VI. O virgyne Marie, quene of blis,
Of thy conforte lete vs not mys.
1
O closed gate of Ezechiell,
O plentevous mounte of Daniel,
O moder of Emanuel,
Of thy conforte lete vs not mys.
2
O perfecte trone of Salamon,
O flore and flese of Gedeon,
O florent yerde of Aaron,
Of thy conforte lete vs not mys.
3
O flamed busshe withoute leasure
Of Moyses, of whome nature
Ihesus Criste tooke, o virgyne pure,
Of thy confort lete vs not mys.
4
O quene Hester moost meke of myende,
That were worthy of god to fynde
Mercy and grace for alle mankyende,
Of thy confort lete vs not mys.
5
O stronge Iudith, that Holoferne
Decapitate, that was so sterne,
Ayenst Sathan to feight vs lerne:
Of thy confort lete vs not mys.
6
O lanterne of eternall light,
By whome of Criste we haue a sight,
Full of alle grace sith thy name hight,
Of thy comfort lete vs not mys.
7
O spowse of Criste inmaculate,
Aboue alle aungellis sublimate,
In blis of thy sonne coronate,
Of thy conforte lete vs not mys.
8
O quene of blis perpetuall,
That we, whiche be terrestriall,
Maye come to blis celestiall,
Of thy conforte lete vs not mys.
