3978
[題詞]述戀緒歌一首[并短歌]
[原文]妹毛吾毛 許己呂波於夜自 多具敝礼登 伊夜奈都可之久 相見<婆> 登許波都波
奈尓 情具之 眼具之毛奈之尓 波思家夜之 安我於久豆麻 大王能 美許登加之古美 阿
之比奇能 夜麻古要奴由伎 安麻射加流 比奈乎左米尓等 別来之 曽乃日乃伎波美 荒璞
能 登之由吉我敝利 春花<乃> 宇都呂布麻泥尓 相見祢婆 伊多母須敝奈美 之伎多倍能
蘇泥可敝之都追 宿夜於知受 伊米尓波見礼登 宇都追尓之 多太尓安良祢婆 孤悲之家
口 知敝尓都母里奴 近<在>者 加敝利尓太仁母 宇知由吉Ｃ 妹我多麻久良 佐之加倍Ｃ
祢天蒙許万思乎 多麻保己乃 路波之騰保久 關左閇尓 敝奈里Ｃ安礼許曽 与思恵夜之
餘志播安良武曽 霍公鳥 来鳴牟都奇尓 伊都之加母 波夜久奈里那牟 宇乃花能 尓保敝
流山乎 余曽能未母 布里佐氣見都追 淡海路尓 伊由伎能里多知 青丹吉 奈良乃吾家尓
奴要鳥能 宇良奈氣之都追 思多戀尓 於毛比宇良夫礼 可度尓多知 由布氣刀比都追 吾
乎麻都等 奈須良牟妹乎 安比Ｃ早見牟
[訓読]妹も我れも 心は同じ たぐへれど いやなつかしく 相見れば 常初花に 心ぐし
めぐしもなしに はしけやし 我が奥妻 大君の 命畏み あしひきの 山越え野行き 天
離る 鄙治めにと 別れ来し その日の極み あらたまの 年行き返り 春花の うつろふま
でに 相見ねば いたもすべなみ 敷栲の 袖返しつつ 寝る夜おちず 夢には見れど う
つつにし 直にあらねば 恋しけく 千重に積もりぬ 近くあらば 帰りにだにも うち行
きて 妹が手枕 さし交へて 寝ても来ましを 玉桙の 道はし遠く 関さへに へなりて
あれこそ よしゑやし よしはあらむぞ 霍公鳥 来鳴かむ月に いつしかも 早くなりな
む 卯の花の にほへる山を よそのみも 振り放け見つつ 近江道に い行き乗り立ち あ
をによし 奈良の我家に ぬえ鳥の うら泣けしつつ 下恋に 思ひうらぶれ 門に立ち
夕占問ひつつ 我を待つと 寝すらむ妹を 逢ひてはや見む
[仮名],いももあれも,こころはおやじ,たぐへれど,いやなつかしく,あひみれば,とこは
つはなに,こころぐし,めぐしもなしに,はしけやし,あがおくづま,おほきみの,みことか
しこみ,あしひきの,やまこえぬゆき,あまざかる,ひなをさめにと,わかれこし,そのひの
きはみ,あらたまの,としゆきがへり,はるはなの,うつろふまでに,あひみねば,いたもす
べなみ,しきたへの,そでかへしつつ,ぬるよおちず,いめにはみれど,うつつにし,ただに
あらねば,こひしけく,ちへにつもりぬ,ちかくあらば,かへりにだにも,うちゆきて,いも
がたまくら,さしかへて,ねてもこましを,たまほこの,みちはしとほく,せきさへに,へな
りてあれこそ,よしゑやし,よしはあらむぞ,ほととぎす,きなかむつきに,いつしかも,は
やくなりなむ,うのはなの,にほへるやまを,よそのみも,ふりさけみつつ,あふみぢに,い
ゆきのりたち,あをによし,ならのわぎへに,ぬえどりの,うらなけしつつ,したごひに,お
もひうらぶれ,かどにたち,ゆふけとひつつ,わをまつと,なすらむいもを,あひてはやみ
む
[_]
[左注]（右三月廿日夜裏忽兮起戀情作 大伴宿祢家持）
[_]
[校異]波 → 婆 [元][類][紀][細] / 之 → 乃 [元][類][細] / 有 → 在 [元][類][紀]
[_]
[ＫＷ],天平１９年３月２０日,年紀,作者：大伴家持,望郷,恋情,悲別,動物,枕詞,高岡,富
山,孤独
