Deme folke in euennes sal he.
11
Faine heuens and [glade] land þisse;
Be stired þe se and fulhed hisse;
Mirthe sal faire feldes ma,
And alle þat euer es in þa.
12
Þan sal glade alle trees of wode
Ofe face of lauerd faire and gode,
For he comes with mikel blis,
For he comes to deme land þis.
13
He sal deme þe werld in euennes,
And þe folke in his sothnes.
