CXXIX. Nowe syng we thys tyme thus:
‘Te deum laudamus.’
1
O endles god of maieste,
On in godhede, in persons thre,
Lorde of all thyng, we knowlege þe:
Te deum laudamus.
2
Angellis of heuen, that be so bryght,
And potestatis so full of myght
Sey vnto the, as itt is ryght:
‘Te deum laudamus.’
3
Cherubyn and seraphyn with loue ardent
Sey vnto the with on assent,
Lorde of vertu omnipotent:
‘Te deum laudamus.’
4
With endles voice they seye to the:
‘Heuyn and erthe, lorde, replete be
With glorie of thy maieste:
Te deum laudamus.’
5
The quere of the apostlys dere
Laudeth the ay with voicis clere,
And thus they sey with louely chere:
‘Te deum laudamus.’
6
The number of the prophetis alsoo
Laudeth the ay with many moo
Seying to the, alpha et .oo.:
‘Te deum laudamus.’
7
The hoste of martirs bright and clere
Laudeth þe, lorde, thatt hast no pere,
And thus they seye to the in fere:
‘Te deum laudamus.’
8
Fadere and sonne and holigost,
Bothe .iij. and .i., of myghtis most,
We knowlege the in euery cost:
Te deum laudamus.