Edom of Achendoon
CAPTAIN CAR, OR, EDOM O GORDON—I
[_]
From “The Old Lady's Collection,” No 28,
1
It fell about the Martimas time,
Fan the wind blue loud an calld,
Said Edom of Gordon to his men,
We man dra till a hall.
2
‘An fatten a hall will we dra tell,
My merry men a' an me?
We will to the house of Rothes,
An see that gay lady.’
3
The lady louked our castell-wa,
Beheld the day ga doun,
An she saa Edun of Gordon,
Fase Edom of Ach[en]doun.
4
‘Gee our yer house, ye gay lady,
Gee our yer house to me;
The night ye's be my leall leman,
The morn my lady free.’
5
‘I winnë gee our my bonny house,
To leard nor yet to loun,
Nor will I gee our my bonny house
To fase Edom of Achendoun.
6
‘Bat ye gett me Cluny, Gight, or Glack,
Or get him young Lesmore,
An I ell gee our my bonny house
To ony of a' the four.’
7
‘Ye's nether gett Cluny, Gight, nor Glack,
Nor yet him young Lesmore,
An ye man gee our yer bonny house,
Winten ony of a' the four.’
8
The ladie shot out of a shot-windou,
It didne hurt his head,
It only grased his knee
[OMITTED]
9
‘Ye hast, my merry men a',
Gather hathorn an fune,
[OMITTED]
To see gin this lady will burn.’
10
‘Wai worth ye, Joke, my man!
I paid ye well yer fee,
An ye tane out the qunië-stane,
Laten in the fire to me.
11
‘Wae worth ye, Joke, my man!
I paid ye well yer hair,
An ye t[a]en out the qunie-stane,
To me laten in the fire.’
12
‘Ye paid me well my meatt, lady,
Ye paid me well my fee,
Bat nou I am Edom of Gordon's man,
Mane eather dee'd or dree.
13
‘Ye paid me well my meatt, lady,
Ye paid me well my hire,
But nou I am Edom of Gordon's man,
To ye mane lat the fire.’
14
Out spak her doughter,
She was bath jimp an smaa;
‘Ye take me in a pair of shets,
Lat me our the castell-waa.’
15
The pat her in a pair of shets,
Lute her oure the castell-waa;
On the point of Edom of Gordon's lance
She got a deadly faa.
16
Cherry, cherry was her cheeks,
An bonny was her eyen;
[OMITTED]
[OMITTED]
17
He turned her about,
[OMITTED]
‘I might haa spared that bonny face
To ha ben some man's delight.
18
‘Chirry is yer chik,
An bonny is yer eayn;
Ye'r the first face I ever saa dead
I wist liveng agen.’
19
Out spak one of his men,
As he stad by a stane;
‘Lat it never be sade brave Edom of Gordon
Was dantoned by a dame.’
20
Out spake the bonny barn,
It sat on the nurce's knee;
‘Gee our yer house, my mider dear,
The reak it smothers me.’
21
‘I wad gee a' my silks,’ she says,
‘That lays in mony a fall,
To haa ye on the head of Mont Ganell,
To gett three gasps of the call.
22
‘I wad gee a' my goud,’ she says,
‘Far it lays out an in,
To haa ye on the head of Mont Ganill,
To get three gasps of the wind.’
23
[OMITTED] that gued lord,
As he came fraa the sea,
‘I see the house of Rothes in fire,
God safe my gay ladie!’
