万葉集 (Manyoshu) :: :: University of Virginia Library

万葉集 (Manyoshu)

第一巻

10.

11.

12.

13.

14.

第十四巻

15.

16.

17.

18.

19.

20.

Collapse All | Expand All expand section

第十四巻

東歌

3348

[題詞]東歌

[原文]奈都素妣久宇奈加美我多能於伎都渚尓布袮波等<杼>米牟佐欲布氣尓家里

[訓読]夏麻引く海上潟の沖つ洲に船は留めむさ夜更けにけり

[仮名],なつそびく,うなかみがたの,おきつすに,ふねはとどめむ,さよふけにけり

[_]

[左注]右一首上総國歌

[_]

[校異]抒 → 杼 [類][古][京]

[_]

[ＫＷ],東歌,千葉県,枕詞,市原市,地名

3349

[題詞]

[原文]可豆思加乃麻萬能宇良<未>乎許具布祢能布奈妣等佐和久奈美多都良思母

[訓読]葛飾の真間の浦廻を漕ぐ船の船人騒く波立つらしも

[仮名],かづしかの,ままのうらみを,こぐふねの,ふなびとさわく,なみたつらしも

[_]

[左注]右一首下総國歌

[_]

[校異]末 → 未 [万葉集古義]

[_]

[ＫＷ],東歌,千葉県,地名,葛飾区,市原市,景物

3350

[題詞]

[原文]筑波祢乃尓比具波麻欲能伎奴波安礼杼伎美我美家思志安夜尓伎保思母

[訓読]筑波嶺の新桑繭の衣はあれど君が御衣しあやに着欲しも

[仮名],つくはねの,にひぐはまよの,きぬはあれど,きみがみけしし,あやにきほしも

[_]

[左注]或本歌曰多良知祢能又云安麻多伎保思母 / （右二首常陸國歌）

[_]

[校異]

[_]

[ＫＷ],東歌,茨城県,筑波山,地名,,恋愛,新婚,婚姻

3350S

[題詞]或本歌曰又云

[原文]多良知祢能安麻多伎保思母

[訓読]たらちねのあまた着欲しも

[仮名]たらちねの,あまたきほしも

[_]

[左注]（右二首常陸國歌）

[_]

[校異]

[_]

[ＫＷ],東歌,茨城県,異伝,筑波山,新婚,恋愛

3351

[題詞]

[原文]筑波祢尓由伎可母布良留伊奈乎可母加奈思吉兒呂我尓努保佐流可母

[訓読]筑波嶺に雪かも降らるいなをかも愛しき子ろが布乾さるかも

[仮名],つくはねに,ゆきかもふらる,いなをかも,かなしきころが,にのほさるかも

[_]

[左注]右二首常陸國歌

[_]

[校異]

[_]

[ＫＷ],東歌,茨城県,筑波山,地名,恋情,景物

3352

[題詞]

[原文]信濃奈流須我能安良能尓保登等藝須奈久許恵伎氣<婆> 登伎須疑尓家里

[訓読]信濃なる須我の荒野に霍公鳥鳴く声聞けば時過ぎにけり

[仮名],しなぬなる,すがのあらのに,ほととぎす,なくこゑきけば,ときすぎにけり

[_]

[左注]右一首信濃國歌

[_]

[校異]波 → 婆 [紀][細]

[_]

[ＫＷ],東歌,長野県,地名,真田町,菅平,動物,別離,農事,女歌

相聞

3353

[題詞]相聞

[原文]阿良多麻能伎倍乃波也之尓奈乎多弖天由伎可都麻思自移乎佐伎太多尼

[訓読]あらたまの伎倍の林に汝を立てて行きかつましじ寐を先立たね

[仮名],あらたまの,きへのはやしに,なをたてて,ゆきかつましじ,いをさきだたね

[_]

[左注]（右二首遠江國歌）

[_]

[校異]伎 [類][細]（塙）吉

[_]

[ＫＷ],東歌,相聞,静岡県,枕詞,地名,浜名市,歌謡,歌垣,民謡,恋愛

3354

[題詞]

[原文]伎倍比等乃萬太良夫須麻尓和多佐波太伊利奈麻之母乃伊毛我乎杼許尓

[訓読]伎倍人のまだら衾に綿さはだ入りなましもの妹が小床に

[仮名],きへひとの,まだらぶすまに,わたさはだ,いりなましもの,いもがをどこに

[_]

[左注]右二首遠江國歌

[_]

[校異]

[_]

[ＫＷ],東歌,相聞,静岡県,地名,浜名市,恋愛,歌垣,歌謡,民謡

3355

[題詞]

[原文]安麻乃波良不自能之婆夜麻己能久礼能等伎由都利奈波阿波受可母安良牟

[訓読]天の原富士の柴山この暗の時ゆつりなば逢はずかもあらむ

[仮名],あまのはら,ふじのしばやま,このくれの,ときゆつりなば,あはずかもあらむ

[_]

[左注]（右五首駿河國歌）

[_]

[校異]

[_]

[ＫＷ],東歌,相聞,静岡県,富士山,地名,歌垣,歌謡,民謡,恋愛

3356

[題詞]

[原文]不盡能祢乃伊夜等保奈我伎夜麻治乎毛伊母我理登倍婆氣尓餘婆受吉奴

[訓読]富士の嶺のいや遠長き山道をも妹がりとへばけによばず来ぬ

[仮名],ふじのねの,いやとほながき,やまぢをも,いもがりとへば,けによばずきぬ

[_]

[左注]（右五首駿河國歌）

[_]

[校異]

[_]

[ＫＷ],東歌,相聞,静岡県,富士山,地名,恋愛

3357

[題詞]

[原文]可須美為流布時能夜麻備尓和我伎奈婆伊豆知武吉弖加伊毛我奈氣可牟

[訓読]霞居る富士の山びに我が来なばいづち向きてか妹が嘆かむ

[仮名],かすみゐる,ふじのやまびに,わがきなば,いづちむきてか,いもがなげかむ

[_]

[左注]（右五首駿河國歌）

[_]

[校異]

[_]

[ＫＷ],東歌,相聞,静岡県,富士山,地名,恋情,別離,後朝

3358

[題詞]

[原文]佐奴良久波多麻乃緒婆可里 <古>布良久波布自能多可祢乃奈流佐波能其登

[訓読]さ寝らくは玉の緒ばかり恋ふらくは富士の高嶺の鳴沢のごと

[仮名],さぬらくは,たまのをばかり,こふらくは,ふじのたかねの,なるさはのごと

[_]

[左注]或本歌曰麻可奈思美奴良久波思家良久佐奈良久波伊豆能多可祢能奈流佐波奈須与一本歌曰阿敝良久波多麻能乎思家也古布良久波布自乃多可祢尓布流由伎奈須毛 / （右五首駿河國歌）

[_]

[校異]右 → 古 [西（訂正右書）][類][紀][温] / 久波 [細]（塙）久

[_]

[ＫＷ],東歌,相聞,静岡県,富士山,地名,恋情,歌謡,民謡,歌垣

3358S1

[題詞]或本歌曰

[原文]麻可奈思美奴良久波思家良久佐奈良久波伊豆能多可祢能奈流佐波奈須与

[訓読]ま愛しみ寝らくはしけらくさ鳴らくは伊豆の高嶺の鳴沢なすよ

[仮名]まかなしみ,ぬらくはしけらく,さならくは,いづのたかねの,なるさはなすよ

[_]

[左注]（右五首駿河國歌）

[_]

[校異]

[_]

[ＫＷ],東歌,相聞,静岡県,地名,伊豆,天城山,うわさ,人目,恋愛,歌垣,民謡,歌謡

3358S2

[題詞]一本歌曰

[原文]阿敝良久波多麻能乎思家也古布良久波布自乃多可祢尓布流由伎奈須毛

[訓読]逢へらくは玉の緒しけや恋ふらくは富士の高嶺に降る雪なすも

[仮名]あへらくは,たまのをしけや,こふらくは,ふじのたかねに,ふるゆきなすも

[_]

[左注]（右五首駿河國歌）

[_]

[校異]

[_]

[ＫＷ],東歌,相聞,静岡県,富士山,地名,恋情,歌垣,民謡,歌謡

3359

[題詞]

[原文]駿河能宇美於思敝尓於布流波麻都豆良伊麻思乎多能美波播尓多我比奴 [一云於夜尓多我比奴]

[訓読]駿河の海おし辺に生ふる浜つづら汝を頼み母に違ひぬ [一云親に違ひぬ]

[仮名],するがのうみ,おしへにおふる,はまつづら,いましをたのみ,ははにたがひぬ,[おやにたがひぬ]

[_]

[左注]右五首駿河國歌

[_]

[校異]

[_]

[ＫＷ],東歌,相聞,静岡県,駿河湾,地名,植物,恋情,異伝,歌謡,歌垣,民謡

3360

[題詞]

[原文]伊豆乃宇美尓多都思良奈美能安里都追毛都藝奈牟毛能乎 <美>太礼志米梅楊

[訓読]伊豆の海に立つ白波のありつつも継ぎなむものを乱れしめめや

[仮名],いづのうみに,たつしらなみの,ありつつも,つぎなむものを,みだれしめめや

[_]

[左注]或本歌曰之良久毛能多延都追母都我牟等母倍也美太礼曽米家武 / 右一首伊豆國歌

[_]

[校異]<> → 美 [西（右書）][類][紀][細]

[_]

[ＫＷ],東歌,相聞,静岡県,地名,伊豆,女歌,恋情,序詞

3360S

[題詞]或本歌曰

[原文]之良久毛能多延都追母都我牟等母倍也美太礼曽米家武

[訓読]白雲の絶えつつも継がむと思へや乱れそめけむ

[仮名],しらくもの,たえつつも,つがむともへや,みだれそめけむ

[_]

[左注]右一首伊豆國歌

[_]

[校異]

[_]

[ＫＷ],東歌,相聞,静岡県,異伝,女歌,恋情,序詞

3361

[題詞]

[原文]安思我良能乎弖毛許乃母尓佐須和奈乃可奈流麻之豆美許呂安礼比毛等久

[訓読]足柄のをてもこのもにさすわなのかなるましづみ子ろ我れ紐解く

[仮名],あしがらの,をてもこのもに,さすわなの,かなるましづみ,ころあれひもとく

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,地名,足柄,序詞,恋愛,狩猟,民謡,歌謡

3362

[題詞]

[原文]相模祢乃乎美祢見<可>久思和須礼久流伊毛我名欲妣弖吾乎祢之奈久奈

[訓読]相模嶺の小峰見そくし忘れ来る妹が名呼びて我を音し泣くな

[仮名],さがむねの,をみねみそくし,わすれくる,いもがなよびて,あをねしなくな

[_]

[左注]或本歌曰武蔵祢能乎美祢見可久思和須礼<遊>久伎美我名可氣弖安乎祢思奈久流 / （右十二首相模國歌）

[_]

[校異]所 → 可 [岩波大系]（塙）（楓） / <> → 遊 [西（右書）][元][類][古][紀]

[_]

[ＫＷ],東歌,相聞,神奈川県,地名,丹沢,別離,恋情,異伝

3362S

[題詞]或本歌曰

[原文]武蔵祢能乎美祢見可久思和須礼<遊>久伎美我名可氣弖安乎祢思奈久流

[訓読]武蔵嶺の小峰見隠し忘れ行く君が名懸けて我を音し泣くる

[仮名],むざしねの,をみねみかくし,わすれゆく,きみがなかけて,あをねしなくる

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,異伝,地名,別離,恋情

3363

[題詞]

[原文]和我世古乎夜麻登敝夜利弖麻都之太須安思我良夜麻乃須疑乃木能末可

[訓読]我が背子を大和へ遣りて待つしだす足柄山の杉の木の間か

[仮名],わがせこを,やまとへやりて,まつしだす,あしがらやまの,すぎのこのまか

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,女歌,別離,悲別,地名,足柄,掛詞

3364

[題詞]

[原文]安思我良能波Ｉ祢乃夜麻尓安波麻吉弖實登波奈礼留乎阿波奈久毛安夜思

[訓読]足柄の箱根の山に粟蒔きて実とはなれるを粟無くもあやし

[仮名],あしがらの,はこねのやまに,あはまきて,みとはなれるを,あはなくもあやし

[_]

[左注]或本歌末句曰波布久受能比可波与利己祢思多奈保那保尓 / （右十二首相模國歌）

[_]

[校異]

[_]

[ＫＷ],東歌,相聞,神奈川県,箱根,地名,足柄,掛詞,植物,恋情,農事,民謡,歌謡,異伝

3364S

[題詞]或本歌末句曰

[原文]波布久受能比可波与利己祢思多奈保那保尓

[訓読]延ふ葛の引かば寄り来ね下なほなほに

[仮名],はふくずの,ひかばよりこね,したなほなほに

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,異伝,序詞,恋情,民謡,歌謡

3365

[題詞]

[原文]可麻久良乃美胡之能佐吉能伊波久叡乃伎美我久由倍伎己許呂波母多自

[訓読]鎌倉の見越しの崎の岩崩えの君が悔ゆべき心は持たじ

[仮名],かまくらの,みごしのさきの,いはくえの,きみがくゆべき,こころはもたじ

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,地名,鎌倉,稲村が崎,序詞,恋情

3366

[題詞]

[原文]麻可奈思美佐祢尓和波由久可麻久良能美奈能瀬河泊尓思保美都奈武賀

[訓読]ま愛しみさ寝に我は行く鎌倉の水無瀬川に潮満つなむか

[仮名],まかなしみ,さねにわはゆく,かまくらの,みなのせがはに,しほみつなむか

[_]

[左注]（右十二首相模國歌）

[_]

[校異]泊 [元][類][古] 伯

[_]

[ＫＷ],東歌,相聞,神奈川県,鎌倉,稲背川,地名,恋愛

3367

[題詞]

[原文]母毛豆思麻安之我良乎夫祢安流吉於保美目許曽可流良米己許呂波毛倍杼

[訓読]百づ島足柄小舟歩き多み目こそ離るらめ心は思へど

[仮名],ももづしま,あしがらをぶね,あるきおほみ,めこそかるらめ,こころはもへど

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,足柄,女歌,恋情,皮肉,揶揄,民謡,歌謡

3368

[題詞]

[原文]阿之我利能刀比能可布知尓伊豆流湯能余尓母多欲良尓故呂河伊波奈久尓

[訓読]あしがりの土肥の河内に出づる湯のよにもたよらに子ろが言はなくに

[仮名],あしがりの,とひのかふちに,いづるゆの,よにもたよらに,ころがいはなくに

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,湯河原町,地名,恋情,序詞

3369

[題詞]

[原文]阿之我利乃麻萬能古須氣乃須我麻久良安是加麻可左武許呂勢多麻久良

[訓読]あしがりの麻万の小菅の菅枕あぜかまかさむ子ろせ手枕

[仮名],あしがりの,ままのこすげの,すがまくら,あぜかまかさむ,ころせたまくら

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,地名,足柄,植物,民謡,歌垣,歌謡,口説き,恋愛

3370

[題詞]

[原文]安思我里乃波故祢能祢呂乃尓古具佐能波奈都豆麻奈礼也比母登可受祢牟

[訓読]あしがりの箱根の嶺ろのにこ草の花つ妻なれや紐解かず寝む

[仮名],あしがりの,はこねのねろの,にこぐさの,はなつつまなれや,ひもとかずねむ

[_]

[左注]（右十二首相模國歌）

[_]

[校異]

[_]

[ＫＷ],東歌,相聞,神奈川県,箱根,植物,序詞,恋情,怨恨,地名

3371

[題詞]

[原文]安思我良乃美佐可加思古美久毛利欲能阿我志多婆倍乎許知弖都流可<毛>

[訓読]足柄のみ坂畏み曇り夜の我が下ばへをこち出つるかも

[仮名],あしがらの,みさかかしこみ,くもりよの,あがしたばへを,こちでつるかも

[_]

[左注]（右十二首相模國歌）

[_]

[校異]母 → 毛 [元][類][古][細]

[_]

[ＫＷ],東歌,相聞,神奈川県,足柄,恋情,うわさ,地名

3372

[題詞]

[原文]相模治乃余呂伎能波麻乃麻奈胡奈須兒良波可奈之久於毛波流留可毛

[訓読]相模道の余綾の浜の真砂なす子らは愛しく思はるるかも

[仮名],さがむぢの,よろぎのはまの,まなごなす,こらはかなしく,おもはるるかも

[_]

[左注]右十二首相模國歌

[_]

[校異]

[_]

[ＫＷ],東歌,相聞,神奈川県,大磯,地名,序詞,恋情

3373

[題詞]

[原文]多麻河泊尓左良須弖豆久利佐良左良尓奈仁曽許能兒乃己許太可奈之伎

[訓読]多摩川にさらす手作りさらさらになにぞこの子のここだ愛しき

[仮名],たまかはに,さらすてづくり,さらさらに,なにぞこのこの,ここだかなしき

[_]

[左注]（右九首武蔵國歌）

[_]

[校異]泊 [元][古] 伯

[_]

[ＫＷ],東歌,相聞,埼玉県,東京都,多摩川,恋情,地名

3374

[題詞]

[原文]武蔵野尓宇良敝可多也伎麻左弖尓毛乃良奴伎美我名宇良尓Ｒ尓家里

[訓読]武蔵野に占部肩焼きまさでにも告らぬ君が名占に出にけり

[仮名],むざしのに,うらへかたやき,まさでにも,のらぬきみがな,うらにでにけり

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,地名,女歌,うわさ,人目,恋愛

3375

[題詞]

[原文]武蔵野乃乎具奇我吉藝志多知和可礼伊尓之与比欲利世呂尓安波奈布与

[訓読]武蔵野のをぐきが雉立ち別れ去にし宵より背ろに逢はなふよ

[仮名],むざしのの,をぐきがきぎし,たちわかれ,いにしよひより,せろにあはなふよ

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,地名,動物,序詞,女歌,悲別,恋情

3376

[題詞]

[原文]古非思家波素弖毛布良武乎牟射志野乃宇家良我波奈乃伊呂尓豆奈由米

[訓読]恋しけば袖も振らむを武蔵野のうけらが花の色に出なゆめ

[仮名],こひしけば,そでもふらむを,むざしのの,うけらがはなの,いろにづなゆめ

[_]

[左注]或本歌曰伊可尓思弖古非波可伊毛尓武蔵野乃宇家良我波奈乃伊呂尓Ｒ受安良牟 / （右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,地名,植物,うわさ,人目,恋情,女歌

3376S

[題詞]或本歌曰

[原文]伊可尓思弖古非波可伊毛尓武蔵野乃宇家良我波奈乃伊呂尓Ｒ受安良牟

[訓読]いかにして恋ひばか妹に武蔵野のうけらが花の色に出ずあらむ

[仮名],いかにして,こひばかいもに,むざしのの,うけらがはなの,いろにでずあらむ

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,異伝,地名,植物,恋情,序詞

3377

[題詞]

[原文]武蔵野乃久佐波母呂武吉可毛可久母伎美我麻尓末尓吾者余利尓思乎

[訓読]武蔵野の草葉もろ向きかもかくも君がまにまに我は寄りにしを

[仮名],むざしのの,くさはもろむき,かもかくも,きみがまにまに,わはよりにしを

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,地名,女歌,怨恨,恋情,序詞

3378

[題詞]

[原文]伊利麻治能於保屋我波良能伊波為都良比可婆奴流々々和尓奈多要曽祢

[訓読]入間道の於保屋が原のいはゐつら引かばぬるぬる我にな絶えそね

[仮名],いりまぢの,おほやがはらの,いはゐつら,ひかばぬるぬる,わになたえそね

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,地名,入間,植物,序詞,恋情,民謡,歌垣,歌謡

3379

[題詞]

[原文]和我世故乎安杼可母伊波武牟射志野乃宇家良我波奈乃登吉奈伎母能乎

[訓読]我が背子をあどかも言はむ武蔵野のうけらが花の時なきものを

[仮名],わがせこを,あどかもいはむ,むざしのの,うけらがはなの,ときなきものを

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,東京都,地名,植物,女歌,序詞

3380

[題詞]

[原文]佐吉多萬能津尓乎流布祢乃可是乎伊多美都奈波多由登毛許登奈多延曽祢

[訓読]埼玉の津に居る船の風をいたみ綱は絶ゆとも言な絶えそね

[仮名],さきたまの,つにをるふねの,かぜをいたみ,つなはたゆとも,ことなたえそね

[_]

[左注]（右九首武蔵國歌）

[_]

[校異]

[_]

[ＫＷ],東歌,相聞,埼玉県,地名,行田,序詞,恋情,女歌,民謡,歌謡

3381

[題詞]

[原文]奈都蘇妣久宇奈比乎左之弖等夫登利乃伊多良武等曽与阿我之多波倍思

[訓読]夏麻引く宇奈比をさして飛ぶ鳥の至らむとぞよ我が下延へし

[仮名],なつそびく,うなひをさして,とぶとりの,いたらむとぞよ,あがしたはへし

[_]

[左注]右九首武蔵國歌

[_]

[校異]

[_]

[ＫＷ],東歌,相聞,埼玉県,東京都,地名,枕詞,序詞,恋情

3382

[題詞]

[原文]宇麻具多能祢呂乃佐左葉能都由思母能奴礼弖和伎奈婆汝者故布婆曽毛

[訓読]馬来田の嶺ろの笹葉の露霜の濡れて我来なば汝は恋ふばぞも

[仮名],うまぐたの,ねろのささはの,つゆしもの,ぬれてわきなば,なはこふばぞも

[_]

[左注]（右二首上総國歌）

[_]

[校異]毛 [元][類] 母

[_]

[ＫＷ],東歌,相聞,千葉県,木更津,地名,恋情,悲別

3383

[題詞]

[原文]宇麻具多能祢呂尓可久里為可久太尓毛久尓乃登保可婆奈我目保里勢牟

[訓読]馬来田の嶺ろに隠り居かくだにも国の遠かば汝が目欲りせむ

[仮名],うまぐたの,ねろにかくりゐ,かくだにも,くにのとほかば,ながめほりせむ

[_]

[左注]右二首上総國歌

[_]

[校異]

[_]

[ＫＷ],東歌,相聞,千葉県,地名,木更津,羈旅,恋情,望郷

3384

[題詞]

[原文]可都思加能麻末能手兒奈乎麻許登可聞和礼尓余須等布麻末乃弖胡奈乎

[訓読]葛飾の真間の手児名をまことかも我れに寄すとふ真間の手児名を

[仮名],かづしかの,ままのてごなを,まことかも,われによすとふ,ままのてごなを

[_]

[左注]（右四首下総國歌）

[_]

[校異]

[_]

[ＫＷ],東歌,相聞,千葉県,地名,伝説,恋愛,民謡,歌謡

3385

[題詞]

[原文]可豆思賀能麻萬能手兒奈我安里之<可婆> 麻末乃於須比尓奈美毛登杼呂尓

[訓読]葛飾の真間の手児名がありしかば真間のおすひに波もとどろに

[仮名],かづしかの,ままのてごなが,ありしかば,ままのおすひに,なみもとどろに

[_]

[左注]（右四首下総國歌）

[_]

[校異]婆可 → 可婆 [細]

[_]

[ＫＷ],東歌,相聞,千葉県,地名,葛飾,伝説,市川

3386

[題詞]

[原文]尓保杼里能可豆思加和世乎尓倍須登毛曽能可奈之伎乎刀尓多弖米也母

[訓読]にほ鳥の葛飾早稲をにへすともその愛しきを外に立てめやも

[仮名],にほどりの,かづしかわせを,にへすとも,そのかなしきを,とにたてめやも

[_]

[左注]（右四首下総國歌）

[_]

[校異]

[_]

[ＫＷ],東歌,相聞,千葉県,地名,葛飾,新嘗,祭り,恋情,女歌

3387

[題詞]

[原文]安能於登世受由可牟古馬母我可豆思加乃麻末乃都藝波思夜麻受可欲波牟

[訓読]足の音せず行かむ駒もが葛飾の真間の継橋やまず通はむ

[仮名],あのおとせず,ゆかむこまもが,かづしかの,ままのつぎはし,やまずかよはむ

[_]

[左注]右四首下総國歌

[_]

[校異]豆 [元][類]（塙）都

[_]

[ＫＷ],東歌,相聞,千葉県,地名,葛飾,市川,恋情

3388

[題詞]

[原文]筑波祢乃祢呂尓可須美為須宜可提尓伊伎豆久伎美乎為祢弖夜良佐祢

[訓読]筑波嶺の嶺ろに霞居過ぎかてに息づく君を率寝て遣らさね

[仮名],つくはねの,ねろにかすみゐ,すぎかてに,いきづくきみを,ゐねてやらさね

[_]

[左注]（右十首常陸國歌）

[_]

[校異]

[_]

[ＫＷ],東歌,相聞,茨城県,地名,筑波山,女歌,歌垣,勧誘,恋愛

3389

[題詞]

[原文]伊毛我可度伊夜等保曽吉奴都久波夜麻可久礼奴保刀尓蘇提婆布利弖奈

[訓読]妹が門いや遠そきぬ筑波山隠れぬほとに袖は振りてな

[仮名],いもがかど,いやとほそきぬ,つくはやま,かくれぬほとに,そではふりてな

[_]

[左注]（右十首常陸國歌）

[_]

[校異]婆 [類] 波

[_]

[ＫＷ],東歌,相聞,茨城県,筑波山,地名,別離,羈旅,恋情

3390

[題詞]

[原文]筑波祢尓可加奈久和之能祢乃未乎可奈伎和多里南牟安布登波奈思尓

[訓読]筑波嶺にかか鳴く鷲の音のみをか泣きわたりなむ逢ふとはなしに

[仮名],つくはねに,かかなくわしの,ねのみをか,なきわたりなむ,あふとはなしに

[_]

[左注]（右十首常陸國歌）

[_]

[校異]

[_]

[ＫＷ],東歌,相聞,茨城県,地名,筑波山,動物,序詞,恋情,別離

3391

[題詞]

[原文]筑波祢尓曽我比尓美由流安之保夜麻安志可流登我毛左祢見延奈久尓

[訓読]筑波嶺にそがひに見ゆる葦穂山悪しかるとがもさね見えなくに

[仮名],つくはねに,そがひにみゆる,あしほやま,あしかるとがも,さねみえなくに

[_]

[左注]（右十首常陸國歌）

[_]

[校異]

[_]

[ＫＷ],東歌,相聞,茨城県,地名,筑波山,足尾山,序詞,恋情

3392

[題詞]

[原文]筑波祢乃伊波毛等杼呂尓於都流美豆代尓毛多由良尓和我於毛波奈久尓

[訓読]筑波嶺の岩もとどろに落つる水よにもたゆらに我が思はなくに

[仮名],つくはねの,いはもとどろに,おつるみづ,よにもたゆらに,わがおもはなくに

[_]

[左注]（右十首常陸國歌）

[_]

[校異]於毛 [元] 毛

[_]

[ＫＷ],東歌,相聞,茨城県,地名,筑波山,序詞,恋情

3393

[題詞]

[原文]筑波祢乃乎弖毛許能母尓毛利敝須恵波播已毛礼杼母多麻曽阿比尓家留

[訓読]筑波嶺のをてもこのもに守部据ゑ母い守れども魂ぞ会ひにける

[仮名],つくはねの,をてもこのもに,もりへすゑ,ははいもれども,たまぞあひにける

[_]

[左注]（右十首常陸國歌）

[_]

[校異]

[_]

[ＫＷ],東歌,相聞,茨城県,地名,筑波山,女歌,恋情

3394

[題詞]

[原文]左其呂毛能乎豆久波祢呂能夜麻乃佐吉和須<良>許婆古曽那乎可家奈波賣

[訓読]さ衣の小筑波嶺ろの山の崎忘ら来ばこそ汝を懸けなはめ

[仮名],さごろもの,をづくはねろの,やまのさき,わすらこばこそ,なをかけなはめ

[_]

[左注]（右十首常陸國歌）

[_]

[校異]良延 → 良 [元][類]

[_]

[ＫＷ],東歌,相聞,茨城県,地名,筑波山,別離,恋情,羈旅

3395

[題詞]

[原文]乎豆久波乃祢呂尓都久多思安比太欲波佐波<太>奈利努乎萬多祢天武可聞

[訓読]小筑波の嶺ろに月立し間夜はさはだなりぬをまた寝てむかも

[仮名],をづくはの,ねろにつくたし,あひだよは,さはだなりぬを,またねてむかも

[_]

[左注]（右十首常陸國歌）

[_]

[校異]太尓 → 太 [元][紀][細][矢]

[_]

[ＫＷ],東歌,相聞,茨城県,筑波山,地名,序詞,恋情

3396

[題詞]

[原文]乎都久波乃之氣吉許能麻欲多都登利能目由可汝乎見牟左祢射良奈久尓

[訓読]小筑波の茂き木の間よ立つ鳥の目ゆか汝を見むさ寝ざらなくに

[仮名],をづくはの,しげきこのまよ,たつとりの,めゆかなをみむ,さねざらなくに

[_]

[左注]（右十首常陸國歌）

[_]

[校異]

[_]

[ＫＷ],東歌,相聞,茨城県,地名,筑波山,恋情,別離,羈旅

3397

[題詞]

[原文]比多知奈流奈左可能宇美乃多麻毛許曽比氣波多延須礼阿杼可多延世武

[訓読]常陸なる浪逆の海の玉藻こそ引けば絶えすれあどか絶えせむ

[仮名],ひたちなる,なさかのうみの,たまもこそ,ひけばたえすれ,あどかたえせむ

[_]

[左注]右十首常陸國歌

[_]

[校異]

[_]

[ＫＷ],東歌,相聞,茨城県,地名,北浦,植物,恋情

3398

[題詞]

[原文]比等未奈乃許等波多由登毛波尓思奈能伊思井乃手兒我許<登>奈多延曽祢

[訓読]人皆の言は絶ゆとも埴科の石井の手児が言な絶えそね

[仮名],ひとみなの,ことはたゆとも,はにしなの,いしゐのてごが,ことなたえそね

[_]

[左注]（右四首信濃國歌）

[_]

[校異]等 → 登 [元][類][古][紀]

[_]

[ＫＷ],東歌,相聞,長野県,埴科,地名,伝説,恋情

3399

[題詞]

[原文]信濃道者伊麻能波里美知可里婆祢尓安思布麻之<奈牟> 久都波氣和我世

[訓読]信濃道は今の墾り道刈りばねに足踏ましなむ沓はけ我が背

[仮名],しなぬぢは,いまのはりみち,かりばねに,あしふましなむ,くつはけわがせ

[_]

[左注]（右四首信濃國歌）

[_]

[校異]牟奈 → 奈牟 [元]

[_]

[ＫＷ],東歌,相聞,長野県,女歌,木曽路,地名,恋愛

3400

[題詞]

[原文]信濃奈流知具麻能河泊能左射礼思母伎弥之布美弖婆多麻等比呂波牟

[訓読]信濃なる千曲の川のさざれ石も君し踏みてば玉と拾はむ

[仮名],しなぬなる,ちぐまのかはの,さざれしも,きみしふみてば,たまとひろはむ

[_]

[左注]（右四首信濃國歌）

[_]

[校異]泊 [元] 伯

[_]

[ＫＷ],東歌,相聞,長野県,千曲川,地名,女歌,恋情

3401

[題詞]

[原文]中麻奈尓宇伎乎流布祢能許藝弖奈婆安布許等可多思家布尓思安良受波

[訓読]なかまなに浮き居る船の漕ぎ出なば逢ふことかたし今日にしあらずは

[仮名],なかまなに,うきをるふねの,こぎでなば,あふことかたし,けふにしあらずは

[_]

[左注]右四首信濃國歌

[_]

[校異]

[_]

[ＫＷ],東歌,相聞,長野県,地名,千曲川,別離,女歌,恋情,羈旅

3402

[題詞]

[原文]比能具礼尓宇須比乃夜麻乎古由流日波勢奈能我素Ｒ母佐夜尓布良思都

[訓読]日の暮れに碓氷の山を越ゆる日は背なのが袖もさやに振らしつ

[仮名],ひのぐれに,うすひのやまを,こゆるひは,せなのがそでも,さやにふらしつ

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,碓氷,別離,女歌,恋情,羈旅

3403

[題詞]

[原文]安我古非波麻左香毛可奈思久佐麻久良多胡能伊利野乃於<久>母可奈思母

[訓読]我が恋はまさかも愛し草枕多胡の入野の奥も愛しも

[仮名],あがこひは,まさかもかなし,くさまくら,たごのいりのの,おくもかなしも

[_]

[左注]（右廿二首上野國歌）

[_]

[校異]父 → 久 [代匠記初稿本]

[_]

[ＫＷ],東歌,相聞,群馬県,枕詞,地名,多胡,吉井町,序詞,恋情

3404

[題詞]

[原文]可美都氣努安蘇能麻素武良可伎武太伎奴礼杼安加奴乎安杼加安我世牟

[訓読]上つ毛野安蘇のま麻むらかき抱き寝れど飽かぬをあどか我がせむ

[仮名],かみつけの,あそのまそむら,かきむだき,ぬれどあかぬを,あどかあがせむ

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,序詞,恋情

3405

[題詞]

[原文]可美都氣努乎度能多杼里我可波治尓毛兒良波安波奈毛比等理能未思弖

[訓読]上つ毛野乎度の多杼里が川路にも子らは逢はなもひとりのみして

[仮名],かみつけの,をどのたどりが,かはぢにも,こらはあはなも,ひとりのみして

[_]

[左注]或本歌曰可美都氣乃乎野乃多杼里我安波治尓母世奈波安波奈母美流比登奈思尓 / （右廿二首上野國歌）

[_]

[校異]

[_]

[ＫＷ],東歌,相聞,群馬県,地名,恋情

3405S

[題詞]或本歌曰

[原文]可美都氣乃乎野乃多杼里我安波治尓母世奈波安波奈母美流比登奈思尓

[訓読]上つ毛野小野の多杼里があはぢにも背なは逢はなも見る人なしに

[仮名],かみつけの,をののたどりが,あはぢにも,せなはあはなも,みるひとなしに

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,女歌,恋情

3406

[題詞]

[原文]可美都氣野左野乃九久多知乎里波夜志安礼波麻多牟恵許登之許受登母

[訓読]上つ毛野佐野の茎立ち折りはやし我れは待たむゑ来とし来ずとも

[仮名],かみつけの,さののくくたち,をりはやし,あれはまたむゑ,ことしこずとも

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,高崎,女歌,恋情

3407

[題詞]

[原文]可美都氣努麻具波思麻度尓安佐日左指麻伎良波之母奈安利都追見礼婆

[訓読]上つ毛野まぐはしまとに朝日さしまきらはしもなありつつ見れば

[仮名],かみつけの,まぐはしまとに,あさひさし,まきらはしもな,ありつつみれば

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,序詞,恋愛,逢会

3408

[題詞]

[原文]尓比多夜麻祢尓波都可奈那和尓余曽利波之奈流兒良師安夜尓可奈思<母>

[訓読]新田山嶺にはつかなな我に寄そりはしなる子らしあやに愛しも

[仮名],にひたやま,ねにはつかなな,わによそり,はしなるこらし,あやにかなしも

[_]

[左注]（右廿二首上野國歌）

[_]

[校異]毛 → 母 [元][類][古][紀]

[_]

[ＫＷ],東歌,相聞,群馬県,地名,太田市,金山,うわさ,恋情

3409

[題詞]

[原文]伊香保呂尓安麻久母伊都藝可奴麻豆久比等登於多波布伊射祢志米刀羅

[訓読]伊香保ろに天雲い継ぎかぬまづく人とおたはふいざ寝しめとら

[仮名],いかほろに,あまくもいつぎ,かぬまづく,ひととおたはふ,いざねしめとら

[_]

[左注]（右廿二首上野國歌）

[_]

[校異]奴 [元] 努

[_]

[ＫＷ],東歌,相聞,群馬県,地名,伊香保,人目,うわさ,恋情

3410

[題詞]

[原文]伊香保呂能蘇比乃波里波良祢毛己呂尓於久乎奈加祢曽麻左可思余加婆

[訓読]伊香保ろの沿ひの榛原ねもころに奥をなかねそまさかしよかば

[仮名],いかほろの,そひのはりはら,ねもころに,おくをなかねそ,まさかしよかば

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,伊香保,序詞,恋情

3411

[題詞]

[原文]多胡能祢尓与西都奈波倍弖与須礼騰毛阿尓久夜斯豆之曽能可<抱>与吉尓

[訓読]多胡の嶺に寄せ綱延へて寄すれどもあにくやしづしその顔よきに

[仮名],たごのねに,よせつなはへて,よすれども,あにくやしづし,そのかほよきに

[_]

[左注]（右廿二首上野國歌）

[_]

[校異]之 [元] 久 / 把 → 抱 [矢]

[_]

[ＫＷ],東歌,相聞,群馬県,地名,多胡,吉井町,序詞,怨恨,恋情,口説き

3412

[題詞]

[原文]賀美都家野久路保乃祢呂乃久受葉我多可奈師家兒良尓伊夜射可里久母

[訓読]上つ毛野久路保の嶺ろの葛葉がた愛しけ子らにいや離り来も

[仮名],かみつけの,くろほのねろの,くずはがた,かなしけこらに,いやざかりくも

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,赤城山,序詞,恋情

3413

[題詞]

[原文]刀祢河泊乃可波世毛思良受多太和多里奈美尓安布能須安敝流伎美可母

[訓読]利根川の川瀬も知らず直渡り波にあふのす逢へる君かも

[仮名],とねがはの,かはせもしらず,ただわたり,なみにあふのす,あへるきみかも

[_]

[左注]（右廿二首上野國歌）

[_]

[校異]泊 [元] 伯

[_]

[ＫＷ],東歌,相聞,群馬県,地名,利根川,序詞,女歌,恋愛

3414

[題詞]

[原文]伊香保呂能夜左可能為提尓多都努自能安良波路萬代母佐祢乎佐祢弖婆

[訓読]伊香保ろのやさかのゐでに立つ虹の現はろまでもさ寝をさ寝てば

[仮名],いかほろの,やさかのゐでに,たつのじの,あらはろまでも,さねをさねてば

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,伊香保,序詞,人目,恋愛,逢会

3415

[題詞]

[原文]可美都氣努伊可保乃奴麻尓宇恵古奈<宜> 可久古非牟等夜多祢物得米家武

[訓読]上つ毛野伊香保の沼に植ゑ小水葱かく恋ひむとや種求めけむ

[仮名],かみつけの,いかほのぬまに,うゑこなぎ,かくこひむとや,たねもとめけむ

[_]

[左注]（右廿二首上野國歌）

[_]

[校異]伎 → 宜 [元][類][古]

[_]

[ＫＷ],東歌,相聞,群馬県,地名,伊香保,植物,譬喩,恋情,反省

3416

[題詞]

[原文]可美都氣努可保夜我奴麻能伊波為都良比可波奴礼都追安乎奈多要曽祢

[訓読]上つ毛野可保夜が沼のいはゐつら引かばぬれつつ我をな絶えそね

[仮名],かみつけの,かほやがぬまの,いはゐつら,ひかばぬれつつ,あをなたえそね

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,植物,序詞,採草歌,恋情

3417

[題詞]

[原文]可美都氣努伊奈良能奴麻乃於保為具左与曽尓見之欲波伊麻許曽麻左礼 [柿本朝臣人麻呂歌集出也]

[訓読]上つ毛野伊奈良の沼の大藺草外に見しよは今こそまされ [柿本朝臣人麻呂歌集出也]

[仮名],かみつけの,いならのぬまの,おほゐぐさ,よそにみしよは,いまこそまされ

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,植物,序詞,恋情,作者：柿本人麻呂歌集

3418

[題詞]

[原文]可美都氣<努> 佐野田能奈倍能武良奈倍尓許登波佐太米都伊麻波伊可尓世母

[訓読]上つ毛野佐野田の苗のむら苗に事は定めつ今はいかにせも

[仮名],かみつけの,さのだのなへの,むらなへに,ことはさだめつ,いまはいかにせも

[_]

[左注]（右廿二首上野國歌）

[_]

[校異]奴 → 努 [元][類]

[_]

[ＫＷ],東歌,相聞,群馬県,地名,佐野,高崎,恋情

3419

[題詞]

[原文]伊可保世欲奈可中次下於毛比度路久麻許曽之都等和須礼西奈布母

[訓読]伊香保せよ奈可中次下思ひどろくまこそしつと忘れせなふも

[仮名],いかほせよ,*******,おもひどろ,くまこそしつと,わすれせなふも

[_]

[左注]（右廿二首上野國歌）

[_]

[校異]次 [元][類][古] 吹

[_]

[ＫＷ],東歌,相聞,群馬県,地名,難訓,恋情

3420

[題詞]

[原文]可美都氣努佐野乃布奈波之登里波奈之於也波左久礼騰和波左可流賀倍

[訓読]上つ毛野佐野の舟橋取り離し親は放くれど我は離るがへ

[仮名],かみつけの,さののふなはし,とりはなし,おやはさくれど,わはさかるがへ

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,高崎,恋情,女歌,序詞

3421

[題詞]

[原文]伊香保祢尓可未奈那里曽祢和我倍尓波由恵波奈家杼母兒良尓与里弖曽

[訓読]伊香保嶺に雷な鳴りそね我が上には故はなけども子らによりてぞ

[仮名],いかほねに,かみななりそね,わがへには,ゆゑはなけども,こらによりてぞ

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,伊香保,恋情

3422

[題詞]

[原文]伊可保可是布久日布加奴日安里登伊倍杼安我古非能未思等伎奈可里家利

[訓読]伊香保風吹く日吹かぬ日ありと言へど我が恋のみし時なかりけり

[仮名],いかほかぜ,ふくひふかぬひ,ありといへど,あがこひのみし,ときなかりけり

[_]

[左注]（右廿二首上野國歌）

[_]

[校異]

[_]

[ＫＷ],東歌,相聞,群馬県,地名,伊香保,恋情

3423

[題詞]

[原文]可美都氣努伊可抱乃祢呂尓布路与伎能遊吉須宜可提奴伊毛賀伊敝乃安多里

[訓読]上つ毛野伊香保の嶺ろに降ろ雪の行き過ぎかてぬ妹が家のあたり

[仮名],かみつけの,いかほのねろに,ふろよきの,ゆきすぎかてぬ,いもがいへのあたり

[_]

[左注]右廿二首上野國歌

[_]

[校異]

[_]

[ＫＷ],東歌,相聞,群馬県,地名,伊香保,序詞,恋情

3424

[題詞]

[原文]之母都家野美可母乃夜麻能許奈良能須麻具波思兒呂波多賀家可母多牟

[訓読]下つ毛野みかもの山のこ楢のすまぐはし子ろは誰が笥か持たむ

[仮名],しもつけの,みかものやまの,こならのす,まぐはしころは,たがけかもたむ

[_]

[左注]（右二首下野國歌）

[_]

[校異]

[_]

[ＫＷ],東歌,相聞,栃木県,地名,太田和山,植物,序詞,恋情

3425

[題詞]

[原文]志母都家<努> 安素乃河泊良欲伊之布<麻>受蘇良由登伎奴与奈我己許呂能礼

[訓読]下つ毛野阿蘇の川原よ石踏まず空ゆと来ぬよ汝が心告れ

[仮名],しもつけの,あそのかはらよ,いしふまず,そらゆときぬよ,ながこころのれ

[_]

[左注]右二首下野國歌

[_]

[校異]<> → 努 [西（右書）][元][類][古][紀] / 泊 [元] 伯 / 麻努 → 麻 [西（訂正）][元][類 ][古][紀]

[_]

[ＫＷ],東歌,相聞,栃木県,地名,恋情,口説き,求婚

3426

[題詞]

[原文]安比豆祢能久尓乎佐杼抱美安波奈波婆斯努比尓勢毛等比毛牟須婆佐祢

[訓読]会津嶺の国をさ遠み逢はなはば偲ひにせもと紐結ばさね

[仮名],あひづねの,くにをさどほみ,あはなはば,しのひにせもと,ひもむすばさね

[_]

[左注]（右三首陸奥國歌）

[_]

[校異]毛 [細] 牟

[_]

[ＫＷ],東歌,相聞,福島県,東北地方,地名,会津,磐梯山,悲別,恋情

3427

[題詞]

[原文]筑紫奈留尓抱布兒由恵尓美知能久乃可刀利乎登女乃由比思比毛等久

[訓読]筑紫なるにほふ子ゆゑに陸奥の可刀利娘子の結ひし紐解く

[仮名],つくしなる,にほふこゆゑに,みちのくの,かとりをとめの,ゆひしひもとく

[_]

[左注]（右三首陸奥國歌）

[_]

[校異]

[_]

[ＫＷ],東歌,相聞,福島県,東北地方,地名,筑紫,福岡,遊行女婦,浮気,恋愛,防人

3428

[題詞]

[原文]安太多良乃祢尓布須思之能安里都々毛安礼波伊多良牟祢度奈佐利曽祢

[訓読]安達太良の嶺に伏す鹿猪のありつつも我れは至らむ寝処な去りそね

[仮名],あだたらの,ねにふすししの,ありつつも,あれはいたらむ,ねどなさりそね

[_]

[左注]右三首陸奥國歌

[_]

[校異]

[_]

[ＫＷ],東歌,相聞,福島県,東北地方,地名,二本松市,安達太良山,動物,序詞,恋情

譬喩歌

3429

[題詞]譬喩歌

[原文]等保都安布美伊奈佐保曽江乃水乎都久思安礼乎多能米弖安佐麻之物能乎

[訓読]遠江引佐細江のみをつくし我れを頼めてあさましものを

[仮名],とほつあふみ,いなさほそえの,みをつくし,あれをたのめて,あさましものを

[_]

[左注]右一首遠江國歌

[_]

[校異]

[_]

[ＫＷ],東歌,譬喩歌,静岡県,地名,浜名湖,怨恨,恋愛

3430

[題詞]

[原文]斯太能宇良乎阿佐許求布祢波与志奈之尓許求良米可母与 <余>志許佐流良米

[訓読]志太の浦を朝漕ぐ船はよしなしに漕ぐらめかもよよしこさるらめ

[仮名],しだのうらを,あさこぐふねは,よしなしに,こぐらめかもよ,よしこさるらめ

[_]

[左注]右一首駿河國歌

[_]

[校異]奈 → 余 [元]

[_]

[ＫＷ],東歌,譬喩歌,静岡県,地名,後朝,恋愛

3431

[題詞]

[原文]阿之我里乃安伎奈乃夜麻尓比古布祢乃斯利比可志母與許己波故賀多尓

[訓読]足柄の安伎奈の山に引こ船の後引かしもよここばこがたに

[仮名],あしがりの,あきなのやまに,ひこふねの,しりひかしもよ,ここばこがたに

[_]

[左注]（右三首相模國歌）

[_]

[校異]

[_]

[ＫＷ],東歌,譬喩歌,神奈川県,地名,恋愛

3432

[題詞]

[原文]阿之賀利乃和乎可鶏夜麻能可頭乃木能和乎可豆佐祢母可豆佐可受等母

[訓読]足柄のわを可鶏山のかづの木の我をかづさねも門さかずとも

[仮名],あしがりの,わをかけやまの,かづのきの,わをかづさねも,かづさかずとも

[_]

[左注]（右三首相模國歌）

[_]

[校異]

[_]

[ＫＷ],東歌,譬喩歌,神奈川県,地名,植物,恋愛

3433

[題詞]

[原文]多伎木許流可麻久良夜麻能許太流木乎麻都等奈我伊波婆古非都追夜安良牟

[訓読]薪伐る鎌倉山の木垂る木を松と汝が言はば恋ひつつやあらむ

[仮名],たきぎこる,かまくらやまの,こだるきを,まつとながいはば,こひつつやあらむ

[_]

[左注]右三首相模國歌

[_]

[校異]

[_]

[ＫＷ],東歌,譬喩歌,神奈川県,鎌倉,地名,掛詞,恋情

3434

[題詞]

[原文]可美都家野安蘇夜麻都豆良野乎比呂美波比尓思物能乎安是加多延世武

[訓読]上つ毛野阿蘇山つづら野を広み延ひにしものをあぜか絶えせむ

[仮名],かみつけの,あそやまつづら,のをひろみ,はひにしものを,あぜかたえせむ

[_]

[左注]（右三首上野國歌）

[_]

[校異]

[_]

[ＫＷ],東歌,譬喩歌,群馬県,地名,恋情

3435

[題詞]

[原文]伊可保呂乃蘇比乃波里波良和我吉奴尓都伎与良之母与比多敝登於毛敝婆

[訓読]伊香保ろの沿ひの榛原我が衣に着きよらしもよひたへと思へば

[仮名],いかほろの,そひのはりはら,わがきぬに,つきよらしもよ,ひたへとおもへば

[_]

[左注]（右三首上野國歌）

[_]

[校異]

[_]

[ＫＷ],東歌,譬喩歌,群馬県,地名,伊香保,恋愛

3436

[題詞]

[原文]志良登保布乎尓比多夜麻乃毛流夜麻乃宇良賀礼勢奈<那> 登許波尓毛我母

[訓読]しらとほふ小新田山の守る山のうら枯れせなな常葉にもがも

[仮名],しらとほふ,をにひたやまの,もるやまの,うらがれせなな,とこはにもがも

[_]

[左注]右三首上野國歌

[_]

[校異]<> → 那 [西（右書）][元][紀][温]

[_]

[ＫＷ],東歌,譬喩歌,群馬県,地名,太田市,金山,恋情

3437

[題詞]

[原文]美知乃久能安太多良末由美波自伎於伎弖西良思馬伎那婆都良波可馬可毛

[訓読]陸奥の安達太良真弓はじき置きて反らしめきなば弦はかめかも

[仮名],みちのくの,あだたらまゆみ,はじきおきて,せらしめきなば,つらはかめかも

[_]

[左注]右一首陸奥國歌

[_]

[校異]

[_]

[ＫＷ],東歌,譬喩歌,福島県,東北地方,地名,二本松市,安達太良山,女歌,浮気,恋愛

雜歌

3438

[題詞]雜歌

[原文]都武賀野尓須受我於等伎許由可牟思太能等能乃奈可知師登我里須良思母

[訓読]都武賀野に鈴が音聞こゆ可牟思太の殿のなかちし鳥猟すらしも

[仮名],つむがのに,すずがおときこゆ,かむしだの,とののなかちし,とがりすらしも

[_]

[左注]或本歌曰美都我野尓又曰和久胡思

[_]

[校異]

[_]

[ＫＷ],東歌,雑歌,地名,静岡県,鷹狩り,狩り讃美

3438S

[題詞]或本歌曰又曰

[原文]美都我野尓和久胡思

[訓読]美都我野に若子し

[仮名],みつがのに ,わくごし,

[_]

[左注]

[_]

[校異]

[_]

[ＫＷ],東歌,雑歌,地名,異伝,狩り讃美

3439

[題詞]

[原文]須受我祢乃波由馬宇馬夜能都追美井乃美都乎多麻倍奈伊毛我多太手欲

[訓読]鈴が音の早馬駅家の堤井の水を給へな妹が直手よ

[仮名],すずがねの,はゆまうまやの,つつみゐの,みづをたまへな,いもがただてよ

[_]

[左注]

[_]

[校異]

[_]

[ＫＷ],東歌,雑歌,宿駅,宴席,歌謡

3440

[題詞]

[原文]許乃河泊尓安佐菜安良布兒奈礼毛安礼毛余知乎曽母弖流伊Ｒ兒多婆里尓

[一云麻之毛安礼母]

[訓読]この川に朝菜洗ふ子汝れも我れもよちをぞ持てるいで子給りに [一云ましも我れも]

[_]

[仮名],このかはに,あさなあらふこ,なれもあれも,よちをぞもてる,いでこたばりに,[ましもあれも]

[_]

[左注]

[_]

[校異]泊 [元][紀] 伯 [ＫＷ],東歌,雑歌,戯笑,宴席,異伝,歌謡,東歌

3441

[題詞]

[原文]麻等保久能久毛為尓見由流伊毛我敝尓伊都可伊多良武安由賣安我古麻

[訓読]ま遠くの雲居に見ゆる妹が家にいつか至らむ歩め我が駒

[仮名],まとほくの,くもゐにみゆる,いもがへに,いつかいたらむ,あゆめあがこま

[_]

[左注]柿本朝臣人麻呂歌集曰等保久之弖又曰安由賣久路古<麻>

[_]

[校異]麿 → 麻 [元][類][紀]

[_]

[ＫＷ],東歌,雑歌,作者：柿本人麻呂歌集,異伝,羈旅,恋情,望郷

3441S

[題詞]柿本朝臣人麻呂歌集曰又曰

[原文]等保久之弖安由賣久路古<麻>

[訓読]遠くして歩め黒駒

[仮名],とほくして ,あゆめくろこま

[_]

[左注]

[_]

[校異]

[_]

[ＫＷ],東歌,雑歌,異伝,作者：柿本人麻呂歌集,羈旅,恋情,望郷

3442

[題詞]

[原文]安豆麻治乃手兒乃欲妣左賀古要我祢弖夜麻尓可祢牟毛夜杼里波奈之尓

[訓読]東道の手児の呼坂越えがねて山にか寝むも宿りはなしに

[仮名],あづまぢの,てごのよびさか,こえがねて,やまにかねむも,やどりはなしに

[_]

[左注]

[_]

[校異]

[_]

[ＫＷ],東歌,雑歌,地名,静岡県,蒲原町,羈旅,難渋

3443

[題詞]

[原文]宇良毛奈久和我由久美知尓安乎夜宜乃波里弖多弖礼波物能毛比弖都母

[訓読]うらもなく我が行く道に青柳の張りて立てれば物思ひ出つも

[仮名],うらもなく,わがゆくみちに,あをやぎの,はりてたてれば,ものもひでつも

[_]

[左注]

[_]

[校異]弖 [元][類][古] 豆

[_]

[ＫＷ],東歌,雑歌,植物,羈旅,望郷

3444

[題詞]

[原文]伎波都久乃乎加能久君美良和礼都賣杼故尓毛<美>多奈布西奈等都麻佐祢

[訓読]伎波都久の岡のくくみら我れ摘めど籠にも満たなふ背なと摘まさね

[仮名],きはつくの,をかのくくみら,われつめど,こにもみたなふ,せなとつまさね

[_]

[左注]

[_]

[校異]乃 → 美 [万葉考]

[_]

[ＫＷ],東歌,雑歌,地名,茨城県,真壁郡,植物,野遊び,掛け合い,女歌,歌垣,歌謡,恋愛

3445

[題詞]

[原文]美奈刀<能> 安之我奈可那流多麻古須氣可利己和我西古等許乃敝太思尓

[訓読]港の葦が中なる玉小菅刈り来我が背子床の隔しに

[仮名],みなとの,あしがなかなる,たまこすげ,かりこわがせこ,とこのへだしに

[_]

[左注]

[_]

[校異]安之能 → 能 [元][類][古][紀] [西（訂正左書）] 能也

[_]

[ＫＷ],東歌,雑歌,植物,女歌,恋愛

3446

[題詞]

[原文]伊毛奈呂我都可布河泊豆乃佐<左良乎疑> 安志等比<登>其等加多理与良斯毛

[訓読]妹なろが使ふ川津のささら荻葦と人言語りよらしも

[仮名],いもなろが,つかふかはづの,ささらをぎ,あしとひとごと,かたりよらしも

[_]

[左注]

[_]

[校異]泊 [元][紀] 伯 / 左良乎疑 [西（上書訂正）][元][類][紀] / 等 → 登 [元][類][紀]

[_]

[ＫＷ],東歌,雑歌,植物,うわさ,譬喩,恋愛,遊行女婦

3447

[題詞]

[原文]久佐可氣乃安努奈由可武等波里之美知阿努波由加受弖阿良久佐太知奴

[訓読]草蔭の安努な行かむと墾りし道安努は行かずて荒草立ちぬ

[仮名],くさかげの,あのなゆかむと,はりしみち,あのはゆかずて,あらくさだちぬ

[_]

[左注]

[_]

[校異]

[_]

[ＫＷ],東歌,雑歌,植物,地名,静岡県,浮島沼,枕詞,新道,譬喩

3448

[題詞]

[原文]波奈治良布己能牟可都乎乃乎那能乎能比自尓都久麻提伎美我与母賀母

[訓読]花散らふこの向つ峰の乎那の峰のひじにつくまで君が代もがも

[仮名],はなぢらふ,このむかつをの,をなのをの,ひじにつくまで,きみがよもがも

[_]

[左注]

[_]

[校異]

[_]

[ＫＷ],東歌,雑歌,地名,静岡県,引佐郡,三日ヶ町,尾奈山,寿歌,長久

3449

[題詞]

[原文]思路多倍乃許呂母能素Ｒ乎麻久良我欲安麻許伎久見由奈美多都奈由米

[訓読]白栲の衣の袖を麻久良我よ海人漕ぎ来見ゆ波立つなゆめ

[仮名],しろたへの,ころものそでを,まくらがよ,あまこぎくみゆ,なみたつなゆめ

[_]

[左注]

[_]

[校異]

[_]

[ＫＷ],東歌,雑歌,枕詞,地名,茨城県,古川市,掛詞

3450

[題詞]

[原文]乎久佐乎等乎具佐受家乎等斯抱布祢乃那良敝弖美礼婆乎具佐可<知>馬利

[訓読]乎久佐男と乎具佐受家男と潮舟の並べて見れば乎具佐勝ちめり

[仮名],をくさをと,をぐさずけをと,しほぶねの,ならべてみれば,をぐさかちめり

[_]

[左注]

[_]

[校異]利 → 知 [類]

[_]

[ＫＷ],東歌,雑歌,地名,宴席,戯笑

3451

[題詞]

[原文]左奈都良能乎可尓安波麻伎可奈之伎我 <古>麻波多具等毛和波素登毛波自

[訓読]左奈都良の岡に粟蒔き愛しきが駒は食ぐとも我はそとも追じ

[仮名],さなつらの,をかにあはまき,かなしきが,こまはたぐとも,わはそともはじ

[_]

[左注]

[_]

[校異]古 [西（上書訂正）][元][類][紀]

[_]

[ＫＷ],東歌,雑歌,地名,植物,動物,女歌,宴席

3452

[題詞]

[原文]於毛思路伎野乎婆奈夜吉曽布流久左尓仁比久佐麻自利於非波於布流我尓

[訓読]おもしろき野をばな焼きそ古草に新草交り生ひは生ふるがに

[仮名],おもしろき,のをばなやきそ,ふるくさに,にひくさまじり,おひはおふるがに

[_]

[左注]

[_]

[校異]左 [元][類] 佐

[_]

[ＫＷ],東歌,雑歌,野焼き

3453

[題詞]

[原文]可是<能>等能登抱吉和伎母賀吉西斯伎奴多母登乃久太利麻欲比伎尓家利

[訓読]風の音の遠き我妹が着せし衣手本のくだりまよひ来にけり

[仮名],かぜのとの,とほきわぎもが,きせしきぬ,たもとのくだり,まよひきにけり

[_]

[左注]

[_]

[校異]乃 → 能 [元][類]

[_]

[ＫＷ],東歌,雑歌,枕詞,羈旅,望郷

3454

[題詞]

[原文]尓波尓多都安佐提古夫須麻許余比太尓都麻余之許西祢安佐提古夫須麻

[訓読]庭に立つ麻手小衾今夜だに夫寄しこせね麻手小衾

[仮名],にはにたつ,あさでこぶすま,こよひだに,つまよしこせね,あさでこぶすま

[_]

[左注]

[_]

[校異]

[_]

[ＫＷ],東歌,雑歌,植物,恋情

相聞

3455

[題詞]相聞

[原文]古非思家婆伎麻世和我勢古可伎都楊疑宇礼都美可良思和礼多知麻多牟

[訓読]恋しけば来ませ我が背子垣つ柳末摘み枯らし我れ立ち待たむ

[仮名],こひしけば,きませわがせこ,かきつやぎ,うれつみからし,われたちまたむ

[_]

[左注]

[_]

[校異]

[_]

[ＫＷ],東歌,相聞,女歌,恋情,植物

3456

[題詞]

[原文]宇都世美能夜蘇許登乃敝波思氣久等母安良蘇比可祢弖安乎許登奈須那

[訓読]うつせみの八十言のへは繁くとも争ひかねて我を言なすな

[仮名],うつせみの,やそことのへは,しげくとも,あらそひかねて,あをことなすな

[_]

[左注]

[_]

[校異]

[_]

[ＫＷ],東歌,相聞,うわさ,恋愛,女歌

3457

[題詞]

[原文]宇知日佐須美夜能和我世波夜麻<登>女乃比射麻久其登尓安乎和須良須奈

[訓読]うちひさす宮の我が背は大和女の膝まくごとに我を忘らすな

[仮名],うちひさす,みやのわがせは,やまとめの,ひざまくごとに,あをわすらすな

[_]

[左注]

[_]

[校異]等 → 登 [元][類][古][紀]

[_]

[ＫＷ],東歌,相聞,恋愛,不安,別離,女歌

3458

[題詞]

[原文]奈勢能古夜等里乃乎加恥志奈可太乎礼安乎祢思奈久与伊久豆君麻弖尓

[訓読]汝背の子や等里の岡道しなかだ折れ我を音し泣くよ息づくまでに

[仮名],なせのこや,とりのをかちし,なかだをれ,あをねしなくよ,いくづくまでに

[_]

[左注]

[_]

[校異]

[_]

[ＫＷ],東歌,相聞,地名,恋情,後朝,女歌

3459

[題詞]

[原文]伊祢都氣波可加流安我<手>乎許余比毛可等能乃和久胡我等里弖奈氣可武

[訓読]稲つけばかかる我が手を今夜もか殿の若子が取りて嘆かむ

[仮名],いねつけば,かかるあがてを,こよひもか,とののわくごが,とりてなげかむ

[_]

[左注]

[_]

[校異]手 [西（上書訂正）][元][類][紀]

[_]

[ＫＷ],東歌,相聞,女歌,作業歌,恋愛

3460

[題詞]

[原文]多礼曽許能屋能戸於曽夫流尓布奈未尓和<我>世乎夜里弖伊波布許能戸乎

[訓読]誰れぞこの屋の戸押そぶる新嘗に我が背を遣りて斎ふこの戸を

[仮名],たれぞこの,やのとおそぶる,にふなみに,わがせをやりて,いはふこのとを

[_]

[左注]

[_]

[校異]家 → 我 [元][類][古]

[_]

[ＫＷ],東歌,相聞,女歌,新嘗,咎め歌,妻問い

3461

[題詞]

[原文]安是登伊敝可佐宿尓安波奈久尓真日久礼弖与比奈波許奈尓安家奴思太久流

[訓読]あぜと言へかさ寝に逢はなくにま日暮れて宵なは来なに明けぬしだ来る

[仮名],あぜといへか,さねにあはなくに,まひくれて,よひなはこなに,あけぬしだくる

[_]

[左注]

[_]

[校異]

[_]

[ＫＷ],東歌,相聞,女歌,恋情,妻問い,怨恨

3462

[題詞]

[原文]安志比奇乃夜末佐波妣登乃比登佐波尓麻奈登伊布兒我安夜尓可奈思佐

[訓読]あしひきの山沢人の人さはにまなと言ふ子があやに愛しさ

[仮名],あしひきの,やまさはびとの,ひとさはに,まなといふこが,あやにかなしさ

[_]

[左注]

[_]

[校異]

[_]

[ＫＷ],東歌,相聞,枕詞,恋情

3463

[題詞]

[原文]麻等保久能野尓毛安波奈牟己許呂奈久佐刀乃美奈可尓安敝流世奈可母

[訓読]ま遠くの野にも逢はなむ心なく里のみ中に逢へる背なかも

[仮名],まとほくの,のにもあはなむ,こころなく,さとのみなかに,あへるせなかも

[_]

[左注]

[_]

[校異]

[_]

[ＫＷ],東歌,相聞,人目,うわさ,恋愛,女歌

3464

[題詞]

[原文]比登其登乃之氣吉尓余里弖麻乎其母能於夜自麻久良波和波麻可自夜毛

[訓読]人言の繁きによりてまを薦の同じ枕は我はまかじやも

[仮名],ひとごとの,しげきによりて,まをごもの,おやじまくらは,わはまかじやも

[_]

[左注]

[_]

[校異]

[_]

[ＫＷ],東歌,相聞,うわさ,恋愛,女歌

3465

[題詞]

[原文]巨麻尓思吉比毛登伎佐氣弖奴流我倍尓安杼世呂登可母安夜尓可奈之伎

[訓読]高麗錦紐解き放けて寝るが上にあどせろとかもあやに愛しき

[仮名],こまにしき,ひもときさけて,ぬるがへに,あどせろとかも,あやにかなしき

[_]

[左注]

[_]

[校異]

[_]

[ＫＷ],東歌,相聞,恋情,女歌

3466

[題詞]

[原文]麻可奈思美奴礼婆許登尓豆佐祢奈敝波己許呂乃緒呂尓能里弖可奈思母

[訓読]ま愛しみ寝れば言に出さ寝なへば心の緒ろに乗りて愛しも

[仮名],まかなしみ,ぬればことにづ,さねなへば,こころのをろに,のりてかなしも

[_]

[左注]

[_]

[校異]

[_]

[ＫＷ],東歌,相聞,うわさ,恋情,女歌

3467

[題詞]

[原文]於久夜麻能真木乃伊多度乎等杼登之弖和<我>比良可武尓伊利伎弖奈左祢

[訓読]奥山の真木の板戸をとどとして我が開かむに入り来て寝さね

[仮名],おくやまの,まきのいたとを,とどとして,わがひらかむに,いりきてなさね

[_]

[左注]

[_]

[校異]我 [西（上書訂正）][元][類][古][紀]

[_]

[ＫＷ],東歌,相聞,妻問い,恋愛

3468

[題詞]

[原文]夜麻杼里乃乎呂能<波>都乎尓可賀美可家刀奈布倍美許曽奈尓与曽利鶏米

[訓読]山鳥の峰ろのはつをに鏡懸け唱ふべみこそ汝に寄そりけめ

[仮名],やまとりの,をろのはつをに,かがみかけ,となふべみこそ,なによそりけめ

[_]

[左注]

[_]

[校異]<> → 波 [西（左書）][元][類][紀]

[_]

[ＫＷ],東歌,相聞,うわさ,恋愛,神祭り

3469

[題詞]

[原文]由布氣尓毛許余比登乃良路和賀西奈波阿是曽母許与比与斯呂伎麻左奴

[訓読]夕占にも今夜と告らろ我が背なはあぜぞも今夜寄しろ来まさぬ

[仮名],ゆふけにも,こよひとのらろ,わがせなは,あぜぞもこよひ,よしろきまさぬ

[_]

[左注]

[_]

[校異]

[_]

[ＫＷ],東歌,相聞,女歌,妻問い,恋情

3470

[題詞]

[原文]安比見弖波千等世夜伊奴流伊奈乎加<母> 安礼也思加毛布伎美末知我弖尓

[柿本朝臣人麻呂歌集出也]

[訓読]相見ては千年やいぬるいなをかも我れやしか思ふ君待ちがてに [柿本朝臣人麻呂歌集出也]

[_]

[仮名],あひみては,ちとせやいぬる,いなをかも,あれやしかもふ,きみまちがてに

[_]

[左注]

[_]

[校異]毛 → 母 [類][紀] [ＫＷ],東歌,相聞,女歌,恋情,作者：柿本人麻呂歌集

3471

[題詞]

[原文]思麻良久波祢都追母安良牟乎伊米能未尓母登奈見要都追安乎祢思奈久流

[訓読]しまらくは寝つつもあらむを夢のみにもとな見えつつ我を音し泣くる

[仮名],しまらくは,ねつつもあらむを,いめのみに,もとなみえつつ,あをねしなくる

[_]

[左注]

[_]

[校異]

[_]

[ＫＷ],東歌,相聞,恋情,女歌

3472

[題詞]

[原文]比登豆麻等安是可曽乎伊波牟志可良<婆>加刀奈里乃伎奴乎可里弖伎奈波毛

[訓読]人妻とあぜかそを言はむしからばか隣の衣を借りて着なはも

[仮名],ひとづまと,あぜかそをいはむ,しからばか,となりのきぬを,かりてきなはも

[_]

[左注]

[_]

[校異]波 → 婆 [元][紀][古]

[_]

[ＫＷ],東歌,相聞,怨恨,恋情

3473

[題詞]

[原文]左努夜麻尓宇都也乎能登乃等抱可騰母祢毛等可兒呂賀於<母>尓美要都留

[訓読]左努山に打つや斧音の遠かども寝もとか子ろが面に見えつる

[仮名],さのやまに,うつやをのとの,とほかども,ねもとかころが,おもにみえつる

[_]

[左注]

[_]

[校異]由 → 母 [万葉考]

[_]

[ＫＷ],東歌,相聞,地名,群馬県,高崎市,栃木県,佐野市,羈旅,恋情,序詞

3474

[題詞]

[原文]宇恵太氣能毛登左倍登与美伊Ｒ弖伊奈婆伊豆思牟伎弖可伊毛我奈氣可牟

[訓読]植ゑ竹の本さへ響み出でて去なばいづし向きてか妹が嘆かむ

[仮名],うゑだけの,もとさへとよみ,いでていなば,いづしむきてか,いもがなげかむ

[_]

[左注]

[_]

[校異]

[_]

[ＫＷ],東歌,相聞,羈旅,別離,恋愛,植物

3475

[題詞]

[原文]古非都追母乎良牟等須礼杼遊布麻夜万可久礼之伎美乎於母比可祢都母

[訓読]恋ひつつも居らむとすれど遊布麻山隠れし君を思ひかねつも

[仮名],こひつつも,をらむとすれど,ゆふまやま,かくれしきみを,おもひかねつも

[_]

[左注]

[_]

[校異]

[_]

[ＫＷ],東歌,相聞,地名,女歌,別離,羈旅

3476

[題詞]

[原文]宇倍兒奈波和奴尓故布奈毛多刀都久能努賀奈敝由家婆故布思可流奈母

[訓読]うべ子なは我ぬに恋ふなも立と月のぬがなへ行けば恋しかるなも

[仮名],うべこなは,わぬにこふなも,たとつくの,ぬがなへゆけば,こふしかるなも

[_]

[左注]或本歌末句曰奴我奈敝由家杼和<奴><由賀>乃敝波

[_]

[校異]努 → 奴 [元][類][紀] / 賀由 → 由賀 [万葉集略解]

[_]

[ＫＷ],東歌,相聞,羈旅,恋情

3476S

[題詞]或本歌末句曰

[原文]奴我奈敝由家杼和<奴><由賀>乃敝波

[訓読]ぬがなへ行けど我ぬ行がのへば

[仮名],ぬがなへゆけど,わぬゆがのへば

[_]

[左注]

[_]

[校異]

[_]

[ＫＷ],東歌,相聞,恋情,異伝

3477

[題詞]

[原文]安都麻道乃手兒乃欲婢佐可古要弖伊奈婆安礼波古非牟奈能知波安比奴登母

[訓読]東路の手児の呼坂越えて去なば我れは恋ひむな後は逢ひぬとも

[仮名],あづまぢの,てごのよびさか,こえていなば,あれはこひむな,のちはあひぬとも

[_]

[左注]

[_]

[校異]

[_]

[ＫＷ],東歌,相聞,地名,静岡県,蒲原町,羈旅,恋情

3478

[題詞]

[原文]等保斯等布故奈乃思良祢尓阿抱思太毛安波乃敝思太毛奈尓己曽与佐礼

[訓読]遠しとふ故奈の白嶺に逢ほしだも逢はのへしだも汝にこそ寄され

[仮名],とほしとふ,こなのしらねに,あほしだも,あはのへしだも,なにこそよされ

[_]

[左注]

[_]

[校異]

[_]

[ＫＷ],東歌,相聞,地名,群馬県,白根山,石川県,白山,うわさ,恋愛,羈旅

3479

[題詞]

[原文]安可見夜麻久左祢可利曽氣安波須賀倍安良蘇布伊毛之安夜尓可奈之毛

[訓読]安可見山草根刈り除け逢はすがへ争ふ妹しあやに愛しも

[仮名],あかみやま,くさねかりそけ,あはすがへ,あらそふいもし,あやにかなしも

[_]

[左注]

[_]

[校異]

[_]

[ＫＷ],東歌,相聞,地名,栃木県,佐野市,赤見町,恋愛

3480

[題詞]

[原文]於保伎美乃美己等可思古美可奈之伊毛我多麻久良波奈礼欲太知伎努可母

[訓読]大君の命畏み愛し妹が手枕離れ夜立ち来のかも

[仮名],おほきみの,みことかしこみ,かなしいもが,たまくらはなれ,よだちきのかも

[_]

[左注]

[_]

[校異]

[_]

[ＫＷ],東歌,相聞,防人,恋情,羈旅,出発,別離

3481

[題詞]

[原文]安利伎奴乃佐恵々々之豆美伊敝能伊母尓毛乃伊波受伎尓弖於毛比具流之母

[訓読]あり衣のさゑさゑしづみ家の妹に物言はず来にて思ひ苦しも

[仮名],ありきぬの,さゑさゑしづみ,いへのいもに,ものいはずきにて,おもひぐるしも

[_]

[左注]柿本朝臣人麻呂歌集中出見上已<訖>也

[_]

[校異]説 → 訖 [類][紀][古][矢]

[_]

[ＫＷ],東歌,相聞,作者：柿本人麻呂歌集,重出,羈旅,出発,別離,恋情

3482

[題詞]

[原文]可良許呂毛須蘇乃宇知可倍安波祢杼毛家思吉己許呂乎安我毛波奈久尓

[訓読]韓衣裾のうち交へ逢はねども異しき心を我が思はなくに

[仮名],からころも,すそのうちかへ,あはねども,けしきこころを,あがもはなくに

[_]

[左注]或本歌曰可良己呂母須素能宇知可比阿波奈敝婆祢奈敝乃可良尓許等多可利都母

[_]

[校異]

[_]

[ＫＷ],東歌,相聞,恋愛,序詞

3482S

[題詞]或本歌曰

[原文]可良己呂母須素能宇知可比阿波奈敝婆祢奈敝乃可良尓許等多可利都母

[訓読]韓衣裾のうち交ひ逢はなへば寝なへのからに言痛かりつも

[仮名]からころも,すそのうちかひ,あはなへば,ねなへのからに,ことたかりつも

[_]

[左注]

[_]

[校異]

[_]

[ＫＷ],東歌,相聞,うわさ,恋愛,異伝

3483

[題詞]

[原文]比流等家波等<家>奈敝比毛乃和賀西奈尓阿比与流等可毛欲流等家也須家

[訓読]昼解けば解けなへ紐の我が背なに相寄るとかも夜解けやすけ

[仮名],ひるとけば,とけなへひもの,わがせなに,あひよるとかも,よるとけやすけ

[_]

[左注]

[_]

[校異]<> → 家 [西（右書）][元][類][古][紀]

[_]

[ＫＷ],東歌,相聞,女歌,恋情,妻問い

3484

[題詞]

[原文]安左乎良乎遠家尓布須左尓宇麻受登毛安須伎西佐米也伊射西乎騰許尓

[訓読]麻苧らを麻笥にふすさに績まずとも明日着せさめやいざせ小床に

[仮名],あさをらを,をけにふすさに,うまずとも,あすきせさめや,いざせをどこに

[_]

[左注]

[_]

[校異]

[_]

[ＫＷ],東歌,相聞,恋愛

3485

[題詞]

[原文]都流伎多知身尓素布伊母乎等里見我祢哭乎曽奈伎都流手兒尓安良奈久尓

[訓読]剣大刀身に添ふ妹を取り見がね音をぞ泣きつる手児にあらなくに

[仮名],つるぎたち,みにそふいもを,とりみがね,ねをぞなきつる,てごにあらなくに

[_]

[左注]

[_]

[校異]

[_]

[ＫＷ],東歌,相聞,枕詞,恋愛

3486

[題詞]

[原文]可奈思伊毛乎由豆加奈倍麻伎母許呂乎乃許登等思伊波婆伊夜可多麻斯尓

[訓読]愛し妹を弓束並べ巻きもころ男のこととし言はばいや勝たましに

[仮名],かなしいもを,ゆづかなべまき,もころをの,こととしいはば,いやかたましに

[_]

[左注]

[_]

[校異]

[_]

[ＫＷ],東歌,相聞,恋情,逢会

3487

[題詞]

[原文]安豆左由美須恵尓多麻末吉可久須酒曽宿莫奈那里尓思於久乎可奴加奴

[訓読]梓弓末に玉巻きかくすすぞ寝なななりにし奥をかぬかぬ

[仮名],あづさゆみ,すゑにたままき,かくすすぞ,ねなななりにし,おくをかぬかぬ

[_]

[左注]

[_]

[校異]

[_]

[ＫＷ],東歌,相聞,恋情

3488

[題詞]

[原文]於布之毛等許乃母登夜麻乃麻之波尓毛能良奴伊毛我名可多尓伊弖牟可母

[訓読]生ふしもとこの本山のましばにも告らぬ妹が名かたに出でむかも

[仮名],おふしもと,このもとやまの,ましばにも,のらぬいもがな,かたにいでむかも

[_]

[左注]

[_]

[校異]

[_]

[ＫＷ],東歌,相聞,うわさ,植物,不安,恋愛

3489

[題詞]

[原文]安豆左由美欲良能夜麻邊能之牙可久尓伊毛呂乎多弖天左祢度波良布母

[訓読]梓弓欲良の山辺の茂かくに妹ろを立ててさ寝処払ふも

[仮名],あづさゆみ,よらのやまへの,しげかくに,いもろをたてて,さねどはらふも

[_]

[左注]

[_]

[校異]

[_]

[ＫＷ],東歌,相聞,地名,枕詞,恋愛

3490

[題詞]

[原文]安都左由美須恵波余里祢牟麻左可許曽比等目乎於保美奈乎波思尓於家礼

[柿本朝臣人麻呂歌集出也]

[訓読]梓弓末は寄り寝むまさかこそ人目を多み汝をはしに置けれ [柿本朝臣人麻呂歌集出也]

[_]

[仮名],あづさゆみ,すゑはよりねむ,まさかこそ,ひとめをおほみ,なをはしにおけれ

[_]

[左注]

[_]

[校異] [ＫＷ],東歌,相聞,人目,うわさ,枕詞,恋情,作者：柿本人麻呂歌集

3491

[題詞]

[原文]楊奈疑許曽伎礼波伴要須礼余能比等乃古非尓思奈武乎伊可尓世余等曽

[訓読]柳こそ伐れば生えすれ世の人の恋に死なむをいかにせよとぞ

[仮名],やなぎこそ,きればはえすれ,よのひとの,こひにしなむを,いかにせよとぞ

[_]

[左注]

[_]

[校異]

[_]

[ＫＷ],東歌,相聞,植物,恋情,女歌

3492

[題詞]

[原文]乎夜麻田乃伊氣能都追美尓左須楊奈疑奈里毛奈良受毛奈等布多里波母

[訓読]小山田の池の堤にさす柳成りも成らずも汝と二人はも

[仮名],をやまだの,いけのつつみに,さすやなぎ,なりもならずも,なとふたりはも

[_]

[左注]

[_]

[校異]

[_]

[ＫＷ],東歌,相聞,植物,恋情

3493

[題詞]

[原文]於曽波夜母奈乎許曽麻多賣牟可都乎能四比乃故夜提能安比波多<我>波自

[訓読]遅速も汝をこそ待ため向つ峰の椎の小やで枝の逢ひは違はじ

[仮名],おそはやも,なをこそまため,むかつをの,しひのこやでの,あひはたがはじ

[_]

[左注]或本歌曰於曽波夜毛伎美乎思麻多武牟可都乎能思比乃佐要太能登吉波須具登母

[_]

[校異]家 → 我 [元][類]

[_]

[ＫＷ],東歌,相聞,植物,恋情,異伝

3493S

[題詞]或本歌曰

[原文]於曽波夜毛伎美乎思麻多武牟可都乎能思比乃佐要太能登吉波須具登母

[訓読]遅速も君をし待たむ向つ峰の椎のさ枝の時は過ぐとも

[仮名],おそはやも,きみをしまたむ,むかつをの,しひのさえだの,ときはすぐとも

[_]

[左注]

[_]

[校異]

[_]

[ＫＷ],東歌,相聞,異伝,植物,恋情

3494

[題詞]

[原文]兒毛知夜麻和可加敝流弖能毛美都麻弖宿毛等和波毛布汝波安杼可毛布

[訓読]子持山若かへるでのもみつまで寝もと我は思ふ汝はあどか思ふ

[仮名],こもちやま,わかかへるでの,もみつまで,ねもとわはもふ,なはあどかもふ

[_]

[左注]

[_]

[校異]

[_]

[ＫＷ],東歌,相聞,地名,群馬県,子持村,恋情,植物

3495

[題詞]

[原文]伊波保呂乃蘇比能和可麻都可藝里登也伎美我伎麻左奴宇良毛等奈久文

[訓読]巌ろの沿ひの若松限りとや君が来まさぬうらもとなくも

[仮名],いはほろの,そひのわかまつ,かぎりとや,きみがきまさぬ,うらもとなくも

[_]

[左注]

[_]

[校異]文 [細] 毛

[_]

[ＫＷ],東歌,相聞,植物,怨恨,恋情,女歌

3496

[題詞]

[原文]多知婆奈乃古婆乃波奈里我於毛布奈牟己許呂宇都久思伊弖安礼波伊可奈

[訓読]橘の古婆の放髪が思ふなむ心うつくしいで我れは行かな

[仮名],たちばなの,こばのはなりが,おもふなむ,こころうつくし,いであれはいかな

[_]

[左注]

[_]

[校異]

[_]

[ＫＷ],東歌,相聞,地名,神奈川県,川崎市,恋情

3497

[題詞]

[原文]可波加美能祢自路多可我夜安也尓阿夜尓左宿佐寐弖許曽己登尓弖尓思可

[訓読]川上の根白高萱あやにあやにさ寝さ寝てこそ言に出にしか

[仮名],かはかみの,ねじろたかがや,あやにあやに,さねさねてこそ,ことにでにしか

[_]

[左注]

[_]

[校異]

[_]

[ＫＷ],東歌,相聞,植物,恋愛,譬喩,うわさ

3498

[題詞]

[原文]宇奈波良乃根夜波良古須氣安麻多安礼婆伎美波和須良酒和礼和須流礼夜

[訓読]海原の根柔ら小菅あまたあれば君は忘らす我れ忘るれや

[仮名],うなはらの,ねやはらこすげ,あまたあれば,きみはわすらす,われわするれや

[_]

[左注]

[_]

[校異]

[_]

[ＫＷ],東歌,相聞,植物,譬喩,女歌,怨恨,恋情

3499

[題詞]

[原文]乎可尓与西和我可流加夜能佐祢加夜能麻許等奈其夜波祢呂等敝奈香母

[訓読]岡に寄せ我が刈る萱のさね萱のまことなごやは寝ろとへなかも

[仮名],をかによせ,わがかるかやの,さねかやの,まことなごやは,ねろとへなかも

[_]

[左注]

[_]

[校異]

[_]

[ＫＷ],東歌,相聞,植物,譬喩,恋愛,勧誘

3500

[題詞]

[原文]牟良佐伎波根乎可母乎布流比等乃兒能宇良我奈之家乎祢乎遠敝奈久尓

[訓読]紫草は根をかも終ふる人の子のうら愛しけを寝を終へなくに

[仮名],むらさきは,ねをかもをふる,ひとのこの,うらがなしけを,ねををへなくに

[_]

[左注]

[_]

[校異]

[_]

[ＫＷ],東歌,相聞,植物,譬喩,恋愛

3501

[題詞]

[原文]安波乎呂能乎呂田尓於波流多波美豆良比可婆奴流奴留安乎許等奈多延

[訓読]安波峰ろの峰ろ田に生はるたはみづら引かばぬるぬる我を言な絶え

[仮名],あはをろの,をろたにおはる,たはみづら,ひかばぬるぬる,あをことなたえ

[_]

[左注]

[_]

[校異]

[_]

[ＫＷ],東歌,相聞,地名,千葉県,植物,序詞,女歌,恋情

3502

[題詞]

[原文]和我目豆麻比等波左久礼杼安佐我保能等思佐倍己其登和波佐可流我倍

[訓読]我が目妻人は放くれど朝顔のとしさへこごと我は離るがへ

[仮名],わがめづま,ひとはさくれど,あさがほの,としさへこごと,わはさかるがへ

[_]

[左注]

[_]

[校異]

[_]

[ＫＷ],東歌,相聞,恋情,人目,枕詞

3503

[題詞]

[原文]安齊可我多志保悲乃由多尓於毛敝良婆宇家良我波奈乃伊呂尓弖米也母

[訓読]安齊可潟潮干のゆたに思へらばうけらが花の色に出めやも

[仮名],あせかがた,しほひのゆたに,おもへらば,うけらがはなの,いろにでめやも

[_]

[左注]

[_]

[校異]

[_]

[ＫＷ],東歌,相聞,地名,植物,恋情,序詞

3504

[題詞]

[原文]波流敝左久布治能宇良葉乃宇良夜須尓左奴流夜曽奈伎兒呂乎之毛倍婆

[訓読]春へ咲く藤の末葉のうら安にさ寝る夜ぞなき子ろをし思へば

[仮名],はるへさく,ふぢのうらばの,うらやすに,さぬるよぞなき,ころをしもへば

[_]

[左注]

[_]

[校異]

[_]

[ＫＷ],東歌,相聞,植物,序詞,恋情

3505

[題詞]

[原文]宇知比佐都美夜能瀬河泊能可保婆奈能孤悲天香眠良武 <伎>曽母許余比毛

[訓読]うちひさつ宮能瀬川のかほ花の恋ひてか寝らむ昨夜も今夜も

[仮名],うちひさつ,みやのせがはの,かほばなの,こひてかぬらむ,きぞもこよひも

[_]

[左注]

[_]

[校異]泊 [元] 伯 / <> → 伎 [西（左書）][元][類][古]

[_]

[ＫＷ],東歌,相聞,地名,長野県,植物,恋情

3506

[題詞]

[原文]尓比牟路能許騰伎尓伊多礼婆波太須酒伎穂尓弖之伎美我見延奴己能許呂

[訓読]新室のこどきに至ればはだすすき穂に出し君が見えぬこのころ

[仮名],にひむろの,こどきにいたれば,はだすすき,ほにでしきみが,みえぬこのころ

[_]

[左注]

[_]

[校異]

[_]

[ＫＷ],東歌,相聞,諸物,恋情,女歌

3507

[題詞]

[原文]多尓世婆美弥<年>尓波比多流多麻可豆良多延武能己許呂和我母波奈久尓

[訓読]谷狭み峰に延ひたる玉葛絶えむの心我が思はなくに

[仮名],たにせばみ,みねにはひたる,たまかづら,たえむのこころ,わがもはなくに

[_]

[左注]

[_]

[校異]羊 → 年 [類][古][紀]

[_]

[ＫＷ],東歌,相聞,植物,序詞,恋情

3508

[題詞]

[原文]芝付乃御宇良佐伎奈流根都古具佐安比見受安良婆安礼古非米夜母

[訓読]芝付の御宇良崎なるねつこ草相見ずあらば我れ恋ひめやも

[仮名],しばつきの,みうらさきなる,ねつこぐさ,あひみずあらば,あれこひめやも

[_]

[左注]

[_]

[校異]

[_]

[ＫＷ],東歌,相聞,地名,神奈川県,植物,恋情,序詞

3509

[題詞]

[原文]多久夫須麻之良夜麻可是能宿奈敝杼母古呂賀於曽伎能安路許曽要志母

[訓読]栲衾白山風の寝なへども子ろがおそきのあろこそえしも

[仮名],たくぶすま,しらやまかぜの,ねなへども,ころがおそきの,あろこそえしも

[_]

[左注]

[_]

[校異]

[_]

[ＫＷ],東歌,相聞,恋情,地名,石川県

3510

[題詞]

[原文]美蘇良由久 <君>母尓毛我母奈家布由伎弖伊母尓許等<杼>比安須可敝里許武

[訓読]み空行く雲にもがもな今日行きて妹に言どひ明日帰り来む

[仮名],みそらゆく,くもにもがもな,けふゆきて,いもにことどひ,あすかへりこむ

[_]

[左注]

[_]

[校異]君尓 → 君 [西（訂正）][類][紀][細] / 抒 → 杼 [類][紀][細]

[_]

[ＫＷ],東歌,相聞,恋情,羈旅,別離

3511

[題詞]

[原文]安乎祢呂尓多奈婢久君母能伊佐欲比尓物能乎曽於毛布等思乃許能己呂

[訓読]青嶺ろにたなびく雲のいさよひに物をぞ思ふ年のこのころ

[仮名],あをねろに,たなびくくもの,いさよひに,ものをぞおもふ,としのこのころ

[_]

[左注]

[_]

[校異]

[_]

[ＫＷ],東歌,相聞,恋情

3512

[題詞]

[原文]比登祢呂尓伊波流毛能可良安乎祢呂尓伊佐欲布久母能余曽里都麻波母

[訓読]一嶺ろに言はるものから青嶺ろにいさよふ雲の寄そり妻はも

[仮名],ひとねろに,いはるものから,あをねろに,いさよふくもの,よそりづまはも

[_]

[左注]

[_]

[校異]

[_]

[ＫＷ],東歌,相聞,恋情,うわさ

3513

[題詞]

[原文]由布佐礼婆美夜麻乎左良奴尓努具母能安是可多要牟等伊比之兒呂<波>母

[訓読]夕さればみ山を去らぬ布雲のあぜか絶えむと言ひし子ろはも

[仮名],ゆふされば,みやまをさらぬ,にのぐもの,あぜかたえむと,いひしころはも

[_]

[左注]

[_]

[校異]婆 → 波 [元]

[_]

[ＫＷ],東歌,相聞,序詞,恋情

3514

[題詞]

[原文]多可伎祢尓久毛能都久能須和礼左倍尓伎美尓都吉奈那多可祢等毛比弖

[訓読]高き嶺に雲のつくのす我れさへに君につきなな高嶺と思ひて

[仮名],たかきねに,くものつくのす,われさへに,きみにつきなな,たかねともひて

[_]

[左注]

[_]

[校異]

[_]

[ＫＷ],東歌,相聞,恋情

3515

[題詞]

[原文]阿我於毛乃和須礼牟之太波久尓波布利祢尓多都久毛乎見都追之努波西

[訓読]我が面の忘れむしだは国はふり嶺に立つ雲を見つつ偲はせ

[仮名],あがおもの,わすれむしだは,くにはふり,ねにたつくもを,みつつしのはせ

[_]

[左注]

[_]

[校異]

[_]

[ＫＷ],東歌,相聞,女歌,恋情,望郷,羈旅

3516

[題詞]

[原文]對馬能祢波之多具毛安良南敷可牟能祢尓多奈婢久君毛乎見都追思努<波>毛

[訓読]対馬の嶺は下雲あらなふ可牟の嶺にたなびく雲を見つつ偲はも

[仮名],つしまのねは,したぐもあらなふ,かむのねに,たなびくくもを,みつつしのはも

[_]

[左注]

[_]

[校異]婆 → 波 [元][類][紀]

[_]

[ＫＷ],東歌,相聞,地名,対馬,長崎県,望郷,羈旅,防人

3517

[題詞]

[原文]思良久毛能多要尓之伊毛乎阿是西呂等許己呂尓能里弖許己婆可那之家

[訓読]白雲の絶えにし妹をあぜせろと心に乗りてここば愛しけ

[仮名],しらくもの,たえにしいもを,あぜせろと,こころにのりて,ここばかなしけ

[_]

[左注]

[_]

[校異]

[_]

[ＫＷ],東歌,相聞,恋情,別離

3518

[題詞]

[原文]伊波能倍尓伊可賀流久毛能可努麻豆久比等曽於多波布伊射祢之賣刀良

[訓読]岩の上にいかかる雲のかのまづく人ぞおたはふいざ寝しめとら

[仮名],いはのへに,いかかるくもの,かのまづく,ひとぞおたはふ,いざねしめとら

[_]

[左注]

[_]

[校異]

[_]

[ＫＷ],東歌,相聞,序詞,恋情

3519

[題詞]

[原文]奈我波伴尓己良例安波由久安乎久毛能伊弖来和伎母兒安必見而由可武

[訓読]汝が母に嘖られ我は行く青雲の出で来我妹子相見て行かむ

[仮名],ながははに,こられあはゆく,あをくもの,いでこわぎもこ,あひみてゆかむ

[_]

[左注]

[_]

[校異]

[_]

[ＫＷ],東歌,相聞,恋情

3520

[題詞]

[原文]於毛可多能和須礼牟之太波於抱野呂尓多奈婢久君母乎見都追思努波牟

[訓読]面形の忘れむしだは大野ろにたなびく雲を見つつ偲はむ

[仮名],おもかたの,わすれむしだは,おほのろに,たなびくくもを,みつつしのはむ

[_]

[左注]

[_]

[校異]

[_]

[ＫＷ],東歌,相聞,恋情,望郷,羈旅

3521

[題詞]

[原文]可良須等布於保乎曽杼里能麻左Ｒ尓毛伎麻左奴伎美乎許呂久等曽奈久

[訓読]烏とふ大をそ鳥のまさでにも来まさぬ君をころくとぞ鳴く

[仮名],からすとふ,おほをそとりの,まさでにも,きまさぬきみを,ころくとぞなく

[_]

[左注]

[_]

[校異]

[_]

[ＫＷ],東歌,相聞,動物,恋情,女歌

3522

[題詞]

[原文]伎曽許曽波兒呂等左宿之香久毛能宇倍由奈伎由久多豆乃麻登保久於毛保由

[訓読]昨夜こそば子ろとさ寝しか雲の上ゆ鳴き行く鶴の間遠く思ほゆ

[仮名],きぞこそば,ころとさねしか,くものうへゆ,なきゆくたづの,まとほくおもほゆ

[_]

[左注]

[_]

[校異]

[_]

[ＫＷ],東歌,相聞,動物,恋情

3523

[題詞]

[原文]佐可故要弖阿倍乃田能毛尓為流多豆乃等毛思吉伎美波安須左倍母我毛

[訓読]坂越えて安倍の田の面に居る鶴のともしき君は明日さへもがも

[仮名],さかこえて,あへのたのもに,ゐるたづの,ともしききみは,あすさへもがも

[_]

[左注]

[_]

[校異]

[_]

[ＫＷ],東歌,相聞,地名,静岡県,序詞,動物,恋情,女歌

3524

[題詞]

[原文]麻乎其母能布能<末>知可久弖安波奈敝波於吉都麻可母能奈氣伎曽安我須流

[訓読]まを薦の節の間近くて逢はなへば沖つま鴨の嘆きぞ我がする

[仮名],まをごもの,ふのまちかくて,あはなへば,おきつまかもの,なげきぞあがする

[_]

[左注]

[_]

[校異]未 → 末 [細]

[_]

[ＫＷ],東歌,相聞,植物,動物,序詞,恋情

3525

[題詞]

[原文]水久君野尓可母能波抱能須兒呂我宇倍尓許等乎呂波敝而伊麻太宿奈布母

[訓読]水久君野に鴨の這ほのす子ろが上に言緒ろ延へていまだ寝なふも

[仮名],みくくのに,かものはほのす,ころがうへに,ことをろはへて,いまだねなふも

[_]

[左注]

[_]

[校異]

[_]

[ＫＷ],東歌,相聞,地名,動物,恋情

3526

[題詞]

[原文]奴麻布多都可欲波等里我栖安我己許呂布多由久奈母等奈与母波里曽祢

[訓読]沼二つ通は鳥が巣我が心二行くなもとなよ思はりそね

[仮名],ぬまふたつ,かよはとりがす,あがこころ,ふたゆくなもと,なよもはりそね

[_]

[左注]

[_]

[校異]

[_]

[ＫＷ],東歌,相聞,恋愛

3527

[題詞]

[原文]於吉尓須毛乎加母乃毛己呂也左可杼利伊伎豆久伊毛乎於伎弖伎努可母

[訓読]沖に住も小鴨のもころ八尺鳥息づく妹を置きて来のかも

[仮名],おきにすも,をかものもころ,やさかどり,いきづくいもを,おきてきのかも

[_]

[左注]

[_]

[校異]

[_]

[ＫＷ],東歌,相聞,動物,羈旅,別離,恋情,出発

3528

[題詞]

[原文]水都等利乃多々武与曽比尓伊母能良尓毛乃伊波受伎尓弖於毛比可祢都母

[訓読]水鳥の立たむ装ひに妹のらに物言はず来にて思ひかねつも

[仮名],みづとりの,たたむよそひに,いものらに,ものいはずきにて,おもひかねつも

[_]

[左注]

[_]

[校異]乃 [元][類]（塙）能 / 母 [元][類][細]（塙）毛

[_]

[ＫＷ],東歌,相聞,羈旅,出発,別離,恋情

3529

[題詞]

[原文]等夜乃野尓乎佐藝祢良波里乎佐乎左毛祢奈敝古由恵尓波伴尓許呂波要

[訓読]等夜の野に兎ねらはりをさをさも寝なへ子ゆゑに母に嘖はえ

[仮名],とやののに,をさぎねらはり,をさをさも,ねなへこゆゑに,ははにころはえ

[_]

[左注]

[_]

[校異]

[_]

[ＫＷ],東歌,相聞,地名,動物,恋愛

3530

[題詞]

[原文]左乎思鹿能布須也久草無良見要受等母兒呂我可奈門欲由可久之要思母

[訓読]さを鹿の伏すや草むら見えずとも子ろが金門よ行かくしえしも

[仮名],さをしかの,ふすやくさむら,みえずとも,ころがかなとよ,ゆかくしえしも

[_]

[左注]

[_]

[校異]

[_]

[ＫＷ],東歌,相聞,動物,恋愛,序詞

3531

[題詞]

[原文]伊母乎許曽安比美尓許思可麻欲婢吉能与許夜麻敝呂能思之奈須於母敝流

[訓読]妹をこそ相見に来しか眉引きの横山辺ろの獣なす思へる

[仮名],いもをこそ,あひみにこしか,まよびきの,よこやまへろの,ししなすおもへる

[_]

[左注]

[_]

[校異]

[_]

[ＫＷ],東歌,相聞,枕詞,恋愛,怨恨,動物

3532

[題詞]

[原文]波流能野尓久佐波牟古麻能久知夜麻受安乎思努布良武伊敝乃兒呂波母

[訓読]春の野に草食む駒の口やまず我を偲ふらむ家の子ろはも

[仮名],はるののに,くさはむこまの,くちやまず,あをしのふらむ,いへのころはも

[_]

[左注]

[_]

[校異]

[_]

[ＫＷ],東歌,相聞,動物,序詞,恋情,望郷,羈旅

3533

[題詞]

[原文]比登乃兒乃可奈思家之太波々麻渚杼里安奈由牟古麻能乎之家口母奈思

[訓読]人の子の愛しけしだは浜洲鳥足悩む駒の惜しけくもなし

[仮名],ひとのこの,かなしけしだは,はますどり,あなゆむこまの,をしけくもなし

[_]

[左注]

[_]

[校異]乃 [元][類] 能

[_]

[ＫＷ],東歌,相聞,動物,恋情

3534

[題詞]

[原文]安可胡麻我可度弖乎思都々伊弖可天尓世之乎見多弖思伊敝能兒良波母

[訓読]赤駒が門出をしつつ出でかてにせしを見立てし家の子らはも

[仮名],あかごまが,かどでをしつつ,いでかてに,せしをみたてし,いへのこらはも

[_]

[左注]

[_]

[校異]

[_]

[ＫＷ],東歌,相聞,動物,羈旅,別離,望郷,出発

3535

[題詞]

[原文]於能我乎遠於保尓奈於毛比曽尓波尓多知恵麻須我可良尓古麻尓安布毛能乎

[訓読]己が命をおほにな思ひそ庭に立ち笑ますがからに駒に逢ふものを

[仮名],おのがをを,おほになおもひそ,にはにたち,ゑますがからに,こまにあふものを

[_]

[左注]

[_]

[校異]

[_]

[ＫＷ],東歌,相聞,動物,恋情,慰撫

3536

[題詞]

[原文]安加胡麻乎宇知弖左乎妣吉己許呂妣吉伊可奈流勢奈可和我理許武等伊布

[訓読]赤駒を打ちてさ緒引き心引きいかなる背なか我がり来むと言ふ

[仮名],あかごまを,うちてさをびき,こころひき,いかなるせなか,わがりこむといふ

[_]

[左注]

[_]

[校異]

[_]

[ＫＷ],東歌,相聞,動物,女歌,怨恨,恋愛,序詞

3537

[題詞]

[原文]久敝胡之尓武藝波武古宇馬能波都々々尓安比見之兒良之安夜尓可奈思母

[訓読]くへ越しに麦食む小馬のはつはつに相見し子らしあやに愛しも

[仮名],くへごしに,むぎはむこうまの,はつはつに,あひみしこらし,あやにかなしも

[_]

[左注]或本歌曰宇麻勢胡之牟伎波武古麻能波都々々尓仁必波太布礼思古呂之可奈思母

[_]

[校異]

[_]

[ＫＷ],東歌,相聞,異伝,動物,序詞,恋情

3537S

[題詞]或本歌曰

[原文]宇麻勢胡之牟伎波武古麻能波都々々尓仁必波太布礼思古呂之可奈思母

[訓読]馬柵越し麦食む駒のはつはつに新肌触れし子ろし愛しも

[仮名],うませごし,むぎはむこまの,はつはつに,にひはだふれし,ころしかなしも

[_]

[左注]

[_]

[校異]

[_]

[ＫＷ],東歌,相聞,異伝,恋情,序詞

3538

[題詞]

[原文]比呂波之乎宇馬古思我祢弖己許呂能未伊母我理夜里弖和波己許尓思天

[訓読]広橋を馬越しがねて心のみ妹がり遣りて我はここにして

[仮名],ひろはしを,うまこしがねて,こころのみ,いもがりやりて,わはここにして

[_]

[左注]或本歌發句曰乎波夜之尓古麻乎波左佐氣

[_]

[校異]

[_]

[ＫＷ],東歌,相聞,異伝,うわさ,恋情,動物

3538S

[題詞]或本歌發句曰

[原文]乎波夜之尓古麻乎波左佐氣

[訓読]小林に駒を馳ささげ

[仮名],をばやしに,こまをはささげ

[_]

[左注]

[_]

[校異]

[_]

[ＫＷ],東歌,相聞,異伝,恋情

3539

[題詞]

[原文]安受乃宇敝尓古馬乎都奈伎弖安夜抱可等比等豆麻古呂乎伊吉尓和我須流

[訓読]あずの上に駒を繋ぎて危ほかど人妻子ろを息に我がする

[仮名],あずのうへに,こまをつなぎて,あやほかど,ひとづまころを,いきにわがする

[_]

[左注]

[_]

[校異]豆 [類] 都

[_]

[ＫＷ],東歌,相聞,序詞,恋情,動物

3540

[題詞]

[原文]左和多里能手兒尓伊由伎安比安可胡麻我安我伎乎波夜未許等登波受伎奴

[訓読]左和多里の手児にい行き逢ひ赤駒が足掻きを速み言問はず来ぬ

[仮名],さわたりの,てごにいゆきあひ,あかごまが,あがきをはやみ,こととはずきぬ

[_]

[左注]

[_]

[校異]

[_]

[ＫＷ],東歌,相聞,地名,群馬県,動物,恋情

3541

[題詞]

[原文]安受倍可良古麻<能>由胡能須安也波刀文比<登>豆麻古呂乎麻由可西良布母

[訓読]あずへから駒の行ごのす危はとも人妻子ろをまゆかせらふも

[仮名],あずへから,こまのゆごのす,あやはとも,ひとづまころを,まゆかせらふも

[_]

[左注]

[_]

[校異]乃 → 能 [元][類] / 等 → 登 [元][類]

[_]

[ＫＷ],東歌,相聞,動物,序詞,訓義未詳,恋愛

3542

[題詞]

[原文]<佐>射礼伊思尓古馬乎波佐世弖己許呂伊多美安我毛布伊毛我伊敝<能>安多里可聞

[訓読]さざれ石に駒を馳させて心痛み我が思ふ妹が家のあたりかも

[仮名],さざれいしに,こまをはさせて,こころいたみ,あがもふいもが,いへのあたりかも

[_]

[左注]

[_]

[校異]伊 → 佐 [西（訂正右書）][元][類][紀] / 乃 → 能 [元][類]

[_]

[ＫＷ],東歌,相聞,動物,恋愛,妻問い

3543

[題詞]

[原文]武路我夜乃都留能都追美乃那利奴賀尓古呂波伊敝<杼>母伊末太<年>那久尓

[訓読]むろがやの都留の堤の成りぬがに子ろは言へどもいまだ寝なくに

[仮名],むろがやの,つるのつつみの,なりぬがに,ころはいへども,いまだねなくに

[_]

[左注]

[_]

[校異]抒 → 杼 [類][細] / 羊 → 年 [元][類][紀]

[_]

[ＫＷ],東歌,相聞,地名,山梨県,上野原町,恋情

3544

[題詞]

[原文]阿須可河泊之多尓其礼留乎之良受思天勢奈那登布多理左宿而久也思母

[訓読]あすか川下濁れるを知らずして背ななと二人さ寝て悔しも

[仮名],あすかがは,したにごれるを,しらずして,せななとふたり,さねてくやしも

[_]

[左注]

[_]

[校異]泊 [元][類][紀] 伯

[_]

[ＫＷ],東歌,相聞,明日香,奈良,地名,浮気,恋情,後悔,怨恨

3545

[題詞]

[原文]安須可河泊世久登之里世波安麻多欲母為祢弖己麻思乎世久得四里世<婆>

[訓読]あすか川堰くと知りせばあまた夜も率寝て来ましを堰くと知りせば

[仮名],あすかがは,せくとしりせば,あまたよも,ゐねてこましを,せくとしりせば

[_]

[左注]

[_]

[校異]泊 [元][紀] 伯 / 波 → 婆 [元][類][紀]

[_]

[ＫＷ],東歌,相聞,明日香,奈良,地名,恋情

3546

[題詞]

[原文]安乎楊木能波良路可波刀尓奈乎麻都等西美度波久末受多知度奈良須母

[訓読]青柳の張らろ川門に汝を待つと清水は汲まず立ち処平すも

[仮名],あをやぎの,はらろかはとに,なをまつと,せみどはくまず,たちどならすも

[_]

[左注]

[_]

[校異]

[_]

[ＫＷ],東歌,相聞,植物,女歌,恋情

3547

[題詞]

[原文]阿遅乃須牟須沙能伊利江乃許母理沼乃安奈伊伎豆加思美受比佐尓指天

[訓読]あぢの棲む須沙の入江の隠り沼のあな息づかし見ず久にして

[仮名],あぢのすむ,すさのいりえの,こもりぬの,あないきづかし,みずひさにして

[_]

[左注]

[_]

[校異]

[_]

[ＫＷ],東歌,相聞,動物,恋情,序詞

3548

[題詞]

[原文]奈流世<呂>尓木都能余須奈須伊等能伎提可奈思家世呂尓比等佐敝余須母

[訓読]鳴る瀬ろにこつの寄すなすいとのきて愛しけ背ろに人さへ寄すも

[仮名],なるせろに,こつのよすなす,いとのきて,かなしけせろに,ひとさへよすも

[_]

[左注]

[_]

[校異]路 → 呂 [元][類]

[_]

[ＫＷ],東歌,相聞,うわさ,恋情

3549

[題詞]

[原文]多由比我多志保弥知和多流伊豆由可母加奈之伎世呂我和賀利可欲波牟

[訓読]多由比潟潮満ちわたるいづゆかも愛しき背ろが我がり通はむ

[仮名],たゆひがた,しほみちわたる,いづゆかも,かなしきせろが,わがりかよはむ

[_]

[左注]

[_]

[校異]

[_]

[ＫＷ],東歌,相聞,地名,福井県,恋情,女歌,妻問い

3550

[題詞]

[原文]於志弖伊奈等伊祢波都可祢杼奈美乃保能伊多夫良思毛与伎曽比登里宿而

[訓読]おしていなと稲は搗かねど波の穂のいたぶらしもよ昨夜ひとり寝て

[仮名],おしていなと,いねはつかねど,なみのほの,いたぶらしもよ,きぞひとりねて

[_]

[左注]

[_]

[校異]

[_]

[ＫＷ],東歌,相聞,恋情,作業歌,歌謡,孤独

3551

[題詞]

[原文]阿遅可麻能可多尓左久奈美比良湍尓母比毛登久毛能可加奈思家乎於吉弖

[訓読]阿遅可麻の潟にさく波平瀬にも紐解くものか愛しけを置きて

[仮名],あぢかまの,かたにさくなみ,ひらせにも,ひもとくものか,かなしけをおきて

[_]

[左注]

[_]

[校異]

[_]

[ＫＷ],東歌,相聞,地名,恋情,女歌,序詞,浮気

3552

[題詞]

[原文]麻都我宇良尓佐和恵宇良太知麻比<登>其等於毛抱須奈母呂和賀母抱乃須毛

[訓読]まつが浦にさわゑうら立ちま人言思ほすなもろ我が思ほのすも

[仮名],まつがうらに,さわゑうらだち,まひとごと,おもほすなもろ,わがもほのすも

[_]

[左注]

[_]

[校異]等 → 登 [元][類][紀]

[_]

[ＫＷ],東歌,相聞,地名,宮城県,福島県,うわさ,恋愛,女歌

3553

[題詞]

[原文]安治可麻能可家能水奈刀尓伊流思保乃許弖多受久毛可伊里弖祢麻久母

[訓読]あじかまの可家の港に入る潮のこてたずくもが入りて寝まくも

[仮名],あぢかまの,かけのみなとに,いるしほの,こてたずくもが,いりてねまくも

[_]

[左注]

[_]

[校異]

[_]

[ＫＷ],東歌,相聞,地名,愛知県,序詞,うわさ,恋情

3554

[題詞]

[原文]伊毛我奴流等許<能>安多理尓伊波具久留水都尓母我毛与伊里弖祢末久母

[訓読]妹が寝る床のあたりに岩ぐくる水にもがもよ入りて寝まくも

[仮名],いもがぬる,とこのあたりに,いはぐくる,みづにもがもよ,いりてねまくも

[_]

[左注]

[_]

[校異]乃 → 能 [元][類]

[_]

[ＫＷ],東歌,相聞,恋情

3555

[題詞]

[原文]麻久良我乃許我能和多利乃可良加治乃於<登>太可思母奈宿莫敝兒由恵尓

[訓読]麻久良我の許我の渡りの韓楫の音高しもな寝なへ子ゆゑに

[仮名],まくらがの,こがのわたりの,からかぢの,おとだかしもな,ねなへこゆゑに

[_]

[左注]

[_]

[校異]等 → 登 [類][細]

[_]

[ＫＷ],東歌,相聞,地名,茨城県,古河,序詞,うわさ,恋愛

3556

[題詞]

[原文]思保夫祢能於可礼婆可奈之左宿都礼婆比登其等思氣志那乎杼可母思武

[訓読]潮船の置かれば愛しさ寝つれば人言繁し汝をどかもしむ

[仮名],しほぶねの,おかればかなし,さねつれば,ひとごとしげし,なをどかもしむ

[_]

[左注]

[_]

[校異]

[_]

[ＫＷ],東歌,相聞,枕詞,恋情,うわさ

3557

[題詞]

[原文]奈夜麻思家比登都麻可母与許具布祢能和須礼波勢奈那伊夜母比麻須尓

[訓読]悩ましけ人妻かもよ漕ぐ舟の忘れはせなないや思ひ増すに

[仮名],なやましけ,ひとづまかもよ,こぐふねの,わすれはせなな,いやもひますに

[_]

[左注]

[_]

[校異]

[_]

[ＫＷ],東歌,相聞,序詞,恋情

3558

[題詞]

[原文]安波受之弖由加婆乎思家牟麻久良我能許賀己具布祢尓伎美毛安波奴可毛

[訓読]逢はずして行かば惜しけむ麻久良我の許我漕ぐ船に君も逢はぬかも

[仮名],あはずして,ゆかばをしけむ,まくらがの,こがこぐふねに,きみもあはぬかも

[_]

[左注]

[_]

[校異]

[_]

[ＫＷ],東歌,相聞,地名,茨城県,古河,遊行女婦,女歌

3559

[題詞]

[原文]於保夫祢乎倍由毛登母由毛可多米提之許曽能左刀妣等阿良波左米可母

[訓読]大船を舳ゆも艫ゆも堅めてし許曽の里人あらはさめかも

[仮名],おほぶねを,へゆもともゆも,かためてし,こそのさとびと,あらはさめかも

[_]

[左注]

[_]

[校異]

[_]

[ＫＷ],東歌,相聞,序詞,うわさ,恋愛,地名

3560

[題詞]

[原文]麻可祢布久尓布能麻曽保乃伊呂尓Ｒ<弖> 伊波奈久能未曽安我古布良久波

[訓読]ま金ふく丹生のま朱の色に出て言はなくのみぞ我が恋ふらくは

[仮名],まかねふく,にふのまそほの,いろにでて,いはなくのみぞ,あがこふらくは

[_]

[左注]

[_]

[校異]々 → 弖 [元][類]

[_]

[ＫＷ],東歌,相聞,地名,奈良,吉野,岐阜,序詞,うわさ,恋情

3561

[題詞]

[原文]可奈刀田乎安良我伎麻由美比賀刀礼婆阿米乎万刀能須伎美乎等麻刀母

[訓読]金門田を荒垣ま斎み日が照れば雨を待とのす君をと待とも

[仮名],かなとだを,あらがきまゆみ,ひがとれば,あめをまとのす,きみをとまとも

[_]

[左注]

[_]

[校異]

[_]

[ＫＷ],東歌,相聞,序詞,恋情,女歌

3562

[題詞]

[原文]安里蘇夜尓於布流多麻母乃宇知奈婢伎比登里夜宿良牟安乎麻知可祢弖

[訓読]荒礒やに生ふる玉藻のうち靡きひとりや寝らむ我を待ちかねて

[仮名],ありそやに,おふるたまもの,うちなびき,ひとりやぬらむ,あをまちかねて

[_]

[左注]

[_]

[校異]

[_]

[ＫＷ],東歌,相聞,植物,序詞,恋情,孤独

3563

[題詞]

[原文]比多我多能伊蘇乃和可米乃多知美太要和乎可麻都那毛伎曽毛己余必母

[訓読]比多潟の礒のわかめの立ち乱え我をか待つなも昨夜も今夜も

[仮名],ひたがたの,いそのわかめの,たちみだえ,わをかまつなも,きぞもこよひも

[_]

[左注]

[_]

[校異]

[_]

[ＫＷ],東歌,相聞,地名,茨城県,植物,序詞,恋情

3564

[題詞]

[原文]古須氣呂乃宇良布久可是能安騰須酒香可奈之家兒呂乎於毛比須吾左牟

[訓読]古須気ろの浦吹く風のあどすすか愛しけ子ろを思ひ過ごさむ

[仮名],こすげろの,うらふくかぜの,あどすすか,かなしけころを,おもひすごさむ

[_]

[左注]

[_]

[校異]

[_]

[ＫＷ],東歌,相聞,地名,東京都,小菅町,恋情

3565

[題詞]

[原文]可能古呂等宿受夜奈里奈牟波太須酒伎宇良野乃夜麻尓都久可多与留母

[訓読]かの子ろと寝ずやなりなむはだすすき宇良野の山に月片寄るも

[仮名],かのころと,ねずやなりなむ,はだすすき,うらののやまに,つくかたよるも

[_]

[左注]

[_]

[校異]

[_]

[ＫＷ],東歌,相聞,植物,地名,長野県,恋情

3566

[題詞]

[原文]和伎毛古尓安我古非思奈婆曽和敝可毛加未尓於保世牟己許呂思良受弖

[訓読]我妹子に我が恋ひ死なばそわへかも神に負ほせむ心知らずて

[仮名],わぎもこに,あがこひしなば,そわへかも,かみにおほせむ,こころしらずて

[_]

[左注]

[_]

[校異]

[_]

[ＫＷ],東歌,相聞,恋情

防人歌

3567

[題詞]防人歌

[原文]於伎弖伊可婆伊毛婆麻可奈之母知弖由久安都佐能由美乃由都可尓母我毛

[訓読]置きて行かば妹はま愛し持ちて行く梓の弓の弓束にもがも

[仮名],おきていかば,いもはまかなし,もちてゆく,あづさのゆみの,ゆづかにもがも

[_]

[左注]（右二首<問>答）

[_]

[校異]

[_]

[ＫＷ],東歌,相聞,恋情,出発

3568

[題詞]

[原文]於久礼為弖古非波久流思母安佐我里能伎美我由美尓母奈良麻思物能乎

[訓読]後れ居て恋ひば苦しも朝猟の君が弓にもならましものを

[仮名],おくれゐて,こひばくるしも,あさがりの,きみがゆみにも,ならましものを

[_]

[左注]右二首<問>答

[_]

[校異]問 [西（訂正右書）][紀][細][温]

[_]

[ＫＷ],東歌,相聞,女歌,恋情,出発

3569

[題詞]

[原文]佐伎母理尓多知之安佐氣乃可奈刀Ｒ尓手婆奈礼乎思美奈吉思兒良<波>母

[訓読]防人に立ちし朝開の金戸出にたばなれ惜しみ泣きし子らはも

[仮名],さきもりに,たちしあさけの,かなとでに,たばなれをしみ,なきしこらはも

[_]

[左注]

[_]

[校異]婆 → 波 [類]

[_]

[ＫＷ],東歌,相聞,防人,出発,羈旅,望郷,恋情

3570

[題詞]

[原文]安之能葉尓由布宜里多知弖可母我鳴乃左牟伎由布敝思奈乎波思努波牟

[訓読]葦の葉に夕霧立ちて鴨が音の寒き夕し汝をば偲はむ

[仮名],あしのはに,ゆふぎりたちて,かもがねの,さむきゆふへし,なをばしのはむ

[_]

[左注]

[_]

[校異]

[_]

[ＫＷ],東歌,相聞,動物,望郷,恋情

3571

[題詞]

[原文]於能豆麻乎比登乃左刀尓於吉於保々思久見都々曽伎奴流許能美知乃安比太

[訓読]己妻を人の里に置きおほほしく見つつぞ来ぬるこの道の間

[仮名],おのづまを,ひとのさとにおき,おほほしく,みつつぞきぬる,このみちのあひだ

[_]

[左注]

[_]

[校異]

[_]

[ＫＷ],東歌,相聞,防人,望郷,不安,恋情

譬喩歌

3572

[題詞]譬喩歌

[原文]安杼毛敝可阿自久麻<夜>末乃由豆流波乃布敷麻留等伎尓可是布可受可母

[訓読]あど思へか阿自久麻山の弓絃葉のふふまる時に風吹かずかも

[仮名],あどもへか,あじくまやまの,ゆづるはの,ふふまるときに,かぜふかずかも

[_]

[左注]

[_]

[校異]<> → 夜 [西（下書）][類][紀][細]

[_]

[ＫＷ],東歌,譬喩歌,地名,茨城県,子飼山,植物,婚姻

3573

[題詞]

[原文]安之比奇能夜麻可都良加氣麻之波尓母衣我多奇可氣乎於吉夜可良佐武

[訓読]あしひきの山かづらかげましばにも得がたきかげを置きや枯らさむ

[仮名],あしひきの,やまかづらかげ,ましばにも,えがたきかげを,おきやからさむ

[_]

[左注]

[_]

[校異]

[_]

[ＫＷ],東歌,譬喩歌,植物,婚姻

3574

[題詞]

[原文]乎佐刀奈流波奈多知波奈乎比伎余治弖乎良無登須礼杼宇良和可美許曽

[訓読]小里なる花橘を引き攀ぢて折らむとすれどうら若みこそ

[仮名],をさとなる,はなたちばなを,ひきよぢて,をらむとすれど,うらわかみこそ

[_]

[左注]

[_]

[校異]

[_]

[ＫＷ],東歌,譬喩歌,植物,婚姻

3575

[題詞]

[原文]美夜自呂乃 <須>可敝尓多弖流可保我波奈莫佐吉伊<Ｒ>曽祢許米弖思努波武

[訓読]美夜自呂のすかへに立てるかほが花な咲き出でそねこめて偲はむ

[仮名],みやじろの,すかへにたてる,かほがはな,なさきいでそね,こめてしのはむ

[_]

[左注]

[_]

[校異]渚 → 須 [類][古] / 弖 → Ｒ [類][紀]

[_]

[ＫＷ],東歌,譬喩歌,地名,植物,恋情

3576

[題詞]

[原文]奈波之呂乃 <古>奈宜我波奈乎伎奴尓須里奈流留麻尓末仁安是可加奈思家

[訓読]苗代の小水葱が花を衣に摺りなるるまにまにあぜか愛しけ

[仮名],なはしろの,こなぎがはなを,きぬにすり,なるるまにまに,あぜかかなしけ

[_]

[左注]

[_]

[校異]告 → 古 [西（訂正頭書）][元][類][紀]

[_]

[ＫＷ],東歌,譬喩歌,植物,恋情

挽歌

3577

[題詞]挽歌

[原文]可奈思伊毛乎伊都知由可米等夜麻須氣乃曽我比尓宿思久伊麻之久夜思母

[訓読]愛し妹をいづち行かめと山菅のそがひに寝しく今し悔しも

[仮名],かなしいもを,いづちゆかめと,やますげの,そがひにねしく,いましくやしも

[_]

[左注]以前歌詞未得勘知國土山川之名也

[_]

[校異]

[_]

[ＫＷ],東歌,挽歌,植物,恋情,後悔,恋愛