LXI. A sterre shone bright on xij day
Ouer that place, where Ihesus lay.
1
On xij.the day this sterre so clere
Brought kingis iij oute of the eest
Vnto that king, that hath no pere,
In Betheleem Iude, where he did rest.
This sterre that day tho went away
Fro that swete place, where Ihesus lay.
2
Bothe golde, encense and swete myrre thoo
Alle thre they gave vnto that chielde,
The whiche is god and man alsoo
Borne of a virgyne vndefielde.
This sterre that day tho went away
Fro that swete place, where Ihesus lay.
3
For he was king of mageste,
They gave hym golde with grete reuerence.
For he was god in persones thre,
Mekely to hym they gave encense.
This sterre that day tho went away
Fro that swete place, where Ihesus lay.
4
For he was man, they gave hym than
Mirre in token, that he shulde dye
And be buried for synfull man
And arise ayene and to blis stye.
This sterre that day tho went away
Fro that swete place, where Ihesus lay.
5
Whenne theire offring alle thre had made
To Crist, that king and lorde of alle,
Right sone the sterre away did fade,
That brightly shone ouer that halle.
This sterre that day tho went away
Fro that swete place, where Ihesus lay.
6
As they were goyng in theire way,
They mette Herode, that mody king:
He bade them wite, where that chield lay,
And come by hym and worde hym bring.
This sterre that daye tho went away
Fro that swete place, where Ihesus lay.
7
King Herode fayne wolde them haue slayne,
But they were warned on a nyght,
They shulde not goo by hym agayne,
By an aungell bothe faire and bright.
This sterre that day tho went away
Fro that swete place, where Ihesus lay.
8
They were full glad, and, as he badde,
They be gone home another way,
And king Herode was wrothe and sadde,
That he of them had lost his pray.
This sterre that day tho went away
Fro that swete place, where Ihesus lay.
9
Into Egipte Ioseph thoo fledde
With the moder and with the chielde,
Where they abode, till he was dedde,
And of his wille he was begiled.
This sterre that day tho went away
Fro that swete place, where Ihesus lay.
10
Kyng Herode thanne in his grete wreth
Seyng of them his purpose lorne
Infantis full yonge he put to deth
Thurgh alle Betheleem, that tho were borne.
This sterre that daye tho went away
Fro that swete place, where Ihesus lay.
11
Thanne, as the prophete Ysay
Had prophesied long tyme before,
A voice was hurde in blisse an hye
Of grete weping and wayling sore.
This sterre that day tho went away
Fro that swete place, where Ihesus lay.
12
Honoure to Criste, that now was borne,
As prophecy had saide before,
To save mankyende, that was forlorne,
And to his blisse for to restore.
This sterre that day tho went away
Fro that swete place, where Ihesus lay.
