VII. Sancta virgo Maria,
Dei genitrix pia.
1
Haile, perfecte trone of Salamon;
Haile, flore and flease of Gedeon;
Haile, ardent busshe of vision,
Dei genitrix pia.
2
What tyme mankynde hath done amys
And for his mys was put fro blis,
By thy mekenes made free it is,
Dei genitrix pia.
3
As a swete floure berith his odoure,
So hast thou borne oure sauyoure
To bringe mankynde oute of doloure,
Dei genitrix pia.
4
Mankynde was shent and ay forlorne
For synne, that Adam did beforne,
Tille Crist Ihesus of the was borne,
Dei genitrix pia.
5
Hym, that of hevyns not take myght be,
With thy wombe thou haste geve, moost free,
Bothe god and man (thus be-leue we),
Dei genitrix pia.
6
The prophecy is done, no dowte:
A man thou hast geve allabowte,
To whome heven and erth doth lowte,
Dei genitrix pia.
7
O stronge Iudith, o Hester meke,
That the serpentes hede of did streke,
At nede of the conforte we seke,
Dei genitrix pia.
8
Moder and mayde in one persone
Was nevir none, but thou allone;
Wherfore of the Crist made his trone,
Dei genitrix pia.
9
As the sonne beame goth thurgh the glas,
Thurgh thy bodie so did he pas
Taking nature, as his wille was,
Dei genitrix pia.
10
In the is complete the prophecye
Of alle the prophetes by and by,
That seide, a mayde shulde bere Messye,
Dei genitrix pia.
11
O lady free, o quene of blis,
Of thy conforte lete vs not mys,
For why thy name nowe called is
Dei genitrix pia.
12
Lete thy mercy bothe springe and sprede,
Forsake vs not for oure mysdede,
But oute of drede to blis vs lede,
Dei genitrix pia.
