CXLVI. Mary hath borne alone
The sonne of god in trone.
1
That meyden mylde here childe did kepe,
As moders dothe echone,
Butt here dere sonne full sore did wepe
For synfull man alone.
2
Sche rockyd hym and sunge “Lullay”,
Butt euer he made grete mone.
“Dere sonne,” she seyde, “telle (I the pray),
Why thou doist wepe alone.”
3
‘Moder,’ he seyde, ‘I schall be sclayn,
Thatt syn did neuer none,
And suffer dethe with woofull payn;
Therfore I wepe alone.’
4
“Lullay,” she seyde, “sclepe and be still
And lete be alle thy mone,
For alle thyng is atte thyn own will
In heuen and erthe alone.”
5
‘Modere,’ he seyde, ‘hou schulde I sclepe?
Hou shulde I leve my mone?
I haue more cause to sobbe and wepe,
Sith I shall die alone.’
6
“Dere sonne,” she seyde, “the kyng of blisse,
Thatt is so highe in trone,
Knowith, thatt thou diddist neuer amys:
Why schuldist thou dy alone?”
7
‘Modere,’ he seyde, ‘only of the
I toke bothe flesshe and bone
To saue mankynde and make it fre
With my hert bloode alone.’
8
“Dere sonne,” she seyde, “thou art equall
To god, thatt ys in trone;
For man therfore, thatt is so thrall,
Why shuldist thou dye alone?”
9
‘Moder,’ he seyde, ‘my faders will
And myn, they be butte one;
Therfore by skylle I most fulfill
My faders will alone.’
10
“Dere sonne,” she seyde, “sith þou hast take
Of me bothe flesshe and bone,
Yff it may be, me notte forsake
In care and woo alone.”
11
‘For man I most the raunsome pay,
The whiche to helle is gone,
Moder,’ he seyde, ‘on goode fryday,
For he may notte alone.’
12
“Dere sonne,” she seyde vnto hym thoo,
“When thou fro me arte gone,
Then shalle I lyff in care and woo
Withowte confort alone.”
13
‘Moder,’ he seyde, ‘take thou no thought,
For me make thou no mone:
When I haue bought, þat I haue wrought,
Thou shalt not be alone.
14
On the .iij.de day, I the behyght,
After thatt I am gone,
I wyll aryse by my grete myght
And confort the alone.’
