128. An Evening Prayer, II
[_]
MS. Ashmole 61 (Sum. Catal. No. 6922)
Ihc lord, well of All godnes,
ffore thi grete pety i þe pray;
ffore-gyffe me All my wykidnes,
Where-with I haue greuyd þe to-dey.
Honour & praysing to þe be,
And thankyng four thi gyftis All,
That I þis dey reseyuid off the;
Now, curtas cryst, to þe I calle.
This nyght fro perell thou me kepe,
My bodely rest whyll þat I take;
And als longe as myne evyne sclepe,
Myn hert in thi seruys wake.
ffore feryng of þe fend owre fo,
ffro fowll dremys & fantasys,
Kepe þis nyght; from synne also
In clenes þat I may vp-ryse.
Saue my gode doers fro greuans,
And quyte them þat þei on me spend;
Kepe my enmys fro noyans,
And gyffe þem grace forto Amend.
Mercy, Ihū, & grante mercy
My body, my soule I þe be-kene,
In nomine patris & filij
& spiritus sancti, Amen.
