XIX. A Roose hath borne a lilly white,
The whiche floure is moost pure and bright.
1
To this roose aungell Gabriell
Seide: ‘Thou shalt bere Emanuell,
Both god and man with vs to dwell;’
The which floure is most pure and bright.
2
This roose, the prophete Ysaye
Seyde, shulde conceyve and bere Messy
Withouten synne or velonye;
The which flour is moost pure and bright.
3
As the sonne beame goth thurgh the glas,
Thurgh this roose that lilly did pas
To save mankynde, as his wille was;
The whiche floure is moost pure and bright.
4
This roose so myelde aye vndefielde
Hath borne a childe for man so wilde
By fraude begiled, from blis exiled;
The whiche flour is moost pure and bright.
5
This roose so good at the cros stode
With wofull moode, when Crist, oure foode,
Shed his hert bloode for man so woode;
The which flour is moost pure and bright.
6
This swete roose pray bothe nyght and day,
Withoute denay that we come maye
To blis for ay the redy waye;
The which flour is moost pure and bright.
