CI. Mary so myelde of hert and myende
Hath borne a childe to save mankyende.
1
Mary so myelde and good of fame
By vertu of the holygoost
Hath borne a chielde, Ihesus by name,
To save mankyende, the whiche was lost.
2
Marie so myelde in hert and myende,
As Gabriell to her behight,
Hath borne a chielde to save mankyende,
The son of god and king of myght.
3
Marie so myelde, that quene of grace,
Hath borne a chielde (scripture seith soo)
To bringe mankyende out of that place,
Where is bothe peyne and endeles woo.
4
Mary so myelde in worde and thought
Hath borne a chielde, Ihesus soo good,
The whiche ayene mankyende hath bought
On the roode tree with his hert bloode.
5
Mary so myelde in dede and wille
Hath borne a chielde, that made alle thing,
To whom althing obeyeth by skille,
As to theire prince, theire lorde and king.
6
Mary so myelde, so pure and clene
Vnto hir chielde, that hath no pere,
By hir mekenes she is a meane,
That we shalle come to heven quere.
7
Mary so myelde, moder and may,
Hath borne a chielde by hir mekenesse,
That shall bringe vs at domes day
Fro thraldom, peyn, woo and distresse.
8
Pray we to hym with worde and thought,
That myelde Marie now furth hath brought,
Whose infinite goodenesse may nought
Esse seca.
