万葉集 (Manyoshu) :: :: University of Virginia Library

万葉集 (Manyoshu)

第一巻

10.

11.

12.

13.

14.

15.

(遣新羅使歌)

3578.

3579.

3580.

3581.

3582.

3583.

3584.

3585.

3586.

3587.

3588.

3589.

3590.

3591.

3592.

3593.

3594.

3595.

3596.

3597.

3598.

3599.

3600.

3601.

3602.

3603.

3604.

3605.

3606.

3606S.

3607.

3607S.

3608.

3608S.

3609.

3609S.

3610.

3610S.

3611.

3612.

3613.

3614.

3615.

3616.

3617.

3618.

3619.

3620.

3621.

3622.

3623.

3624.

3625.

3626.

3627.

3628.

3629.

3630.

3631.

3632.

3633.

3634.

3635.

3636.

3637.

3638.

3639.

3640.

3641.

3642.

3643.

3643S.

3644.

3645.

3646.

3647.

3648.

3649.

3650.

3651.

3652.

3653.

3654.

3654S.

3655.

3656.

3657.

3658.

3659.

3660.

3661.

3661S.

3662.

3663.

3664.

3665.

3666.

3667.

3668.

3669.

3670.

3671.

3672.

3673.

3674.

3675.

3676.

3677.

3678.

3679.

3680.

3681.

3682.

3683.

3684.

3685.

3686.

3687.

3688.

3689.

3690.

3691.

3692.

3693.

3694.

3695.

3696.

3697.

3698.

3699.

3700.

3701.

3702.

3703.

3704.

3705.

3706.

3707.

3708.

3709.

3710.

3711.

3712.

3713.

3714.

3715.

3716.

3717.

3718.

3719.

3720.

3721.

3722.

16.

17.

18.

19.

20.

Collapse All | Expand All expand section

(遣新羅使歌)

3578

[題詞]遣新羅使人等悲別贈答及海路慟情陳思并當所誦之古歌

[原文]武庫能浦乃伊里江能渚鳥羽具久毛流伎美乎波奈礼弖古非尓之奴倍之

[訓読]武庫の浦の入江の洲鳥羽ぐくもる君を離れて恋に死ぬべし

[仮名],むこのうらの,いりえのすどり,はぐくもる,きみをはなれて,こひにしぬべし

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,地名,兵庫県,武庫川,動物,女歌,悲別,序詞,恋情,羈旅,出発,難波,大阪

3579

[題詞]（遣新羅使人等悲別贈答及海路慟情陳思并當所誦之古歌）

[原文]大船尓伊母能流母能尓安良麻勢<婆> 羽具久美母知弖由可麻之母能乎

[訓読]大船に妹乗るものにあらませば羽ぐくみ持ちて行かましものを

[仮名],おほぶねに,いものるものに,あらませば,はぐくみもちて,ゆかましものを

[_]

[左注]（右十一首贈答）

[_]

[校異]波 → 婆 [類]

[_]

[ＫＷ],遣新羅使,天平８年,年紀,贈答,恋情,悲別,出発,羈旅,難波,大阪

3580

[題詞]（遣新羅使人等悲別贈答及海路慟情陳思并當所誦之古歌）

[原文]君之由久海邊乃夜杼尓奇里多々婆安我多知奈氣久伊伎等之理麻勢

[訓読]君が行く海辺の宿に霧立たば我が立ち嘆く息と知りませ

[仮名],きみがゆく,うみへのやどに,きりたたば,あがたちなげく,いきとしりませ

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,女歌,羈旅,出発,悲別,恋情,難波,大阪

3581

[題詞]（遣新羅使人等悲別贈答及海路慟情陳思并當所誦之古歌）

[原文]秋佐良婆安比見牟毛能乎奈尓之可母奇里尓多都倍久奈氣伎之麻佐牟

[訓読]秋さらば相見むものを何しかも霧に立つべく嘆きしまさむ

[仮名],あきさらば,あひみむものを,なにしかも,きりにたつべく,なげきしまさむ

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,悲別,羈旅,出発,慰撫,恋愛,難波,大阪

3582

[題詞]（遣新羅使人等悲別贈答及海路慟情陳思并當所誦之古歌）

[原文]大船乎安流美尓伊太之伊麻須君都追牟許等奈久波也可敝里麻勢

[訓読]大船を荒海に出だしいます君障むことなく早帰りませ

[仮名],おほぶねを,あるみにいだし,いますきみ,つつむことなく,はやかへりませ

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,女歌,羈旅,出発,悲別,餞別,恋愛,難波,大阪

3583

[題詞]（遣新羅使人等悲別贈答及海路慟情陳思并當所誦之古歌）

[原文]真幸而伊毛我伊波伴伐於伎都奈美知敝尓多都等母佐波里安良米也母

[訓読]ま幸くて妹が斎はば沖つ波千重に立つとも障りあらめやも

[仮名],まさきくて,いもがいははば,おきつなみ,ちへにたつとも,さはりあらめやも

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,羈旅,出発,悲別,恋愛,難波,大阪

3584

[題詞]（遣新羅使人等悲別贈答及海路慟情陳思并當所誦之古歌）

[原文]和可礼奈波宇良我奈之家武安我許呂母之多尓乎伎麻勢多太尓安布麻弖尓

[訓読]別れなばうら悲しけむ我が衣下にを着ませ直に逢ふまでに

[仮名],わかれなば,うらがなしけむ,あがころも,したにをきませ,ただにあふまでに

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,羈旅,女歌,恋情,出発,悲別,難波,大阪

3585

[題詞]（遣新羅使人等悲別贈答及海路慟情陳思并當所誦之古歌）

[原文]和伎母故我之多尓毛伎余等於久理多流許呂母能比毛乎安礼等可米也母

[訓読]我妹子が下にも着よと贈りたる衣の紐を我れ解かめやも

[仮名],わぎもこが,したにもきよと,おくりたる,ころものひもを,あれとかめやも

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,羈旅,恋情,出発,難波,大阪

3586

[題詞]（遣新羅使人等悲別贈答及海路慟情陳思并當所誦之古歌）

[原文]和我由恵尓於毛比奈夜勢曽秋風能布可武曽能都奇安波牟母能由恵

[訓読]我がゆゑに思ひな痩せそ秋風の吹かむその月逢はむものゆゑ

[仮名],わがゆゑに,おもひなやせそ,あきかぜの,ふかむそのつき,あはむものゆゑ

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,出発,悲別,餞別,羈旅,恋情,難波,大阪

3587

[題詞]（遣新羅使人等悲別贈答及海路慟情陳思并當所誦之古歌）

[原文]多久夫須麻新羅邊伊麻須伎美我目乎家布可安須可登伊波比弖麻多牟

[訓読]栲衾新羅へいます君が目を今日か明日かと斎ひて待たむ

[仮名],たくぶすま,しらきへいます,きみがめを,けふかあすかと,いはひてまたむ

[_]

[左注]（右十一首贈答）

[_]

[校異]

[_]

[ＫＷ],遣新羅使,天平８年,年紀,贈答,地名,韓国,枕詞,悲別,羈旅,餞別,女歌,難波,大阪

3588

[題詞]（遣新羅使人等悲別贈答及海路慟情陳思并當所誦之古歌）

[原文]波呂波呂尓於<毛>保由流可母之可礼杼毛異情乎安我毛波奈久尓

[訓読]はろはろに思ほゆるかもしかれども異しき心を我が思はなくに

[仮名],はろはろに,おもほゆるかも,しかれども,けしきこころを,あがもはなくに

[_]

[左注]右十一首贈答

[_]

[校異]母 → 毛 [類][紀]

[_]

[ＫＷ],遣新羅使,天平８年,年紀,贈答,羈旅,悲別,出発,恋愛,難波,大阪

3589

[題詞]（遣新羅使人等悲別贈答及海路慟情陳思并當所誦之古歌）

[原文]由布佐礼婆比具良之伎奈久伊故麻山古延弖曽安我久流伊毛我目乎保里

[訓読]夕さればひぐらし来鳴く生駒山越えてぞ我が来る妹が目を欲り

[仮名],ゆふされば,ひぐらしきなく,いこまやま,こえてぞあがくる,いもがめをほり

[_]

[左注]右一首秦間満

[_]

[校異]

[_]

[ＫＷ],遣新羅使,天平８年,年紀,作者：秦間満,地名,奈良,難波,大阪,出発,羈旅,恋情

3590

[題詞]（遣新羅使人等悲別贈答及海路慟情陳思并當所誦之古歌）

[原文]伊毛尓安波受安良婆須敝奈美伊波祢布牟伊故麻乃山乎故延弖曽安我久流

[訓読]妹に逢はずあらばすべなみ岩根踏む生駒の山を越えてぞ我が来る

[仮名],いもにあはず,あらばすべなみ,いはねふむ,いこまのやまを,こえてぞあがくる

[_]

[左注]右一首ま還私家陳思

[_]

[校異]

[_]

[ＫＷ],遣新羅使,天平８年,年紀,地名,奈良,難波,大阪,出発,恋情,羈旅

3591

[題詞]（遣新羅使人等悲別贈答及海路慟情陳思并當所誦之古歌）

[原文]妹等安里之時者安礼杼毛和可礼弖波許呂母弖佐牟伎母能尓曽安里家流

[訓読]妹とありし時はあれども別れては衣手寒きものにぞありける

[仮名],いもとありし,ときはあれども,わかれては,ころもでさむき,ものにぞありける

[_]

[左注]（右三首臨發之時作歌）

[_]

[校異]

[_]

[ＫＷ],遣新羅使,天平８年,年紀,悲別,羈旅,恋情,出発,難波,大阪

3592

[題詞]（遣新羅使人等悲別贈答及海路慟情陳思并當所誦之古歌）

[原文]海原尓宇伎祢世武夜者於伎都風伊多久奈布吉曽妹毛安良奈久尓

[訓読]海原に浮寝せむ夜は沖つ風いたくな吹きそ妹もあらなくに

[仮名],うなはらに,うきねせむよは,おきつかぜ,いたくなふきそ,いももあらなくに

[_]

[左注]（右三首臨發之時作歌）

[_]

[校異]

[_]

[ＫＷ],遣新羅使,天平８年,年紀,羈旅,悲別,出発,難波,大阪,恋情

3593

[題詞]（遣新羅使人等悲別贈答及海路慟情陳思并當所誦之古歌）

[原文]大伴能美津尓布奈能里許藝出而者伊都礼乃思麻尓伊保里世武和礼

[訓読]大伴の御津に船乗り漕ぎ出てはいづれの島に廬りせむ我れ

[仮名],おほともの,みつにふなのり,こぎでては,いづれのしまに,いほりせむわれ

[_]

[左注]右三首臨發之時作歌

[_]

[校異]

[_]

[ＫＷ],遣新羅使,天平８年,年紀,羈旅,出発,難波,大阪,地名

3594

[題詞]（遣新羅使人等悲別贈答及海路慟情陳思并當所誦之古歌）

[原文]之保麻都等安里家流布祢乎思良受之弖久夜之久妹乎和可礼伎尓家利

[訓読]潮待つとありける船を知らずして悔しく妹を別れ来にけり

[仮名],しほまつと,ありけるふねを,しらずして,くやしくいもを,わかれきにけり

[_]

[左注]（右八首乗船入海路上作歌）

[_]

[校異]之 [類][細] 志

[_]

[ＫＷ],遣新羅使,天平８年,年紀,羈旅,悲別,恋情,難波,大阪

3595

[題詞]（遣新羅使人等悲別贈答及海路慟情陳思并當所誦之古歌）

[原文]安佐妣良伎許藝弖天久礼婆牟故能宇良能之保非能可多尓多豆我許恵須毛

[訓読]朝開き漕ぎ出て来れば武庫の浦の潮干の潟に鶴が声すも

[仮名],あさびらき,こぎでてくれば,むこのうらの,しほひのかたに,たづがこゑすも

[_]

[左注]（右八首乗船入海路上作歌）

[_]

[校異]

[_]

[ＫＷ],遣新羅使,天平８年,年紀,地名,兵庫県,武庫川,動物,出発,羈旅,叙景,難波,大阪

3596

[題詞]（遣新羅使人等悲別贈答及海路慟情陳思并當所誦之古歌）

[原文]和伎母故我可多美尓見牟乎印南都麻之良奈美多加弥与曽尓可母美牟

[訓読]我妹子が形見に見むを印南都麻白波高み外にかも見む

[仮名],わぎもこが,かたみにみむを,いなみつま,しらなみたかみ,よそにかもみむ

[_]

[左注]（右八首乗船入海路上作歌）

[_]

[校異]

[_]

[ＫＷ],遣新羅使,天平８年,年紀,羈旅,悲別,望郷,地名,加古川,兵庫

3597

[題詞]（遣新羅使人等悲別贈答及海路慟情陳思并當所誦之古歌）

[原文]和多都美能於伎津之良奈美多知久良思安麻乎等女等母思麻我久<流>見由

[訓読]わたつみの沖つ白波立ち来らし海人娘子ども島隠る見ゆ

[仮名],わたつみの,おきつしらなみ,たちくらし,あまをとめども,しまがくるみゆ

[_]

[左注]（右八首乗船入海路上作歌）

[_]

[校異]礼 → 流 [紀][細]

[_]

[ＫＷ],遣新羅使,天平８年,年紀,羈旅,叙景,兵庫

3598

[題詞]（遣新羅使人等悲別贈答及海路慟情陳思并當所誦之古歌）

[原文]奴波多麻能欲波安氣奴良之多麻能宇良尓安佐里須流多豆奈伎和多流奈里

[訓読]ぬばたまの夜は明けぬらし玉の浦にあさりする鶴鳴き渡るなり

[仮名],ぬばたまの,よはあけぬらし,たまのうらに,あさりするたづ,なきわたるなり

[_]

[左注]（右八首乗船入海路上作歌）

[_]

[校異]

[_]

[ＫＷ],遣新羅使,天平８年,年紀,枕詞,地名,岡山県,倉敷市,動物,叙景,羈旅

3599

[題詞]（遣新羅使人等悲別贈答及海路慟情陳思并當所誦之古歌）

[原文]月余美能比可里乎伎欲美神嶋乃伊素<未>乃宇良由船出須和礼波

[訓読]月読の光りを清み神島の礒廻の浦ゆ船出す我れは

[仮名],つくよみの,ひかりをきよみ,かみしまの,いそみのうらゆ,ふなですわれは

[_]

[左注]（右八首乗船入海路上作歌）

[_]

[校異]末 → 未 [細]

[_]

[ＫＷ],遣新羅使,天平８年,年紀,地名,広島,福山市,羈旅

3600

[題詞]（遣新羅使人等悲別贈答及海路慟情陳思并當所誦之古歌）

[原文]波奈礼蘇尓多弖流牟漏能木宇多我多毛比左之伎時乎須疑尓家流香母

[訓読]離れ礒に立てるむろの木うたがたも久しき時を過ぎにけるかも

[仮名],はなれそに,たてるむろのき,うたがたも,ひさしきときを,すぎにけるかも

[_]

[左注]（右八首乗船入海路上作歌）

[_]

[校異]

[_]

[ＫＷ],遣新羅使,天平８年,年紀,羈旅,福山,広島

3601

[題詞]（遣新羅使人等悲別贈答及海路慟情陳思并當所誦之古歌）

[原文]之麻思久母比等利安里宇流毛能尓安礼也之麻能牟漏能木波奈礼弖安流良武

[訓読]しましくもひとりありうるものにあれや島のむろの木離れてあるらむ

[仮名],しましくも,ひとりありうる,ものにあれや,しまのむろのき,はなれてあるらむ

[_]

[左注]右八首乗船入海路上作歌

[_]

[校異]

[_]

[ＫＷ],遣新羅使,天平８年,年紀,羈旅,福山,広島

3602

[題詞]當所誦詠古歌

[原文]安乎尓余志奈良能美夜古尓多奈妣家流安麻能之良久毛見礼杼安可奴加毛

[訓読]あをによし奈良の都にたなびける天の白雲見れど飽かぬかも

[仮名],あをによし,ならのみやこに,たなびける,あまのしらくも,みれどあかぬかも

[_]

[左注]右一首詠雲

[_]

[校異]歌 [西] 謌 [紀][温] 哥

[_]

[ＫＷ],遣新羅使,天平８年,年紀,古歌,誦詠,枕詞,望郷,羈旅,転用

3603

[題詞]（當所誦詠古歌）

[原文]安乎<楊>疑能延太伎里於呂之湯種蒔忌忌伎美尓故非和多流香母

[訓読]青楊の枝伐り下ろしゆ種蒔きゆゆしき君に恋ひわたるかも

[仮名],あをやぎの,えだきりおろし,ゆだねまき,ゆゆしききみに,こひわたるかも

[_]

[左注]（右三首戀歌）

[_]

[校異]揚 → 楊 [類][紀][温]

[_]

[ＫＷ],遣新羅使,天平８年,年紀,古歌,誦詠,転用,望郷,恋情,植物,羈旅

3604

[題詞]（當所誦詠古歌）

[原文]妹我素弖和可礼弖比左尓奈里奴礼杼比登比母伊毛乎和須礼弖於毛倍也

[訓読]妹が袖別れて久になりぬれど一日も妹を忘れて思へや

[仮名],いもがそで,わかれてひさに,なりぬれど,ひとひもいもを,わすれておもへや

[_]

[左注]（右三首戀歌）

[_]

[校異]

[_]

[ＫＷ],遣新羅使,天平８年,年紀,古歌,誦詠,恋情,望郷,羈旅,転用

3605

[題詞]（當所誦詠古歌）

[原文]和多都美乃宇美尓伊弖多流思可麻河<泊> 多延無日尓許曽安我故非夜麻米

[訓読]わたつみの海に出でたる飾磨川絶えむ日にこそ我が恋やまめ

[仮名],わたつみの,うみにいでたる,しかまがは,たえむひにこそ,あがこひやまめ

[_]

[左注]右三首戀歌

[_]

[校異]伯 → 泊 [古][細][温]

[_]

[ＫＷ],遣新羅使,天平８年,年紀,古歌,誦詠,枕詞,恋情,望郷,兵庫,姫路,船場川,転用,羈旅

3606

[題詞]（當所誦詠古歌）

[原文]多麻藻可流乎等女乎須疑弖奈都久佐能野嶋我左吉尓伊保里須和礼波

[訓読]玉藻刈る処女を過ぎて夏草の野島が崎に廬りす我れは

[仮名],たまもかる,をとめをすぎて,なつくさの,のしまがさきに,いほりすわれは

[_]

[左注]柿本朝臣人麻呂歌曰敏馬乎須疑弖又曰布祢知可豆伎奴

[_]

[校異]

[_]

[ＫＷ],遣新羅使,天平８年,年紀,古歌,誦詠,柿本人麻呂,枕詞,地名,兵庫,淡路,異伝,道行き ,羈旅,転用

3606S

[題詞]（當所誦詠古歌）柿本朝臣人麻呂歌曰又曰

[原文]敏馬乎須疑弖布祢知可豆伎奴

[訓読]敏馬を過ぎて船近づきぬ

[仮名],みぬめをすぎて ,ふねちかづきぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,古歌,誦詠,作者：柿本人麻呂,地名,兵庫,異伝,道行き,羈旅,転用

3607

[題詞]（當所誦詠古歌）

[原文]之路多倍能藤江能宇良尓伊<射>里須流安麻等也見良武多妣由久和礼乎

[訓読]白栲の藤江の浦に漁りする海人とや見らむ旅行く我れを

[仮名],しろたへの,ふぢえのうらに,いざりする,あまとやみらむ,たびゆくわれを

[_]

[左注]柿本朝臣人麻呂歌曰安良多倍乃又曰須受吉都流安麻登香見良武

[_]

[校異]時 → 射 [西（訂正）][類][紀][細]

[_]

[ＫＷ],遣新羅使,天平８年,年紀,古歌,誦詠,枕詞,地名,兵庫,明石,羈旅,柿本人麻呂,異伝 ,転用

3607S

[題詞]（當所誦詠古歌）柿本朝臣人麻呂歌曰又曰

[原文]安良多倍乃須受吉都流安麻登香見良武

[訓読]荒栲の鱸釣る海人とか見らむ

[仮名],あらたへの ,すずきつる,あまとかみらむ

[_]

[左注]

[_]

[校異]

[_]

[ＫＷ],遣新羅使,天平８年,年紀,古歌,誦詠,異伝,作者：柿本人麻呂,枕詞,羈旅,転用

3608

[題詞]（當所誦詠古歌）

[原文]安麻射可流比奈乃奈我道乎孤悲久礼婆安可思能門欲里伊敝乃安多里見由

[訓読]天離る鄙の長道を恋ひ来れば明石の門より家のあたり見ゆ

[仮名],あまざかる,ひなのながちを,こひくれば,あかしのとより,いへのあたりみゆ

[_]

[左注]柿本朝臣人麻呂歌曰夜麻等思麻見由

[_]

[校異]

[_]

[ＫＷ],遣新羅使,天平８年,年紀,古歌,誦詠,異伝,柿本人麻呂,羈旅,地名,明石,兵庫,望郷 ,転用

3608S

[題詞]（當所誦詠古歌）柿本朝臣人麻呂歌曰

[原文]夜麻等思麻見由

[訓読]大和島見ゆ

[仮名],やまとしまみゆ

[_]

[左注]

[_]

[校異]

[_]

[ＫＷ],遣新羅使,天平８年,年紀,古歌,誦詠,異伝,作者：柿本人麻呂,大和,奈良,地名,明石 ,羈旅,望郷,転用

3609

[題詞]（當所誦詠古歌）

[原文]武庫能宇美能尓波余久安良之伊射里須流安麻能都里船奈美能宇倍由見由

[訓読]武庫の海の庭よくあらし漁りする海人の釣舟波の上ゆ見ゆ

[仮名],むこのうみの,にはよくあらし,いざりする,あまのつりぶね,なみのうへゆみゆ

[_]

[左注]柿本朝臣人麻呂歌曰氣比乃宇美能又曰可里許毛能美<太>礼弖出見由安麻能都里船

[_]

[校異]多 → 太 [類][紀][細]

[_]

[ＫＷ],遣新羅使,天平８年,年紀,古歌,誦詠,羈旅,地名,西宮,兵庫,柿本人麻呂,異伝,叙景 ,土地讃美,転用

3609S

[題詞]（當所誦詠古歌）柿本朝臣人麻呂歌曰又曰

[原文]氣比乃宇美能可里許毛能美<太>礼弖出見由安麻能都里船

[訓読]笥飯の海の刈り薦の乱れて出づ見ゆ海人の釣船

[仮名],けひのうみの ,かりこもの,みだれていづみゆ,あまのつりぶね

[_]

[左注]

[_]

[校異]

[_]

[ＫＷ],遣新羅使,天平８年,年紀,古歌,誦詠,羈旅,枕詞,異伝,作者：柿本人麻呂,叙景,土地讃美,地名,淡路,兵庫,転用

3610

[題詞]（當所誦詠古歌）

[原文]安胡乃宇良尓布奈能里須良牟乎等女良我安可毛能須素尓之保美都良武賀

[訓読]安胡の浦に舟乗りすらむ娘子らが赤裳の裾に潮満つらむか

[仮名],あごのうらに,ふなのりすらむ,をとめらが,あかものすそに,しほみつらむか

[_]

[左注]柿本朝臣人麻呂歌曰安美能宇良又曰多<麻>母能須蘇尓

[_]

[校異]麻能 → 麻 [西（訂正）][類][紀][細]

[_]

[ＫＷ],遣新羅使,天平８年,年紀,古歌,誦詠,地名,異伝,柿本人麻呂,羈旅,転用

3610S

[題詞]（當所誦詠古歌）柿本朝臣人麻呂歌曰又曰

[原文]安美能宇良多<麻>母能須蘇尓

[訓読]嗚呼見の浦玉裳の裾に

[仮名],あみのうら ,たまものすそに

[_]

[左注]

[_]

[校異]

[_]

[ＫＷ],遣新羅使,天平８年,年紀,古歌,誦詠,地名,三重県,異伝,作者：柿本人麻呂,転用

3611

[題詞]七夕歌一首

[原文]於保夫祢尓麻可治之自奴伎宇奈波良乎許藝弖天和多流月人乎登Ｉ

[訓読]大船に真楫しじ貫き海原を漕ぎ出て渡る月人壮士

[仮名],おほぶねに,まかぢしじぬき,うなはらを,こぎでてわたる,つきひとをとこ

[_]

[左注]右柿本朝臣人麻呂歌

[_]

[校異]

[_]

[ＫＷ],遣新羅使,天平８年,年紀,作者：柿本人麻呂,転用,古歌,誦詠,七夕,羈旅

3612

[題詞]備後國水調郡長井浦舶泊之夜作歌三首

[原文]安乎尓与之奈良能美也故尓由久比等毛我母久左麻久良多妣由久布祢能登麻利都ん武仁 [旋頭歌也]

[訓読]あをによし奈良の都に行く人もがも草枕旅行く船の泊り告げむに [旋頭歌也]

[仮名],あをによし,ならのみやこに,ゆくひともがも,くさまくら,たびゆくふねの,とまりつげむに

[_]

[左注]右一首大判官

[_]

[校異]

[_]

[ＫＷ],遣新羅使,天平８年,年紀,広島,三原,作者：壬生宇太麻呂,枕詞,旋頭歌,羈旅,望郷

3613

[題詞]（備後國水調郡長井浦舶泊之夜作歌三首）

[原文]海原乎夜蘇之麻我久里伎奴礼杼母奈良能美也故波和須礼可祢都母

[訓読]海原を八十島隠り来ぬれども奈良の都は忘れかねつも

[仮名],うなはらを,やそしまがくり,きぬれども,ならのみやこは,わすれかねつも

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,三原,望郷,羈旅

3614

[題詞]（備後國水調郡長井浦舶泊之夜作歌三首）

[原文]可敝流散尓伊母尓見勢武尓和多都美乃於伎都白玉比利比弖由賀奈

[訓読]帰るさに妹に見せむにわたつみの沖つ白玉拾ひて行かな

[仮名],かへるさに,いもにみせむに,わたつみの,おきつしらたま,ひりひてゆかな

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,三原,羈旅,みやげ,魂触り

3615

[題詞]風速浦舶泊之夜作歌二首

[原文]和我由恵仁妹奈氣久良之風早能宇良能於伎敝尓奇里多奈妣家利

[訓読]我がゆゑに妹嘆くらし風早の浦の沖辺に霧たなびけり

[仮名],わがゆゑに,いもなげくらし,かざはやの,うらのおきへに,きりたなびけり

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,安芸津町,望郷,羈旅,叙景

3616

[題詞]（風速浦舶泊之夜作歌二首）

[原文]於伎都加是伊多久布伎勢波和伎毛故我奈氣伎能奇里尓安可麻之母能乎

[訓読]沖つ風いたく吹きせば我妹子が嘆きの霧に飽かましものを

[仮名],おきつかぜ,いたくふきせば,わぎもこが,なげきのきりに,あかましものを

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,安芸津町,望郷,羈旅

3617

[題詞]安藝國長門嶋舶泊礒邊作歌五首

[原文]伊波婆之流多伎毛登杼呂尓鳴蝉乃許恵乎之伎氣婆京師之於毛保由

[訓読]石走る瀧もとどろに鳴く蝉の声をし聞けば都し思ほゆ

[仮名],いはばしる,たきもとどろに,なくせみの,こゑをしきけば,みやこしおもほゆ

[_]

[左注]右一首大石蓑麻呂

[_]

[校異]

[_]

[ＫＷ],遣新羅使,天平８年,年紀,羈旅,望郷,広島,倉橋島,作者：大石蓑麻呂

3618

[題詞]（安藝國長門嶋舶泊礒邊作歌五首）

[原文]夜麻河<泊>能伎欲吉可波世尓安蘇倍杼母奈良能美夜故波和須礼可祢都母

[訓読]山川の清き川瀬に遊べども奈良の都は忘れかねつも

[仮名],やまがはの,きよきかはせに,あそべども,ならのみやこは,わすれかねつも

[_]

[左注]

[_]

[校異]伯 → 泊 [類][細][温]

[_]

[ＫＷ],遣新羅使,天平８年,年紀,広島,倉橋島,望郷,羈旅,宴席

3619

[題詞]（安藝國長門嶋舶泊礒邊作歌五首）

[原文]伊蘇乃麻由多藝都山河多延受安良婆麻多母安比見牟秋加多麻氣弖

[訓読]礒の間ゆたぎつ山川絶えずあらばまたも相見む秋かたまけて

[仮名],いそのまゆ,たぎつやまがは,たえずあらば,またもあひみむ,あきかたまけて

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,倉橋島,望郷,羈旅

3620

[題詞]（安藝國長門嶋舶泊礒邊作歌五首）

[原文]故悲思氣美奈具左米可祢弖比具良之能奈久之麻可氣尓伊保利須流可母

[訓読]恋繁み慰めかねてひぐらしの鳴く島蔭に廬りするかも

[仮名],こひしげみ,なぐさめかねて,ひぐらしの,なくしまかげに,いほりするかも

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,倉橋島,望郷,羈旅

3621

[題詞]（安藝國長門嶋舶泊礒邊作歌五首）

[原文]和我伊能知乎奈我刀能之麻能小松原伊久与乎倍弖加可武佐備和多流

[訓読]我が命を長門の島の小松原幾代を経てか神さびわたる

[仮名],わがいのちを,ながとのしまの,こまつばら,いくよをへてか,かむさびわたる

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,倉橋島,土地讃美,羈旅

3622

[題詞]従長門浦舶<出>之夜仰觀月光作歌三首

[原文]月余美乃比可里乎伎欲美由布奈藝尓加古能己恵欲妣宇良<未>許具可聞

[訓読]月読みの光りを清み夕なぎに水手の声呼び浦廻漕ぐかも

[仮名],つくよみの,ひかりをきよみ,ゆふなぎに,かこのこゑよび,うらみこぐかも

[_]

[左注]

[_]

[校異]出 [西（上書訂正）][紀][細] / 末 → 未 [万葉集古義]

[_]

[ＫＷ],遣新羅使,天平８年,年紀,羈旅,船出,出発,広島,倉橋島

3623

[題詞]（従長門浦舶<出>之夜仰觀月光作歌三首）

[原文]山乃波尓月可多夫氣婆伊射里須流安麻能等毛之備於伎尓奈都佐布

[訓読]山の端に月傾けば漁りする海人の燈火沖になづさふ

[仮名],やまのはに,つきかたぶけば,いざりする,あまのともしび,おきになづさふ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,出発,広島,倉橋島,叙景,船出

3624

[題詞]（従長門浦舶<出>之夜仰觀月光作歌三首）

[原文]和礼乃未夜欲布祢波許具登於毛敝礼婆於伎敝能可多尓可治能於等須奈里

[訓読]我れのみや夜船は漕ぐと思へれば沖辺の方に楫の音すなり

[仮名],われのみや,よふねはこぐと,おもへれば,おきへのかたに,かぢのおとすなり

[_]

[左注]

[_]

[校異]

[_]

[ＫＷ],遣新羅使,天平８年,年紀,広島,倉橋島,出発,羈旅,船出,叙景

3625

[題詞]古挽歌一首[并短歌]

[原文]由布左礼婆安之敝尓佐和伎安氣久礼婆於伎尓奈都佐布可母須良母都麻等多具比弖和我尾尓波之毛奈布里曽等之<路>多倍乃波祢左之可倍弖宇知波良比左宿等布毛能乎由久美都能可敝良奴其等久布久可是能美延奴我其登久安刀毛奈吉与能比登尓之弖和可礼尓之伊毛我伎世弖思奈礼其呂母蘇弖加多思吉弖比登里可母祢牟

[訓読]夕されば葦辺に騒き明け来れば沖になづさふ鴨すらも妻とたぐひて我が尾には霜な降りそと白栲の羽さし交へてうち掃ひさ寝とふものを行く水の帰らぬごとく吹く風の見えぬがごとく跡もなき世の人にして別れにし妹が着せてしなれ衣袖片敷きてひとりかも寝む

[仮名],ゆふされば,あしへにさわき,あけくれば,おきになづさふ,かもすらも,つまとたぐひて,わがをには,しもなふりそと,しろたへの,はねさしかへて,うちはらひ,さぬとふものを,ゆくみづの,かへらぬごとく,ふくかぜの,みえぬがごとく,あともなき,よのひとにして,わかれにし,いもがきせてし,なれごろも,そでかたしきて,ひとりかもねむ

[_]

[左注]（右丹比大夫悽愴亡妻歌）

[_]

[校異]歌 [西] 謌 / 露 → 路 [類][紀]

[_]

[ＫＷ],遣新羅使,天平８年,年紀,挽歌,転用,古歌,作者：丹比大夫,笠麻呂,羈旅,悲別,望郷 ,広島,倉橋島

3626

[題詞]（古挽歌一首[并短歌]）反歌一首

[原文]多都我奈伎安之<敝>乎左之弖等妣和多類安奈多頭多頭志比等里佐奴礼婆

[訓読]鶴が鳴き葦辺をさして飛び渡るあなたづたづしひとりさ寝れば

[仮名],たづがなき,あしへをさして,とびわたる,あなたづたづし,ひとりさぬれば

[_]

[左注]右丹比大夫悽愴亡妻歌

[_]

[校異]倍 → 敝 [紀][細]

[_]

[ＫＷ],遣新羅使,天平８年,年紀,挽歌,転用,古歌,作者：丹比大夫,笠麻呂,羈旅,悲別,望郷 ,広島,倉橋島

3627

[題詞]属物發思歌一首[并短歌]

[原文]安佐散礼婆伊毛我手尓麻久可我美奈須美津能波麻備尓於保夫祢尓真可治之自奴伎可良久尓々和多理由加武等多太牟可布美奴面乎左指天之保麻知弖美乎妣伎由氣婆於伎敝尓波之良奈美多可美宇良<未>欲理許藝弖和多礼婆和伎毛故尓安波治乃之麻波由布左礼婆久毛為可久里奴左欲布氣弖由久敝乎之良尓安我己許呂安可志能宇良尓布祢等米弖宇伎祢乎詞都追和多都美能於<枳>敝乎見礼婆伊射理須流安麻能乎等女波小船乗都良々尓宇家里安香等吉能之保美知久礼婆安之辨尓波多豆奈伎和多流安左奈藝尓布奈弖乎世牟等船人毛鹿子毛許恵欲妣柔保等里能奈豆左比由氣婆伊敝之麻婆久毛為尓美延奴安我毛敝流許己呂奈具也等波夜久伎弖美牟等於毛比弖於保夫祢乎許藝和我由氣婆於伎都奈美多可久多知伎奴与曽能<未>尓見都追須疑由伎多麻能宇良尓布祢乎等杼米弖波麻備欲里宇良伊蘇乎見都追奈久古奈須祢能未之奈可由和多都美能多麻伎能多麻乎伊敝都刀尓伊毛尓也良牟等比里比登里素弖尓波伊礼弖可敝之也流都可比奈家礼婆毛弖礼杼毛之留思乎奈美等麻多於伎都流可毛

[訓読]朝されば妹が手にまく鏡なす御津の浜びに大船に真楫しじ貫き韓国に渡り行かむと直向ふ敏馬をさして潮待ちて水脈引き行けば沖辺には白波高み浦廻より漕ぎて渡れば我妹子に淡路の島は夕されば雲居隠りぬさ夜更けてゆくへを知らに我が心明石の浦に船泊めて浮寝をしつつわたつみの沖辺を見れば漁りする海人の娘子は小舟乗りつららに浮けり暁の潮満ち来れば葦辺には鶴鳴き渡る朝なぎに船出をせむと船人も水手も声呼びにほ鳥のなづさひ行けば家島は雲居に見えぬ我が思へる心なぐやと早く来て見むと思ひて大船を漕ぎ我が行けば沖つ波高く立ち来ぬ外のみに見つつ過ぎ行き玉の浦に船を留めて浜びより浦礒を見つつ泣く子なす音のみし泣かゆわたつみの手巻の玉を家づとに妹に遣らむと拾ひ取り袖には入れて帰し遣る使なければ持てれども験をなみとまた置きつるかも

[仮名],あさされば,いもがてにまく,かがみなす,みつのはまびに,おほぶねに,まかぢしじぬき,からくにに,わたりゆかむと,ただむかふ,みぬめをさして,しほまちて,みをひきゆけば,おきへには,しらなみたかみ,うらみより,こぎてわたれば,わぎもこに,あはぢのしまは,ゆふされば,くもゐかくりぬ,さよふけて,ゆくへをしらに,あがこころ,あかしのうらに,ふねとめて,うきねをしつつ,わたつみの,おきへをみれば,いざりする,あまのをとめは,をぶねのり,つららにうけり,あかときの,しほみちくれば,あしべには,たづなきわたる,あさなぎに,ふなでをせむと,ふなびとも,かこもこゑよび,にほどりの,なづさひゆけば,いへしまは,くもゐにみえぬ,あがもへる,こころなぐやと,はやくきて,みむとおもひて,おほぶねを,こぎわがゆけば,おきつなみ,たかくたちきぬ,よそのみに,みつつすぎゆき,たまのうらに,ふねをとどめて,はまびより,うらいそをみつつ,なくこなす,ねのみしなかゆ,わたつみの,たまきのたまを,いへづとに,いもにやらむと,ひりひとり,そでにはいれて,かへしやる,つかひなければ,もてれども,しるしをなみと,またおきつるかも

[_]

[左注]

[_]

[校異]歌 [西] 謌 / 末 → 未 [万葉集古義] / 枳 [西（上書訂正）][紀][細][温] / 末 → 未 [西（訂正）][細][紀][温]

[_]

[ＫＷ],遣新羅使,天平８年,年紀,地名,道行き,羈旅,大阪,兵庫,岡山,広島,倉橋島,序詞,枕詞,望郷,孤独

3628

[題詞]（属物發思歌一首[并短歌]）反歌二首

[原文]多麻能宇良能於伎都之良多麻比利敝礼杼麻多曽於伎都流見流比等乎奈美

[訓読]玉の浦の沖つ白玉拾へれどまたぞ置きつる見る人をなみ

[仮名],たまのうらの,おきつしらたま,ひりへれど,またぞおきつる,みるひとをなみ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,望郷,地名,岡山,倉敷,広島,倉橋島,孤独

3629

[題詞]（（属物發思歌一首[并短歌]）反歌二首）

[原文]安伎左良婆和<我>布祢波弖牟和須礼我比与世伎弖於家礼於伎都之良奈美

[訓読]秋さらば我が船泊てむ忘れ貝寄せ来て置けれ沖つ白波

[仮名],あきさらば,わがふねはてむ,わすれがひ,よせきておけれ,おきつしらなみ

[_]

[左注]

[_]

[校異]<> → 我 [西（左書）][紀][細][温]

[_]

[ＫＷ],遣新羅使,天平８年,年紀,羈旅,望郷,広島,倉橋島,孤独

3630

[題詞]周防國玖河郡麻里布浦行之時作歌八首

[原文]真可治奴伎布祢之由加受波見礼杼安可奴麻里布能宇良尓也杼里世麻之乎

[訓読]真楫貫き船し行かずは見れど飽かぬ麻里布の浦に宿りせましを

[仮名],まかぢぬき,ふねしゆかずは,みれどあかぬ,まりふのうらに,やどりせましを

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,土地讃美,山口,岩国,地名

3631

[題詞]（周防國玖河郡麻里布浦行之時作歌八首）

[原文]伊都之可母見牟等於毛比師安波之麻乎与曽尓也故非無由久与思<乎>奈美

[訓読]いつしかも見むと思ひし粟島を外にや恋ひむ行くよしをなみ

[仮名],いつしかも,みむとおもひし,あはしまを,よそにやこひむ,ゆくよしをなみ

[_]

[左注]

[_]

[校異]於 → 乎 [類][紀]

[_]

[ＫＷ],遣新羅使,天平８年,年紀,地名,山口,岩国,土地讃美,恋情,羈旅

3632

[題詞]（周防國玖河郡麻里布浦行之時作歌八首）

[原文]大船尓可之布里多弖天波麻藝欲伎麻里布能宇良尓也杼里可世麻之

[訓読]大船にかし振り立てて浜清き麻里布の浦に宿りかせまし

[仮名],おほぶねに,かしふりたてて,はまぎよき,まりふのうらに,やどりかせまし

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,山口,岩国,地名,土地讃美

3633

[題詞]（周防國玖河郡麻里布浦行之時作歌八首）

[原文]安波思麻能安波自等於毛布伊毛尓安礼也夜須伊毛祢受弖安我故非和多流

[訓読]粟島の逢はじと思ふ妹にあれや安寐も寝ずて我が恋ひわたる

[仮名],あはしまの,あはじとおもふ,いもにあれや,やすいもねずて,あがこひわたる

[_]

[左注]

[_]

[校異]

[_]

[ＫＷ],遣新羅使,天平８年,年紀,地名,岩国,山口,望郷,恋情,羈旅

3634

[題詞]（周防國玖河郡麻里布浦行之時作歌八首）

[原文]筑紫道能可太能於保之麻思末志久母見祢婆古非思吉伊毛乎於伎弖伎奴

[訓読]筑紫道の可太の大島しましくも見ねば恋しき妹を置きて来ぬ

[仮名],つくしぢの,かだのおほしま,しましくも,みねばこひしき,いもをおきてきぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,地名,岡山,山口,岩国,望郷,恋情

3635

[題詞]（周防國玖河郡麻里布浦行之時作歌八首）

[原文]伊毛我伊敝治知可久安里世婆見礼杼安可奴麻里布能宇良乎見世麻思毛能乎

[訓読]妹が家路近くありせば見れど飽かぬ麻里布の浦を見せましものを

[仮名],いもがいへぢ,ちかくありせば,みれどあかぬ,まりふのうらを,みせましものを

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,地名,山口,岩国,望郷,恋情,土地讃美

3636

[題詞]（周防國玖河郡麻里布浦行之時作歌八首）

[原文]伊敝妣等波可敝里波也許等伊波比之麻伊波比麻都良牟多妣由久和礼乎

[訓読]家人は帰り早来と伊波比島斎ひ待つらむ旅行く我れを

[仮名],いへびとは,かへりはやこと,いはひしま,いはひまつらむ,たびゆくわれを

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,地名,山口,上関町,望郷,掛詞

3637

[題詞]（周防國玖河郡麻里布浦行之時作歌八首）

[原文]久左麻久良多妣由久比等乎伊波比之麻伊久与布流末弖伊波比伎尓家牟

[訓読]草枕旅行く人を伊波比島幾代経るまで斎ひ来にけむ

[仮名],くさまくら,たびゆくひとを,いはひしま,いくよふるまで,いはひきにけむ

[_]

[左注]

[_]

[校異]

[_]

[ＫＷ],遣新羅使,天平８年,年紀,枕詞,羈旅,地名,山口,上関町,土地讃美,掛詞

3638

[題詞]過大嶋鳴門而經再宿之後追作歌二首

[原文]巨礼也己能名尓於布奈流門能宇頭之保尓多麻毛可流登布安麻乎等女杼毛

[訓読]これやこの名に負ふ鳴門のうづ潮に玉藻刈るとふ海人娘子ども

[仮名],これやこの,なにおふなるとの,うづしほに,たまもかるとふ,あまをとめども

[_]

[左注]右一首田邊秋庭

[_]

[校異]

[_]

[ＫＷ],遣新羅使,天平８年,年紀,羈旅,土地讃美,山口,大畠瀬戸,叙景,追想

3639

[題詞]（過大嶋鳴門而經再宿之後追作歌二首）

[原文]奈美能宇倍尓宇伎祢世之欲比安杼毛倍香許己呂我奈之久伊米尓美要都流

[訓読]波の上に浮き寝せし宵あど思へか心悲しく夢に見えつる

[仮名],なみのうへに,うきねせしよひ,あどもへか,こころがなしく,いめにみえつる

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,山口,大畠瀬戸,追想,望郷

3640

[題詞]熊毛浦舶泊之夜作歌四首

[原文]美夜故邊尓由可牟船毛我可里許母能美太礼弖於毛布許登都ん夜良牟

[訓読]都辺に行かむ船もが刈り薦の乱れて思ふ言告げやらむ

[仮名],みやこへに,ゆかむふねもが,かりこもの,みだれておもふ,ことつげやらむ

[_]

[左注]右一首羽栗

[_]

[校異]

[_]

[ＫＷ],遣新羅使,天平８年,年紀,羽栗,枕詞,山口,上関町,望郷,羈旅

3641

[題詞]（熊毛浦舶泊之夜作歌四首）

[原文]安可等伎能伊敝胡悲之伎尓宇良<未>欲理可治乃於等須流波安麻乎等女可母

[訓読]暁の家恋しきに浦廻より楫の音するは海人娘子かも

[仮名],あかときの,いへごひしきに,うらみより,かぢのおとするは,あまをとめかも

[_]

[左注]

[_]

[校異]末 → 未 [万葉集古義]

[_]

[ＫＷ],遣新羅使,天平８年,年紀,羈旅,山口,上関町,望郷,叙景

3642

[題詞]（熊毛浦舶泊之夜作歌四首）

[原文]於枳敝欲理之保美知久良之可良能宇良尓安佐里須流多豆奈伎弖佐和伎奴

[訓読]沖辺より潮満ち来らし可良の浦にあさりする鶴鳴きて騒きぬ

[仮名],おきへより,しほみちくらし,からのうらに,あさりするたづ,なきてさわきぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,山口,上関町,叙景

3643

[題詞]（熊毛浦舶泊之夜作歌四首）

[原文]於吉敝欲里布奈妣等能煩流与妣与勢弖伊射都氣也良牟多婢能也登里乎

[訓読]沖辺より船人上る呼び寄せていざ告げ遣らむ旅の宿りを

[仮名],おきへより,ふなびとのぼる,よびよせて,いざつげやらむ,たびのやどりを

[_]

[左注]一云多妣能夜杼里乎伊射都氣夜良奈

[_]

[校異]

[_]

[ＫＷ],遣新羅使,天平８年,年紀,羈旅,山口,上関町,望郷,異伝

3643S

[題詞]（熊毛浦舶泊之夜作歌四首）一云

[原文]多妣能夜杼里乎伊射都氣夜良奈

[訓読]旅の宿りをいざ告げ遣らな

[仮名],たびのやどりを,いざつげやらな

[_]

[左注]

[_]

[校異]

[_]

[ＫＷ],遣新羅使,天平８年,年紀,異伝,羈旅,山口,上関町,望郷

3644

[題詞]佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首

[原文]於保伎美能美許等可之故美於保<夫>祢能由伎能麻尓末<尓> 夜杼里須流可母

[訓読]大君の命畏み大船の行きのまにまに宿りするかも

[仮名],おほきみの,みことかしこみ,おほぶねの,ゆきのまにまに,やどりするかも

[_]

[左注]右一首雪宅麻呂

[_]

[校異]布 → 夫 [類][紀][細] / <> → 尓 [西（右書）][類][紀][細]

[_]

[ＫＷ],遣新羅使,天平８年,年紀,羈旅,大分,中津市,作者：雪宅麻呂,不安

3645

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]和伎毛故波伴也母許奴可登麻都良牟乎於伎尓也須麻牟伊敝都可受之弖

[訓読]我妹子は早も来ぬかと待つらむを沖にや住まむ家つかずして

[仮名],わぎもこは,はやもこぬかと,まつらむを,おきにやすまむ,いへつかずして

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,大分,中津市,望郷,不安

3646

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]宇良<未>欲里許藝許之布祢乎風波夜美於伎都美宇良尓夜杼里須流可毛

[訓読]浦廻より漕ぎ来し船を風早み沖つみ浦に宿りするかも

[仮名],うらみより,こぎこしふねを,かぜはやみ,おきつみうらに,やどりするかも

[_]

[左注]

[_]

[校異]末 → 未 [万葉集古義]

[_]

[ＫＷ],遣新羅使,天平８年,年紀,羈旅,大分,中津市,不安

3647

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]和伎毛故我伊可尓於毛倍可奴婆多末能比登欲毛於知受伊米尓之美由流

[訓読]我妹子がいかに思へかぬばたまの一夜もおちず夢にし見ゆる

[仮名],わぎもこが,いかにおもへか,ぬばたまの,ひとよもおちず,いめにしみゆる

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,大分,中津市,望郷,枕詞,不安

3648

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]宇奈波良能於伎敝尓等毛之伊射流火波安可之弖登母世夜麻登思麻見無

[訓読]海原の沖辺に灯し漁る火は明かして灯せ大和島見む

[仮名],うなはらの,おきへにともし,いざるひは,あかしてともせ,やまとしまみむ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,大分,中津市,望郷

3649

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]可母自毛能宇伎祢乎須礼婆美奈能和多可具呂伎可美尓都由曽於伎尓家類

[訓読]鴨じもの浮寝をすれば蜷の腸か黒き髪に露ぞ置きにける

[仮名],かもじもの,うきねをすれば,みなのわた,かぐろきかみに,つゆぞおきにける

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,大分,中津市,漂泊,不安

3650

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]比左可多能安麻弖流月波見都礼杼母安我母布伊毛尓安波奴許呂可毛

[訓読]ひさかたの天照る月は見つれども我が思ふ妹に逢はぬころかも

[仮名],ひさかたの,あまてるつきは,みつれども,あがもふいもに,あはぬころかも

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,枕詞,大分,中津市,望郷,恋情

3651

[題詞]（佐婆海中忽遭逆風漲浪漂流經宿而後幸得順風到著豊前國下毛郡分間浦於是追怛艱難悽惆作八首）

[原文]奴波多麻能欲和多流月者波夜毛伊弖奴香文宇奈波良能夜蘇之麻能宇倍由伊毛我安多里見牟 [旋頭歌也]

[訓読]ぬばたまの夜渡る月は早も出でぬかも海原の八十島の上ゆ妹があたり見む [旋頭歌也]

[仮名],ぬばたまの,よわたるつきは,はやもいでぬかも,うなはらの,やそしまのうへゆ ,いもがあたりみむ

[_]

[左注]

[_]

[校異]歌 [西] 謌

[_]

[ＫＷ],遣新羅使,天平８年,年紀,羈旅,旋頭歌,枕詞,大分,中津市,望郷

3652

[題詞]至筑紫舘遥望本郷悽愴作歌四首

[原文]之賀能安麻能一日毛於知受也久之保能可良伎孤悲乎母安礼波須流香母

[訓読]志賀の海人の一日もおちず焼く塩のからき恋をも我れはするかも

[仮名],しかのあまの,ひとひもおちず,やくしほの,からきこひをも,あれはするかも

[_]

[左注]

[_]

[校異]

[_]

[ＫＷ],遣新羅使,天平８年,年紀,地名,福岡,志賀島,恋情,羈旅,序詞,望郷

3653

[題詞]（至筑紫舘遥望本郷悽愴作歌四首）

[原文]思可能宇良尓伊射里須流安麻伊敝<妣>等能麻知古布良牟尓安可思都流宇乎

[訓読]志賀の浦に漁りする海人家人の待ち恋ふらむに明かし釣る魚

[仮名],しかのうらに,いざりするあま,いへびとの,まちこふらむに,あかしつるうを

[_]

[左注]

[_]

[校異]比 → 妣 [類][細]

[_]

[ＫＷ],遣新羅使,天平８年,年紀,地名,福岡,志賀島,叙景,羈旅,望郷

3654

[題詞]（至筑紫舘遥望本郷悽愴作歌四首）

[原文]可之布江尓多豆奈吉和多流之可能宇良尓於枳都之良奈美多知之久良思母

[訓読]可之布江に鶴鳴き渡る志賀の浦に沖つ白波立ちし来らしも

[仮名],かしふえに,たづなきわたる,しかのうらに,おきつしらなみ,たちしくらしも

[_]

[左注]一云美知之伎奴良思

[_]

[校異]

[_]

[ＫＷ],遣新羅使,天平８年,年紀,羈旅,地名,福岡,志賀島,叙景,異伝

3654S

[題詞]（至筑紫舘遥望本郷悽愴作歌四首）一云

[原文]美知之伎奴良思

[訓読]満ちし来ぬらし

[仮名],みちしきぬらし

[_]

[左注]

[_]

[校異]

[_]

[ＫＷ],遣新羅使,天平８年,年紀,異伝,羈旅,福岡,志賀島,叙景

3655

[題詞]（至筑紫舘遥望本郷悽愴作歌四首）

[原文]伊麻欲理波安伎豆吉奴良之安思比奇能夜麻末都可氣尓日具良之奈伎奴

[訓読]今よりは秋づきぬらしあしひきの山松蔭にひぐらし鳴きぬ

[仮名],いまよりは,あきづきぬらし,あしひきの,やままつかげに,ひぐらしなきぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,枕詞,恋情,叙景

3656

[題詞]七夕仰觀天漢各陳所思作歌三首

[原文]安伎波疑尓々保敝流和我母奴礼奴等母伎美我美布祢能都奈之等理弖婆

[訓読]秋萩ににほへる我が裳濡れぬとも君が御船の綱し取りてば

[仮名],あきはぎに,にほへるわがも,ぬれぬとも,きみがみふねの,つなしとりてば

[_]

[左注]右一首大使

[_]

[校異]

[_]

[ＫＷ],遣新羅使,天平８年,年紀,作者：阿倍継麻呂,羈旅,七夕,織女,女歌,宴席,福岡

3657

[題詞]（七夕仰觀天漢各陳所思作歌三首）

[原文]等之尓安里弖比等欲伊母尓安布比故保思母和礼尓麻佐里弖於毛布良米也母

[訓読]年にありて一夜妹に逢ふ彦星も我れにまさりて思ふらめやも

[仮名],としにありて,ひとよいもにあふ,ひこほしも,われにまさりて,おもふらめやも

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,七夕,宴席,望郷,恋情,福岡

3658

[題詞]（七夕仰觀天漢各陳所思作歌三首）

[原文]由布豆久欲可氣多知与里安比安麻能我波許具布奈妣等乎見流我等母之佐

[訓読]夕月夜影立ち寄り合ひ天の川漕ぐ船人を見るが羨しさ

[仮名],ゆふづくよ,かげたちよりあひ,あまのがは,こぐふなびとを,みるがともしさ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,七夕,宴席,望郷,恋情,福岡

3659

[題詞]海邊望月作九首

[原文]安伎可是波比尓家尓布伎奴和伎毛故波伊都登<加>和礼乎伊波比麻都良牟

[訓読]秋風は日に異に吹きぬ我妹子はいつとか我れを斎ひ待つらむ

[仮名],あきかぜは,ひにけにふきぬ,わぎもこは,いつとかわれを,いはひまつらむ

[_]

[左注]大使之第二男

[_]

[校異]可 → 加 [類][紀][細]

[_]

[ＫＷ],遣新羅使,天平８年,年紀,作者：阿倍継麻呂次男,羈旅,望郷,恋情,福岡

3660

[題詞]（海邊望月作九首）

[原文]可牟佐夫流安良都能左伎尓与須流奈美麻奈久也伊毛尓故非和多里奈牟

[訓読]神さぶる荒津の崎に寄する波間なくや妹に恋ひわたりなむ

[仮名],かむさぶる,あらつのさきに,よするなみ,まなくやいもに,こひわたりなむ

[_]

[左注]右一首土師<稲>足

[_]

[校異]楯 → 稲 [西（訂正右書）][紀][細]

[_]

[ＫＷ],遣新羅使,天平８年,年紀,地名,福岡,羈旅,望郷,枕詞,作者：土師稲足,恋情

3661

[題詞]（海邊望月作九首）

[原文]可是能牟多与世久流奈美尓伊射里須流安麻乎等女良我毛能須素奴礼奴

[訓読]風の共寄せ来る波に漁りする海人娘子らが裳の裾濡れぬ

[仮名],かぜのむた,よせくるなみに,いざりする,あまをとめらが,ものすそぬれぬ

[_]

[左注]一云安麻乃乎等賣我毛能須蘇奴礼<濃>

[_]

[校異]奴 → 濃 [類][紀][細]

[_]

[ＫＷ],遣新羅使,天平８年,年紀,福岡,叙景,羈旅,異伝

3661S

[題詞]（海邊望月作九首）一云

[原文]安麻乃乎等賣我毛能須蘇奴礼<濃>

[訓読]海人の娘子が裳の裾濡れぬ

[仮名],あまのをとめが,ものすそぬれぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,叙景,異伝

3662

[題詞]（海邊望月作九首）

[原文]安麻能波良布里佐氣見礼婆欲曽布氣尓家流与之恵也之比<等>里奴流欲波安氣婆安氣奴等母

[訓読]天の原振り放け見れば夜ぞ更けにけるよしゑやしひとり寝る夜は明けば明けぬとも

[仮名],あまのはら,ふりさけみれば,よぞふけにける,よしゑやし,ひとりぬるよは,あけばあけぬとも

[_]

[左注]右一首旋頭歌也

[_]

[校異]等 [西（上書訂正）][紀][細][温]

[_]

[ＫＷ],遣新羅使,天平８年,年紀,羈旅,旋頭歌,孤独,恋情,望郷,福岡

3663

[題詞]（海邊望月作九首）

[原文]和多都美能於伎都奈波能里久流等伎登伊毛我麻都良牟月者倍尓都追

[訓読]わたつみの沖つ縄海苔来る時と妹が待つらむ月は経につつ

[仮名],わたつみの,おきつなはのり,くるときと,いもがまつらむ,つきはへにつつ

[_]

[左注]

[_]

[校異]

[_]

[ＫＷ],遣新羅使,天平８年,年紀,植物,羈旅,福岡,望郷,漂泊

3664

[題詞]（海邊望月作九首）

[原文]之可能宇良尓伊射里須流安麻安氣久礼婆宇良未許具良之可治能於等伎許由

[訓読]志賀の浦に漁りする海人明け来れば浦廻漕ぐらし楫の音聞こゆ

[仮名],しかのうらに,いざりするあま,あけくれば,うらみこぐらし,かぢのおときこゆ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,地名,志賀島,叙景,福岡

3665

[題詞]（海邊望月作九首）

[原文]伊母乎於毛比伊能祢良延奴尓安可等吉能安左宜理其問理可里我祢曽奈久

[訓読]妹を思ひ寐の寝らえぬに暁の朝霧隠り雁がねぞ鳴く

[仮名],いもをおもひ,いのねらえぬに,あかときの,あさぎりごもり,かりがねぞなく

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,望郷,動物,福岡

3666

[題詞]（海邊望月作九首）

[原文]由布佐礼婆安伎可是左牟思和伎母故我等伎安良比其呂母由伎弖波也伎牟

[訓読]夕されば秋風寒し我妹子が解き洗ひ衣行きて早着む

[仮名],ゆふされば,あきかぜさむし,わぎもこが,ときあらひごろも,ゆきてはやきむ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,望郷,漂泊

3667

[題詞]（海邊望月作九首）

[原文]和我多妣波比左思久安良思許能安我家流伊毛我許呂母能阿可都久見礼婆

[訓読]我が旅は久しくあらしこの我が着る妹が衣の垢つく見れば

[仮名],わがたびは,ひさしくあらし,このあがける,いもがころもの,あかつくみれば

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,望郷,漂泊

3668

[題詞]到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首

[原文]於保伎美能等保能美可度登於毛敝礼杼氣奈我久之安礼婆古非尓家流可母

[訓読]大君の遠の朝廷と思へれど日長くしあれば恋ひにけるかも

[仮名],おほきみの,とほのみかどと,おもへれど,けながくしあれば,こひにけるかも

[_]

[左注]右一首大使

[_]

[校異]花([西（訂正左書）]美 → 華 [紀][細]

[_]

[ＫＷ],遣新羅使,天平８年,年紀,作者：阿倍継麻呂,羈旅,恋情,望郷,福岡,韓亭

3669

[題詞]（到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首）

[原文]多妣尓安礼杼欲流波火等毛之乎流和礼乎也未尓也伊毛我古非都追安流良牟

[訓読]旅にあれど夜は火灯し居る我れを闇にや妹が恋ひつつあるらむ

[仮名],たびにあれど,よるはひともし,をるわれを,やみにやいもが,こひつつあるらむ

[_]

[左注]右一首大判官

[_]

[校異]

[_]

[ＫＷ],遣新羅使,天平８年,年紀,作者：壬生宇太麻呂,羈旅,望郷,恋情,福岡,韓亭

3670

[題詞]（到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首）

[原文]可良等麻里能<許>乃宇良奈美多々奴日者安礼杼母伊敝尓古非奴日者奈之

[訓読]韓亭能許の浦波立たぬ日はあれども家に恋ひぬ日はなし

[仮名],からとまり,のこのうらなみ,たたぬひは,あれどもいへに,こひぬひはなし

[_]

[左注]

[_]

[校異]許 [西（上書訂正）][類][紀][細]

[_]

[ＫＷ],遣新羅使,天平８年,年紀,福岡,韓亭,地名,能許島,恋情,望郷,羈旅

3671

[題詞]（到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首）

[原文]奴婆多麻乃欲和多流月尓安良麻世婆伊敝奈流伊毛尓安比弖許麻之乎

[訓読]ぬばたまの夜渡る月にあらませば家なる妹に逢ひて来ましを

[仮名],ぬばたまの,よわたるつきに,あらませば,いへなるいもに,あひてこましを

[_]

[左注]

[_]

[校異]

[_]

[ＫＷ],遣新羅使,天平８年,年紀,福岡,韓亭,羈旅,望郷,枕詞

3672

[題詞]（到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首）

[原文]比左可多能月者弖利多里伊刀麻奈久安麻能伊射里波等毛之安敝里見由

[訓読]ひさかたの月は照りたり暇なく海人の漁りは灯し合へり見ゆ

[仮名],ひさかたの,つきはてりたり,いとまなく,あまのいざりは,ともしあへりみゆ

[_]

[左注]

[_]

[校異]

[_]

[ＫＷ],遣新羅使,天平８年,年紀,枕詞,羈旅,福岡,韓亭,叙景

3673

[題詞]（到筑前國志麻郡之韓亭舶泊經三日於時夜月之光皎々流照奄對此<華>旅情悽噎各陳心緒聊以裁歌六首）

[原文]可是布氣婆於吉都思良奈美可之故美等能許能等麻里尓安麻多欲曽奴流

[訓読]風吹けば沖つ白波畏みと能許の亭にあまた夜ぞ寝る

[仮名],かぜふけば,おきつしらなみ,かしこみと,のこのとまりに,あまたよぞぬる

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,韓亭,地名,能許島,漂泊,波待ち

3674

[題詞]引津亭舶泊之作歌七首

[原文]久左麻久良多婢乎久流之美故非乎礼婆可也能山邊尓草乎思香奈久毛

[訓読]草枕旅を苦しみ恋ひ居れば可也の山辺にさを鹿鳴くも

[仮名],くさまくら,たびをくるしみ,こひをれば,かやのやまへに,さをしかなくも

[_]

[左注]（右二首大判官）

[_]

[校異]

[_]

[ＫＷ],遣新羅使,天平８年,年紀,羈旅,地名,福岡,可也山,引津亭,動物,望郷,漂泊,作者：壬生宇太麻呂

3675

[題詞]（引津亭舶泊之作歌七首）

[原文]於吉都奈美多可久多都日尓安敝利伎等美夜古能比等波伎吉弖家牟可母

[訓読]沖つ波高く立つ日にあへりきと都の人は聞きてけむかも

[仮名],おきつなみ,たかくたつひに,あへりきと,みやこのひとは,ききてけむかも

[_]

[左注]右二首大判官

[_]

[校異]

[_]

[ＫＷ],遣新羅使,天平８年,年紀,作者：壬生宇太麻呂,羈旅,望郷,福岡,可也山,引津亭

3676

[題詞]（引津亭舶泊之作歌七首）

[原文]安麻等夫也可里乎都可比尓衣弖之可母奈良能弥夜故尓許登都ん夜良武

[訓読]天飛ぶや雁を使に得てしかも奈良の都に言告げ遣らむ

[仮名],あまとぶや,かりをつかひに,えてしかも,ならのみやこに,ことつげやらむ

[_]

[左注]

[_]

[校異]ん [類] 氣

[_]

[ＫＷ],遣新羅使,天平８年,年紀,羈旅,動物,望郷,枕詞,福岡,引津亭

3677

[題詞]（引津亭舶泊之作歌七首）

[原文]秋野乎尓保波須波疑波佐家礼杼母見流之留思奈之多婢尓師安礼婆

[訓読]秋の野をにほはす萩は咲けれども見る験なし旅にしあれば

[仮名],あきののを,にほはすはぎは,さけれども,みるしるしなし,たびにしあれば

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,植物,漂泊,旅情,望郷,福岡,引津亭

3678

[題詞]（引津亭舶泊之作歌七首）

[原文]伊毛乎於毛比伊能祢良延奴尓安伎乃野尓草乎思香奈伎都追麻於毛比可祢弖

[訓読]妹を思ひ寐の寝らえぬに秋の野にさを鹿鳴きつ妻思ひかねて

[仮名],いもをおもひ,いのねらえぬに,あきののに,さをしかなきつ,つまおもひかねて

[_]

[左注]

[_]

[校異]

[_]

[ＫＷ],遣新羅使,天平８年,年紀,動物,望郷,羈旅,福岡,引津亭

3679

[題詞]（引津亭舶泊之作歌七首）

[原文]於保夫祢尓真可治之自奴伎等吉麻都等和礼波於毛倍杼月曽倍尓家流

[訓読]大船に真楫しじ貫き時待つと我れは思へど月ぞ経にける

[仮名],おほぶねに,まかぢしじぬき,ときまつと,われはおもへど,つきぞへにける

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,福岡,引津亭

3680

[題詞]（引津亭舶泊之作歌七首）

[原文]欲乎奈我美伊能年良延奴尓安之比奇能山妣故等余米佐乎思賀奈君母

[訓読]夜を長み寐の寝らえぬにあしひきの山彦響めさを鹿鳴くも

[仮名],よをながみ,いのねらえぬに,あしひきの,やまびことよめ,さをしかなくも

[_]

[左注]

[_]

[校異]

[_]

[ＫＷ],遣新羅使,天平８年,年紀,福岡,引津亭,羈旅,動物,枕詞,望郷

3681

[題詞]肥前國松浦郡狛嶋亭舶泊之夜遥望海浪各慟旅心作歌七首

[原文]可敝里伎弖見牟等於毛比之和我夜度能安伎波疑須々伎知里尓家武可聞

[訓読]帰り来て見むと思ひし我が宿の秋萩すすき散りにけむかも

[仮名],かへりきて,みむとおもひし,わがやどの,あきはぎすすき,ちりにけむかも

[_]

[左注]右一首秦田麻呂

[_]

[校異]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,植物,望郷,作者：秦田麻呂

3682

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]安米都知能可未乎許比都々安礼麻多武波夜伎万世伎美麻多婆久流思母

[訓読]天地の神を祈ひつつ我れ待たむ早来ませ君待たば苦しも

[仮名],あめつちの,かみをこひつつ,あれまたむ,はやきませきみ,またばくるしも

[_]

[左注]右一首娘子

[_]

[校異]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,遊行女婦,宴席,女歌,作者：娘子

3683

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]伎美乎於毛比安我古非万久波安良多麻乃多都追奇其等尓与久流日毛安良自

[訓読]君を思ひ我が恋ひまくはあらたまの立つ月ごとに避くる日もあらじ

[仮名],きみをおもひ,あがこひまくは,あらたまの,たつつきごとに,よくるひもあらじ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,女歌,恋情

3684

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]秋夜乎奈我美尓可安良武奈曽許々波伊能祢良要奴毛比等里奴礼婆可

[訓読]秋の夜を長みにかあらむなぞここば寐の寝らえぬもひとり寝ればか

[仮名],あきのよを,ながみにかあらむ,なぞここば,いのねらえぬも,ひとりぬればか

[_]

[左注]

[_]

[校異]々 [類][細] 己

[_]

[ＫＷ],遣新羅使,天平８年,年紀,羈旅,佐賀県,唐津市,神集島,孤独,恋情

3685

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]多良思比賣御舶波弖家牟松浦乃宇美伊母我麻都<倍>伎月者倍尓都々

[訓読]足日女御船泊てけむ松浦の海妹が待つべき月は経につつ

[仮名],たらしひめ,みふねはてけむ,まつらのうみ,いもがまつべき,つきはへにつつ

[_]

[左注]

[_]

[校異]敝 → 倍 [類]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,伝説,神功皇后,望郷,地名

3686

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]多婢奈礼婆於毛比多要弖毛安里都礼杼伊敝尓安流伊毛之於母比我奈思母

[訓読]旅なれば思ひ絶えてもありつれど家にある妹し思ひ悲しも

[仮名],たびなれば,おもひたえても,ありつれど,いへにあるいもし,おもひがなしも

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,望郷

3687

[題詞]（肥前國松浦郡狛嶋亭舶泊之夜遥望海浪各慟旅心作歌七首）

[原文]安思必奇能山等妣古<由>留可里我祢波美也故尓由加波伊毛尓安比弖許祢

[訓読]あしひきの山飛び越ゆる鴈がねは都に行かば妹に逢ひて来ね

[仮名],あしひきの,やまとびこゆる,かりがねは,みやこにゆかば,いもにあひてこね

[_]

[左注]

[_]

[校異]田 → 由 [類][紀][細]

[_]

[ＫＷ],遣新羅使,天平８年,年紀,羈旅,佐賀県,唐津市,神集島,枕詞,動物,望郷

3688

[題詞]到壹岐嶋雪連宅満忽遇鬼病死去之時作歌一首[并短歌]

[原文]須賣呂伎能等保能朝庭等可良國尓和多流和我世波伊敝妣等能伊波比麻多祢可多太<未>可母安夜麻知之家牟安吉佐良婆可敝里麻左牟等多良知祢能波々尓麻乎之弖等伎毛須疑都奇母倍奴礼婆今日可許牟明日可蒙許武登伊敝<妣>等波麻知故布良牟尓等保能久尓伊麻太毛都可受也麻等乎毛登保久左可里弖伊波我祢乃安良伎之麻祢尓夜杼理須流君

[訓読]天皇の遠の朝廷と韓国に渡る我が背は家人の斎ひ待たねか正身かも過ちしけむ秋去らば帰りまさむとたらちねの母に申して時も過ぎ月も経ぬれば今日か来む明日かも来むと家人は待ち恋ふらむに遠の国いまだも着かず大和をも遠く離りて岩が根の荒き島根に宿りする君

[仮名],すめろきの,とほのみかどと,からくにに,わたるわがせは,いへびとの,いはひまたねか,ただみかも,あやまちしけむ,あきさらば,かへりまさむと,たらちねの,ははにまをして,ときもすぎ,つきもへぬれば,けふかこむ,あすかもこむと,いへびとは,まちこふらむに,とほのくに,いまだもつかず,やまとをも,とほくさかりて,いはがねの,あらきしまねに,やどりするきみ

[_]

[左注]（右三首挽歌）

[_]

[校異]短歌 [西] 短謌 / 末 → 未 [万葉集略解] / 乎 [古][細] 于 / 比 → 妣 [類][古]

[_]

[ＫＷ],遣新羅使,天平８年,年紀,羈旅,壱岐,挽歌,雪宅麻呂,枕詞,行路死人,長崎

3689

[題詞]（到壹岐嶋雪連宅満忽遇鬼病死去之時作歌一首[并短歌]）反歌二首

[原文]伊波多野尓夜杼里須流伎美伊敝妣等乃伊豆良等和礼乎等<波婆>伊可尓伊波牟

[訓読]岩田野に宿りする君家人のいづらと我れを問はばいかに言はむ

[仮名],いはたのに,やどりするきみ,いへびとの,いづらとわれを,とはばいかにいはむ

[_]

[左注]（右三首挽歌）

[_]

[校異]婆波 → 波婆 [代匠記初稿本]

[_]

[ＫＷ],遣新羅使,天平８年,年紀,挽歌,羈旅,壱岐,雪宅麻呂,地名,行路死人,長崎

3690

[題詞]（（到壹岐嶋雪連宅満忽遇鬼病死去之時作歌一首[并短歌]）反歌二首）

[原文]与能奈可波都祢可久能未等和可礼奴流君尓也毛登奈安我孤悲由加牟

[訓読]世間は常かくのみと別れぬる君にやもとな我が恋ひ行かむ

[仮名],よのなかは,つねかくのみと,わかれぬる,きみにやもとな,あがこひゆかむ

[_]

[左注]右三首挽歌

[_]

[校異]

[_]

[ＫＷ],遣新羅使,天平８年,年紀,挽歌,羈旅,壱岐,雪宅麻呂,恋情,長崎

3691

[題詞]

[原文]天地等登毛尓母我毛等於毛比都々安里家牟毛能乎波之家也思伊敝乎波奈礼弖奈美能宇倍由奈豆佐比伎尓弖安良多麻能月日毛伎倍奴可里我祢母都藝弖伎奈氣婆多良知祢能波々母都末良母安<佐>都由尓毛能須蘇比都知由布疑里尓己呂毛弖奴礼弖左伎久之毛安流良牟其登久伊Ｒ見都追麻都良牟母能乎世間能比登<乃 >奈氣伎<波> 安比於毛波奴君尓安礼也母安伎波疑能知良敝流野邊乃波都乎花可里保尓布<伎>弖久毛婆奈礼等保伎久尓敝能都由之毛能佐武伎山邊尓夜杼里世流良牟

[訓読]天地とともにもがもと思ひつつありけむものをはしけやし家を離れて波の上ゆなづさひ来にてあらたまの月日も来経ぬ雁がねも継ぎて来鳴けばたらちねの母も妻らも朝露に裳の裾ひづち夕霧に衣手濡れて幸くしもあるらむごとく出で見つつ待つらむものを世間の人の嘆きは相思はぬ君にあれやも秋萩の散らへる野辺の初尾花仮廬に葺きて雲離れ遠き国辺の露霜の寒き山辺に宿りせるらむ

[仮名],あめつちと,ともにもがもと,おもひつつ,ありけむものを,はしけやし,いへをはなれて,なみのうへゆ,なづさひきにて,あらたまの,つきひもきへぬ,かりがねも,つぎてきなけば,たらちねの,ははもつまらも,あさつゆに,ものすそひづち,ゆふぎりに,ころもでぬれて,さきくしも,あるらむごとく,いでみつつ,まつらむものを,よのなかの,ひとのなげきは,あひおもはぬ,きみにあれやも,あきはぎの,ちらへるのへの,はつをばな,かりほにふきて,くもばなれ,とほきくにへの,つゆしもの,さむきやまへに,やどりせるらむ

[_]

[左注]（右三首葛井連子老作挽歌）

[_]

[校異]左 → 佐 [類][紀] / 能 → 乃 [類][紀][細] / 婆 → 波 [類][紀] / 疑 → 伎 [類][古][紀]

[_]

[ＫＷ],遣新羅使,天平８年,年紀,羈旅,挽歌,雪宅麻呂,作者：葛井子老,枕詞,哀悼,壱岐,長崎

3692

[題詞]反歌二首

[原文]波之家也思都麻毛古杼毛母多可多加尓麻都良牟伎美也之麻我久礼奴流

[訓読]はしけやし妻も子どもも高々に待つらむ君や島隠れぬる

[仮名],はしけやし,つまもこどもも,たかたかに,まつらむきみや,しまがくれぬる

[_]

[左注]（右三首葛井連子老作挽歌）

[_]

[校異]之（塙）々

[_]

[ＫＷ],遣新羅使,天平８年,年紀,羈旅,挽歌,雪宅麻呂,作者：葛井子老,哀悼,壱岐,長崎

3693

[題詞]（反歌二首）

[原文]毛美知葉能知里奈牟山尓夜杼里奴流君乎麻都良牟比等之可奈之母

[訓読]黄葉の散りなむ山に宿りぬる君を待つらむ人し悲しも

[仮名],もみちばの,ちりなむやまに,やどりぬる,きみをまつらむ,ひとしかなしも

[_]

[左注]右三首葛井連子老作挽歌

[_]

[校異]之 [類][細] 思

[_]

[ＫＷ],遣新羅使,天平８年,年紀,羈旅,挽歌,雪宅麻呂,作者：葛井子老,枕詞,哀悼,壱岐,長崎

3694

[題詞]

[原文]和多都美能 <可>之故伎美知乎也須家口母奈久奈夜美伎弖伊麻太尓母毛奈久由可牟登由吉能安末能保都手乃宇良敝乎可多夜伎弖由加武<等>須流尓伊米能其等美知能蘇良治尓和可礼須流伎美

[訓読]わたつみの畏き道を安けくもなく悩み来て今だにも喪なく行かむと壱岐の海人のほつての占部を肩焼きて行かむとするに夢のごと道の空路に別れする君

[仮名],わたつみの,かしこきみちを,やすけくも,なくなやみきて,いまだにも,もなくゆかむと,ゆきのあまの,ほつてのうらへを,かたやきて,ゆかむとするに,いめのごと,みちのそらぢに,わかれするきみ

[_]

[左注]（右三首六鯖作挽歌）

[_]

[校異]下 → 可 [類][古][紀] / 土 → 等 [岩波大系]（塙）（楓）

[_]

[ＫＷ],遣新羅使,天平８年,年紀,羈旅,挽歌,作者：六人部鯖麻呂,哀悼,雪宅麻呂,地名,壱岐,長崎

3695

[題詞]反歌二首

[原文]牟可之欲里伊比<祁>流許等乃可良久尓能可良久毛己許尓和可礼須留可聞

[訓読]昔より言ひけることの韓国のからくもここに別れするかも

[仮名],むかしより,いひけることの,からくにの,からくもここに,わかれするかも

[_]

[左注]（右三首六鯖作挽歌）

[_]

[校異]都 → 祁 [類][紀]

[_]

[ＫＷ],遣新羅使,天平８年,年紀,羈旅,挽歌,作者：六人部鯖麻呂,哀悼,雪宅麻呂,地名,序詞,壱岐,長崎

3696

[題詞]（反歌二首）

[原文]新羅奇敝可伊敝尓可加反流由吉能之麻由加牟多登伎毛於毛比可祢都母

[訓読]新羅へか家にか帰る壱岐の島行かむたどきも思ひかねつも

[仮名],しらきへか,いへにかかへる,ゆきのしま,ゆかむたどきも,おもひかねつも

[_]

[左注]右三首六鯖作挽歌

[_]

[校異]

[_]

[ＫＷ],遣新羅使,天平８年,年紀,羈旅,挽歌,作者：六人部鯖麻呂,哀悼,雪宅麻呂,地名,壱岐,長崎

3697

[題詞]到對馬嶋淺茅浦舶泊之時不得順風經停五箇日於是瞻望物華各陳慟心作歌三首

[原文]毛母布祢乃波都流對馬能安佐治山志具礼能安米尓毛美多比尓家里

[訓読]百船の泊つる対馬の浅茅山しぐれの雨にもみたひにけり

[仮名],ももふねの,はつるつしまの,あさぢやま,しぐれのあめに,もみたひにけり

[_]

[左注]

[_]

[校異]歌 [西] 謌

[_]

[ＫＷ],遣新羅使,天平８年,年紀,長崎,対馬,叙景,羈旅,地名

3698

[題詞]（到對馬嶋淺茅浦舶泊之時不得順風經停五箇日於是瞻望物華各陳慟心作歌三首）

[原文]安麻射可流比奈尓毛月波弖礼々杼母伊毛曽等保久波和可礼伎尓家流

[訓読]天離る鄙にも月は照れれども妹ぞ遠くは別れ来にける

[仮名],あまざかる,ひなにもつきは,てれれども,いもぞとほくは,わかれきにける

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,望郷,枕詞

3699

[題詞]（到對馬嶋淺茅浦舶泊之時不得順風經停五箇日於是瞻望物華各陳慟心作歌三首）

[原文]安伎左礼婆於久都由之毛尓安倍受之弖京師乃山波伊呂豆伎奴良牟

[訓読]秋去れば置く露霜にあへずして都の山は色づきぬらむ

[仮名],あきされば,おくつゆしもに,あへずして,みやこのやまは,いろづきぬらむ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,望郷

3700

[題詞]竹敷浦舶泊之時<各>陳心緒作歌十八首

[原文]安之比奇能山下比可流毛美知葉能知里能麻河比波計布仁聞安流香母

[訓読]あしひきの山下光る黄葉の散りの乱ひは今日にもあるかも

[仮名],あしひきの,やましたひかる,もみちばの,ちりのまがひは,けふにもあるかも

[_]

[左注]右一首大使

[_]

[校異]<> → 各 [類][細] / 流 [類][細]（塙）留

[_]

[ＫＷ],遣新羅使,天平８年,年紀,羈旅,長崎,対馬,叙景,作者：阿倍継麻呂

3701

[題詞]（竹敷浦舶泊之時<各>陳心緒作歌十八首）

[原文]多可之伎能母美知乎見礼婆和藝毛故我麻多牟等伊比之等伎曽伎尓家流

[訓読]竹敷の黄葉を見れば我妹子が待たむと言ひし時ぞ来にける

[仮名],たかしきの,もみちをみれば,わぎもこが,またむといひし,ときぞきにける

[_]

[左注]右一首副使

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,地名,望郷,作者：大伴三中

3702

[題詞]（竹敷浦舶泊之時<各>陳心緒作歌十八首）

[原文]多可思吉能宇良<未>能毛美知 <和>礼由伎弖可敝里久流末Ｒ知里許須奈由米

[訓読]竹敷の浦廻の黄葉我れ行きて帰り来るまで散りこすなゆめ

[仮名],たかしきの,うらみのもみち,われゆきて,かへりくるまで,ちりこすなゆめ

[_]

[左注]右一首大判官

[_]

[校異]末 → 未 [万葉集古義] / <> → 和 [西（左書）][類][紀][細]

[_]

[ＫＷ],遣新羅使,天平８年,年紀,羈旅,長崎,対馬,地名,叙景,作者：壬生宇太麻呂

3703

[題詞]（竹敷浦舶泊之時<各>陳心緒作歌十八首）

[原文]多可思吉能宇敝可多山者久礼奈為能也之保能伊呂尓奈里尓家流香聞

[訓読]竹敷の宇敝可多山は紅の八しほの色になりにけるかも

[仮名],たかしきの,うへかたやまは,くれなゐの,やしほのいろに,なりにけるかも

[_]

[左注]右一首小判官

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,地名,叙景,作者：大蔵麻呂

3704

[題詞]（竹敷浦舶泊之時<各>陳心緒作歌十八首）

[原文]毛美知婆能知良布山邊由許具布祢能尓保比尓米Ｒ弖伊Ｒ弖伎尓家里

[訓読]黄葉の散らふ山辺ゆ漕ぐ船のにほひにめでて出でて来にけり

[仮名],もみちばの,ちらふやまへゆ,こぐふねの,にほひにめでて,いでてきにけり

[_]

[左注]（右二首對馬娘子名玉槻）

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,遊行女婦,作者：玉槻,女歌

3705

[題詞]（竹敷浦舶泊之時<各>陳心緒作歌十八首）

[原文]多可思吉能多麻毛奈<婢>可之己<藝>Ｒ奈牟君我美布祢乎伊都等可麻多牟

[訓読]竹敷の玉藻靡かし漕ぎ出なむ君がみ船をいつとか待たむ

[仮名],たかしきの,たまもなびかし,こぎでなむ,きみがみふねを,いつとかまたむ

[_]

[左注]右二首對馬娘子名玉槻

[_]

[校異]比 → 婢 [類][紀][細] / 伎 → 藝 [類][紀][細]

[_]

[ＫＷ],遣新羅使,天平８年,年紀,羈旅,長崎,対馬,地名,遊行女婦,作者：玉槻,女歌

3706

[題詞]（竹敷浦舶泊之時<各>陳心緒作歌十八首）

[原文]多麻之家流伎欲吉奈藝佐乎之保美弖婆安可受和礼由久可反流左尓見牟

[訓読]玉敷ける清き渚を潮満てば飽かず我れ行く帰るさに見む

[仮名],たましける,きよきなぎさを,しほみてば,あかずわれゆく,かへるさにみむ

[_]

[左注]右一首大使

[_]

[校異]

[_]

[ＫＷ],遣新羅使,天平８年,年紀,羈旅,土地讃美,長崎,対馬,作者：阿倍継麻呂

3707

[題詞]（竹敷浦舶泊之時<各>陳心緒作歌十八首）

[原文]安伎也麻能毛美知乎可射之和我乎礼婆宇良之保美知久伊麻太安可奈久尓

[訓読]秋山の黄葉をかざし我が居れば浦潮満ち来いまだ飽かなくに

[仮名],あきやまの,もみちをかざし,わがをれば,うらしほみちく,いまだあかなくに

[_]

[左注]右一首副使

[_]

[校異]

[_]

[ＫＷ],遣新羅使,天平８年,年紀,羈旅,土地讃美,長崎,対馬,作者：壬生宇太麻呂

3708

[題詞]（竹敷浦舶泊之時<各>陳心緒作歌十八首）

[原文]毛能毛布等比等尓波美要<緇> 之多婢毛能思多由故布流尓都<奇>曽倍尓家流

[訓読]物思ふと人には見えじ下紐の下ゆ恋ふるに月ぞ経にける

[仮名],ものもふと,ひとにはみえじ,したびもの,したゆこふるに,つきぞへにける

[_]

[左注]右一首大使

[_]

[校異]ア → 緇 [紀][温] / 哥 → 奇 [西（訂正）][類][紀][細]

[_]

[ＫＷ],遣新羅使,天平８年,年紀,羈旅,望郷,長崎,対馬,作者：阿倍継麻呂

3709

[題詞]（竹敷浦舶泊之時<各>陳心緒作歌十八首）

[原文]伊敝豆刀尓可比乎比里布等於伎敝欲里与世久流奈美尓許呂毛弖奴礼奴

[訓読]家づとに貝を拾ふと沖辺より寄せ来る波に衣手濡れぬ

[仮名],いへづとに,かひをひりふと,おきへより,よせくるなみに,ころもでぬれぬ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,長崎,対馬,望郷,みやげ

3710

[題詞]（竹敷浦舶泊之時<各>陳心緒作歌十八首）

[原文]之保非奈<婆> 麻多母和礼許牟伊射遊賀武於伎都志保佐為多可久多知伎奴

[訓読]潮干なばまたも我れ来むいざ行かむ沖つ潮騒高く立ち来ぬ

[仮名],しほひなば,またもわれこむ,いざゆかむ,おきつしほさゐ,たかくたちきぬ

[_]

[左注]

[_]

[校異]波 → 婆 [類]

[_]

[ＫＷ],遣新羅使,天平８年,年紀,羈旅,対馬,長崎

3711

[題詞]（竹敷浦舶泊之時<各>陳心緒作歌十八首）

[原文]和我袖波多毛登等保里弖奴礼奴等母故非和須礼我比等良受波由可自

[訓読]我が袖は手本通りて濡れぬとも恋忘れ貝取らずは行かじ

[仮名],わがそでは,たもととほりて,ぬれぬとも,こひわすれがひ,とらずはゆかじ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,対馬,長崎,望郷

3712

[題詞]（竹敷浦舶泊之時<各>陳心緒作歌十八首）

[原文]奴<婆>多麻能伊毛我保須倍久安良奈久尓和我許呂母弖乎奴礼弖伊可尓勢牟

[訓読]ぬばたまの妹が干すべくあらなくに我が衣手を濡れていかにせむ

[仮名],ぬばたまの,いもがほすべく,あらなくに,わがころもでを,ぬれていかにせむ

[_]

[左注]

[_]

[校異]波 → 婆 [類][古]

[_]

[ＫＷ],遣新羅使,天平８年,年紀,枕詞,羈旅,対馬,長崎,望郷

3713

[題詞]（竹敷浦舶泊之時<各>陳心緒作歌十八首）

[原文]毛美知婆波伊麻波宇都呂布和伎毛故我麻多牟等伊比之等伎能倍由氣婆

[訓読]黄葉は今はうつろふ我妹子が待たむと言ひし時の経ゆけば

[仮名],もみちばは,いまはうつろふ,わぎもこが,またむといひし,ときのへゆけば

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,望郷,対馬,長崎

3714

[題詞]（竹敷浦舶泊之時<各>陳心緒作歌十八首）

[原文]安<伎>佐礼婆故非之美伊母乎伊米尓太尓比左之久見牟乎安氣尓家流香聞

[訓読]秋されば恋しみ妹を夢にだに久しく見むを明けにけるかも

[仮名],あきされば,こひしみいもを,いめにだに,ひさしくみむを,あけにけるかも

[_]

[左注]

[_]

[校異]藝 → 伎 [紀][細]

[_]

[ＫＷ],遣新羅使,天平８年,年紀,恋情,羈旅,望郷,対馬,長崎

3715

[題詞]（竹敷浦舶泊之時<各>陳心緒作歌十八首）

[原文]比等里能未伎奴流許呂毛能比毛等加婆多礼可毛由波牟伊敝杼保久之弖

[訓読]ひとりのみ着寝る衣の紐解かば誰れかも結はむ家遠くして

[仮名],ひとりのみ,きぬるころもの,ひもとかば,たれかもゆはむ,いへどほくして

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,望郷,恋情,孤独,対馬,長崎

3716

[題詞]（竹敷浦舶泊之時<各>陳心緒作歌十八首）

[原文]安麻久毛能多由多比久礼婆九月能毛未知能山毛宇都呂比尓家里

[訓読]天雲のたゆたひ来れば九月の黄葉の山もうつろひにけり

[仮名],あまくもの,たゆたひくれば,ながつきの,もみちのやまも,うつろひにけり

[_]

[左注]

[_]

[校異]

[_]

[ＫＷ],遣新羅使,天平８年,年紀,叙景,羈旅,対馬,長崎

3717

[題詞]（竹敷浦舶泊之時<各>陳心緒作歌十八首）

[原文]多婢尓弖<毛> <母>奈久波也許<登> 和伎毛故我牟須妣思比毛波奈礼尓家流香聞

[訓読]旅にても喪なく早来と我妹子が結びし紐はなれにけるかも

[仮名],たびにても,もなくはやこと,わぎもこが,むすびしひもは,なれにけるかも

[_]

[左注]

[_]

[校異]母 → 毛 [類] / 毛 → 母 [類] / 等 → 登 [類][古][紀]

[_]

[ＫＷ],遣新羅使,天平８年,年紀,羈旅,望郷,対馬,長崎

3718

[題詞]廻来筑紫海路入京到播磨國家嶋之時作歌五首

[原文]伊敝之麻波奈尓許曽安里家礼宇奈波良乎安我古非伎都流伊毛母安良奈久尓

[訓読]家島は名にこそありけれ海原を我が恋ひ来つる妹もあらなくに

[仮名],いへしまは,なにこそありけれ,うなはらを,あがこひきつる,いももあらなくに

[_]

[左注]

[_]

[校異]

[_]

[ＫＷ],遣新羅使,天平８年,年紀,地名,姫路,兵庫,羈旅,孤独,望郷,帰途

3719

[題詞]（廻来筑紫海路入京到播磨國家嶋之時作歌五首）

[原文]久左麻久良多婢尓比左之久安良米也等伊毛尓伊比之乎等之能倍奴良久

[訓読]草枕旅に久しくあらめやと妹に言ひしを年の経ぬらく

[仮名],くさまくら,たびにひさしく,あらめやと,いもにいひしを,としのへぬらく

[_]

[左注]

[_]

[校異]

[_]

[ＫＷ],遣新羅使,天平８年,年紀,枕詞,羈旅,望郷,帰途,姫路,兵庫

3720

[題詞]（廻来筑紫海路入京到播磨國家嶋之時作歌五首）

[原文]和伎毛故乎由伎弖波也美武安波治之麻久毛為尓見延奴伊敝都久良之母

[訓読]我妹子を行きて早見む淡路島雲居に見えぬ家つくらしも

[仮名],わぎもこを,ゆきてはやみむ,あはぢしま,くもゐにみえぬ,いへづくらしも

[_]

[左注]

[_]

[校異]

[_]

[ＫＷ],遣新羅使,天平８年,年紀,地名,淡路,兵庫,姫路,望郷,帰途,羈旅

3721

[題詞]（廻来筑紫海路入京到播磨國家嶋之時作歌五首）

[原文]奴婆多麻能欲安可之母布<祢>波許藝由可奈美都能波麻末都麻知故非奴良武

[訓読]ぬばたまの夜明かしも船は漕ぎ行かな御津の浜松待ち恋ひぬらむ

[仮名],ぬばたまの,よあかしもふねは,こぎゆかな,みつのはままつ,まちこひぬらむ

[_]

[左注]

[_]

[校異]弥 → 祢 [類][紀][細]

[_]

[ＫＷ],遣新羅使,天平８年,年紀,枕詞,地名,大阪,難波,兵庫,姫路,帰途

3722

[題詞]（廻来筑紫海路入京到播磨國家嶋之時作歌五首）

[原文]大伴乃美津能等麻里尓布祢波弖々多都多能山乎伊都可故延伊加武

[訓読]大伴の御津の泊りに船泊てて龍田の山をいつか越え行かむ

[仮名],おほともの,みつのとまりに,ふねはてて,たつたのやまを,いつかこえいかむ

[_]

[左注]

[_]

[校異]

[_]

[ＫＷ],遣新羅使,天平８年,年紀,羈旅,地名,兵庫,姫路,大阪,難波,奈良,帰途