72. My Thought Was on a Maid so Bright
[_]
Trinity Coll. Camb. MS. 1230
Alma redemptoris mater
As I lay vp-on a nyth
My þowth was on a berd so brith
That men clepyn marye ful of myth
Redemptoris mater.
[T]o here cam gabryel wyth lyth
and seyd, ‘heyl be þu, blysful wyth!
To ben clepyd now art þu dyth
Redemptoris mater.’
At þat wurd þat lady bryth
Anon conseyuyd god ful of myth
Than men wyst weel that sche hyth
Redemptoris mater.
[Q]wan ihesu on þe rode was pyth
Mary was doolful of that syth
Til sche sey hym ryse vp rith
Redemptoris mater.
Ihesu that syttyst in heuene lyth
Graunt vs to comyn beforn thi sith
wyth that berde that is so brith
Redemptoris mater.
