30. The Five Joys of Our Lady
[_]
Cotton MS. Caligula A. ii
Quinque Gaudia
1
Heyl! gloryous virgyne, ground of all our grace,
Heyl! modere of crist in pure virginite,
Heyl! whom the son of god ches for his place,
Send from above down from the faders see.
Heyl! with thyne ere conceyvynge, send to the
The message be gabryell, in this wyse seynge,
‘Heyl! full of grace, oure lord ys with the.’
Heyl! with thyne humble hert to it obeying.
2
Heyl! that with god so priuy art and pleyne,
Among all wymmene blessed most þu be.
Heyl! that conceyved and bere with-outen peyne
The second person in the trynyte,
Heyl! chast lyly descended from Iesse,
Heyl! cristall clere, Heyl! closet of clennesse,
Heyl! blessed burioun, Heyl! blome of all beaute,
ffayrest of fayre, aye flowryng in fayrnesse.
3
Heyl! emperyse of heuen hyest of astate,
Heyl! mayden makelesse, heyl! moder of pyte,
Heyl! queene of counfort, of counfort desolate
When thou thy chylde sawe dying on a tre.
Heyl! whos vprisyng full shynyng was to þe,
Heyl! that oure mescheves old hast new redressed,
Heyl! be whos meene this lord hase made vs fre,
The fruyt of thy wombe, ay be he b[l]essed.
4
Heyl! stydfast sterre with stremys lemyng lyȝt,
Heyl! that beheld full clerely with thyne eye
Thy son ascendynge be his propre myght,
Peersyng the clowdes in-to heuen hye,
Wher it was sayde to hem of Galelye:
‘Why merveyl ye thus lokyng vp in veyne?
This lord þat thus Ascended myȝtylye,
Ryȝt as he stey, he shall come doun Ayeyn.’
5
Heyl! floure of vertu, whos feyrnesse may not fade,
Heyl! rose on ryse most holsom of odoure,
Heyl! whom the holy gost can Ioye, and glade
In the assumyng vp in-to his toure.
Heyl! comely queene, there crowned with honoure,
Heyl! mediatrice and mene for man-kynd,
Heyl! salue to seke vs synners send socoure,
These Ioyes fyve empryntynge in oure mynd.
Amen.
Explicit.
