CLXIV. Vita, dulcedo et spes
Nostra, Maria, tu es.
1
Perles prynces of euery place,
Of heuen, of erthe, of see, of sonde,
Moder of mercy and of grace,
Helpe thy seruauntys in euery londe.
Oure woo thou sese, oure ioy increse,
Graunt us that pease, that is endlese.
2
Pray thy sone to vnbynde oure bonde
And brynge us owte of care and woo
And defende us with his right honde
And kepe us fro the fende, oure foo.
Oure woo þou sease, oure ioy increse,
Graunt us that pease, that is endlese.
3
Thoughe thatte Adam, oure first parent,
And Eve alsoo haue done offense,
Lete notte mankynde for ay be schent,
Sith thou art quene of indulgence.
Oure woo þou sease, oure ioy increse,
Graunt us that pease, that is endlese.
4
Oure lyffe, oure sweetnes, oure truste alsoo
Thou art only; therfore we calle
Only to the (and to no moo),
Chyldryn of Eve, exyles most thralle.
Oure woo þou sease, oure ioy increse,
Graunt us that pease, that is endlese.
5
Here in this vale of care and woo,
Sith thou art oure mediatrise,
Thyn eyen of mercy, of grace alsoo
Turne thou to us in mercyfull wyse.
Oure woo þou sease, oure joy increse,
Graunt us that pease, that is endlese.
6
O swete Mary most meke and fre,
Thatt blessid fruyte of thy wombe, Ihesus,
After thatte we departyd be
Fro thys exyle, schewe thou to us.
Oure woo þou sease, oure ioy increse,
Graunt us that pease, that is endlese.
7
O sweete lady, atte domys day,
When the false fende schalle us accuse,
For us vnto thy sone thou pray,
For syn thatte he us notte refuse.
Oure woo þou sease, oure ioy increse,
Graunt us that pease, that is endlese.
8
Lete notte the fende with alle his fraude
Brynge us to payn and endles woo,
Butte thatte to god we may gyff laude
In blysse with the and many moo.
Oure woo þou sease, oure ioy increse,
Graunt us that pease, that is endlese.
