XXXV. O Christe, rex gencium,
O vita viuencium.
1
O orient light shynyng moost bright,
O sonne of right, adowne thou light
And by thy myght now geve vs light,
O Christe rex gencium.
2
O savyoure moost of honoure,
Cum fro thy towre, cease oure doloure
Bothe day and houre waityng socoure,
O vita viuencium.
3
O we in payne wolde, in certeyn,
Thou woldest refrayne, lorde, and restreyn
Thyne hande ageyn of myght and meyn,
O Christe, rex gencium.
4
O Iesse rote moost swete and soote,
In ryende and rote moost full of boote,
To vs be bote bounde hande and foote,
O vita viuencium.
5
O Assuere, prince without pere,
Come fro thy spere, to vs draw nere;
Oure prayer here, o lorde moost dere,
O Christe, rex gencium.
6
O cornere stone, that makist both one,
Here oure grete mone and graunt our bone:
Cume downe anone, save vs echeone,
O vita viuencium.
7
O prince of peas, oure bonde release,
Oure woo thou ceas and graunt vs peas
In blis endeles, that shall not cease,
O Christe, rex gencium.
8
O king of myght and sonne of right,
O endeles light so clere and bright,
Of the a sight thou vs behight,
O vita viuencium.