CX. O quene of pitee, moder of grace,
In the high citee graunt vs a place.
1
O quene of pitee and of grace,
O swete lady, to thy dere chielde,
That king, that lorde of euery place,
Pray thou for vs, thy seruauntis myelde,
Fro blisse that we be not exiled
For oure offence, trespas and synne,
But that swete place that we may wynne.
2
O princesse of eternall peace,
O lady of aungellis moost bright,
Pray thy dere sonne oure woo to seace
And bring vs fro derkenes to light,
Of hym that we may haue a sight,
That died for vs on the roode tree
And shed his blode to make vs free.
3
O emperesse withouten pere,
O queen also of heven blisse,
Of Criest Ihesu, thy son so dere,
What thou wilt aske, thou shalt not mysse;
For he is thyne, and thou art his.
O swete lady, sith it is soo,
Defende mankyende fro endeles woo.
4
O floure of alle virginitee,
O moder of oure savioure,
O chast bowre of the trinitee,
O virgyne pure moost of honoure,
Be oure comfort, help and socoure,
And vttirly thou not forsake
Mankynde, the which thy son hath take.
5
O gate of lyfe, moder and wyfe,
O hope and trust of synners alle,
In angwishe, woo, trouble and stryfe
For thy comfort we crie and calle,
Bothe olde and yonge, both gret and small;
Therfore oure help and comfort be,
Sith oure trust is onely in the.
6
O louely spowse and paramoure
Of Criest, that is bothe god and man,
Thou hast born chielde without doloure,
And so noon other woman can.
Do thou thy cure, swete lady, than,
Sith thou haast borne the lord of alle,
So that mankyende be not made thralle.
7
O lantern of eternall light,
O myrroure of humilitee,
In whom the holy goost did light
Bicause of thy virginitee,
Kepe mankyende fro captiuitee
And fro that woofull place of helle,
With the fowle fende that it not dwelle.
8
O heuenly sterre most bright and clere
Of alle sterres of hevyn so bright,
O swete lady, oure prayere here
And be oure guyde both day and nyght,
That we may please that king of myght,
So that we may come to that blis,
Wherof the ioye eternall is.
Explicit liber ympnorum et canticorum, quem composuit frater Iacobus Ryman ordinis Minorum ad laudem omnipotentis dei et sanctissime matris eius Marie omniumque sanctorum anno domini millesimo cccc.mo lxxxxij.o
