LXXXIII.
[1]
Hou loued þine teldes bene,
Lauerd of mightes, albidene!
Gernes and wanes mi saule alsswa
In porches of lauerd to ga;
2
Mi hert and mi flesche onhand
Gladed in god liuand.
3
And sothlike ilka sparw
Findes him hous, wide or narw,
And þe turtil to him a neste,
Þar he mai with his briddes reste.
4
Weuedes þine, lauerd of mightes,
Mi kinge and mi god dai and nightes!
5
Seli þat in hous þine won;
In werlde of werldes loue þe þai mon.
6
Seli man of wham es helpe fra þe,
Vpsteghynges in his hert to be
Sete, in dene of teres ma,
In stede whilke he sete swa.
7
Sothlike blissinge giue sal
Lagh-berer; þai sal ga with-al
Fra might in mighte; be seene on-on
God of goddes sal in Syon.
8
Lauerd, god of mightes, here bede of me;
God of Iacob, with eres bise.
9
Oure forhiler, bihald nou,
And in face of þi criste se þou;
10
For better es a dai dwelland
In þi porches, ouer a thousand;
11
.I. ches outcasten forto lin
In þe hous of god is min,
Mare þan forto won with-inne
Teldes of þam þat ere in sinne.
12
For mercy and sothnes loues god alle,
Hap and blis lauerd giue salle.
13
He sal noght schere fra godes þa
In vnderandnes þat ga.
Lauerd god of mightes, blissed be
Þe man þat hopes ai in þe.
