XIII. Salue, sancta parens
Omni labe carens.
1
O heuenly sterre so clere and bright,
In whome did light the sonne of right;
Wherefore we singe with alle oure myght:
‘Salue, sancta parens’.
2
As the sonne beame goth thurgh the glas,
The sonne of god thurgh the did pas
Taking nature, as his wille was,
Omni labe carens.
3
Whenne Criste, thy sonne, had suffred payne
And rose fro deth to lyfe agayne,
To the he seide and not in vayne:
‘Salue, sancta parens.’
4
As grete peyne tho it was to the
Thyne owne dere sonne in peyn to se,
As vnto hym nayled on tree,
Omni labe carens.
5
But with alle ioye thou were replete,
Whenne thy dere sonne with the did mete
And grette the with thies wordes swete:
‘Salue, sancta parens.’
6
No wonder was, yf thou were gladde
Seyng, for whome thou haddest be sadde,
Thy sonne, of whome alle ioye is hadde,
Omni labe carens.
7
O moder of bothe god and man,
Aftur oure myght and, as we can,
We sey to the, as he seide than:
‘Salue, sancta parens.’
8
Pray Criste, that he vs not forsake,
That benignely of the hath take
Nature mankynde fre forto make,
Omni labe carens.
