CLVI. Sancta Maria, ora pro nobis.
1
O tryclyn of the trinite
Replete with alle diuinite,
O flowre of alle uirginite,
Ora pro nobis.
2
O blessid quene of heuen blys,
Wheroff the ioye eternalle is,
Of the whiche blis thatte we not mys,
Ora pro nobis.
3
O emperesse of helle alsoo,
Into thatte place thatt we not goo,
Where is derkenes and endles woo,
Ora pro nobis.
4
O spowsesse of Crist, oure sauyowre,
The whiche restyd in thy chast bowre,
Thatte he kepe us fro alle dolowre,
Ora pro nobis.
5
O sweete lady so meke and mylde,
Vnto Ihesu, thy blessid chylde,
Fro blysse thatt we be notte exylde,
Ora pro nobis.
6
Holy moder of Crist Ihesu,
Thatte is the lorde of alle vertu,
Thatte he with grace may us renu,
Ora pro nobis.
7
Holy virgyn of virgyns alle,
Thatt thy sweete sone Ihesus may calle
Vs vnto hym, bothe grete and smalle,
Ora pro nobis.
8
Thatte we, whiche be terrestrialle,
May leve this lyff so bestialle
And come to blysse celestialle,
Ora pro nobis.