 | Religious Lyrics of the XVth Century |  |
121. God Bids Us Use Reason and Evidence
Why, why, what ys þis? why, hit ys
Non nodyre sekurely but weritus were-by domini.
Non nodyre sekurely but weritus were-by domini.
Whane no-þing whas but god alone—
The fadyre, þe holly gost & þe sone—
Whone ys iij and iij ys whone.
The fadyre, þe holly gost & þe sone—
Whone ys iij and iij ys whone.
Heyuyn & erthe furst he wroȝt,
And odyre creaturs he made of noȝt,
All þing dyspossid lyk as he þowȝt.
And odyre creaturs he made of noȝt,
All þing dyspossid lyk as he þowȝt.
Mane for an appull of lyttyll prys,
He lost þe blys of parradys,
ffor he dessyryd for to be wys.
He lost þe blys of parradys,
ffor he dessyryd for to be wys.
188
Tell me þis ressoun, yeve þat þu cane,
how goddys sone be-came a mane
be lynnag of dawyt and nassone?
how goddys sone be-came a mane
be lynnag of dawyt and nassone?
Marwell I have þat pure wyrgyne
Myȝt consayfe sappyens dewyne;
I trow hit passyt all wyttus þine.
Myȝt consayfe sappyens dewyne;
I trow hit passyt all wyttus þine.
The grettust lord of sofferantte
ys god him-selfe in his humannyte,
ffor man-kynd he dyid wppon a tre.
ys god him-selfe in his humannyte,
ffor man-kynd he dyid wppon a tre.
Man, þu art but corrypptybull,
Tell me how hit may be possibull
That he schall lyue euer, as sayth þe bybull?
Tell me how hit may be possibull
That he schall lyue euer, as sayth þe bybull?
Man, þu art but in faynyt
To comprehend nor to indyte
All þis matters se in sennyt.
To comprehend nor to indyte
All þis matters se in sennyt.
God hym-selfe byddyt vs by his senttens
To so vse owre resoun and owre efydens,
And to his wordys yef wholl credens.
To so vse owre resoun and owre efydens,
And to his wordys yef wholl credens.
| Religious Lyrics of the XVth Century | |