110. ‘Have All My Heart and Be in Peace’
[_]
Trinity Coll. Camb. MS. 263. Part II
Querimonia Xi languentis pro amore.
Trewloue trewe, on you I truste,
Euermore to fynde you perseuerawnt,
Ellys wolde my herte yn sondir brest,
Bot I cowde love yn expyrant.
Loke þat youre chere change for no chaunce,
Ne kepe noman youre sorow see;
If I may not do you plesance,
Myne herte hath holly noone but ye.
Therfor, haue alle myne herte & beon yn pees,
& þynke I love you soueranly—
ffor þat I say hit is no lese—
Wolde god ye wyste as wele as I.
ffor wele I se, bothe day & nygth
That trew loue wyle me neuer cese.
Haue mercy on me, worthly wiyght,
Haue all my herte & be yn pese.
Ye haue all myne herte where-euer ye go,
Herte, body & all my richez;
I am bot dede & ye go me fro,
There was neuer þynge I louyd so moche.
Therfor, dere herte, loke ye be trewe,
& loue me wele withouten lese;
I wyll neuer change you for no newe,
Haue all myne herte & be yn pees.
ffor where I love I kan not leve,
Ofte tymes hit doeth myn herte gret wo;
A preuey peyne hit is to preue
To loue & be rygth longe þer-fro.
ffor—& ye wyste ye wolde say so—
A lovere wolde his love ay se.
Therfore, I morne ryght ofte I-wys,
& so doeth oþer loveris mo.
My herte hath noone but ye yn folde;
A! dere herte, whan dyde I ylle,
But euer wrougth rygth as ye wolde,
Or euer was vntrewe you tylle?
