University of Virginia Library

Uith thir wordis the spreit of Eneas
And of the strang Achates reiosyt was,
Gretly desyryng the clowd to brek in tway.
Bot first Achates till Enee gan say:
“Son of the goddes, quhat purposs now,” quod he,
“Rysis in thy breist? All is sovir, thou may se,
Thyne navy and thy ferys recoverit beyn,
Wantand but ane, amang the fludis greyn
Quham we saw droun. All other thingis, thou knawis,
Is now conform onto thy moderis sawys.”
And scarsly haith he all thir wordis spokkyn,
Quhen that the clowd abowt thame swith was brokkyn
And vanyst tyte away amang the ayr.
Vp stude Enee, in cleir lycht schynyng fair,
Lyke till ane god in body and in face
For his moder grantit hir son sik grace,
Hys crysp harys war plesand on to se,
Hys favour gudly, full of fresch bewte,
Lyke till ane ȝongker with twa lauchand eyn—
Als gracyus fortobehald, I weyn,
As evoir boyn by craft of hand weill dycht,
Or as we se the burnyst siluer brycht,
Or ȝit the quhite polist marbill stane schyne
Quhen thai beyn circulit about with gold sa fyne.
Or evir thai wist, befor thame all inhy,
Onto the queyn thus said he reuerently:
“Hym quham ȝe seik behald now present heir,
Enee the Troian, delyverit from danger
Of storm and wallys of the Libiane see.
O thou only, quhilk rewth hess and piete
On the ontellabill pyne of the Troianys,
Quhilk ws, the Grekis levyngis and remanys,
Ourset with all maner necessiteis
And euery perrell baith be landis and seis,
Within thy cyte ressauys till herbry
And to famyliar frendschip and ally;
To quyte the, rendring ganand thankis rycht,
That lyis nocht, Dido, intill our mycht,
Nor all the laif of the Troian menȝe,
Throw out this warld skatterit quhar euer thai be,
Bot the hie goddis, gif ony deite takis tent
To thame at petuus beyn and pacient,
For iustice eik gif euer reward beis get,
And rychtwyss myndis ramembrit and nocht forȝet,
Thai ilke goddis mot dewly reward the
Accordyng thy desert in all degre.
Quhou happy and ioyus was that tyme serene
That the producit hess, sa nobill a queyn!
Quhou wirschipfull eik war thai parentis of mycht
Quhilk the engendrit hess, sa worthy a wight!
Quhill fludis rynnys in the sey but dowt,
Quhil sonnys schaddow circlys hillis about,
And the firmament starris doith conteyn,
Thy honour and thy fame sall evir be grene,
And thy renown remane perpetualy,
Throu all realmys quharto that drevyn am I.”
Thus sayand, til his frend Ilioneus
Hys rycht hand gave he, and to Serestus
Gave his left hand, syne welcumit euery man,
The strang Cloanthus and the stowt Gyan.
The queyn Dido, astonyst a litill wie
At the first syght, behaldand his bewte,
Awondring be quhat wyss he cummyn was,
Onto him thus scho said with myld face:
“Son of the goddes, quhat hard aduersite
Throw owt so feill perrellis hass catchit the?
Quhat forss and violens drave the hyddir till ws,
Apon thir costis that beyn so dangerus?
Art thou not theilk compacient Eneas
That apon haly Venus engendrit was
Be the Troian Anchises, as thai say,
Besyde the flude Symois in Phrigia?
Weill I remembir, to Sydon the cyte
Sen Tewcer com, banyst from his cuntre,
Sekand supple at Belus, and sum new land;
My fader than, Belus, I vndirstand,
The rich realm of Cipir wastit by weir,
And wan it syne and gave it to Tewcer,
And evir syne of Troy, that gret cyte,
The distructioun hass beyn weill knaw to me,
Thy name alsso, and pryncis of Grece sans faill
With quham thou faught seir tymys in batale.
This ilk Tewcer hys ennemys of Troy
Rusyt and lovit, and with excellent ioy
Full oft him self extoll and vant he wald
Of Troiane blude tobe discend of ald.
Tharfor haue done, gallandis, cum on ȝour way,
Entir within our lugyng, we ȝou pray.
Siclike fortoun, throu mony feill danger,
At last onto this land hass dryve me heir;
Thus, nocht mysknawand quhat payn is ennoy to dre,
I lernyt to help all tholis aduersyte.”
Rehersyng this, convoys sche Eneas
Towart the place quhar hir ryche palyce was,
And tharwith eik commandis halyday,
Throwe owt the cyte all suldbe game and play.
And netheless, the sammyn tyme sendis sche
Down to his folkis at the cost of the see
Twenty fed oxin, large, gret and fyne,
And ane hundreth bustuus bowkis of swyne,
Ane hundreth lammys and thar moderis tharby,
With other presandis, and wyne habundandly.
The place within maist gloriusly and gay
Adornyt was all our with ryall array;
Amyd the hie rufe of the mekill hall
For the banket mony rich claith of pall
Was spred, and mony badkyn wonderly wrocht.
Of siluer playt ane huge weght furth was brocht
To set on burdis, and veschell forgit of gold
Quharin was grave (maste curyus tobehold)
The valȝeant dedis of forfaderis past by
Sen first begynnyng of thar geneology,
Man eftir man lyke as thai dyd succeid,
In lang rememberans of thar worthyheid.
Ene, for that his faderly piete
Wold nocht suffir hys mynd in rest tobe,
In haist Achates to the schippis send
To schaw Ascaneus all fra end till end,
Onto the cite that he onon war brocht;
On ȝong Ascaneus was haill the faderis thocht.
Seir gyftis eik he bad bryng with him syne,
Hynt and deliuerit from the Troian rewyne—
Ane rych garmont brusyt with stife gold wyre,
The purpour mantill and rycht quent attyre
That pliabill was with the gilt bordour large,
Sum tyme array of Helene, queyn of Arge,
Quhilk from the realm of Myce with hir sche brocht,
Quhen scho to Troy forbodyn hymeneus socht,
This wondrus gift gottin at hir moder Lyda;
And forthir eik, of fair Illionya
He bad hym bryng with hym the ceptre wand
Quhilum Priamus eldast douchter bair in hand,
The collar pight with orient peirlys als
That sche vmquhile wair about hir hals,
Off gold alsso the closs or dowbill crown
Set full of precyus stonys enveroun.
To do his charge, Achates bissely
The way towart the schippis socht in hy.