VII.
[1]
Lauerd mi god, sauf me, .I. hoped in þe,
Fra al me filyhand; and lese me;
2
Leswhenne reue [he] als lioune
Saule myne to bring it doune,
While nane es þat bie sal,
Ne whilke saufe þat mas with-al.
3
Lauerd mi god, yife .i. dide þis,
Yife wikednesse in mi hende is,
4
Ife .I. yelde yeldand me iuele, .I. falle
Gilti vnnait fra mi faes alle,
5
Fylegh saule mine þe faa,
Grypes, and fortredes swa
In erthe my life, mi blisse with wa
In duste ledes, þar þai come fra.
6
Vprise, lauerd, in wreth þine,
And vpheue in endes ofe faes myne;
7
And rise, lauerd, in bode þou sente to be;
And kirke ofe folke sal vmgife þe;
8
And for þat, torne vpe in heghte.
Lauerd demes folke righte.
9
Deme me, lauerd, aftir my rightwisenes,
And after ouer me myn vnderandnes.
10
Endede nith ofe sinful be;
And right sal tou rightwise to þe;
Ransakand þair hertes clene
And þair neres, gode, bidene.
11
Mi rightwis helpe fra lauerd in querte,
Þat saufe makes right ofe herte.
12
God rightwise demer, stalworth, and tholand,
Nou wrethes be al dais in land?
13
Bot ye be torned, his swerde schakes he righte;
He bente his bough, and graiþed ite,
14
And in it grayþed he lomes of dede,
His arwes he made to brennand rede.
15
Bihald, he kyneld vnrightwisnesse,
Onfange sorwe and bare wickednesse;
16
Þe slough he opened and it groue he:
And in dyke he felle þat he made to be.
17
His sorwe torne in his heued withalle,
And his wiknes in his scalp doune-falle:
18
.I. sal schriue to lauerd aftir his rightwisnes,
And salme to name ofe lauerd heghist es.
