万葉集 (Manyoshu) :: :: University of Virginia Library

万葉集 (Manyoshu)

第一巻

10.

11.

12.

13.

14.

15.

16.

17.

18.

19.

20.

Collapse All | Expand All expand section

雜歌

1664

[題詞]泊瀬朝倉宮御宇大泊瀬幼武天<皇>御製歌一首

[原文]暮去者小椋山尓臥鹿之今夜者不鳴寐家良霜

[訓読]夕されば小倉の山に伏す鹿の今夜は鳴かず寐ねにけらしも

[仮名],ゆふされば,をぐらのやまに,ふすしかの,こよひはなかず,いねにけらしも

[_]

[左注]右或本云崗本天皇御製不審正指因以累戴

[_]

[校異]歌 [西] 謌 / 皇天皇 → 皇 [藍][壬][紀] / 歌 [西] 謌 [西（訂正）] 歌

[_]

[ＫＷ],雑歌,作者：雄略天皇,舒明天皇,斉明天皇,作者異伝,重出,地名,動物

1665

[題詞]崗本宮御宇天皇幸紀伊國時歌二首

[原文]為妹吾玉拾奥邊有玉縁持来奥津白浪

[訓読]妹がため我れ玉拾ふ沖辺なる玉寄せ持ち来沖つ白波

[仮名],いもがため,われたまひりふ,おきへなる,たまよせもちこ,おきつしらなみ

[_]

[左注]（右二首作者未詳）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：斉明天皇,行幸,羈旅,紀州,和歌山,地名

1666

[題詞]（崗本宮御宇天皇幸紀伊國時歌二首）

[原文]朝霧尓沾尓之衣不干而一哉君之山道将越

[訓読]朝霧に濡れにし衣干さずしてひとりか君が山道越ゆらむ

[仮名],あさぎりに,ぬれにしころも,ほさずして,ひとりかきみが,やまぢこゆらむ

[_]

[左注]右二首作者未詳

[_]

[校異]

[_]

[ＫＷ],雑歌,作者：斉明天皇,行幸,羈旅,紀州,和歌山,地名,留守

1667

[題詞]大寳元年辛丑冬十月太上天皇大行天皇幸紀伊國時歌十三首

[原文]為妹我玉求於伎邊有白玉依来於伎都白浪

[訓読]妹がため我れ玉求む沖辺なる白玉寄せ来沖つ白波

[仮名],いもがため,あれたまもとむ,おきへなる,しらたまよせこ,おきつしらなみ

[_]

[左注]右一首上見既畢但歌辞小換年代相違因以累戴

[_]

[校異]歌 [西] 謌 [西（訂正）] 歌 / 歌 [西] 謌

[_]

[ＫＷ],雑歌,持統天皇,文武天皇,行幸,羈旅,紀州,和歌山,重出,地名,大宝１年１０月,年紀

1668

[題詞]（大寳元年辛丑冬十月太上天皇大行天皇幸紀伊國時歌十三首）

[原文]白埼者幸在待大船尓真梶繁貫又将顧

[訓読]白崎は幸くあり待て大船に真梶しじ貫きまたかへり見む

[仮名],しらさきは,さきくありまて,おほぶねに,まかぢしじぬき,またかへりみむ

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,土地讃美,地名,大宝１年１０月 ,年紀

1669

[題詞]（大寳元年辛丑冬十月太上天皇大行天皇幸紀伊國時歌十三首）

[原文]三名部乃浦塩莫満鹿嶋在釣為海人乎見變来六

[訓読]南部の浦潮な満ちそね鹿島なる釣りする海人を見て帰り来む

[仮名],みなべのうら,しほなみちそね,かしまなる,つりするあまを,みてかへりこむ

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,土地讃美,地名,大宝１年１０月 ,年紀

1670

[題詞]（大寳元年辛丑冬十月太上天皇大行天皇幸紀伊國時歌十三首）

[原文]朝開滂出而我者湯羅前釣為海人乎見<反>将来

[訓読]朝開き漕ぎ出て我れは由良の崎釣りする海人を見て帰り来む

[仮名],あさびらき,こぎでてわれは,ゆらのさき,つりするあまを,みてかへりこむ

[_]

[左注]

[_]

[校異]變 → 反 [藍][壬][類]

[_]

[ＫＷ],雑歌,持統天皇,文武天皇,行幸,羈旅,紀州,和歌山,土地讃美,地名,大宝１年１０月 ,年紀

1671

[題詞]（大寳元年辛丑冬十月太上天皇大行天皇幸紀伊國時歌十三首）

[原文]湯羅乃前塩乾尓祁良志白神之礒浦箕乎敢而滂動

[訓読]由良の崎潮干にけらし白神の礒の浦廻をあへて漕ぐなり

[仮名],ゆらのさき,しほひにけらし,しらかみの,いそのうらみを,あへてこぐなり

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1672

[題詞]（大寳元年辛丑冬十月太上天皇大行天皇幸紀伊國時歌十三首）

[原文]黒牛方塩干乃浦乎紅玉裾須蘇延徃者誰妻

[訓読]黒牛潟潮干の浦を紅の玉裳裾引き行くは誰が妻

[仮名],くろうしがた,しほひのうらを,くれなゐの,たまもすそびき,ゆくはたがつま

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,恋情,大宝１年１０月,年紀

1673

[題詞]（大寳元年辛丑冬十月太上天皇大行天皇幸紀伊國時歌十三首）

[原文]風莫乃濱之白浪徒於斯依久流見人無 [一云於斯依来藻]

[訓読]風莫の浜の白波いたづらにここに寄せ来る見る人なしに [一云ここに寄せ来も]

[仮名],かざなしの,はまのしらなみ,いたづらに,ここによせくる,みるひとなしに,[ここによせくも]

[_]

[左注]右一首山上<臣>憶良類聚歌林曰長忌寸意吉麻呂應詔作此歌

[_]

[校異]莫（塙）草 / 臣 [西（上書訂正）][藍][壬][紀] / 歌林 [西] 謌林 [西（訂正）] 歌林 / 此歌 [西] 此謌 [西（訂正）] 此歌

[_]

[ＫＷ],雑歌,長意吉麻呂,持統天皇,文武天皇,行幸,羈旅,紀州,和歌山,地名,大宝１年１０月,年紀,異伝,推敲

1674

[題詞]（大寳元年辛丑冬十月太上天皇大行天皇幸紀伊國時歌十三首）

[原文]我背兒我使将来歟跡出立之此松原乎今日香過南

[訓読]我が背子が使来むかと出立のこの松原を今日か過ぎなむ

[仮名],わがせこが,つかひこむかと,いでたちの,このまつばらを,けふかすぎなむ

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1675

[題詞]（大寳元年辛丑冬十月太上天皇大行天皇幸紀伊國時歌十三首）

[原文]藤白之三坂乎越跡白栲之我衣乎者所沾香裳

[訓読]藤白の御坂を越ゆと白栲の我が衣手は濡れにけるかも

[仮名],ふぢしろの,みさかをこゆと,しろたへの,わがころもでは,ぬれにけるかも

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1676

[題詞]（大寳元年辛丑冬十月太上天皇大行天皇幸紀伊國時歌十三首）

[原文]勢能山尓黄葉常敷神岳之山黄葉者今日散濫

[訓読]背の山に黄葉常敷く神岳の山の黄葉は今日か散るらむ

[仮名],せのやまに,もみちつねしく,かむをかの,やまのもみちは,けふかちるらむ

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,望郷,地名,大宝１年１０月,年紀

1677

[題詞]（大寳元年辛丑冬十月太上天皇大行天皇幸紀伊國時歌十三首）

[原文]山跡庭聞徃歟大我野之竹葉苅敷廬為有跡者

[訓読]大和には聞こえも行くか大我野の竹葉刈り敷き廬りせりとは

[仮名],やまとには,きこえもゆくか,おほがのの,たかはかりしき,いほりせりとは

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1678

[題詞]（大寳元年辛丑冬十月太上天皇大行天皇幸紀伊國時歌十三首）

[原文]木國之昔弓雄之響矢用鹿取靡坂上尓曽安留

[訓読]紀の国の昔弓雄の鳴り矢もち鹿取り靡けし坂の上にぞある

[仮名],きのくにの,むかしさつをの,なりやもち,かとりなびけし,さかのうへにぞある

[_]

[左注]

[_]

[校異]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1679

[題詞]（大寳元年辛丑冬十月太上天皇大行天皇幸紀伊國時歌十三首）

[原文]城國尓不止将徃来妻社妻依来西尼妻常言長柄 [一云嬬賜尓毛嬬云長<良 >]

[訓読]紀の国にやまず通はむ妻の杜妻寄しこせに妻といひながら [一云妻賜はにも妻といひながら]

[仮名],きのくにに,やまずかよはむ,つまのもり,つまよしこせに,つまといひながら,[つまたまはにも,つまといひながら]

[_]

[左注]右一首或云坂上忌寸人長作

[_]

[校異]良 → 柄 [藍][壬][類][紀]

[_]

[ＫＷ],雑歌,持統天皇,文武天皇,行幸,羈旅,紀州,和歌山,地名,大宝１年１０月,年紀

1680

[題詞]後人歌二首

[原文]朝裳吉木方徃君我信土山越濫今日曽雨莫零根

[訓読]あさもよし紀へ行く君が真土山越ゆらむ今日ぞ雨な降りそね

[仮名],あさもよし,きへゆくきみが,まつちやま,こゆらむけふぞ,あめなふりそね

[_]

[左注]

[_]

[校異]歌 [西] 謌

[_]

[ＫＷ],雑歌,和歌山,餞別,留守,地名

1681

[題詞]（後人歌二首）

[原文]後居而吾戀居者白雲棚引山乎今日香越濫

[訓読]後れ居て我が恋ひ居れば白雲のたなびく山を今日か越ゆらむ

[仮名],おくれゐて,あがこひをれば,しらくもの,たなびくやまを,けふかこゆらむ

[_]

[左注]

[_]

[校異]

[_]

[ＫＷ],雑歌,餞別,留守

1682

[題詞]獻忍壁皇子歌一首 [詠仙人形]

[原文]常之<倍>尓夏冬徃哉裘扇不放山住人

[訓読]とこしへに夏冬行けや裘扇放たぬ山に住む人

[仮名],とこしへに,なつふゆゆけや,かはごろも,あふぎはなたぬ,やまにすむひと

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌 / 陪 → 倍 [藍][壬][類][紀]

[_]

[ＫＷ],雑歌,作者：柿本人麻呂歌集,献呈歌,詠物,忍壁皇子,非略体

1683

[題詞]獻舎人皇子歌二首

[原文]妹手取而引与治に手折吾刺可花開鴨

[訓読]妹が手を取りて引き攀ぢふさ手折り我がかざすべく花咲けるかも

[仮名],いもがてを,とりてひきよぢ,ふさたをり,わがかざすべく,はなさけるかも

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,献呈歌,舎人皇子,非略体

1684

[題詞]（獻舎人皇子歌二首）

[原文]春山者散過去鞆三和山者未含君持勝尓

[訓読]春山は散り過ぎぬとも三輪山はいまだふふめり君待ちかてに

[仮名],はるやまは,ちりすぎぬとも,みわやまは,いまだふふめり,きみまちかてに

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,献呈歌,舎人皇子,奈良,桜井,非略体,地名

1685

[題詞]泉河邊間人宿祢作歌二首

[原文]河瀬激乎見者玉藻鴨散乱而在川常鴨

[訓読]川の瀬のたぎつを見れば玉藻かも散り乱れたる川の常かも

[仮名],かはのせの,たぎつをみれば,たまもかも,ちりみだれたる,かはのつねかも

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌 / 玉藻 [類][古]（塙）玉

[_]

[ＫＷ],雑歌,柿本人麻呂歌集,作者：間人宿祢,木津川,京都,羈旅,非略体,地名

1686

[題詞]（泉河邊間人宿祢作歌二首）

[原文]孫星頭刺玉之嬬戀乱祁良志此川瀬尓

[訓読]彦星のかざしの玉は妻恋ひに乱れにけらしこの川の瀬に

[仮名],ひこほしの,かざしのたまは,つまごひに,みだれにけらし,このかはのせに

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,柿本人麻呂歌集,七夕,作者：間人宿祢,木津川,京都,羈旅,非略体

1687

[題詞]鷺坂作歌一首

[原文]白鳥鷺坂山松影宿而徃奈夜毛深徃乎

[訓読]白鳥の鷺坂山の松蔭に宿りて行かな夜も更けゆくを

[仮名],しらとりの,さぎさかやまの,まつかげに,やどりてゆかな,よもふけゆくを

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,京都,羈旅,非略体,地名

1688

[題詞]名木河作歌二首

[原文]ぬ干人母在八方沾衣乎家者夜良奈羈印

[訓読]あぶり干す人もあれやも濡れ衣を家には遣らな旅のしるしに

[仮名],あぶりほす,ひともあれやも,ぬれぎぬを,いへにはやらな,たびのしるしに

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,京都,羈旅,非略体,地名

1689

[題詞]（名木河作歌二首）

[原文]在衣邊著而榜尼杏人濱過者戀布在奈利

[訓読]あり衣辺につきて漕がさね杏人の浜を過ぐれば恋しくありなり

[仮名],ありそへに,つきてこがに,からひとの,はまをすぐれば,こほしくありなり

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,京都,羈旅,非略体,地名

1690

[題詞]高島作歌二首

[原文]高嶋之阿渡川波者驟鞆吾者家思宿加奈之弥

[訓読]高島の阿渡川波は騒けども我れは家思ふ宿り悲しみ

[仮名],たかしまの,あどかはなみは,さわけども,われはいへおもふ,やどりかなしみ

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,滋賀県,羈旅,非略体,望郷,地名

1691

[題詞]（高島作歌二首）

[原文]客在者三更刺而照月高嶋山隠惜毛

[訓読]旅なれば夜中をさして照る月の高島山に隠らく惜しも

[仮名],たびにあれば,よなかをさして,てるつきの,たかしまやまに,かくらくをしも

[_]

[左注]（右柿本朝臣人麻呂之歌集所出）

[_]

[校異]刺（塙）判

[_]

[ＫＷ],雑歌,作者：柿本人麻呂歌集,滋賀県,羈旅,非略体,地名

1692

[題詞]紀伊國作歌二首

[原文]吾戀妹相佐受玉浦丹衣片敷一鴨将寐

[訓読]我が恋ふる妹は逢はさず玉の浦に衣片敷き独りかも寝む

[仮名],あがこふる,いもはあはさず,たまのうらに,ころもかたしき,ひとりかもねむ

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,和歌山,羈旅,非略体,地名,望郷

1693

[題詞]（紀伊國作歌二首）

[原文]玉匣開巻惜ね夜矣袖可礼而一鴨将寐

[訓読]玉櫛笥明けまく惜しきあたら夜を衣手離れて独りかも寝む

[仮名],たまくしげ,あけまくをしき,あたらよを,ころもでかれて,ひとりかもねむ

[_]

[左注]（右柿本朝臣人麻呂之歌集所出）

[_]

[校異]寐 [類] 宿

[_]

[ＫＷ],雑歌,作者：柿本人麻呂歌集,和歌山,羈旅,非略体,望郷

1694

[題詞]鷺坂作歌一首

[原文]細比礼乃鷺坂山白管自吾尓尼保波<尼> 妹尓示

[訓読]栲領巾の鷺坂山の白つつじ我れににほはに妹に示さむ

[仮名],たくひれの,さぎさかやまの,しらつつじ,われににほはに,いもにしめさむ

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌 / 弖 → 尼 [藍][類][紀]

[_]

[ＫＷ],雑歌,作者：柿本人麻呂歌集,京都,羈旅,非略体,地名,植物

1695

[題詞]泉河作歌一首

[原文]妹門入出見川乃床奈馬尓三雪遣未冬鴨

[訓読]妹が門入り泉川の常滑にみ雪残れりいまだ冬かも

[仮名],いもがかど,いりいづみがはの,とこなめに,みゆきのこれり,いまだふゆかも

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,木津川,京都,羈旅,非略体,地名

1696

[題詞]名木河作歌三首

[原文]衣手乃名木之川邊乎春雨吾立沾等家念良武可

[訓読]衣手の名木の川辺を春雨に我れ立ち濡ると家思ふらむか

[仮名],ころもでの,なきのかはへを,はるさめに,われたちぬると,いへおもふらむか

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,京都,羈旅,非略体,地名

1697

[題詞]（名木河作歌三首）

[原文]家人使在之春雨乃与久列杼吾<等>乎沾念者

[訓読]家人の使ひにあらし春雨の避くれど我れを濡らさく思へば

[仮名],いへびとの,つかひにあらし,はるさめの,よくれどわれを,ぬらさくおもへば

[_]

[左注]（右柿本朝臣人麻呂之歌集所出）

[_]

[校異]<> → 等 [藍][類][紀]

[_]

[ＫＷ],雑歌,作者：柿本人麻呂歌集,京都,羈旅,非略体

1698

[題詞]（名木河作歌三首）

[原文]ぬ干人母在八方家人春雨須良乎間使尓為

[訓読]あぶり干す人もあれやも家人の春雨すらを真使ひにする

[仮名],あぶりほす,ひともあれやも,いへびとの,はるさめすらを,まつかひにする

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,京都,羈旅,非略体

1699

[題詞]宇治河作歌二首

[原文]巨椋乃入江響奈理射目人乃伏見何田井尓鴈渡良之

[訓読]巨椋の入江響むなり射目人の伏見が田居に雁渡るらし

[仮名],おほくらの,いりえとよむなり,いめひとの,ふしみがたゐに,かりわたるらし

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,京都,羈旅,非略体,地名,動物

1700

[題詞]（宇治河作歌二首）

[原文]金風山吹瀬乃響苗天雲翔鴈相鴨

[訓読]秋風に山吹の瀬の鳴るなへに天雲翔る雁に逢へるかも

[仮名],あきかぜに,やまぶきのせの,なるなへに,あまくもかける,かりにあへるかも

[_]

[左注]（右柿本朝臣人麻呂之歌集所出）

[_]

[校異]雁相 [藍][類][古] 相

[_]

[ＫＷ],雑歌,作者：柿本人麻呂歌集,京都,羈旅,非略体,地名

1701

[題詞]獻弓削皇子歌三首

[原文]佐宵中等夜者深去良斯鴈音所聞空月渡見

[訓読]さ夜中と夜は更けぬらし雁が音の聞こゆる空を月渡る見ゆ

[仮名],さよなかと,よはふけぬらし,かりがねの,きこゆるそらを,つきわたるみゆ

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,弓削皇子,献呈歌,非略体,動物

1702

[題詞]（獻弓削皇子歌三首）

[原文]妹當茂苅音夕霧来鳴而過去及乏

[訓読]妹があたり繁き雁が音夕霧に来鳴きて過ぎぬすべなきまでに

[仮名],いもがあたり,しげきかりがね,ゆふぎりに,きなきてすぎぬ,すべなきまでに

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,弓削皇子,献呈歌,非略体,動物

1703

[題詞]（獻弓削皇子歌三首）

[原文]雲隠鴈鳴時秋山黄葉片待時者雖過

[訓読]雲隠り雁鳴く時は秋山の黄葉片待つ時は過ぐれど

[仮名],くもがくり,かりなくときは,あきやまの,もみちかたまつ,ときはすぐれど

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,弓削皇子,献呈歌,非略体,動物,植物,季節

1704

[題詞]獻舎人皇子歌二首

[原文]に手折多武山霧茂鴨細川瀬波驟祁留

[訓読]ふさ手折り多武の山霧繁みかも細川の瀬に波の騒ける

[仮名],ふさたをり,たむのやまきり,しげみかも,ほそかはのせに,なみのさわける

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,舎人皇子,献呈歌,飛鳥,非略体,地名

1705

[題詞]（獻舎人皇子歌二首）

[原文]冬木成春部戀而殖木實成時片待吾等叙

[訓読]冬こもり春へを恋ひて植ゑし木の実になる時を片待つ我れぞ

[仮名],ふゆこもり,はるへをこひて,うゑしきの,みになるときを,かたまつわれぞ

[_]

[左注]（右柿本朝臣人麻呂之歌集所出）

[_]

[校異]

[_]

[ＫＷ],雑歌,作者：柿本人麻呂歌集,舎人皇子,献呈歌,非略体,季節

1706

[題詞]舎人皇子御歌一首

[原文]黒玉夜霧立衣手高屋於霏ｄ麻天尓

[訓読]ぬばたまの夜霧は立ちぬ衣手を高屋の上にたなびくまでに

[仮名],ぬばたまの,よぎりはたちぬ,ころもでを,たかやのうへに,たなびくまでに

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,舎人皇子,桜井,飛鳥,非略体,地名

1707

[題詞]鷺坂作歌一首

[原文]山代久世乃鷺坂自神代春者張乍秋者散来

[訓読]山背の久世の鷺坂神代より春は張りつつ秋は散りけり

[仮名],やましろの,くぜのさぎさか,かむよより,はるははりつつ,あきはちりけり

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,京都,羈旅,非略体,地名

1708

[題詞]泉河邊作歌一首

[原文]春草馬咋山自越来奈流鴈使者宿過奈利

[訓読]春草を馬咋山ゆ越え来なる雁の使は宿り過ぐなり

[仮名],はるくさを,うまくひやまゆ,こえくなる,かりのつかひは,やどりすぐなり

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,木津川,京都,羈旅,非略体,動物

1709

[題詞]獻弓削皇子歌一首

[原文]御食向南淵山之巌者落波太列可削遺有

[訓読]御食向ふ南淵山の巌には降りしはだれか消え残りたる

[仮名],みけむかふ,みなぶちやまの,いはほには,ふりしはだれか,きえのこりたる

[_]

[左注]（右柿本朝臣人麻呂之歌集所出）

[_]

[校異]歌 [西] 謌 [西（訂正）] 歌 / 歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂歌集,弓削皇子,飛鳥,献呈歌,非略体,地名,季節

1710

[題詞]

[原文]吾妹兒之赤裳<Ｏ>塗而殖之田乎苅将蔵倉無之濱

[訓読]我妹子が赤裳ひづちて植ゑし田を刈りて収めむ倉無の浜

[仮名],わぎもこが,あかもひづちて,うゑしたを,かりてをさめむ,くらなしのはま

[_]

[左注]（右二首或云柿本朝臣人麻呂作）

[_]

[校異]泥 → Ｏ [藍][類][紀]

[_]

[ＫＷ],雑歌,作者：柿本人麻呂,福岡県,中津市,地名

1711

[題詞]

[原文]百<轉> 八十之嶋廻乎榜雖来粟小嶋者雖見不足可聞

[訓読]百伝ふ八十の島廻を漕ぎ来れど粟の小島は見れど飽かぬかも

[仮名],ももづたふ,やそのしまみを,こぎくれど,あはのこしまは,みれどあかぬかも

[_]

[左注]右二首或云柿本朝臣人麻呂作

[_]

[校異]轉之 → 轉 [藍][類][古][紀] / 者 [類][古][紀] 志

[_]

[ＫＷ],雑歌,作者：柿本人麻呂,羈旅,淡路,粟島,土地讃美,地名

1712

[題詞]登筑波山詠月一首

[原文]天原雲無夕尓烏玉乃宵度月乃入巻ね毛

[訓読]天の原雲なき宵にぬばたまの夜渡る月の入らまく惜しも

[仮名],あまのはら,くもなきよひに,ぬばたまの,よわたるつきの,いらまくをしも

[_]

[左注]

[_]

[校異]

[_]

[ＫＷ],雑歌,茨城,羈旅,地名

1713

[題詞]幸芳野離宮時歌二首

[原文]瀧上乃三船山従秋津邊来鳴度者誰喚兒鳥

[訓読]滝の上の三船の山ゆ秋津辺に来鳴き渡るは誰れ呼子鳥

[仮名],たきのうへの,みふねのやまゆ,あきづへに,きなきわたるは,たれよぶこどり

[_]

[左注]（右<二>首作者未詳）

[_]

[校異]歌 [西] 謌 [西（訂正）] 歌

[_]

[ＫＷ],雑歌,吉野,離宮,行幸,地名,動物

1714

[題詞]（幸芳野離宮時歌二首）

[原文]落多藝知流水之磐觸与杼賣類与杼尓月影所見

[訓読]落ちたぎち流るる水の岩に触れ淀める淀に月の影見ゆ

[仮名],おちたぎち,ながるるみづの,いはにふれ,よどめるよどに,つきのかげみゆ

[_]

[左注]右<二>首作者未詳

[_]

[校異]三 → 二 [藍][矢] （楓）三

[_]

[ＫＷ],雑歌,吉野,離宮,行幸,叙景

1715

[題詞]槐本歌一首

[原文]樂<浪>之平山風之海吹者釣為海人之袂變所見

[訓読]楽浪の比良山風の海吹けば釣りする海人の袖返る見ゆ

[仮名],ささなみの,ひらやまかぜの,うみふけば,つりするあまの,そでかへるみゆ

[_]

[左注]

[_]

[校異]歌 [西] 謌 [西（訂正）] 歌 / 波 → 浪 [藍][壬][類][紀]

[_]

[ＫＷ],雑歌,作者：柿本人麻呂,滋賀県,琵琶湖,羈旅,地名,叙景

1716

[題詞]山上歌一首

[原文]白那弥<乃> 濱松之木乃手酬草幾世左右二箇年薄經濫

[訓読]白波の浜松の木の手向けくさ幾代までにか年は経ぬらむ

[仮名],しらなみの,はままつのきの,たむけくさ,いくよまでにか,としはへぬらむ

[_]

[左注]右一首或云川嶋皇子御作歌

[_]

[校異]歌 [西] 謌 [西（訂正）] 歌 / 之 → 乃 [藍][壬][類][紀] / 歌 [西] 謌 [西（訂正）] 歌

[_]

[ＫＷ],雑歌,作者：山上憶良,川島皇子,異伝,重出,和歌山,羈旅,地名

1717

[題詞]春日歌一首

[原文]三川之淵瀬物不落左提刺尓衣手<潮> 干兒波無尓

[訓読]三川の淵瀬もおちず小網さすに衣手濡れぬ干す子はなしに

[仮名],みつかはの,ふちせもおちず,さでさすに,ころもでぬれぬ,ほすこはなしに

[_]

[左注]

[_]

[校異]歌 [西] 謌 [西（訂正）] 歌 / 湖 → 潮 [類][古][紀]

[_]

[ＫＷ],雑歌,作者：春日蔵首老,滋賀県,愛知,羈旅

1718

[題詞]高市歌一首

[原文]足利思<代> 榜行舟薄高嶋之足速之水門尓極尓<監>鴨

[訓読]率ひて漕ぎ去にし舟は高島の安曇の港に泊てにけむかも

[仮名],あどもひて,こぎいにしふねは,たかしまの,あどのみなとに,はてにけむかも

[_]

[左注]

[_]

[校異]歌 [西] 謌 [西（訂正）] 歌 / 伐 → 代 [濫][壬][類][紀] / 濫 → 監 [類][古][紀]

[_]

[ＫＷ],雑歌,作者：高市黒人,琵琶湖,滋賀県,羈旅,地名

1719

[題詞]春日蔵歌一首

[原文]照月遠雲莫隠嶋陰尓吾船将極留不知毛

[訓読]照る月を雲な隠しそ島蔭に我が舟泊てむ泊り知らずも

[仮名],てるつきを,くもなかくしそ,しまかげに,わがふねはてむ,とまりしらずも

[_]

[左注]右一首或本云小辨作也或記姓氏無記名字或称名号不称姓氏然依古記便以次載凡如此類下皆放焉

[_]

[校異]歌 [西] 謌 [西（訂正）] 歌 / 辨 [藍][紀][温]（塙）弁 / 放 [文][細][温] 效

[_]

[ＫＷ],雑歌,作者：春日蔵首老,小辨,異伝,羈旅

1720

[題詞]元仁歌三首

[原文]馬屯而打集越来今日見鶴芳野之川乎何時将顧

[訓読]馬並めてうち群れ越え来今日見つる吉野の川をいつかへり見む

[仮名],うまなめて,うちむれこえき,けふみつる,よしののかはを,いつかへりみむ

[_]

[左注]（右柿本朝臣人麻呂之歌集出）

[_]

[校異]歌 [西] 謌 [西（訂正）] 歌 / 今日 [壬][類]（塙）今

[_]

[ＫＷ],雑歌,柿本人麻呂歌集,作者：元仁,吉野,羈旅,非略体,地名

1721

[題詞]（元仁歌三首）

[原文]辛苦晩去日鴨吉野川清河原乎雖見不飽君

[訓読]苦しくも暮れゆく日かも吉野川清き川原を見れど飽かなくに

[仮名],くるしくも,くれゆくひかも,よしのがは,きよきかはらを,みれどあかなくに

[_]

[左注]（右柿本朝臣人麻呂之歌集出）

[_]

[校異]

[_]

[ＫＷ],雑歌,柿本人麻呂歌集,作者：元仁,吉野,土地讃美,羈旅,非略体,地名

1722

[題詞]（元仁歌三首）

[原文]吉野川河浪高見多寸能浦乎不視歟成嘗戀布<真>國

[訓読]吉野川川波高み滝の浦を見ずかなりなむ恋しけまくに

[仮名],よしのがは,かはなみたかみ,たきのうらを,みずかなりなむ,こほしけまくに

[_]

[左注]（右柿本朝臣人麻呂之歌集出）

[_]

[校異]莫 → 真 [壬][類][古]

[_]

[ＫＷ],雑歌,柿本人麻呂歌集,作者：元仁,吉野,羈旅,土地讃美,非略体,地名

1723

[題詞]絹歌一首

[原文]河蝦鳴六田乃河之川楊乃根毛居侶雖見不飽<河>鴨

[訓読]かわづ鳴く六田の川の川柳のねもころ見れど飽かぬ川かも

[仮名],かはづなく,むつたのかはの,かはやぎの,ねもころみれど,あかぬかはかも

[_]

[左注]（右柿本朝臣人麻呂之歌集出）

[_]

[校異]歌 [西] 謌 [西（訂正）] 歌 / 君 → 河 [壬][類][古][紀]

[_]

[ＫＷ],雑歌,柿本人麻呂歌集,作者：絹,吉野,土地讃美,羈旅,非略体,地名,動物

1724

[題詞]嶋足歌一首

[原文]欲見来之久毛知久吉野川音清左見二友敷

[訓読]見まく欲り来しくもしるく吉野川音のさやけさ見るにともしく

[仮名],みまくほり,こしくもしるく,よしのがは,おとのさやけさ,みるにともしく

[_]

[左注]（右柿本朝臣人麻呂之歌集出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,柿本人麻呂歌集,作者：嶋足,吉野,土地讃美,羈旅,非略体,地名

1725

[題詞]麻呂歌一首

[原文]古之賢人之遊兼吉野川原雖見不飽鴨

[訓読]いにしへの賢しき人の遊びけむ吉野の川原見れど飽かぬかも

[仮名],いにしへの,さかしきひとの,あそびけむ,よしののかはら,みれどあかぬかも

[_]

[左注]右柿本朝臣人麻呂之歌集出

[_]

[校異]歌 [西] 謌 [西（訂正）] 歌 / 歌 [西] 謌 [西（訂正）] 歌

[_]

[ＫＷ],雑歌,柿本人麻呂歌集,作者：麻呂,吉野,羈旅,土地讃美,非略体,地名

1726

[題詞]丹比真人歌一首

[原文]難波方塩干尓出<而> 玉藻苅海未通<女>等汝名告左祢

[訓読]難波潟潮干に出でて玉藻刈る海人娘子ども汝が名告らさね

[仮名],なにはがた,しほひにいでて,たまもかる,あまをとめども,ながなのらさね

[_]

[左注]

[_]

[校異]歌 [西] 謌 [西（訂正）] 歌 / <> → 而 [壬][類][古][紀] / <> → 女 [代匠記精撰本]

[_]

[ＫＷ],雑歌,作者：丹比真人,大阪,羈旅,妻問い,地名

1727

[題詞]和歌一首

[原文]朝入為流人跡乎見座草枕客去人尓妾<名>者不<教>

[訓読]あさりする人とを見ませ草枕旅行く人に我が名は告らじ

[仮名],あさりする,ひととをみませ,くさまくら,たびゆくひとに,わがなはのらじ

[_]

[左注]

[_]

[校異]歌 [西] 謌 / <> → 名 [万葉集新考] / 敷 → 教 [万葉集略解]

[_]

[ＫＷ],雑歌,和歌,答え,羈旅,大阪,妻問い

1728

[題詞]石川卿歌一首

[原文]名草目而今夜者寐南従明日波戀鴨行武従此間別者

[訓読]慰めて今夜は寝なむ明日よりは恋ひかも行かむこゆ別れなば

[仮名],なぐさめて,こよひはねなむ,あすよりは,こひかもゆかむ,こゆわかれなば

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：石川年足,石川宮麻呂,羈旅,恋情

1729

[題詞]宇合卿歌三首

[原文]暁之夢所見乍梶嶋乃石<超>浪乃敷弖志所念

[訓読]暁の夢に見えつつ梶島の礒越す波のしきてし思ほゆ

[仮名],あかときの,いめにみえつつ,かぢしまの,いそこすなみの,しきてしおもほゆ

[_]

[左注]

[_]

[校異]歌 [西] 謌 [西（訂正）] 歌 / 越 → 超 [藍][類][紀]

[_]

[ＫＷ],雑歌,作者：藤原宇合,羈旅,望郷,九州,京都,地名

1730

[題詞]（宇合卿歌三首）

[原文]山品之石田乃小野之母蘇原見乍哉公之山道越良武

[訓読]山科の石田の小野のははそ原見つつか君が山道越ゆらむ

[仮名],やましなの,いはたのをのの,ははそはら,みつつかきみが,やまぢこゆらむ

[_]

[左注]

[_]

[校異]

[_]

[ＫＷ],雑歌,作者：藤原宇合,京都,留守,羈旅,地名

1731

[題詞]（宇合卿歌三首）

[原文]山科乃石田社尓布<麻>越者蓋吾妹尓直相鴨

[訓読]山科の石田の杜に幣置かばけだし我妹に直に逢はむかも

[仮名],やましなの,いはたのもりに,ぬさおかば,けだしわぎもに,ただにあはむかも

[_]

[左注]

[_]

[校異]靡 → 麻 [藍][壬][類][紀]

[_]

[ＫＷ],雑歌,作者：藤原宇合,京都,羈旅,望郷,手向け,地名

1732

[題詞]碁師歌二首

[原文]<祖>母山霞棚引左夜深而吾舟将泊等万里不知母

[訓読]大葉山霞たなびきさ夜更けて我が舟泊てむ泊り知らずも

[仮名],おほばやま,かすみたなびき,さよふけて,わがふねはてむ,とまりしらずも

[_]

[左注]

[_]

[校異]歌 [西] 謌 [西（訂正）] 歌 / <> → 祖 [万葉集略解]

[_]

[ＫＷ],雑歌,作者：碁師,滋賀県,琵琶湖,重出,羈旅,寂寥,地名

1733

[題詞]（碁師歌二首）

[原文]思乍雖来々不勝而水尾埼真長乃浦乎又顧津

[訓読]思ひつつ来れど来かねて三尾の崎真長の浦をまたかへり見つ

[仮名],おもひつつ,くれどきかねて,みをのさき,まながのうらを,またかへりみつ

[_]

[左注]

[_]

[校異]

[_]

[ＫＷ],雑歌,作者：碁師,滋賀県,琵琶湖,羈旅,地名

1734

[題詞]少辨歌一首

[原文]高嶋之足利湖乎滂過而塩津菅浦今<香>将滂

[訓読]高島の安曇の港を漕ぎ過ぎて塩津菅浦今か漕ぐらむ

[仮名],たかしまの,あどのみなとを,こぎすぎて,しほつすがうら,いまかこぐらむ

[_]

[左注]

[_]

[校異]歌 [西] 謌 [西（訂正）] 歌 / 辨 [藍][類] 弁 / 者 → 香 [藍][壬][類][紀]

[_]

[ＫＷ],雑歌,作者：少辨,滋賀県,琵琶湖,羈旅,道行き,地名

1735

[題詞]伊保麻呂歌一首

[原文]吾疊三重乃河原之礒裏尓如是鴨跡鳴河蝦可物

[訓読]我が畳三重の川原の礒の裏にかくしもがもと鳴くかはづかも

[仮名],わがたたみ,みへのかはらの,いそのうらに,かくしもがもと,なくかはづかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：伊保麻呂,三重県,内部川,羈旅,地名

1736

[題詞]式部大倭芳野作歌一首

[原文]山高見白木綿花尓落多藝津夏身之川門雖見不飽香開

[訓読]山高み白木綿花に落ちたぎつ夏身の川門見れど飽かぬかも

[仮名],やまたかみ,しらゆふばなに,おちたぎつ,なつみのかはと,みれどあかぬかも

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：式部大倭,吉野,土地讃美,羈旅,地名

1737

[題詞]兵部川原歌一首

[原文]大瀧乎過而夏箕尓傍為而浄川瀬見何明沙

[訓読]大滝を過ぎて夏身に近づきて清き川瀬を見るがさやけさ

[仮名],おほたきを,すぎてなつみに,ちかづきて,きよきかはせを,みるがさやけさ

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：兵部川原,吉野,土地讃美,羈旅,地名

1738

[題詞]詠上総末珠名娘子一首[并短歌]

[原文]水長鳥安房尓継有梓弓末乃珠名者胸別之廣吾妹腰細之須軽娘子之其姿之端正尓如花咲而立者玉桙乃道<徃>人者己行道者不去而不召尓門至奴指並隣之君者 <預> 己妻離而不乞尓鎰左倍奉人<皆乃> 如是迷有者容艶縁而曽妹者多波礼弖有家留

[訓読]しなが鳥安房に継ぎたる梓弓周淮の珠名は胸別けの広き我妹腰細のすがる娘子のその顔のきらきらしきに花のごと笑みて立てれば玉桙の道行く人はおのが行く道は行かずて呼ばなくに門に至りぬさし並ぶ隣の君はあらかじめ己妻離れて乞はなくに鍵さへ奉る人皆のかく惑へればたちしなひ寄りてぞ妹はたはれてありける

[仮名],しながとり,あはにつぎたる,あづさゆみ,すゑのたまなは,むなわけの,ひろきわぎも,こしぼその,すがるをとめの,そのなりの,きらきらしきに,はなのごと,ゑみてたてれば,たまほこの,みちゆくひとは,おのがゆく,みちはゆかずて,よばなくに,かどにいたりぬ,さしならぶ,となりのきみは,あらかじめ,おのづまかれて,こはなくに,かぎさへまつる,ひとみなの,かくまとへれば,たちしなひ,よりてぞいもは,たはれてありける

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 行 → 徃 [藍][類][紀] / 豫 → 預 [藍][壬][類][紀] / 乃皆 → 皆乃 [藍][類][温]

[_]

[ＫＷ],雑歌,作者：高橋虫麻呂歌集,千葉,美女伝説,枕詞,地名

1739

[題詞]（詠上総末珠名娘子一首[并短歌]）反歌

[原文]金門尓之人乃来立者夜中母身者田菜不知出曽相来

[訓読]金門にし人の来立てば夜中にも身はたな知らず出でてぞ逢ひける

[仮名],かなとにし,ひとのきたてば,よなかにも,みはたなしらず,いでてぞあひける

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,千葉,美女伝説,地名

1740

[題詞]詠水江浦嶋子一首[并短歌]

[原文]春日之霞時尓墨吉之岸尓出居而釣船之得<乎>良布見者 <古>之事曽所念水江之浦嶋兒之堅魚釣鯛釣矜及七日家尓毛不来而海界乎過而榜行尓海若神之女尓邂尓伊許藝Ｔ相誂良比言成之賀婆加吉結常代尓至海若神之宮乃内隔之細有殿尓携二人入居而耆不為死不為而永世尓有家留物乎世間之愚人<乃> 吾妹兒尓告而語久須臾者家歸而父母尓事毛告良比如明日吾者来南登言家礼婆妹之答久常世邊復變来而如今将相跡奈良婆此篋開勿勤常曽己良久尓堅目師事乎墨吉尓還来而家見跡 <宅>毛見金手里見跡里毛見金手恠常所許尓念久従家出而三歳之間尓 <垣>毛無家滅目八跡此筥乎開而見手歯 <如>本家者将有登玉篋小披尓白雲之自箱出而常世邊棚引去者立走Ｓ袖振反側足受利四管頓情消失奴若有之皮毛皺奴黒有之髪毛白斑奴 <由>奈由奈波氣左倍絶而後遂壽死祁流水江之浦嶋子之家地見

[訓読]春の日の霞める時に住吉の岸に出で居て釣舟のとをらふ見ればいにしへのことぞ思ほゆる水江の浦島の子が鰹釣り鯛釣りほこり七日まで家にも来ずて海境を過ぎて漕ぎ行くに海神の神の娘子にたまさかにい漕ぎ向ひ相とぶらひ言成りしかばかき結び常世に至り海神の神の宮の内のへの妙なる殿にたづさはりふたり入り居て老いもせず死にもせずして長き世にありけるものを世間の愚か人の我妹子に告りて語らくしましくは家に帰りて父母に事も告らひ明日のごと我れは来なむと言ひければ妹が言へらく常世辺にまた帰り来て今のごと逢はむとならばこの櫛笥開くなゆめとそこらくに堅めし言を住吉に帰り来りて家見れど家も見かねて里見れど里も見かねてあやしみとそこに思はく家ゆ出でて三年の間に垣もなく家失せめやとこの箱を開きて見てばもとのごと家はあらむと玉櫛笥少し開くに白雲の箱より出でて常世辺にたなびきぬれば立ち走り叫び袖振りこいまろび足ずりしつつたちまちに心消失せぬ若くありし肌も皺みぬ黒くありし髪も白けぬゆなゆなは息さへ絶えて後つひに命死にける水江の浦島の子が家ところ見ゆ

[仮名],はるのひの,かすめるときに,すみのえの,きしにいでゐて,つりぶねの,とをらふみれば,いにしへの,ことぞおもほゆる,みづのえの,うらしまのこが,かつをつり,たひつりほこり,なぬかまで,いへにもこずて,うなさかを,すぎてこぎゆくに,わたつみの,かみのをとめに,たまさかに,いこぎむかひ,あひとぶらひ,ことなりしかば,かきむすび,とこよにいたり,わたつみの,かみのみやの,うちのへの,たへなるとのに,たづさはり,ふたりいりゐて,おいもせず,しにもせずして,ながきよに,ありけるものを,よのなかの,おろかひとの,わぎもこに,のりてかたらく,しましくは,いへにかへりて,ちちははに,こともかたらひ,あすのごと,われはきなむと,いひければ,いもがいへらく,とこよへに,またかへりきて,いまのごと,あはむとならば,このくしげ,ひらくなゆめと,そこらくに,かためしことを,すみのえに,かへりきたりて,いへみれど,いへもみかねて,さとみれど,さともみかねて,あやしみと,そこにおもはく,いへゆいでて,みとせのあひだに,かきもなく,いへうせめやと,このはこを,ひらきてみてば,もとのごと,いへはあらむと,たまくしげ,すこしひらくに,しらくもの,はこよりいでて,とこよへに,たなびきぬれば,たちはしり,さけびそでふり,こいまろび,あしずりしつつ,たちまちに,こころけうせぬ,わかくありし,はだもしわみぬ,くろくありし,かみもしらけぬ,ゆなゆなは,いきさへたえて,のちつひに ,いのちしにける,みづのえの,うらしまのこが,いへところみゆ

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 / 手 → 乎 [西（訂正右書）][壬][細][温][矢] / 吉 → 古 [西（訂正右書） ][藍][壬][類] / 之 → 乃 [藍][壬][類] / 宅 [西（上書訂正）][藍][壬][類] / 墻 → 垣 [藍][類][紀] / 如来 → 如 [藍][類] / 反 [藍][類]（塙）返 / <> → 由 [西（右書）][藍][類][紀]

[_]

[ＫＷ],雑歌,作者：高橋虫麻呂歌集,浦島伝説,若狭,地名,枕詞

1741

[題詞]（詠水江浦嶋子一首[并短歌]）反歌

[原文]常世邊可住物乎劔刀己之<行>柄於曽也是君

[訓読]常世辺に住むべきものを剣大刀汝が心からおそやこの君

[仮名],とこよへに,すむべきものを,つるぎたち,ながこころから,おそやこのきみ

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 心 → 行 [藍][壬][類][紀]

[_]

[ＫＷ],雑歌,作者：高橋虫麻呂歌集,浦島伝説,若狭,地名

1742

[題詞]見河内大橋獨去娘子歌一首[并短歌]

[原文]級照片足羽河之左丹塗大橋之上従紅赤裳<數>十引山藍用 <揩>衣服而直獨伊渡為兒者若草乃夫香有良武橿實之獨歟将宿問巻乃欲我妹之家乃不知久

[訓読]しな照る片足羽川のさ丹塗りの大橋の上ゆ紅の赤裳裾引き山藍もち摺れる衣着てただ独りい渡らす子は若草の夫かあるらむ橿の実の独りか寝らむ問はまくの欲しき我妹が家の知らなく

[仮名],しなでる,かたしはがはの,さにぬりの,おほはしのうへゆ,くれなゐの,あかもすそびき,やまあゐもち,すれるきぬきて,ただひとり,いわたらすこは,わかくさの,つまかあるらむ,かしのみの,ひとりかぬらむ,とはまくの,ほしきわぎもが,いへのしらなく

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 摺 →揩 [紀] / <> → 數 [西（右書）][藍][壬][類][紀]

[_]

[ＫＷ],雑歌,作者：高橋虫麻呂歌集,大阪,美女,孤独,枕詞,地名

1743

[題詞]（見河内大橋獨去娘子歌一首[并短歌]）反歌

[原文]大橋之頭尓家有者心悲久獨去兒尓屋戸借申尾

[訓読]大橋の頭に家あらばま悲しく独り行く子に宿貸さましを

[仮名],おほはしの,つめにいへあらば,まかなしく,ひとりゆくこに,やどかさましを

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,大阪,美女,孤独,地名

1744

[題詞]見武蔵小埼沼鴨作歌一首

[原文]前玉之小埼乃沼尓鴨曽翼霧己尾尓零置流霜乎掃等尓有斯

[訓読]埼玉の小埼の沼に鴨ぞ羽霧るおのが尾に降り置ける霜を掃ふとにあらし

[仮名],さきたまの,をさきのぬまに,かもぞはねきる,おのがをに,ふりおけるしもを,はらふとにあらし

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,埼玉,旋頭歌,地名

1745

[題詞]那賀郡曝井歌一首

[原文]三栗乃中尓向有曝井之不絶将通従所尓妻毛我

[訓読]三栗の那賀に向へる曝井の絶えず通はむそこに妻もが

[仮名],みつぐりの,なかにむかへる,さらしゐの,たえずかよはむ,そこにつまもが

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,埼玉,羈旅,土地讃美,枕詞,地名

1746

[題詞]手綱濱歌一首

[原文]遠妻四高尓有世婆不知十方手綱乃濱能尋来名益

[訓読]遠妻し多賀にありせば知らずとも手綱の浜の尋ね来なまし

[仮名],とほづまし,たかにありせば,しらずとも,たづなのはまの,たづねきなまし

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌

[_]

[ＫＷ],雑歌,作者：高橋虫麻呂歌集,茨城県,望郷,土地讃美,地名

1747

[題詞]春三月諸卿大夫等下難波時歌二首[并短歌]

[原文]白雲之龍田山之瀧上之小鞍嶺尓開乎為流櫻花者山高風之不息者春雨之継而零者最末枝者落過去祁利下枝尓遺有花者須臾者落莫乱草枕客去君之及還来

[訓読]白雲の龍田の山の瀧の上の小椋の嶺に咲きををる桜の花は山高み風しやまねば春雨の継ぎてし降ればほつ枝は散り過ぎにけり下枝に残れる花はしましくは散りな乱ひそ草枕旅行く君が帰り来るまで

[仮名],しらくもの,たつたのやまの,たきのうへの,をぐらのみねに,さきををる,さくらのはなは,やまたかみ,かぜしやまねば,はるさめの,つぎてしふれば,ほつえは,ちりすぎにけり,しづえに,のこれるはなは,しましくは,ちりなまがひそ,くさまくら,たびゆくきみが,かへりくるまで

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 短歌 [西] 短哥 [西（訂正）] 短歌

[_]

[ＫＷ],雑歌,作者：高橋虫麻呂歌集,奈良,餞別,天平６年３月,年紀,難波,大阪,地名,枕詞 ,植物

1748

[題詞]（春三月諸卿大夫等下難波時歌二首[并短歌]）反歌

[原文]吾去者七日<者>不過龍田彦勤此花乎風尓莫落

[訓読]我が行きは七日は過ぎじ龍田彦ゆめこの花を風にな散らし

[仮名],わがゆきは,なぬかはすぎじ,たつたひこ,ゆめこのはなを,かぜになちらし

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / <> → 者 [藍][壬][類][紀]

[_]

[ＫＷ],雑歌,作者：高橋虫麻呂歌集,奈良,餞別,天平６年３月,年紀,難波,大阪,風神,鎮花 ,地名,植物

1749

[題詞]（春三月諸卿大夫等下難波時歌二首[并短歌]）

[原文]白雲乃立田山乎夕晩尓打越去者瀧上之櫻花者開有者落過祁里含有者可開継許知<期>智乃花之盛尓雖不見<在> 君之三行者今西應有

[訓読]白雲の龍田の山を夕暮れにうち越え行けば瀧の上の桜の花は咲きたるは散り過ぎにけりふふめるは咲き継ぎぬべしこちごちの花の盛りに見さずとも君がみ行きは今にしあるべし

[仮名],しらくもの,たつたのやまを,ゆふぐれに,うちこえゆけば,たきのうへの,さくらのはなは,さきたるは,ちりすぎにけり,ふふめるは,さきつぎぬべし,こちごちの,はなのさかりに,めさずとも,きみがみゆきは,いまにしあるべし

[_]

[左注]（右件歌者高橋連蟲麻呂歌集中出）

[_]

[校異]斯 → 期 [藍][類][紀] / 左右 → 在 [新訓万葉集] （塙）左右

[_]

[ＫＷ],雑歌,作者：高橋虫麻呂歌集,奈良,餞別,天平６年３月,年紀,難波,大阪,風神,鎮花 ,地名,枕詞,植物

1750

[題詞]（春三月諸卿大夫等下難波時歌二首[并短歌]）反歌

[原文]暇有者魚津柴比渡向峯之櫻花毛折末思物緒

[訓読]暇あらばなづさひ渡り向つ峰の桜の花も折らましものを

[仮名],いとまあらば,なづさひわたり,むかつをの,さくらのはなも,をらましものを

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,奈良,餞別,天平６年３月,年紀,難波,大阪,風神,鎮花 ,植物

1751

[題詞]難波經宿明日還来之時歌一首[并短歌]

[原文]嶋山乎射徃廻流河副乃丘邊道従昨日己曽吾<超>来壮鹿一夜耳宿有之柄二 <峯>上之櫻花者瀧之瀬従落堕而流君之将見其日左右庭山下之風莫吹登打越而名二負有社尓風祭為奈

[訓読]島山をい行き廻れる川沿ひの岡辺の道ゆ昨日こそ我が越え来しか一夜のみ寝たりしからに峰の上の桜の花は瀧の瀬ゆ散らひて流る君が見むその日までには山おろしの風な吹きそとうち越えて名に負へる杜に風祭せな

[仮名],しまやまを,いゆきめぐれる,かはそひの,をかへのみちゆ,きのふこそ,わがこえこしか,ひとよのみ,ねたりしからに,をのうへの,さくらのはなは,たきのせゆ,ちらひてながる,きみがみむ,そのひまでには,やまおろしの,かぜなふきそと,うちこえて,なにおへるもりに,かざまつりせな

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 越 → 超 [藍 ][紀] / 岑 → 峯 [藍][紀][矢][京]

[_]

[ＫＷ],雑歌,作者：高橋虫麻呂歌集,龍田,大阪,天平６年３月,年紀,風祭り,風神,地名,植物

1752

[題詞]（難波經宿明日還来之時歌一首[并短歌]）反歌

[原文]射行相乃 <坂>之踏本尓開乎為流櫻花乎令見兒毛欲得

[訓読]い行き逢ひの坂のふもとに咲きををる桜の花を見せむ子もがも

[仮名],いゆきあひの,さかのふもとに,さきををる,さくらのはなを,みせむこもがも

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 / 坂上 → 坂 [藍][類][紀]

[_]

[ＫＷ],雑歌,作者：高橋虫麻呂歌集,龍田,大阪,天平６年３月,年紀,鎮花,地名,植物

1753

[題詞]検税使大伴卿登筑波山時歌一首[并短歌]

[原文]衣手常陸國二並筑波乃山乎欲見君来座登熱尓汗可伎奈氣木根取嘯鳴登 <峯>上乎 <公>尓令見者男神毛許賜女神毛千羽日給而時登無雲居雨零筑波嶺乎清照言借石國之真保良乎委曲尓示賜者歡登紐之緒解而家如解而曽遊打靡春見麻之従者夏草之茂者雖在今日之樂者

[訓読]衣手常陸の国の二並ぶ筑波の山を見まく欲り君来ませりと暑けくに汗かき嘆げ木の根取りうそぶき登り峰の上を君に見すれば男神も許したまひ女神もちはひたまひて時となく雲居雨降る筑波嶺をさやに照らしていふかりし国のまほらをつばらかに示したまへば嬉しみと紐の緒解きて家のごと解けてぞ遊ぶうち靡く春見ましゆは夏草の茂くはあれど今日の楽しさ

[仮名],ころもで,ひたちのくにの,ふたならぶ,つくはのやまを,みまくほり,きみきませりと,あつけくに,あせかきなげ,このねとり,うそぶきのぼり,をのうへを,きみにみすれば,をかみも,ゆるしたまひ,めかみも,ちはひたまひて,ときとなく,くもゐあめふる,つくはねを,さやにてらして,いふかりし,くにのまほらを,つばらかに,しめしたまへば,うれしみと,ひものをときて,いへのごと,とけてぞあそぶ,うちなびく,はるみましゆは,なつくさの,しげくはあれど,けふのたのしさ

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 岑 → 峯 [藍 ][類][紀][矢] / 君 → 公 [藍][類][紀][温]

[_]

[ＫＷ],雑歌,作者：高橋虫麻呂歌集,茨城,国見,歌垣,大伴旅人,道足,地名,枕詞

1754

[題詞]（検税使大伴卿登筑波山時歌一首[并短歌]）反歌

[原文]今日尓何如将及筑波嶺昔人之将来其日毛

[訓読]今日の日にいかにかしかむ筑波嶺に昔の人の来けむその日も

[仮名],けふのひに,いかにかしかむ,つくはねに,むかしのひとの,きけむそのひも

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,茨城,国見,歌垣,大伴旅人,道足,地名

1755

[題詞]詠霍公鳥一首[并短歌]

[原文]鴬之生卵乃中尓霍公鳥獨所生而己父尓似而者不鳴己母尓似而者不鳴宇能花乃開有野邊従飛翻来鳴令響橘之花乎居令散終日雖喧聞吉幣者将為遐莫去吾屋戸之花橘尓住度鳥

[訓読]鴬の卵の中に霍公鳥独り生れて己が父に似ては鳴かず己が母に似ては鳴かず卯の花の咲きたる野辺ゆ飛び翔り来鳴き響もし橘の花を居散らしひねもすに鳴けど聞きよし賄はせむ遠くな行きそ我が宿の花橘に住みわたれ鳥

[仮名],うぐひすの,かひごのなかに,ほととぎす,ひとりうまれて,ながちちに,にてはなかず,ながははに,にてはなかず,うのはなの,さきたるのへゆ,とびかけり,きなきとよもし,たちばなの,はなをゐちらし,ひねもすに,なけどききよし,まひはせむ,とほくなゆきそ,わがやどの,はなたちばなに,すみわたれとり

[_]

[左注]（右件歌者高橋連蟲麻呂歌集中出）

[_]

[校異]歌 [西] 哥 [西（訂正）] 歌

[_]

[ＫＷ],雑歌,作者：高橋虫麻呂歌集,動物,植物

1756

[題詞]（詠霍公鳥一首[并短歌]）反歌

[原文]掻霧之雨零夜乎霍公鳥鳴而去成Ａ怜其鳥

[訓読]かき霧らし雨の降る夜を霍公鳥鳴きて行くなりあはれその鳥

[仮名],かききらし,あめのふるよを,ほととぎす,なきてゆくなり,あはれそのとり

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,動物

1757

[題詞]登筑波山歌一首[并短歌]

[原文]草枕客之憂乎名草漏事毛有<哉>跡筑波嶺尓登而見者尾花落師付之田井尓鴈泣毛寒来喧奴新治乃鳥羽能淡海毛秋風尓白浪立奴筑波嶺乃吉久乎見者長氣尓念積来之憂者息沼

[訓読]草枕旅の憂へを慰もることもありやと筑波嶺に登りて見れば尾花散る師付の田居に雁がねも寒く来鳴きぬ新治の鳥羽の淡海も秋風に白波立ちぬ筑波嶺のよけくを見れば長き日に思ひ積み来し憂へはやみぬ

[仮名],くさまくら,たびのうれへを,なぐさもる,こともありやと,つくはねに,のぼりてみれば,をばなちる,しつくのたゐに,かりがねも,さむくきなきぬ,にひばりの,とばのあふみも,あきかぜに,しらなみたちぬ,つくはねの,よけくをみれば,ながきけに,おもひつみこし,うれへはやみぬ

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌 / 武 → 哉 [藍][類]

[_]

[ＫＷ],雑歌,作者：高橋虫麻呂歌集,茨城,山讃美,旅愁,東国,関東,枕詞,地名

1758

[題詞]（登筑波山歌一首[并短歌]）反歌

[原文]筑波嶺乃須蘇廻乃田井尓秋田苅妹許将遺黄葉手折奈

[訓読]筑波嶺の裾廻の田居に秋田刈る妹がり遣らむ黄葉手折らな

[仮名],つくはねの,すそみのたゐに,あきたかる,いもがりやらむ,もみちたをらな

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 [西（訂正）] 歌

[_]

[ＫＷ],雑歌,作者：高橋虫麻呂歌集,茨城,旅愁,東国,関東,地名,植物

1759

[題詞]登筑波嶺為の歌會日作歌一首[并短歌]

[原文]鷲住筑波乃山之裳羽服津乃其津乃上尓率而未通女<壮>士之徃集加賀布の歌尓他妻尓吾毛交牟吾妻尓他毛言問此山乎牛掃神之従来不禁行事叙今日耳者目串毛勿見事毛咎莫 [の歌者東俗語曰賀我比]

[訓読]鷲の住む筑波の山の裳羽服津のその津の上に率ひて娘子壮士の行き集ひかがふかがひに人妻に我も交らむ我が妻に人も言問へこの山をうしはく神の昔より禁めぬわざぞ今日のみはめぐしもな見そ事もとがむな [の歌は、東の俗語に賀我比と曰ふ]

[仮名],わしのすむ,つくはのやまの,もはきつの,そのつのうへに,あどもひて,をとめをとこの,ゆきつどひ,かがふかがひに,ひとづまに,われもまじらむ,わがつまに,ひともこととへ,このやまを,うしはくかみの,むかしより,いさめぬわざぞ,けふのみは,めぐしもなみそ,こともとがむな

[_]

[左注]（右件歌者高橋連蟲麻呂歌集中出）

[_]

[校異]歌 [西] 謌 / 作歌 [西] 作謌 [西（訂正）] 作歌 / 短歌 [西] 短哥 [西（訂正）] 短歌 / 牡 → 壮 [元][藍][類] / 歌 [西] 謌 / 歌 [西] 謌

[_]

[ＫＷ],雑歌,作者：高橋虫麻呂歌集,茨城,歌垣,東国,関東,地名

1760

[題詞]（登筑波嶺為の歌會日作歌一首[并短歌]）反歌

[原文]男神尓雲立登斯具礼零沾通友吾将反哉

[訓読]男神に雲立ち上りしぐれ降り濡れ通るとも我れ帰らめや

[仮名],をかみに,くもたちのぼり,しぐれふり,ぬれとほるとも,われかへらめや

[_]

[左注]右件歌者高橋連蟲麻呂歌集中出

[_]

[校異]歌 [西] 謌 [西（訂正）] 歌 / 歌 [西] 謌 [西（訂正）] 歌 / 歌集 [西] 謌集 [西（訂正）] 歌集

[_]

[ＫＷ],雑歌,作者：高橋虫麻呂歌集,茨城,歌垣,東国,関東

1761

[題詞]詠鳴<鹿>一首[并短歌]

[原文]三諸之神邊山尓立向三垣乃山尓秋芽子之妻巻六跡朝月夜明巻鴦視足日木乃山響令動喚立鳴毛

[訓読]三諸の神奈備山にたち向ふ御垣の山に秋萩の妻をまかむと朝月夜明けまく惜しみあしひきの山彦響め呼びたて鳴くも

[仮名],みもろの,かむなびやまに,たちむかふ,みかきのやまに,あきはぎの,つまをまかむと,あさづくよ,あけまくをしみ,あしひきの,やまびことよめ,よびたてなくも

[_]

[左注]（右件歌或云柿本朝臣人麻呂作）

[_]

[校異]鹿謌 → 鹿 [元][藍][類][紀] / 歌 [西] 哥 [西（訂正）] 歌

[_]

[ＫＷ],雑歌,作者：柿本人麻呂,異伝,飛鳥,秋,地名,植物,動物

1762

[題詞]（詠鳴<鹿>一首[并短歌]）反歌

[原文]明日之夕不相有八方足日木<乃> 山彦令動呼立哭毛

[訓読]明日の宵逢はざらめやもあしひきの山彦響め呼びたて鳴くも

[仮名],あすのよひ,あはざらめやも,あしひきの,やまびことよめ,よびたてなくも

[_]

[左注]右件歌或云柿本朝臣人麻呂作

[_]

[校異]歌 [西] 謌 / 之 → 乃 [元][藍][類][紀] / 歌 [西] 謌 [西（訂正）] 歌

[_]

[ＫＷ],雑歌,作者：柿本人麻呂,異伝,飛鳥,秋,動物

1763

[題詞]沙弥女王歌一首

[原文]倉橋之山乎高歟夜牢尓出来月之片待難

[訓読]倉橋の山を高みか夜隠りに出で来る月の片待ちかたき

[仮名],くらはしの,やまをたかみか,よごもりに,いでくるつきの,かたまちかたき

[_]

[左注]右一首間人宿祢大浦歌中既見但末一句相換亦作歌兩主不敢正指因以累載

[_]

[校異]歌 [西] 謌 [西（訂正）] 歌 / 歌 [西] 謌 [西（訂正）] 歌 / 作歌 [西] 作謌 [西（訂正）] 作歌

[_]

[ＫＷ],雑歌,作者：沙弥女王,間人大浦,異伝,飛鳥,地名

1764

[題詞]七夕歌一首[并短歌]

[原文]久堅乃天漢尓上瀬尓珠橋渡之下湍尓船浮居雨零而風不吹登毛風吹而雨不落等物裳不令濕不息来益常 <玉>橋渡須

[訓読]久方の天の川原に上つ瀬に玉橋渡し下つ瀬に舟浮け据ゑ雨降りて風吹かずとも風吹きて雨降らずとも裳濡らさずやまず来ませと玉橋渡す

[仮名],ひさかたの,あまのかはらに,かみつせに,たまはしわたし,しもつせに,ふねうけすゑ,あめふりて,かぜふかずとも,かぜふきて,あめふらずとも,もぬらさず,やまずきませと,たまはしわたす

[_]

[左注]（右件歌或云中衛大将藤原北卿宅作也）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 王 → 玉

[_]

[ＫＷ],雑歌,作者：藤原房前,七夕,宴席

1765

[題詞]（七夕歌一首[并短歌]）反歌

[原文]天漢霧立渡且今日<々々々> 吾待君之船出為等霜

[訓読]天の川霧立ちわたる今日今日と我が待つ君し舟出すらしも

[仮名],あまのがは,きりたちわたる,けふけふと,わがまつきみし,ふなですらしも

[_]

[左注]右件歌或云中衛大将藤原北卿宅作也

[_]

[校異]歌 [西] 謌 [西（訂正）] 歌 / 且今日 → 々々々 [元][藍] / 歌 [西] 謌

[_]

[ＫＷ],雑歌,作者：藤原房前,七夕,宴席