University of Virginia Library

CHAP. XIX.

Comment les Sauuages se traitent en leurs
maladies: ensemble de leurs sepultures & funerailles:
& des grands pleurs qu'ils font apres
leurs morts.

POVR donques mettre fin à
parler de nos Sauuages de
l'Amerique, il faut sauoir
comment ils se gouuernent
tant en leurs maladies qu'à
la fin de leurs iours: c'est à dire quand ils
sont prochains de la mort naturelle. S'il
aduient donc qu'aucuns d'eux tombe malade

apres qu'il aura monstré & fait entẽ
dre ou il sent le mal, soit aux bras iambes
ou autres parties du corps, cest endroit
là sera succé auec la bouche par l'vn de
ses amis: & quelques fois par vne maniere
d'abuseurs qu'ils ont entre eux nom-
mez Pagés, qui est à dire Barbier ou Medecin
(autres que les Caraïbes dont i'ay
parlé traitant de leur religion) lesquels
non seulement leur font accroire qu'ils
leur arrachent la maladie mais aussi que
ils leur prolongent la vie. Cependat outre
les fievres & maladies communes de
nos Ameriquains, à quoy cõme i'ay touché
ci deuant à cause de leur pays bien
temperé, ils ne sont si suiets que nous
sommes par deça, ils ont vne maladie in-
curable qu'ils nomment Pians, laquelle
combien qu'ordinairement elle prouienne
& se prenne de paillardise, i'ay neantmoins
veu auoir à de ieunes enfans lesquels
en estoyent aussi couuerts qu'on
en voit par deça estre de la petite verole.
Mais au reste ceste contagion se conuertissant
en pustules plus larges que le pou
ce, lesquelles s'espãdẽt par tout le corps,
voire iusqu'au visage, ceux qui en sont
entachez en portent aussi bien les marques
toute leur vie, que font les verolez
& chancreux de par decà de leur tur
pitude & vilenie. Et de fait i'ay veu en
ce pays-là vn Truchement, natif de Rouen,
lequel s'estant veautré en toutes sortes
de paillardises parmi les femmes &
filles Sauuages, en auoit si bien receu son
salaire, que son corps & son visage estans
aussi couuerts & desfigurez de ces Pians,
que s'il eust esté vray ladre, les places y
estoyent tellement imprimees qu'impossible
luy fut de les iamais effacer: aussi
est ceste maladie la plus dangereuse en
ceste terre du Bresil. Ainsi pour reprendre
mõ premier propos, les Ameriquains
ont ceste coustume, que quant au traitement
de la bouche de leurs malades: si

celuy qui est detenu au lict deuoit demeu
rer vn mois sans manger on ne luy en dõ
nera iamais qu'il n'en demande: mesmes
quelque grieue que soit la maladie, les au
tres qui sont en santé, suyuant leur coustume,
ne laisseront pas pour cela, buuans
sautãs & chantãs, de faire bruit autour du
poure patiẽt: lequel aussi de son costé sachant
bien qu'il ne gagneroit rien de s'en
fascher, aime mieux auoir les oreilles rõ
pues que d'en dire mot. Toutes fois s'il
aduient qu'il meure, & sur tout si c'est
quelque bon pere de famille, la chantrerie
estant soudain tournee en pleurs, ils
lamẽtent de telle façon que si nous-nous
trouuions en quelque village ou il y eut
vn mort, ou il ne falloit pas faire estat d'y
coucher, ou ne se pas attendre de dormir
la nuit. Mais principalemẽt c'est merueille
d'ouyr les femmes lesquelles braillans
si fort & si haut que vous diriez que ce
sont hurlemẽs de chiens & de loups font
communément tels regrets & tels dialogues.
Il est mort, diront les vnes en trainant
leur voix, celuy qui estoit si vaillãt,
& qui nous a tant fait manger de prisonniers.
Puis les autres en esclatant de mes
me respondront. O que c'estoit vn bon
chasseur & vn excellent pescheur: Ha le
braue assommeur de Portugais & de
Margaias, desquels il nous a si bien vengez,
dira quelqu'vne parmi les autres. tel
lement que parmi ces grands pleurs s'em
brassans les bras & les espaules l'vne de
l'autre s'incitans à qui fera le plus grand
dueil: iusques à ce que le corps soit osté
de deuant elles, elles ne cesseront en dechifrant
& recitant ainsi par le menu tout
ce qu'il aura fait & dit en sa vie, de faire
de longues kirielles de ses louanges.

[ILLUSTRATION]

Bref, à la maniere que les fẽmes de Bearn
ainsi qu'on dit, faisans de vice vertu en
vne partie des pleurs qu'ẽlles font sur
leurs maris decedez, chantẽt La mi amou,
La mi amon: Cara rident, oeil de splendou: Ca
ma leugé bet dansadou: Lo mé balen, Lo m'esburbat:
matî depes: fort tard au lheit
C'est à dire mon amour: Mon amour visage
riant, œil de splendeur, iambe lege
re, beau danseur, le mien vaillant, le mien
esueillé, matin debout fort tard au lict: voi
re cõme aucũs disent que les femmes en
quelques endroits de Gascongne adioustent,
Yere, yere, o le bet renegadou o le
bet iougadou qu'here: c'est à dire, helas
helas, ô le beau renieur, ô le beau ioueur
qu'il estoit: ainsi en font nos poures Ame
ri quaines: lesquelles au surpl9 au refrein
de chacune pose adioustant tousiours, il
est mort, il est mort celuy duquel nous
faisions maintenant le dueil, les hommes
leur respondant disent: Helas il est vray
nous ne le verrons plus iusques à ce que
nous soyons derriere les montagnes, ou,
ainsi que nous enseignent nos Caraïbes,
nous danserons auec luy & autres propos
semblables qu'ils adioustent. Or ces
querimonies durant ordinairement demy
iour (carils ne gardent gueres leurs
corps morts dauantage) apres que la fosse
aura esté faite, non pas longue à nostre
mode, ains ronde & profonde comme vn
grand tonneau à tenir le vin, le corps qui
aussi incontinent apres auoir esté expiré
aura esté plié, les bras & les iambes liez
alentour, sera ainsi enterré presques tout

debout: mesme (comme i'ay dit) si c'est
quelque bon vieillard qui soit decedé, il
sera ensepulturé dans sa maison enueloppé
de son lict de couton, voire on enterrera
auec luy quelques coliers, plumasseries,
& autres besongnes qu'il souloit por

ter, quand il estoit en vie. Sur lequel propos
on pourroit alleguer beaucoup d'exemples
des Anciens qui en vsoyent de
ceste facon: comme ceque dit Iosephe qui
fut mis au sepulchre de Dauid: & ce que
les historiens prophanes tesmoignent de
tant de grãds personnages qui apres leur
mort ayans esté ainsi parez de ioyaux fort
precieux le tout est pourri auec leurs
corps: & pour n'aller plus loin de nos Ameriquains,
comme nous auons ia allegué
ailleurs, les Indiens du Peru terre
continente à la leur enterrans auec leurs
Rois & Caciques grande quantité d'or &
de pierres precieuses, plusieurs Espagnols
de ceux qui furent les premiers en
ceste contree recerchans les despouilles
de ses corps morts iusquesaux tombeaux
& crotes ou ils scauoyẽt les trouuer, en fu
rent grandemẽt enrichis. Toutefois pour
retourner à nos Tououpinambaoults, depuis
que les François ont hanté parmi eux ils
n'enterrent pas si coustumierement les
choses de valeur auec leurs morts, qu'ils
faisoyent auparauãt: mais ce qui est beaucoup
pire, oyez la plus grande superstition
qui se pourroit imaginer en laquelle
ces poures gens sont detenus. Dés la
premiere nuit d'apres qu'vn corps, à la
façon que vous auez entendu, a esté enter
ré, eux croyans fermemẽt que si Aygnan,
c'est à dire le diable en leur lãgue ne trou
uoit d'autres viandes toutes prestes aupres,
qu'il le deterreroit & mangeroit, nõ
seulement ils mettent de grands plats de
terre pleins de farines, volailles, poissons
& autres viandes bien cuites auec de leur
bruuage dit Caouin sus la fossedu deffũct,
mais aussi iusqu'à ce qu'ils pensent que
le corps soit entierement pourri, ils continuent
à faire tels seruices, vrayement
diaboliques. Duquel erreur il nous estoit
tant plus malaisé de les diuertir, que les
Truchemens de Normandie qui nous auoyẽt
precedez en ce pays là, à l'imitatiõ
des prestres de Bel prenans de nuit ces
bonnes viandes pour les manger, les y auoyent
tellement entretenus, voire confirmez,
que quoy que par experiẽce nous
leur mõstrissiõs que ce qu'ils y mettoyẽt
le soir s'y retrouueroit le lẽ demain, à pei
ne peusmes nous persuader le contraire
à quelques vns. Tellemẽt qu'on peut dire
ceste resuerie des Sauuages n'estre pas
fort differente de celle des Rabins Docteurs
Iudaiques: ni de celle de Pausanias.
Car les Rabins tiennẽt que le corps

mort est laissé en la puissance d'vn diable
qu'il nommẽt Zazel ou azazel, lequel ils
disent estre appelé prince du desert au
Leuitique: & mesme pour confirmer
leur erreur ils destournent ces passages
de l'Escriture ou il est dit au serpent tu

mangeras la terre tout le temps de ta vie:
car puis disent ils que nostre cosps est
terre du limon & de la poudre de la ter-

re, qui est la viande du Serpent, il luy est

suiet iusques a ce qu'il soit transmué en
nature spirituelle. Pausanias semblablement
raconte d'vn autre diable nommé
Eurinomus, duquelles interpreteurs des
Delphiens ont dit, qu'il deuoroit la chair
des morts, & n'y laissoit rien que les os,
qui est en somme, ainsi que i'ay dit, le mes
me erreur de nos Ameriquains.

Finalement quand les Sauuages, à la
maniere que nous auons monstré au chapitre
precedent, renouuellent & trans-

portent leur village en autre lieu, mettãs
dessus les fosses des trespassez de petites
couuertures de leur grande herbe nommee
Pindo: non seulement les passans y re
cognoissent forme de Cimitiere, mais
aussi quand les femmes s'y rencontrent,
ou autremẽt quãd elles sont par les bois
si elles se ressouuiennẽt de leurs feus ma
ris, ce sera à faire les regrets accoustumez,
& à hurler de telle sorte qu'elles se
font ouyr de demie lieuë. Parquoy les
laissant pleurer tout leur saoul, puis que
i'ay poursuyui les Sauuages iusques
à la fosse, ie mettray ici fin à discourir
de leur maniere de faire: toutesfois
les lecteurs en pourrõt encore voir quelque
chose au Colloque suyuant lequel
fut fait au temps que i'estois en l'Amerique
à l'aide d'vn Truchement, qui non
seulement, pour y auoir demeuré sept ou
huit ans entendoit parfaitement le langage
des gens du pays, mais aussi parce
qu'il auoit bien estudié mesme en la langue
Grecque, dont (ainsi que ceux qui
l'entendent ont ia peu voir ci dessus) ceste
nation des Tououpinamboults, a quelques
mots, il le pouuoit mieux expliquer.