Religious Lyrics of the XVth Century | ||
78
48. I Will Have No Other Spouse
Vpon a lady my loue ys lente,
With-owtene change of any chere,
That ys louely & contynent
And most at my desyre.
With-owtene change of any chere,
That ys louely & contynent
And most at my desyre.
Thys lady ys yn my herte pyght;
Her to loue y haue gret haste.
With all my power & my myȝth,
To her y make myne herte stedfast.
Her to loue y haue gret haste.
With all my power & my myȝth,
To her y make myne herte stedfast.
Therfor wyll y non oþur spowse,
Ner none oþur loues, for to take;
But only to here y make my vowes,
And all oþur to forsake.
Ner none oþur loues, for to take;
But only to here y make my vowes,
And all oþur to forsake.
Thys lady ys gentyll & meke,
Moder she ys & well of all;
She ys neuur for to seke,
Noþur to grete ner to small.
Moder she ys & well of all;
She ys neuur for to seke,
Noþur to grete ner to small.
Redy she ys nyght & day,
To man & wommon & chylde ynfere,
ȝyf þat þey wyll awȝt to here say,
Our prayeres mekely for to here.
To man & wommon & chylde ynfere,
ȝyf þat þey wyll awȝt to here say,
Our prayeres mekely for to here.
To serue þys lady we all be bownde,
Both nyȝth & day yn euery place,
Where euur we be, yn felde or towne,
Or elles yn any oþur place.
Both nyȝth & day yn euery place,
Where euur we be, yn felde or towne,
Or elles yn any oþur place.
Pray we to þys lady bryȝth,
In þe worshyp of þe trinite,
To brynge vs alle to heuen lyȝth—
Amen, say we, for charyte.
In þe worshyp of þe trinite,
To brynge vs alle to heuen lyȝth—
Amen, say we, for charyte.
Religious Lyrics of the XVth Century | ||