万葉集 (Manyoshu) :: :: University of Virginia Library

[原文]牽牛者織女等天地之別時<由> 伊奈宇之呂河向立 <思>空不安久尓嘆空不安久尓青浪尓望者多要奴白雲尓な者盡奴如是耳也伊伎都枳乎良牟如是耳也戀都追安良牟佐丹塗之小船毛賀茂玉纒之真可伊毛我母 [一云小棹毛何毛] 朝奈藝尓伊可伎渡夕塩尓 [一云夕倍尓毛] 伊許藝渡久方之天河原尓天飛也領巾可多思吉真玉手乃玉手指更餘宿毛寐而師可聞 [一云伊毛左祢而師加] 秋尓安良受登母 [一云秋不待登毛]

[訓読]彦星は織女と天地の別れし時ゆいなうしろ川に向き立ち思ふそら安けなくに嘆くそら安けなくに青波に望みは絶えぬ白雲に涙は尽きぬかくのみや息づき居らむかくのみや恋ひつつあらむさ丹塗りの小舟もがも玉巻きの真櫂もがも [一云小棹もがも] 朝なぎにい掻き渡り夕潮に [一云夕にも] い漕ぎ渡り久方の天の川原に天飛ぶや領巾片敷き真玉手の玉手さし交へあまた夜も寐ねてしかも [一云寐もさ寝てしか] 秋にあらずとも [一云秋待たずとも]

[仮名],ひこほしは,たなばたつめと,あめつちの,わかれしときゆ,いなうしろ,かはにむきたち,おもふそら,やすけなくに,なげくそら,やすけなくに,あをなみに,のぞみはたえぬ,しらくもに,なみたはつきぬ,かくのみや,いきづきをらむ,かくのみや,こひつつあらむ,さにぬりの,をぶねもがも,たままきの,まかいもがも,[をさをもがも],あさなぎに,いかきわたり,ゆふしほに,[ゆふべにも],いこぎわたり,ひさかたの,あまのかはらに,あまとぶや,ひれかたしき,またまでの,たまでさしかへ,あまたよも,いねてしかも,[いもさねてしか],あきにあらずとも,[あきまたずとも]

[_]

[左注]（右天平元年七月七日夜憶良仰觀天河 [一云帥家作]）

[_]

[校異]雨 → 由 [西（訂正右書）][類][紀][細] / 宇 [童蒙抄]（塙）牟 / 意 → 思 [類][紀][温]

[_]

[ＫＷ],秋雑歌,作者：山上憶良,七夕

1521

[題詞]（山上<臣>憶良七夕歌十二首）反歌

[原文]風雲者二岸尓可欲倍杼母吾遠嬬之 [一云波之嬬乃] 事曽不通

[訓読]風雲は二つの岸に通へども我が遠妻の [一云愛し妻の] 言ぞ通はぬ

[仮名],かぜくもは,ふたつのきしに,かよへども,わがとほづまの[はしつまの],ことぞかよはぬ

[_]

[左注]（右天平元年七月七日夜憶良仰觀天河 [一云帥家作]）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：山上憶良,七夕

1522

[題詞]（山上<臣>憶良七夕歌十二首）

[原文]多夫手二毛投越都倍<吉> 天漢敝太而礼婆可母安麻多須辨奈吉

[訓読]たぶてにも投げ越しつべき天の川隔てればかもあまたすべなき

[仮名],たぶてにも,なげこしつべき,あまのがは,へだてればかも,あまたすべなき

[_]

[左注]右天平元年七月七日夜憶良仰觀天河 [一云帥家作]

[_]

[校異]伎 → 吉 [類][紀]

[_]

[ＫＷ],秋雑歌,作者：山上憶良,七夕

1523

[題詞]（山上<臣>憶良七夕歌十二首）

[原文]秋風之吹尓之日従何時可登吾待戀之君曽来座流

[訓読]秋風の吹きにし日よりいつしかと我が待ち恋ひし君ぞ来ませる

[仮名],あきかぜの,ふきにしひより,いつしかと,あがまちこひし,きみぞきませる

[_]

[左注]（右天平二年七月八日夜帥家集會）

[_]

[校異]

[_]

[ＫＷ],秋雑歌,作者：山上憶良,七夕

1524

[題詞]（山上<臣>憶良七夕歌十二首）

[原文]天漢伊刀河浪者多々祢杼母伺候難之近此瀬呼

[訓読]天の川いと川波は立たねどもさもらひかたし近きこの瀬を

[仮名],あまのがは,いとかはなみは,たたねども,さもらひかたし,ちかきこのせを

[_]

[左注]（右天平二年七月八日夜帥家集會）

[_]

[校異]

[_]

[ＫＷ],秋雑歌,作者：山上憶良,七夕

1525

[題詞]（山上<臣>憶良七夕歌十二首）

[原文]袖振者見毛可波之都倍久雖近度為便無秋西安良祢波

[訓読]袖振らば見も交しつべく近けども渡るすべなし秋にしあらねば

[仮名],そでふらば,みもかはしつべく,ちかけども,わたるすべなし,あきにしあらねば

[_]

[左注]（右天平二年七月八日夜帥家集會）

[_]

[校異]

[_]

[ＫＷ],秋雑歌,作者：山上憶良,七夕

1526

[題詞]（山上<臣>憶良七夕歌十二首）

[原文]玉蜻蜒髣髴所見而別去者毛等奈也戀牟相時麻而波

[訓読]玉かぎるほのかに見えて別れなばもとなや恋ひむ逢ふ時までは

[仮名],たまかぎる,ほのかにみえて,わかれなば,もとなやこひむ,あふときまでは

[_]

[左注]右天平二年七月八日夜帥家集會

[_]

[校異]

[_]

[ＫＷ],秋雑歌,作者：山上憶良,七夕

1527

[題詞]（山上<臣>憶良七夕歌十二首）

[原文]牽牛之迎嬬船己藝出良之 <天>漢原尓霧之立波

[訓読]彦星の妻迎へ舟漕ぎ出らし天の川原に霧の立てるは

[仮名],ひこほしの,つまむかへぶね,こぎづらし,あまのかはらに,きりのたてるは

[_]

[左注]

[_]

[校異]<> → 天 [類][紀]

[_]

[ＫＷ],秋雑歌,作者：山上憶良,七夕

1528

[題詞]（山上<臣>憶良七夕歌十二首）

[原文]霞立天河原尓待君登伊徃<還>尓裳襴所沾

[訓読]霞立つ天の川原に君待つとい行き帰るに裳の裾濡れぬ

[仮名],かすみたつ,あまのかはらに,きみまつと,いゆきかへるに,ものすそぬれぬ

[_]

[左注]

[_]

[校異]還程 → 還 [類][紀]

[_]

[ＫＷ],秋雑歌,作者：山上憶良,七夕

1529

[題詞]（山上<臣>憶良七夕歌十二首）

[原文]天河浮津之浪音佐和久奈里吾待君思舟出為良之母

[訓読]天の川浮津の波音騒くなり我が待つ君し舟出すらしも

[仮名],あまのがは,うきつのなみおと,さわくなり,わがまつきみし,ふなですらしも

[_]

[左注]

[_]

[校異]

[_]

[ＫＷ],秋雑歌,作者：山上憶良,七夕

1530

[題詞]大宰諸卿大夫并官人等宴筑前國蘆城驛家歌二首

[原文]娘部思秋芽子交蘆城野今日乎始而萬代尓将見

[訓読]をみなへし秋萩交る蘆城の野今日を始めて万世に見む

[仮名],をみなへし,あきはぎまじる,あしきのの,けふをはじめて,よろづよにみむ

[_]

[左注]（右二首作者未詳）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,福岡県,太宰府,宴席,土地讃美,地名,植物

1531

[題詞]（大宰諸卿大夫并官人等宴筑前國蘆城驛家歌二首）

[原文]珠匣葦木乃河乎今日見者迄萬代将忘八方

[訓読]玉櫛笥蘆城の川を今日見ては万代までに忘らえめやも

[仮名],たまくしげ,あしきのかはを,けふみては,よろづよまでに,わすらえめやも

[_]

[左注]右二首作者未詳

[_]

[校異]

[_]

[ＫＷ],秋雑歌,福岡県,太宰府,宴席,土地讃美,枕詞,地名

1532

[題詞]笠朝臣金村伊香山作歌二首

[原文]草枕客行人毛徃觸者尓保比奴倍久毛開流芽子香聞

[訓読]草枕旅行く人も行き触ればにほひぬべくも咲ける萩かも

[仮名],くさまくら,たびゆくひとも,ゆきふれば,にほひぬべくも,さけるはぎかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：笠金村,滋賀県,塩津,羈旅,土地讃美,枕詞,植物

1533

[題詞]（笠朝臣金村伊香山作歌二首）

[原文]伊香山野邊尓開有芽子見者公之家有尾花之所念

[訓読]伊香山野辺に咲きたる萩見れば君が家なる尾花し思ほゆ

[仮名],いかごやま,のへにさきたる,はぎみれば,きみがいへなる,をばなしおもほゆ

[_]

[左注]

[_]

[校異]

[_]

[ＫＷ],秋雑歌,作者：笠金村,滋賀県,塩津,羈旅,望郷,地名,植物

1534

[題詞]石川朝臣老夫歌一首

[原文]娘部志秋芽子折礼玉桙乃道去Ｌ跡為乞兒

[訓読]をみなへし秋萩折れれ玉桙の道行きづとと乞はむ子がため

[仮名],をみなへし,あきはぎをれれ,たまほこの,みちゆきづとと,こはむこがため

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：石川老夫,旅みやげ,植物

1535

[題詞]藤原宇合卿歌一首

[原文]我背兒乎何時曽且今登待苗尓於毛也者将見秋風吹

[訓読]我が背子をいつぞ今かと待つなへに面やは見えむ秋の風吹く

[仮名],わがせこを,いつぞいまかと,まつなへに,おもやはみえむ,あきのかぜふく

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：藤原宇合,女歌,宴席

1536

[題詞]縁達帥歌一首

[原文]暮相而朝面羞隠野乃芽子者散去寸黄葉早續也

[訓読]宵に逢ひて朝面なみ名張野の萩は散りにき黄葉早継げ

[仮名],よひにあひて,あしたおもなみ,なばりのの,はぎはちりにき,もみちはやつげ

[_]

[左注]

[_]

[校異]謌 [温][矢][京] 歌

[_]

[ＫＷ],秋雑歌,作者：縁達帥,三重県,名張,羈旅,序詞,植物

1537

[題詞]山上<臣>憶良詠秋野花<歌>二首

[原文]秋野尓咲有花乎指折可伎數者七種花 [其一]

[訓読]秋の野に咲きたる花を指折りかき数ふれば七種の花 [其一]

[仮名],あきののに,さきたるはなを,およびをり,かきかぞふれば,ななくさのはな

[_]

[左注]

[_]

[校異]巨 → 臣 [紀][細][温] / <> → 歌 [類][矢][京]

[_]

[ＫＷ],秋雑歌,作者：山上憶良,詠物詩,植物

1538

[題詞]（山上<臣>憶良詠秋野花<歌>二首）

[原文]芽之花乎花葛花瞿麦之花姫部志又藤袴朝皃之花 [其二]

[訓読]萩の花尾花葛花なでしこの花をみなへしまた藤袴朝顔の花 [其二]

[仮名],はぎのはな,をばなくずはな,なでしこのはな,をみなへし,またふぢはかま,あさがほのはな

[_]

[左注]

[_]

[校異]

[_]

[ＫＷ],秋雑歌,作者：山上憶良,秋七草,詠物歌,植物

1539

[題詞]天皇御製歌二首

[原文]秋<田>乃穂田乎鴈之鳴闇尓夜之穂杼呂尓毛鳴渡可聞

[訓読]秋の田の穂田を雁がね暗けくに夜のほどろにも鳴き渡るかも

[仮名],あきのたの,ほたをかりがね,くらけくに,よのほどろにも,なきわたるかも

[_]

[左注]

[_]

[校異]歌 [西] 謌 [西（訂正）] 歌 / 日 → 田 [矢][京]

[_]

[ＫＷ],秋雑歌,作者：聖武天皇,動物,季節,叙景

1540

[題詞]（天皇御製歌二首）

[原文]今朝乃旦開鴈鳴寒聞之奈倍野邊能淺茅曽色付丹来

[訓読]今朝の朝明雁が音寒く聞きしなへ野辺の浅茅ぞ色づきにける

[仮名],けさのあさけ,かりがねさむく,ききしなへ,のへのあさぢぞ,いろづきにける

[_]

[左注]

[_]

[校異]

[_]

[ＫＷ],秋雑歌,作者：聖武天皇,動物,季節

1541

[題詞]大宰帥大伴卿歌二首

[原文]吾岳尓棹<壮>鹿来鳴先芽之花嬬問尓来鳴棹<壮>鹿

[訓読]我が岡にさを鹿来鳴く初萩の花妻どひに来鳴くさを鹿

[仮名],わがをかに,さをしかきなく,はつはぎの,はなつまどひに,きなくさをしか

[_]

[左注]

[_]

[校異]歌 [西] 謌 [西（訂正）] 歌 / 牡 → 壮 [定本] / 牡 → 壮 [定本]

[_]

[ＫＷ],秋雑歌,作者：大伴旅人,太宰府,植物,動物

1542

[題詞]（大宰帥大伴卿歌二首）

[原文]吾岳之秋芽花風乎痛可落成将見人裳欲得

[訓読]我が岡の秋萩の花風をいたみ散るべくなりぬ見む人もがも

[仮名],わがをかの,あきはぎのはな,かぜをいたみ,ちるべくなりぬ,みむひともがも

[_]

[左注]

[_]

[校異]

[_]

[ＫＷ],秋雑歌,作者：大伴旅人,太宰府,植物,恋情

1543

[題詞]三原王歌一首

[原文]秋露者移尓有家里水鳥乃青羽乃山能色付見者

[訓読]秋の露は移しにありけり水鳥の青葉の山の色づく見れば

[仮名],あきのつゆは,うつしにありけり,みづどりの,あをばのやまの,いろづくみれば

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：三原王,季節

1544

[題詞]湯原王七夕歌二首

[原文]牽牛之念座良武従情見吾辛苦夜之更降去者

[訓読]彦星の思ひますらむ心より見る我れ苦し夜の更けゆけば

[仮名],ひこほしの,おもひますらむ,こころより,みるわれくるし,よのふけゆけば

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：湯原王,七夕

1545

[題詞]（湯原王七夕歌二首）

[原文]織女之袖續三更之五更者河瀬之鶴者不鳴友吉

[訓読]織女の袖継ぐ宵の暁は川瀬の鶴は鳴かずともよし

[仮名],たなばたの,そでつぐよひの,あかときは,かはせのたづは,なかずともよし

[_]

[左注]

[_]

[校異]

[_]

[ＫＷ],秋雑歌,作者：湯原王,七夕

1546

[題詞]市原王七夕歌一首

[原文]妹許登吾去道乃河有者附目緘結跡夜更降家類

[訓読]妹がりと我が行く道の川しあればつくめ結ぶと夜ぞ更けにける

[仮名],いもがりと,わがゆくみちの,かはしあれば,つくめむすぶと,よぞふけにける

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：市原王,七夕

1547

[題詞]藤原朝臣八束歌一首

[原文]棹四香能芽二貫置有露之白珠相佐和仁誰人可毛手尓将巻知布

[訓読]さを鹿の萩に貫き置ける露の白玉あふさわに誰れの人かも手に巻かむちふ

[仮名],さをしかの,はぎにぬきおける,つゆのしらたま,あふさわに,たれのひとかも,てにまかむちふ

[_]

[左注]

[_]

[校異]

[_]

[ＫＷ],秋雑歌,作者：藤原八束,旋頭歌,比喩,恋歌,動物

1548

[題詞]大伴坂上郎女晩芽子歌一首

[原文]咲花毛 <乎曽>呂波Ｑ奥手有長意尓尚不如家里

[訓読]咲く花もをそろはいとはしおくてなる長き心になほしかずけり

[仮名],さくはなも,をそろはいとはし,おくてなる,ながきこころに,なほしかずけり

[_]

[左注]

[_]

[校異]歌 [西] 謌 [西（訂正）] 歌 / 宇都 → 乎曽 [類][紀]

[_]

[ＫＷ],秋雑歌,作者：坂上郎女,比喩,恋歌

1549

[題詞]典鑄正紀朝臣鹿人至衛門大尉大伴宿祢稲公跡見庄作歌一首

[原文]射目立而跡見乃岳邊之瞿麦花總手折吾者将去寧樂人之為

[訓読]射目立てて跡見の岡辺のなでしこの花ふさ手折り我れは持ちて行く奈良人のため

[仮名],いめたてて,とみのをかへの,なでしこのはな,ふさたをり,われはもちてゆく,ならひとのため

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：紀鹿人,大伴稲公,奈良県,桜井市,みやげ,別れ歌,地名,植物,旋頭歌

1550

[題詞]湯原王鳴鹿歌一首

[原文]秋芽之落乃乱尓呼立而鳴奈流鹿之音遥者

[訓読]秋萩の散りの乱ひに呼びたてて鳴くなる鹿の声の遥けさ

[仮名],あきはぎの,ちりのまがひに,よびたてて,なくなるしかの,こゑのはるけさ

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：湯原王,植物,動物,叙景

1551

[題詞]市原王歌一首

[原文]待時而落<鍾>礼能 <雨>零収開朝香山之将黄變

[訓読]時待ちて降れるしぐれの雨やみぬ明けむ朝か山のもみたむ

[仮名],ときまちて,ふれるしぐれの,あめやみぬ,あけむあしたか,やまのもみたむ

[_]

[左注]

[_]

[校異]歌 [西] 謌 [西（訂正）] 歌 / 鐘 → 鍾 [類][温][矢] / 雨令 → 雨 [万葉集新考]

[_]

[ＫＷ],秋雑歌,作者：市原王,季節

1552

[題詞]湯原王蟋蟀歌一首

[原文]暮月夜心毛思努尓白露乃置此庭尓蟋蟀鳴毛

[訓読]夕月夜心もしのに白露の置くこの庭にこほろぎ鳴くも

[仮名],ゆふづくよ,こころもしのに,しらつゆの,おくこのにはに,こほろぎなくも

[_]

[左注]

[_]

[校異]

[_]

[ＫＷ],秋雑歌,作者：湯原王,動物,季節,叙景

1553

[題詞]衛門大尉大伴宿祢稲公歌一首

[原文]<鍾>礼能雨無間零者三笠山木末歴色附尓家里

[訓読]時雨の雨間なくし降れば御笠山木末あまねく色づきにけり

[仮名],しぐれのあめ,まなくしふれば,みかさやま,こぬれあまねく,いろづきにけり

[_]

[左注]

[_]

[校異]歌 [西] 謌 [西（訂正）] 歌 / 鐘 → 鍾 [類]

[_]

[ＫＷ],秋雑歌,作者：大伴稲公,奈良,地名,季節

1554

[題詞]大伴家持和歌一首

[原文]皇之御笠乃山能秋黄葉今日之<鍾>礼尓散香過奈牟

[訓読]大君の御笠の山の黄葉は今日の時雨に散りか過ぎなむ

[仮名],おほきみの,みかさのやまの,もみちばは,けふのしぐれに,ちりかすぎなむ

[_]

[左注]

[_]

[校異]歌 [西] 謌 [西（訂正）] 歌 / 鐘 → 鍾 [類]

[_]

[ＫＷ],秋雑歌,作者：大伴家持,奈良,地名,植物

1555

[題詞]安貴王歌一首

[原文]秋立而幾日毛不有者此宿流朝開之風者手本寒母

[訓読]秋立ちて幾日もあらねばこの寝ぬる朝明の風は手本寒しも

[仮名],あきたちて,いくかもあらねば,このねぬる,あさけのかぜは,たもとさむしも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：安貴王,季節,恋情

1556

[題詞]忌部首黒麻呂歌一首

[原文]秋田苅借蘆毛未壊者鴈鳴寒霜毛置奴我二

[訓読]秋田刈る刈廬もいまだ壊たねば雁が音寒し霜も置きぬがに

[仮名],あきたかる,かりいほもいまだ,こほたねば,かりがねさむし,しももおきぬがに

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：忌部黒麻呂,動物,季節

1557

[題詞]故郷豊浦寺之尼私房宴歌三首

[原文]明日香河逝廻<丘>之秋芽<子>者今日零雨尓落香過奈牟

[訓読]明日香川行き廻る岡の秋萩は今日降る雨に散りか過ぎなむ

[仮名],あすかがは,ゆきみるをかの,あきはぎは,けふふるあめに,ちりかすぎなむ

[_]

[左注]右一首丹比真人國人

[_]

[校異]歌 [西] 謌 [西（訂正）] 歌 → 謌 / 岳 → 丘 [類][紀] / <> → 子 [類][紀][温]

[_]

[ＫＷ],秋雑歌,作者：丹比国人,飛鳥,宴席,豊浦寺,尼,地名,植物,季節

1558

[題詞]（故郷豊浦寺之尼私房宴歌三首）

[原文]鶉鳴古郷之秋芽子乎思人共相見都流可聞

[訓読]鶉鳴く古りにし里の秋萩を思ふ人どち相見つるかも

[仮名],うづらなく,ふりにしさとの,あきはぎを,おもふひとどち,あひみつるかも

[_]

[左注]（右二首沙弥尼等）

[_]

[校異]

[_]

[ＫＷ],秋雑歌,作者：沙弥尼,飛鳥,宴席,豊浦寺,動物,植物

1559

[題詞]（故郷豊浦寺之尼私房宴歌三首）

[原文]秋芽子者盛過乎徒尓頭刺不挿還去牟跡哉

[訓読]秋萩は盛り過ぐるをいたづらにかざしに挿さず帰りなむとや

[仮名],あきはぎは,さかりすぐるを,いたづらに,かざしにささず,かへりなむとや

[_]

[左注]右二首沙弥尼等

[_]

[校異]

[_]

[ＫＷ],秋雑歌,作者：沙弥尼,飛鳥,宴席,豊浦寺,植物

1560

[題詞]大伴坂上郎女跡見田庄作歌二首

[原文]妹目乎始見之埼乃秋芽子者此月其呂波落許須莫湯目

[訓読]妹が目を始見の崎の秋萩はこの月ごろは散りこすなゆめ

[仮名],いもがめを,**みのさきの,あきはぎは,このつきごろは,ちりこすなゆめ

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：坂上郎女,奈良県,桜井市,植物

1561

[題詞]（大伴坂上郎女跡見田庄作歌二首）

[原文]吉名張乃猪養山尓伏鹿之嬬呼音乎聞之登聞思佐

[訓読]吉隠の猪養の山に伏す鹿の妻呼ぶ声を聞くが羨しさ

[仮名],よなばりの,ゐかひのやまに,ふすしかの,つまよぶこゑを,きくがともしさ

[_]

[左注]

[_]

[校異]聞 [類][紀]（塙）門

[_]

[ＫＷ],秋雑歌,作者：坂上郎女,奈良県,桜井市,地名,動物

1562

[題詞]巫部麻蘇娘子鴈歌一首

[原文]誰聞都従此間鳴渡鴈鳴乃嬬呼音乃 <乏>知<在><乎>

[訓読]誰れ聞きつこゆ鳴き渡る雁がねの妻呼ぶ声の羨しくもあるか

[仮名],たれききつ,こゆなきわたる,かりがねの,つまよぶこゑの,ともしくもあるか

[_]

[左注]

[_]

[校異]歌 [西] 謌 [西（訂正）] 歌 / 之 → 乏 [万葉集略解] / 左 → 在 [万葉集略解] / 守 → 乎 [定本]

[_]

[ＫＷ],秋雑歌,作者：巫部麻蘇娘子,恋情,恋歌,大伴家持,動物

1563

[題詞]大伴家持和歌一首

[原文]聞津哉登妹之問勢流鴈鳴者真毛遠雲隠奈利

[訓読]聞きつやと妹が問はせる雁が音はまことも遠く雲隠るなり

[仮名],ききつやと,いもがとはせる,かりがねは,まこともとほく,くもがくるなり

[_]

[左注]

[_]

[校異]歌 [西] 謌

[_]

[ＫＷ],秋雑歌,作者：大伴家持,和歌,巫部麻蘇娘子,恋歌,比喩,動物

1564

[題詞]<日>置長枝娘子歌一首

[原文]秋付者尾花我上尓置露乃應消毛吾者所念香聞

[訓読]秋づけば尾花が上に置く露の消ぬべくも我は思ほゆるかも

[仮名],あきづけば,をばながうへに,おくつゆの,けぬべくもわは,おもほゆるかも

[_]

[左注]

[_]

[校異]曰 → 日 [紀][細][温] / 歌 [西] 謌 [西（訂正）] 歌

[_]

[ＫＷ],秋雑歌,作者：日置長枝娘子,大伴家持,恋歌,恋情,植物

1565

[題詞]大伴家持和歌一首

[原文]吾屋戸乃一村芽子乎念兒尓不令見殆令散都類香聞

[訓読]我が宿の一群萩を思ふ子に見せずほとほと散らしつるかも

[仮名],わがやどの,ひとむらはぎを,おもふこに,みせずほとほと,ちらしつるかも

[_]

[左注]

[_]

[校異]歌 [西] 謌

[_]

[ＫＷ],秋雑歌,作者：大伴家持,日置長枝娘子,恋歌,恋情,比喩,植物

1566

[題詞]大伴家持秋歌四首

[原文]久堅之雨間毛不置雲隠鳴曽去奈流早田鴈之哭

[訓読]久方の雨間も置かず雲隠り鳴きぞ行くなる早稲田雁がね

[仮名],ひさかたの,あままもおかず,くもがくり,なきぞゆくなる,わさだかりがね

[_]

[左注]（右四首天平八年丙子秋九月作）

[_]

[校異]歌 [西] 謌

[_]

[ＫＷ],秋雑歌,作者：大伴家持,天平８年９月,年紀,動物,季節,叙景

1567

[題詞]（大伴家持秋歌四首）

[原文]雲隠鳴奈流鴈乃去而将居秋田之穂立繁之所念

[訓読]雲隠り鳴くなる雁の行きて居む秋田の穂立繁くし思ほゆ

[仮名],くもがくり,なくなるかりの,ゆきてゐむ,あきたのほたち,しげくしおもほゆ

[_]

[左注]（右四首天平八年丙子秋九月作）

[_]

[校異]

[_]

[ＫＷ],秋雑歌,作者：大伴家持,天平８年９月,年紀,動物

1568

[題詞]（大伴家持秋歌四首）

[原文]雨隠情欝悒出見者春日山者色付二家利

[訓読]雨隠り心いぶせみ出で見れば春日の山は色づきにけり

[仮名],あまごもり,こころいぶせみ,いでみれば,かすがのやまは,いろづきにけり

[_]

[左注]（右四首天平八年丙子秋九月作）

[_]

[校異]

[_]

[ＫＷ],秋雑歌,作者：大伴家持,鬱屈,奈良,雨隠,天平８年９月,年紀,地名,季節

1569

[題詞]（大伴家持秋歌四首）

[原文]雨晴而清照有此月夜又更而雲勿田菜引

[訓読]雨晴れて清く照りたるこの月夜またさらにして雲なたなびき

[仮名],あめはれて,きよくてりたる,このつくよ,またさらにして,くもなたなびき

[_]

[左注]右四首天平八年丙子秋九月作

[_]

[校異]

[_]

[ＫＷ],秋雑歌,作者：大伴家持,天平８年９月,年紀

1570

[題詞]藤原朝臣八束歌二首

[原文]此間在而春日也何處雨障出而不行者戀乍曽乎流

[訓読]ここにありて春日やいづち雨障み出でて行かねば恋ひつつぞ居る

[仮名],ここにありて,かすがやいづち,あまつつみ,いでてゆかねば,こひつつぞをる

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：藤原八束,奈良,鬱屈,雨隠,地名,恋情

1571

[題詞]（藤原朝臣八束歌二首）

[原文]春日野尓 <鍾>礼零所見明日従者黄葉頭刺牟高圓乃山

[訓読]春日野に時雨降る見ゆ明日よりは黄葉かざさむ高円の山

[仮名],かすがのに,しぐれふるみゆ,あすよりは,もみちかざさむ,たかまとのやま

[_]

[左注]

[_]

[校異]鐘 → 鍾 [類]

[_]

[ＫＷ],秋雑歌,作者：藤原八束,奈良,地名

1572

[題詞]大伴家持白露歌一首

[原文]吾屋戸乃草花上之白露乎不令消而玉尓貫物尓毛我

[訓読]我が宿の尾花が上の白露を消たずて玉に貫くものにもが

[仮名],わがやどの,をばながうへの,しらつゆを,けたずてたまに,ぬくものにもが

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴家持,植物

1573

[題詞]大伴利上歌一首

[原文]秋之雨尓所沾乍居者雖賎吾妹之屋戸志所念香聞

[訓読]秋の雨に濡れつつ居ればいやしけど我妹が宿し思ほゆるかも

[仮名],あきのあめに,ぬれつつをれば,いやしけど,わぎもがやどし,おもほゆるかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴利上,恋情

1574

[題詞]右大臣橘家宴歌七首

[原文]雲上尓鳴奈流鴈之雖遠君将相跡手廻来津

[訓読]雲の上に鳴くなる雁の遠けども君に逢はむとた廻り来つ

[仮名],くものうへに,なくなるかりの,とほけども,きみにあはむと,たもとほりきつ

[_]

[左注]（右二首）（ / 天平十年戊寅秋八月廿日）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,宴席,橘諸兄,天平１０年８月２０日,年紀,動物

1575

[題詞]（右大臣橘家宴歌七首）

[原文]雲上尓鳴都流鴈乃寒苗芽子乃下葉者黄變可毛

[訓読]雲の上に鳴きつる雁の寒きなへ萩の下葉はもみちぬるかも

[仮名],くものうへに,なきつるかりの,さむきなへ,はぎのしたばは,もみちぬるかも

[_]

[左注]右二首（ / 天平十年戊寅秋八月廿日）

[_]

[校異]

[_]

[ＫＷ],秋雑歌,宴席,橘諸兄,天平１０年８月２０日,年紀,植物

1576

[題詞]（右大臣橘家宴歌七首）

[原文]此岳尓小<壮>鹿履起宇加Ｏ良比可聞可<聞>為良久君故尓許曽

[訓読]この岡に小鹿踏み起しうかねらひかもかもすらく君故にこそ

[仮名],このをかに,をしかふみおこし,うかねらひ,かもかもすらく,きみゆゑにこそ

[_]

[左注]右一首長門守巨曽倍朝臣津嶋（ / 天平十年戊寅秋八月廿日）

[_]

[校異]牡 → 壮 [定本] / 開 → 聞 [代匠記精撰本]

[_]

[ＫＷ],秋雑歌,作者：巨曽倍津嶋,宴席,橘諸兄,天平１０年８月２０日,年紀,主人讃美,動物

1577

[題詞]（右大臣橘家宴歌七首）

[原文]秋野之草花我末乎押靡而来之久毛知久相流君可聞

[訓読]秋の野の尾花が末を押しなべて来しくもしるく逢へる君かも

[仮名],あきののの,をばながうれを,おしなべて,こしくもしるく,あへるきみかも

[_]

[左注]（右二首阿倍朝臣蟲麻呂）（ / 天平十年戊寅秋八月廿日）

[_]

[校異]

[_]

[ＫＷ],秋雑歌,作者：阿倍虫麻呂,宴席,橘諸兄,天平１０年８月２０日,年紀,主人讃美,植物

1578

[題詞]（右大臣橘家宴歌七首）

[原文]今朝鳴而行之鴈鳴寒可聞此野乃淺茅色付尓家類

[訓読]今朝鳴きて行きし雁が音寒みかもこの野の浅茅色づきにける

[仮名],けさなきて,ゆきしかりがね,さむみかも,このののあさぢ,いろづきにける

[_]

[左注]右二首阿倍朝臣蟲麻呂（ / 天平十年戊寅秋八月廿日）

[_]

[校異]

[_]

[ＫＷ],秋雑歌,作者：阿倍虫麻呂,宴席,橘諸兄,天平１０年８月２０日,年紀,主人讃美,動物

1579

[題詞]（右大臣橘家宴歌七首）

[原文]朝扉開而物念時尓白露乃置有秋芽子所見喚鶏本名

[訓読]朝戸開けて物思ふ時に白露の置ける秋萩見えつつもとな

[仮名],あさとあけて,ものもふときに,しらつゆの,おけるあきはぎ,みえつつもとな

[_]

[左注]（右二首文忌寸馬養 / 天平十年戊寅秋八月廿日）

[_]

[校異]

[_]

[ＫＷ],秋雑歌,作者：文馬養,宴席,橘諸兄,天平１０年８月２０日,年紀,植物

1580

[題詞]（右大臣橘家宴歌七首）

[原文]棹<壮>鹿之来立鳴野之秋芽子者露霜負而落去之物乎

[訓読]さを鹿の来立ち鳴く野の秋萩は露霜負ひて散りにしものを

[仮名],さをしかの,きたちなくのの,あきはぎは,つゆしもおひて,ちりにしものを

[_]

[左注]右二首文忌寸馬養 / 天平十年戊寅秋八月廿日

[_]

[校異]牡 → 壮 [紀]

[_]

[ＫＷ],秋雑歌,作者：文馬養,宴席,橘諸兄,天平１０年８月２０日,年紀,動物,植物

1581

[題詞]橘朝臣奈良麻呂結集宴歌十一首

[原文]不手折而落者惜常我念之秋黄葉乎挿頭鶴鴨

[訓読]手折らずて散りなば惜しと我が思ひし秋の黄葉をかざしつるかも

[仮名],たをらずて,ちりなばをしと,わがおもひし,あきのもみちを,かざしつるかも

[_]

[左注]（右二首橘朝臣奈良麻呂）（ / 以前冬十月十七日集於右大臣橘卿之舊宅宴飲也）

[_]

[校異]朝臣 [類] 宿祢 / 歌 [西] 謌 [西（訂正）] 歌

[_]

[ＫＷ],秋雑歌,作者：橘奈良麻呂,宴席,天平１０年１０月１７日,年紀,植物

1582

[題詞]（橘朝臣奈良麻呂結集宴歌十一首）

[原文]<希>将見人尓令見跡黄葉乎手折曽我来師雨零久仁

[訓読]めづらしき人に見せむと黄葉を手折りぞ我が来し雨の降らくに

[仮名],めづらしき,ひとにみせむと,もみちばを,たをりぞわがこし,あめのふらくに

[_]

[左注]右二首橘朝臣奈良麻呂（ / 以前冬十月十七日集於右大臣橘卿之舊宅宴飲也）

[_]

[校異]布 → 希 [万葉集略解]

[_]

[ＫＷ],秋雑歌,作者：橘奈良麻呂,宴席,天平１０年１０月１７日,年紀,植物

1583

[題詞]（橘朝臣奈良麻呂結集宴歌十一首）

[原文]黄葉乎令落<鍾>礼尓所沾而来而君之黄葉乎挿頭鶴鴨

[訓読]黄葉を散らす時雨に濡れて来て君が黄葉をかざしつるかも

[仮名],もみちばを,ちらすしぐれに,ぬれてきて,きみがもみちを,かざしつるかも

[_]

[左注]右一首久米女王（ / 以前冬十月十七日集於右大臣橘卿之舊宅宴飲也）

[_]

[校異]鐘 → 鍾 [定本]

[_]

[ＫＷ],秋雑歌,作者：久米女王,橘奈良麻呂,宴席,天平１０年１０月１７日,年紀,植物

1584

[題詞]（橘朝臣奈良麻呂結集宴歌十一首）

[原文]<希>将見跡吾念君者秋山<乃> 始<黄>葉尓似許曽有家礼

[訓読]めづらしと我が思ふ君は秋山の初黄葉に似てこそありけれ

[仮名],めづらしと,あがおもふきみは,あきやまの,はつもみちばに,にてこそありけれ

[_]

[左注]右一首長忌寸娘（ / 以前冬十月十七日集於右大臣橘卿之舊宅宴飲也）

[_]

[校異]布 → 希 [万葉集略解] / <> → 乃 [類][紀][温][矢] / <> → 黄 [西（右書）][類][紀][細]

[_]

[ＫＷ],秋雑歌,作者：長娘,橘奈良麻呂,宴席,天平１０年１０月１７日,年紀,主人讃美,植物

1585

[題詞]（橘朝臣奈良麻呂結集宴歌十一首）

[原文]平山乃峯之黄葉取者落 <鍾>礼能雨師無間零良志

[訓読]奈良山の嶺の黄葉取れば散る時雨の雨し間なく降るらし

[仮名],ならやまの,みねのもみちば,とればちる,しぐれのあめし,まなくふるらし

[_]

[左注]右一首内舎人縣犬養宿祢吉男（ / 以前冬十月十七日集於右大臣橘卿之舊宅宴飲也）

[_]

[校異]鐘 → 鍾 [類]

[_]

[ＫＷ],秋雑歌,作者：縣犬養吉男,橘奈良麻呂,宴席,天平１０年１０月１７日,年紀,地名 ,植物,奈良

1586

[題詞]（橘朝臣奈良麻呂結集宴歌十一首）

[原文]黄葉乎落巻惜見手折来而今夜挿頭津何物可将念

[訓読]黄葉を散らまく惜しみ手折り来て今夜かざしつ何か思はむ

[仮名],もみちばを,ちらまくをしみ,たをりきて,こよひかざしつ,なにかおもはむ

[_]

[左注]右一首縣犬養宿祢持男（ / 以前冬十月十七日集於右大臣橘卿之舊宅宴飲也）

[_]

[校異]

[_]

[ＫＷ],秋雑歌,作者：縣犬養持男,橘奈良麻呂,宴席,天平１０年１０月１７日,年紀,植物

1587

[題詞]（橘朝臣奈良麻呂結集宴歌十一首）

[原文]足引乃山之黄葉今夜毛加浮去良武山河之瀬尓

[訓読]あしひきの山の黄葉今夜もか浮かび行くらむ山川の瀬に

[仮名],あしひきの,やまのもみちば,こよひもか,うかびゆくらむ,やまがはのせに

[_]

[左注]右一首大伴宿祢書持（ / 以前冬十月十七日集於右大臣橘卿之舊宅宴飲也）

[_]

[校異]

[_]

[ＫＷ],秋雑歌,作者：大伴書持,橘奈良麻呂,宴席,天平１０年１０月１７日,植物

1588

[題詞]（橘朝臣奈良麻呂結集宴歌十一首）

[原文]平山乎令丹黄葉手折来而今夜挿頭都落者雖落

[訓読]奈良山をにほはす黄葉手折り来て今夜かざしつ散らば散るとも

[仮名],ならやまを,にほはすもみち,たをりきて,こよひかざしつ,ちらばちるとも

[_]

[左注]右一首<三>手代人名（ / 以前冬十月十七日集於右大臣橘卿之舊宅宴飲也）

[_]

[校異]之 → 三 [細]

[_]

[ＫＷ],秋雑歌,作者：三手代人名,橘奈良麻呂,宴席,天平１０年１０月１７日,年紀,地名 ,奈良,植物

1589

[題詞]（橘朝臣奈良麻呂結集宴歌十一首）

[原文]露霜尓逢有黄葉乎手折来而妹挿頭都後者落十方

[訓読]露霜にあへる黄葉を手折り来て妹とかざしつ後は散るとも

[仮名],つゆしもに,あへるもみちを,たをりきて,いもはかざしつ,のちはちるとも

[_]

[左注]右一首秦許遍麻呂（ / 以前冬十月十七日集於右大臣橘卿之舊宅宴飲也）

[_]

[校異]

[_]

[ＫＷ],秋雑歌,作者：秦許遍麻呂,橘奈良麻呂,宴席,天平１０年１０月１７日,年紀,植物

1590

[題詞]（橘朝臣奈良麻呂結集宴歌十一首）

[原文]十月 <鍾>礼尓相有黄葉乃吹者将落風之随

[訓読]十月時雨にあへる黄葉の吹かば散りなむ風のまにまに

[仮名],かむなづき,しぐれにあへる,もみちばの,ふかばちりなむ,かぜのまにまに

[_]

[左注]右一首大伴宿祢池主（ / 以前冬十月十七日集於右大臣橘卿之舊宅宴飲也）

[_]

[校異]鐘 → 鍾 [類]

[_]

[ＫＷ],秋雑歌,作者：大伴池主,橘奈良麻呂,宴席,天平１０年１０月１７日,年紀,植物

1591

[題詞]（橘朝臣奈良麻呂結集宴歌十一首）

[原文]黄葉乃過麻久惜美思共遊今夜者不開毛有奴香

[訓読]黄葉の過ぎまく惜しみ思ふどち遊ぶ今夜は明けずもあらぬか

[仮名],もみちばの,すぎまくをしみ,おもふどち,あそぶこよひは,あけずもあらぬか

[_]

[左注]右一首内舎人大伴宿祢家持 / 以前冬十月十七日集於右大臣橘卿之舊宅宴飲也

[_]

[校異]

[_]

[ＫＷ],秋雑歌,作者：大伴家持,橘奈良麻呂,宴席,天平１０年１０月１７日,年紀,植物

1592

[題詞]大伴坂上郎女竹田庄作歌二首

[原文]然不有五百代小田乎苅乱田蘆尓居者京師所念

[訓読]しかとあらぬ五百代小田を刈り乱り田廬に居れば都し思ほゆ

[仮名],しかとあらぬ,いほしろをだを,かりみだり,たぶせにをれば,みやこしおもほゆ

[_]

[左注]（右天平十一年己卯秋九月作）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：坂上郎女,奈良県,桜井市,望郷,天平１１年９月,年紀,地名

1593

[題詞]（大伴坂上郎女竹田庄作歌二首）

[原文]隠口乃始瀬山者色附奴 <鍾>礼乃雨者零尓家良思母

[訓読]隠口の泊瀬の山は色づきぬ時雨の雨は降りにけらしも

[仮名],こもりくの,はつせのやまは,いろづきぬ,しぐれのあめは,ふりにけらしも

[_]

[左注]右天平十一年己卯秋九月作

[_]

[校異]鐘 → 鍾 [類][矢]

[_]

[ＫＷ],秋雑歌,作者：坂上郎女,奈良県,桜井市,天平１１年９月,年紀,季節

1594

[題詞]佛前唱歌一首

[原文]思具礼能雨無間莫零紅尓丹保敝流山之落巻惜毛

[訓読]時雨の雨間なくな降りそ紅ににほへる山の散らまく惜しも

[仮名],しぐれのあめ,まなくなふりそ,くれなゐに,にほへるやまの,ちらまくをしも

[_]

[左注]右冬十月皇后宮之維摩講終日供養大唐高麗等種々音樂尓乃唱此歌詞弾琴者市原王忍坂王[後賜姓大原真人赤麻呂也] 歌子者田口朝臣家守河邊朝臣東人置始連長谷等十數人也

[_]

[校異]歌 [西] 謌 [西（訂正）] 歌 / 謌 [温][矢][京] 歌 / 歌 [西] 謌 [西（訂正）] 歌

[_]

[ＫＷ],秋雑歌,天平１１年１０月,年紀,光明皇后,誦唱

1595

[題詞]大伴宿祢像見歌一首

[原文]秋芽子乃枝毛十尾二降露乃消者雖消色出目八方

[訓読]秋萩の枝もとををに置く露の消なば消ぬとも色に出でめやも

[仮名],あきはぎの,えだもとををに,おくつゆの,けなばけぬとも,いろにいでめやも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴像見,恋愛,植物

1596

[題詞]大伴宿祢家持到娘子門作歌一首

[原文]妹家之門田乎見跡打出来之情毛知久照月夜鴨

[訓読]妹が家の門田を見むとうち出で来し心もしるく照る月夜かも

[仮名],いもがいへの,かどたをみむと,うちいでこし,こころもしるく,てるつくよかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴家持,恋愛,恋情

1597

[題詞]大伴宿祢家持秋歌三首

[原文]秋野尓開流秋芽子秋風尓靡流上尓秋露置有

[訓読]秋の野に咲ける秋萩秋風に靡ける上に秋の露置けり

[仮名],あきののに,さけるあきはぎ,あきかぜに,なびけるうへに,あきのつゆおけり

[_]

[左注]（右天平十五年癸未秋八月見物色作）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴家持,天平１５年８月,年紀,植物,季節

1598

[題詞]（大伴宿祢家持秋歌三首）

[原文]棹<壮>鹿之朝立野邊乃秋芽子尓玉跡見左右置有白露

[訓読]さを鹿の朝立つ野辺の秋萩に玉と見るまで置ける白露

[仮名],さをしかの,あさたつのへの,あきはぎに,たまとみるまで,おけるしらつゆ

[_]

[左注]（右天平十五年癸未秋八月見物色作）

[_]

[校異]牡 → 壮 [紀]

[_]

[ＫＷ],秋雑歌,作者：大伴家持,天平１５年８月,年紀,動物,植物

1599

[題詞]（大伴宿祢家持秋歌三首）

[原文]狭尾<壮>鹿乃胸別尓可毛秋芽子乃散過鶏類盛可毛行流

[訓読]さを鹿の胸別けにかも秋萩の散り過ぎにける盛りかも去ぬる

[仮名],さをしかの,むなわけにかも,あきはぎの,ちりすぎにける,さかりかもいぬる

[_]

[左注]右天平十五年癸未秋八月見物色作

[_]

[校異]牡 → 壮 [紀]

[_]

[ＫＷ],秋雑歌,作者：大伴家持,天平１５年８月,年紀,動物,植物

1600

[題詞]内舎人石川朝臣廣成歌二首

[原文]妻戀尓鹿鳴山邊之秋芽子者露霜寒盛須疑由君

[訓読]妻恋ひに鹿鳴く山辺の秋萩は露霜寒み盛り過ぎゆく

[仮名],つまごひに,かなくやまへの,あきはぎは,つゆしもさむみ,さかりすぎゆく

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：石川広成,植物,動物,季節

1601

[題詞]（内舎人石川朝臣廣成歌二首）

[原文]目頬布君之家有波奈須為寸穂出秋乃過良久惜母

[訓読]めづらしき君が家なる花すすき穂に出づる秋の過ぐらく惜しも

[仮名],めづらしき,きみがいへなる,はなすすき,ほにいづるあきの,すぐらくをしも

[_]

[左注]

[_]

[校異]

[_]

[ＫＷ],秋雑歌,作者：石川広成,宴席,植物,季節

1602

[題詞]大伴宿祢家持鹿鳴歌二首

[原文]山妣姑乃相響左右妻戀尓鹿鳴山邊尓獨耳為手

[訓読]山彦の相響むまで妻恋ひに鹿鳴く山辺に独りのみして

[仮名],やまびこの,あひとよむまで,つまごひに,かなくやまへに,ひとりのみして

[_]

[左注]（右二首天平十五年癸未八月十六日作）

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴家持,天平１５年８月１６日,年紀,孤独,恋情,動物

1603

[題詞]（大伴宿祢家持鹿鳴歌二首）

[原文]<頃>者之朝開尓聞者足日木篦山<呼>令響狭尾<壮>鹿鳴哭

[訓読]このころの朝明に聞けばあしひきの山呼び響めさを鹿鳴くも

[仮名],このころの,あさけにきけば,あしひきの,やまよびとよめ,さをしかなくも

[_]

[左注]右二首天平十五年癸未八月十六日作

[_]

[校異]項 → 頃 [紀] / 乎 → 呼 [類][紀][矢][京] / <> → 壮 [西（右書）][紀]

[_]

[ＫＷ],秋雑歌,作者：大伴家持,天平１５年８月１６日,年紀,動物,季節

1604

[題詞]大原真人今城傷惜寧樂故郷歌一首

[原文]秋去者春日山之黄葉見流寧樂乃京師乃荒良久惜毛

[訓読]秋されば春日の山の黄葉見る奈良の都の荒るらく惜しも

[仮名],あきされば,かすがのやまの,もみちみる,ならのみやこの,あるらくをしも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大原今城,奈良,荒都,地名

1605

[題詞]大伴宿祢家持歌一首

[原文]高圓之野邊乃秋芽子此日之暁露尓開兼可聞

[訓読]高円の野辺の秋萩このころの暁露に咲きにけむかも

[仮名],たかまとの,のへのあきはぎ,このころの,あかときつゆに,さきにけむかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],秋雑歌,作者：大伴家持,奈良,地名,植物