69. Ave Gracia Plena
[_]
B.M. Addit. MS. 20059
[_]
Aue gracia plena dominus tecum. luce. 1.
Ave gracia plena, devoide of all trespace,
Ryght well knowen to god before the world began,
Promysed of prophetes for oure chyefe solace,
Annunciat by Aungell was thy concepcioun,
Without originall synne as diuerse maketh mencioun—
Bothe gotene and borne, non in like case—
Wherfore, haile! glorious lady, mary full of grace.
[_]
Orietur stella ex Jacob. Numero. 24.
Haile! gracious virgyn, in materno vtero
Sanctified also, or euere thou wast borne
Esayas prophesyed, withe diuver other moo,
þat þu shuldest conceyve which most helpe men forlorne,
The blessid ster of Jacob promysed long beforne,
The swete flowre of Naȝareth, most feyrest of face—
Wherfore, haile! glorious lady, mary full of grace.
[_]
Spiritus sanctus superueniet in te et virtus altissimi obumbrabit tibi. luce 1.
Haile! generouse lady, in thy tender age
Inuiolate, vnto god of most hye devocioun,
Beawtefyed with vertue and voide of all owterage,
O fresshe fragraunt floure, of greatest discrecioun
Ab inicio predestynate, by diuine eleccioun,
In whome our sauyour crist chose his dwellyng place—
Wherefore, heile! glorious lady, mary full of grace.
[_]
Ego dixi dij estis et filij excelsi omnes. psal. 81.
Haile! pure virgyn, mary, in thy childes byrthe—
Of carefull payne and woo, there was non in the
Whiche women do suffre—þu haddest all ioye & myrthe,
Therfore þu maist be called a goddes; yf any be
Other in heven or erthe, then surely thow art she—
One spyryte and will with cryst in his palace.
Wherfore, haile! glorious lady, mary full of grace.
[_]
Oculi domini super iustos et aures eius ad preces eorum. Psal. 33.
Haile! precellent lady, bothe quene & empresse,
The chosen spowse of god his promyse to fulfyll,
Pray for vs, pore wretches þat lyve here in distres,
O flowre of virginite, whiche neuer thoghtist yll;
Thy son will performe what so euer is thy will.
Loke! for whome thow prayest, releassed is his trespace—
Wherfore, haile! glorious lady, mary full of grace.
[_]
Quia respexit humilitatem Ancille sue. luce 1.
Haile! rubicounde Rose, of womenhod the flowre,
Synes thy fyrst begynnyng our lord was with the,
Of thy carnall substaunce he became our sauyoure.
Perceyvyng thy gret godenesse & humilite,
Thow optayndest grace before the deite,
Or euer cryst did come into thy palace—
Wherfore, haile! glorious lady, mary full of grace.
[_]
Quia fecit mihi magna qui potens est. luce 1.
Haile! serene princesse, shynyng in vertu clere,
Pray for vs suche grace here presently to optayne.
O carbuncle of chastite, in gyftes þu hast no pere;
Kepe vs from heresyes and all opynyons vayne,
Desyre cryst, thy son, that we may remayne
Aboue with hym in syon, þat ioyfull heyvenly place—
Now here I do conclude, haile! mary, full of grace.
[_]
Tu memor esto mei dum mortis venerit hora.
Amen Spes mea Jesus Maria.
