II. Inquit Marie Gabriell:
‘Concipies Emanuel.’
1
The aungell seide of high degree:
‘Haile, full of grace: Crist is with the;
Of alle women blessed thou be!
Concipies Emanuel.’
2
This mayden marveyled in her thought,
How and what wyse this shulde be wrought.
The aungell seyde: ‘Mary, drede nought;
Concipies Emanuel.’
3
‘Drede not,’ he seide, ‘thou mayden myelde;
Thou shalte conceyve and bere a childe
(And be a moder vndefielde),
Cui nomen Emanuel.
4
This childe, that shalle be born of the,
Shall be of grete and high degree
And sonne of god callid shall be,
Cui nomen Emanuel.
5
And god shalle geve hym Dauid see,
And in Iacobes hows reigne shall he;
Of whose kingdome non ende shal be;
Cui nomen Emanuel.
6
To the aungelle this mayden free
Thanne seide: ‘Telle me, how this shal be,
Sith man shall be vnknow of me,
Vt pariam Emanuel.’
7
‘Drede not,’ he seide, that aungell bright;
‘The holygoost in the shalle light,
And thurgh vertu of god almyght
Concipies Emanuel.
8
Elizabeth, thy cosyn, loo,
In here age vj monethes agoo
Hath conceyved a childe alsoo:
Concipies Emanuel.’
9
Magnifiyng god manyfolde:
‘Goddes handemayde,’ she seyde, ‘beholde.
To me be done, as thou hast tolde,
Vt pariam Emanuel.’
