University of Virginia Library

Dauid wæs haten diormod hæleð,
Israela brega, æðelæ and rice,
cyninga cynost, Criste liofost.
Wæs he under hiofenum hearpera mærost
ðara we an folcum gefrigen hæbben.
Sangere he wæs soðfæstest, swiðe geðancol
to ðingienne þiodum sinum
wið þane mildostan manna sceppend.
Wæs se dryhtnes ðiowa Dauid æt wige
soð sigecempa, searocyne man,
casere creaftig, þonne cumbulgebrec
on gewinndagum weorðan scoldan.
Hwȩðere him geiode, swa ful oft gedeð
þætte godferhte gylt gefræmmað
þurh lichaman lene geðohtas.
Gelamp þæt him mon ansende saula neriend,
witgan mid wordum, weorada dominus,
and secgan het, selfum gecyðan
ymb his womdeda waldendes doom,
þæt se fruma wære his feores sceldig,
for ðam þe he Uriam het aldre beneman,
fromne ferdrinc fere beserode,
and him Bezabe brohte to wife
for gitsunga, þe he godes eorre
þurh his selfes weorc sona anfunde.
Him ða ðingode þioda aldor,
Dauid georne, and to dryhtne gebæd,
and his synna hord selfa ontende,
gyltas georne gode andhette,
weoruda dryhtne, and ðus wordum spæc:

“Miltsa ðu me, meahta walden, nu ðu wast manna geðohtas,
help ðu, hælend min, handgeweorces
þines anes, ælmehtig god,
efter þinre ðære miclan mildhiortnesse.

Ond eac efter menio miltsa ðinra,
dryhten weoruda, adilga min unriht
to forgefenesse gaste minum.

Aðweah me of sennum, saule fram wammum,
gasta sceppend, geltas geclansa,
þa ðe ic on aldre æfre gefremede
ðurh lichaman leðre geðohtas.

Forðan ic unriht min eal oncnawe,
and eac synna gehwær selfum æt eagan,
firendeda geðrec beforan standeð,
scelda scinað; forgef me, sceppen min,
lifes liohtfruma, ðinre lufan blisse.

Nu ic anum ðe oft syngode,
and yfela feola eac gefræmede,
gelta gramhegdig, ic ðe, gasta breogo,
helende Crist, helpe bidde,
ðæt me forgefene gastes wunde
an forðgesceaft feran mote,
þy ðine wordcwidas weorðan gefelde,
ðæt ðu ne wilnast weora æniges deað;
ac ðu synfulle simle lærdes
ðæt hio cerrende Criste herdon
and hiom lif mid ðe langsum begȩton,
swilce ðu æt dome, dryhten, oferswiðdest
ealra synna cynn, saula neriend.

Ic on unrihtum eac ðan in synnum
geeacnod wæs. Ðu ðæt ana wast,
mæhtig dryhten, hu me modor gebær
in scame and in sceldum; forgef me, sceppend min,
ðæt ic fram ðæm synnum selfa gecerre,
þa ðe mine ældran ær geworhtan
and ic selfa eac sioððan beeode.

Ac ðu, selua god, soð an lufast;
þy ic ðe mid benum biddan wille
lifes and lisse, liohtes aldor,
forðan ðu me uncuðe eac ðan derne
þinre snetera hord selfa ontendes.

Ðu me, meahtig god, milde and bliðe
þurh ysopon ealne ahluttra,
þonne ic geclænsod Criste hero,
and eac ofer snawe self scinende
þinre sibbe lufan sona gemete.

Ontyn nu, elmehtig, earna hleoðor,
þæt min gehernes hehtful weorðe
on gefean bliðse forðweard to ðe;
ðanne bioð on wenne, waldend, simle
þa gebrocenan ban, bilwit dominus,
ða þe on hænðum ær hwile wæron.

Ahwerf nu fram synnum, saula neriend,
and fram misdedum minra gylta
þine ansione, ælmeahtig god,
and ðurh miltsunga meahta þinra
ðu unriht min eall adilga.

Æc ðu, dryhten Crist, clȩne hiortan
in me, mehtig god, modswiðne geðanc
to ðolienne ðinne willan
and to healdenne halige domas,
and ðu rihtne gast, rodera waldend,
in ferðe minum feste geniowa.

Ne aweorp ðu me, weoruda dryhten,
fram ansione ealra þinra miltsa,
ne ðane godan fram me gast haligne
aferre, domine, frea ælmeahtig,
þinra arna me eal ne bescerwe.

Sæle nu bliðse me, bilewit dominus,
þinre hælo heht, helm alwihta,
and me, lifgende liohtes hiorde,
gaste ðine, god selfa, getreme,
ðæt ic aldorlice a forð sioððan
to ðinum willan weorðan mote.

Simle ic ðine weogas wanhogan lærde,
ðæt hio arlease eft gecerdan
to hiora selfra saula hiorde,
god selfa, to ðe gastes mundberd
ðurh sibbe lufan seocan scoldan.

Befreo me an ferðe, fæder mancynnes,
fram blodgete and bealaniðum,
god lifigende, gylta geclansa,
helo and helpend, hiofenrices weard;
ðanne tunge min triowfest blissað
for ðines selfes soðfestnesse.

Ontyn nu, waldend god, weoloras mine;
swa min muð sioððan mæhte ðine
and lof georne liodum to bliðse,
soð sigedryhten, secgende wæs.

Ic ðe onsegednesse sona brohte,
weoruda dryhtne, ðer ðu wolde swa,
ða ðu þæt ne lufedest, lifes bretta,
ðæt ic ðe bernelac brengan moste
deadra neata, dryhtne to willan.

Ac ðe micle ma, mehtig dryhten,
lifiende Crist, liicwerðe bið
se gehnysta gast, hiorte geclansod
and geeadmeded ingeþancum;
ða ðu, ælmæhtig, æfre ne æwest.

Gedoo nu fræmsume frofre ðine
to ðinum godan gastes willan,
ðætte Sione dun sigefest weorðe,
and weallas Sion wynfȩste getremed,
Hierusolimȩ, god lifiende.

Swa þu, frea meahtig, anfehst siþðan
liofwende lac lioda þinra,
hælend manna; hio ðæt halige cealf
on wigbed þin willum asettað,
liohtes aldor. Forgef me, lifigende
meotod mancynnes, mæhtig dominus,
ðæt ða sorhfullan saule wunde,
þa ðe ic on ælde uel on giogeðe
in flæschaman gefrȩmed hæbbe
leahtra hegeleasra, mid lufan þinre
gastæ forgeofene glidan mote.”

Swæ þingode þiode aldor,
Dauid to dryhtne, deda gemyndig,
þæt hine mȩhtig god mannum to frofre
ðæs cynedomes, Crist neriende,
waldende god, weorðne munde.
Forðon he gebette balaniða hord
mid eaðmede ingeþance,
ða ðe he on ferðe gefrȩmed hæfde,
gastes wunde. Forgef us, god mæahtig,
þæt we synna hord simle oferwinnan
and us geearnian æce dreamas
an lifigendra landes wenne.