CVII. Stella celi, micaris clare;
Regina celi, letare.
1
O quene of blisse, thy son Ihesus,
Quem meruisti portare,
God and man is, we bileue thus:
Regina celi, letare.
2
O lady free, the king of grace,
Quem meruisti portare,
Hath ordeyned the a ioyfull place:
Regina celi, letare.
3
O spowse moost bright, thy son alone,
Quem meruisti portare,
Thy place hath dight next to the trone:
Regina celi, letare.
4
O moder dere of god and man,
Quem meruisti portare,
Thou art more clere, than tunge tell can:
Regina celi, letare.
5
O moder myelde, thy son so good,
Quem meruisti portare,
For man so wielde died on the rode:
Regina celi, letare.
6
O meke of myende, thy son also,
Quem meruisti portare,
Hath brought mankyende fro peyn and woo,
Regina celi, letare.
7
O virgyn pure, as he behight,
Quem meruisti portare,
He rose, full sure, by his grete myght:
Regina celi, letare.
8
O emperesse, that emperoure,
Quem meruisti portare,
In oure distresse he is socoure:
Regina celi, letare.
9
O heuenly sterre, the prince of peas,
Quem meruisti portare,
Oure goostly werre by the doth seace:
Regina celi, letare.
10
For vs thou pray Emanuell,
Quem meruisti portare,
So that we may in heven well:
Regina celi, letare.
