XLVI. The sone of god alone
Hath made vs free echeone.
1
The faders sonne of heven blis
Of a pure mayde man bicome is
To for-geve man, that did amys,
By his mekenes allone.
2
Bothe yonge and olde we were forlorn
For synne, that Adam did beforne,
Till of a mayde this chielde was born
To make vs fre alone.
3
Moder Mary and virgyne pure
Clothed hym with mortall vesture
And closed hym in her clausure
Of chastite allone.
4
When he was xxx.ti winter olde,
For xxx. plates he was solde
To the Iewes wikked and bolde
By fals Iudas alone.
5
Vpon his hede a crowne of thorne
The Iewes sette than with grete scorne,
And with scourgis his flesshe they torne
For our trespas alone.
6
The Iewes thanne of wikked moode
Nayled his bodye on the roode,
Wheron he shed his precious bloode
To make vs free alone.
7
He was dede and in his graue leyde
And rose ayene, as scripture seide,
On the iij.de daye and to blis steyde,
Both god and man alone.
8
Now beseche we this king of grace,
That we may haue a dwelling place
And euir to see his glorious face
In heven blis echeone.
