134. O Sweet Angel, Bring Me to Bliss
[_]
Henry E. Huntington Library, Ellesmere MS. 34. B. 7
A praier to the goode Angell.
O swete angell, to me soo deere,
that nyght and day standithe me neere
ffull loueyngly with mylde moode,
Thankyng, loueyng, loue & praysyng,
Offer for me to Ihū, our kyng,
ffor his gyfftes greate and goode.
As thow gothe betwix hym and me,
And knowethe my lyffe in euery degre,
Saying it in his presence,
Aske me grace to loue hym truly,
To serue my lorde with hertt duly,
With my dayly diligence.
Keepe me from vice and all perells,
Whiles thowe with me dayly trauells
In this worlde of wyckednesse;
Sett me my peticions grauntede
By thy praier dayly haunted,
Yff it please thy holynes.
The versicull
O swete Angell, that keepith me,
Bryng me to blysse, I pray the!
