XII. O clemens, o pia,
O dulcis Maria.
1
O quene of mercy and of grace,
O oure comforte in euery case,
To whome we calle in euery place,
O clemens, o pia;
2
O lady fre, o quene of blis,
Of thy conforte lete vs not mys,
For why thy name nowe called is
O dulcis Maria.
3
O oure lodesterre bothe bright and clere,
O quene of blis havyng no pere,
O spowse of Criste moost swete and dere,
O clemens, o pia;
4
Moder and mayde in one persone
Was neuir noon, but thou allone;
Wherefor, good lady, here oure mone,
O dulcis Maria.
5
O lanterne of eternall light
Moost pure and clene, moost clere and bright,
Cause vs of Criste to haue a sight,
O clemens, o pia.
6
O virgyne Mary meke and myelde,
For vs thou pray vnto thy chielde,
Fro blis that we be not exielde,
O dulcis Maria.
7
O flos campi of swete odoure,
O Iesse yerde full of honoure,
O moder of oure sauyoure,
O clemens, o pia;
8
O virgyne pure, on vs thou rue
And for oure synne vs not eschew,
But represent vs to Crist Ihesu,
O dulcis Maria.
9
O floure of alle virginitie
Replete with alle diuinite,
O triclyne of the trinitie,
O clemens, o pia;
10
O welle of vertu and of grace,
Returne to vs thy louely face;
Forsake vs not for oure trespace,
O dulcis Maria.
11
O fragrant roose, o lilly chaste,
O ardent busshe, that did not wast,
Thyne eye of grace vpon vs cast,
O clemens, o pia.
12
With louely chere pray thy sonne dere,
King Assuere, in blis so clere
That we in fere to hym may appere,
O dulcis Maria.