LVII. O, o, o, o, o, o, o, o,
O deus sine termino.
1
O fader withoute begynnyng,
O sonne and holigoost also,
O iij. and one without ending,
O deus sine termino;
2
O iij. persones in one vnyte
Beyng but one god and nomoo,
One in substance, essens and myght,
O deus sine termino;
3
O, whiche hast made bothe day and nyght,
Heven and erthe rounde like an O
By thy wisdome and endeles myght,
O deus sine termino;
4
O, whiche of nought althing hast wrought,
O verbum in principio,
O, without whom is wrought right nought,
O deus sine termino;
5
O prince of peas, o heven king,
O fynall ender of oure woo,
O, whose kingdome hath non ending,
O deus sine termino;
6
O maker of eche creature,
O supplanter of oure foo,
O sonne of Marie, virgyn pure,
O deus sine termino;
7
We beseche the with alle oure myght,
Or we depart this worlde fro,
Of forgevenes of oure delicte,
O deus sine termino.
8
Criste graunte vs grace, that we come may
To heven blisse, whenne we hens goo,
That deyed for vs on good friday
Et regnat sine termino.