University of Virginia Library

Pandarus, seand hys brotheris corps at erd,
And on quhat wyss thus fortune with thame ferd,
And quhou the chance of batale ȝeid al wrang,
Full forcyly with hys braid schuldris strang
He thristis to the levys of the ȝet,
And closyt queym the entre, and furth schet
Without the port a gret sort of hys feris,
In hard bargane amyd the mortal weris;
And of hys ennemyss sum inclosyt he,
Ressavand all at thrang to the entre.
A fuyll he was and wytles in a thyng,
Persauyt not Turnus, Rutilian kyng,
So violently thryng in at the ȝet;
Quham he onwar within the cite schet,
Lyke as ane rageand wild tygyr onstabill
Amang the febill bestis onfensabill.
Sone as Turnus hym hess inclusyt seyn,
A glowand new lyght brystis from hys eyn,
Hys armour ryngis or clattris horribilly;
Hys crystis trymlyt on hys hed in hy,
That in hys sanguane bludy scheild als straucht
Kest schynand fyry bemys lyke fyre flaucht.
All suddanly, affrayit Eneadanys
Hys face onfrendly persauit and byg banys.
The hydduus Pandarus than hym self furth schew,
That wonder fervent in hys furour grew;
Hys broderis slauchter to revenge in will,
Thus austernly he spekis Turnus ontill:
“Thys is not Queyn Amatais cheif cite,
Suld the begeif into dowry,” said he,
“Nor ȝit the myddis of Ardea cite bald,
Thi faderis burgh, Turnus, doith the withhald.
Thou seys thy fays strenth and wallys wyde;
Ȝeild the for thy, thou may eschape na syde.”
Turnus agane, with curage blyth and glaid,
Nocht abasyt, ful baldly to hym said:
“My frend, begyn, gif thou hess hardyment,
And mach with me allone apon this bent,
And hand for hand, gif at it be thy will,
Thou sal schaw Pryam heir thou hes fund Achill.”
The tother tho a huge speir of haill tre,
With bark and knottis altogidder, leyt fle
In al his forss, bot the dynt dyd no deir;
Nocht bot the ayr was wondyt with the speir,
For wikkyt Iuno, the ald Saturnus get,
Choppyt by the schaft, and fixt it in the ȝet.
“Ha!” quod Turnus, “sa sal thou not astart
Thys wapyn now in faith or we depart,
Nor on sik wyss eschape this bytand brand,
Quhilk my gret forss thus rollys in my hand;
For he that aw this swerd, and wond sal wyrk,
Is not sa faynt, ne sa sone sall nocht irk.”
And with that word, standand on hys typtays,
Hevyng hys swerd, heich hys hand dyd rayss;
Down with the dynt duschit the steil blaid keyn
Amyd hys forhed, hard betwix hys eyn,
Hys berdless chekis or hys chaftis rownd
In sondyr schorn hess with a grysly wound:
Sa felloun sownd or clap maid this gret clasche,
That of hys huge weght, fell with a rasche,
The erd dyndlyt, and all the cite schuke.
So large feild hys gowsty body tuke,
That fer onbreid ourspred was all the plane,
Hys armour sparkyt with hys blude and brane.
Baith to and fra, apon hys schuldris tway,
Hys hed clovyn in equale halfis lay.
Of dreidfull raddour trymlyng for affray,
The Troianys fled rycht fast and brak away,
And gif Turnus had than incontinent
Ramembryt hym, and kauch in mynd to rent
The lokkis vp, and oppyn the ȝettis wyde,
So that hys feris without the port that tyde
Mycht haue entryt, and cumyn in the cite,
The last day of the batale that had be,
And latter finale end to the remanys
Of Phrigiane folkis and pepil Troianys.
Bot sic ardent hie furour marcyall,
And of slauchter desire insaciall,
Draif hym to follow thame that hym gaynstandis;
And first he kyllit Phalarys with his handis,
And ane other, that Gyges hecht, alssua,
Of quham the howchys bath he smate in twa;
Syn speris rent and hynt vp all on raw
And at the flearis bakkis fast dyd thraw,
That wondir was to se hym quhar he went,
For Iuno ekyt hys strenth and hardyment.
Syne ane Hales onto the corpsis ded
In cumpany he ekyt in that sted;
And Phegeas doun brytnys in the feld,
Spetit throw owt the body and hys scheld;
Alchandrus syne, and the prowd Halyus,
Nemonas eik, and keyn Prytanyus,
Quhilkis mysknew Turnus was within the wall,
And to the bargan dyd that feris call,
Apon the grund onon al ded he layd,
In bargan full expert; syne dyd invaid
With schynand swerd, hard at the dykis syde,
Ane Lynceus, the quhilk the sammyn tyde
Resistys, as he myght, with fell afferis,
And efter help cryis apon hys feris;
Bot with a strake he smate hys nek in twa,
Baith helm and hed flaw far the body fra.
And, efter thir, ane Amycus he slew,
That bayn had beyn to wild bestis enew;
Was nane other mair happy nor expert
To graith and til invnct a castyng dart,
And with vennom to garnys the steil hedis.
By Turnus handis the ilk tyme done to ded is
Eolus son, hait Clytius, the heynd,
And Creteus also, was the Musys frend—
Creteus, poet to Musys famyliar,
That in hys mynd and breist all tymys bar
Sangis and gestis, musyk and harpyng;
Apon hys stryngis playd he mony a spryng,
Lays and rymys on the best awyss,
And euermar hys maner and his gyss
Was forto syng, blason and discryve,
Men and stedis, knychthed, wer and stryve.