CV. Salue, regina glorie,
Mater misericordie.
1
Hayle, oure lod sterre bothe bright and clere;
Hayle, welle of grace and of pitee;
Hayle, spowse of Criest louely and dere,
Mater misericordie.
2
Hayle, floure of alle virginitee;
Hayle, full of grace: Criest is with the;
Hayle, temple of the trinitee,
Mater misericordie.
3
Hayle, quene of blisse, emperesse of hell;
Hayle, doughter Syon full of beautie;
Hayle, closed gate of Ezechiell,
Mater misericordie.
4
O fragrant rose, o lilly chast,
O violete of puritee,
Thyn ey of grace vpon vs cast,
Mater misericordie.
5
O quene of blisse, o virgyn pure,
For confort we resorte to the;
On vs therfore do thou thy cure,
Mater misericordie.
6
In tyme of nede, bothe grete and small,
For subsidie we calle to the,
And by thy name thus we the call:
‘Mater misericordie.’
7
What tyme mankyende had done amys,
By thy mekenesse it was made free
And brought ayene to heven blisse,
Mater misericordie.
8
As the son beame goth thurgh the glas,
The son of god passed thurgh the
Takyng nature, as his wille was,
Mater misericordie.
9
With the glorie of thy son swete,
O quene of blisse, o lady free,
Heven and erthe bothe be replete,
Mater misericordie.
10
Moder and mayde in one persone
Was neuir noon ne noon shall be,
But thou alone, o heven trone,
Mater misericordie.
11
O lantern of eternall light,
That gave them light, that myght not see,
Cause vs of Criest to haue a sight,
Mater misericordie.
12
O virgyne pure, o quene of blis,
Cause vs to be in blisse with the,
Wherof the ioye eternall is,
Mater misericordie.