XCI.
[1]
Gode es to lauerd for to schriue,
And salme to þi heghist name biliue;
2
To schew areli þi mildehertnes,
And bi night þi sothfastnes;
3
In a tenstringed sautre,
With sange in harp and mikel gle.
4
For þou lusted me, lauerd, in þi makinge al,
And in werkes of þi hende glade .i. sal.
5
Hou mikel, lauerd, þine werkes ere þai!
Swyth depe þine thoghtes ere ai.
6
Man vnwise sal knawe noght,
And foele noght vndrestand þese oght.
7
When sinful ere sprungen als hai,
And schewed ere al þat wirke wickenes ai:
8
Þat þai sterue in werld of werld, þis;
And þou, lauerd, heghist in euer is.
9
For loke, lauerd, þine faas alle,
For loke þine faas forworth þai salle,
And to-sprede sal mare and lesse
Þas þat wirken wickenesse.
10
And vphouen als vnicorne sal be mi horn,
And mine elde in merci ofe fulhed þar-forn.
11
And forsegh min egh, lokande,
Þas þat ere mine illewillande,
And riseand in me liþerande
Here sal min ere in ilka lande.
12
Rightwis als palme blome sal he,
Als cedre ofe Yban manifalded be.
13
Set in hous of lauerd, in porches swa
Ofe hous ofe our gode blome sal þa.
14
Yhite felefold in elde ofe fulhed þai sal,
And welequemand be; þat þai schewe with-al:
15
For rightwis lauerd our god he esse,
And in him is noghte wickednesse.
