 | The Paris Psalter |  |
Psalm 124
1
Þa þe on drihten heora dædum getreowað,hi beoð on Sionbeorge swyþe gelice;
122
þe eardfæst byð on Hierusalem.
2
Hi synd mundbeorgas micle ymbutan;haldeð heora ymbhwyrft ece drihten
of ðisson nu awa to worulde.
3
Næfre forlæteð lifes drihtenfirenfulra tan furðor gangan,
þonne he soðfæstra settan wylle.
4
Ne he soðfæste swylce læteð,þæt hi to unrihte ahwær willen
handum ræcean, ac he him hraþe gyldeð;
do þu, drihten, wel þam þe gedefe her
hiora heortan riht healdað mid gode.
5
Þa ðe gearwe beoð to gramum bendum,eft hi gelædeð ece drihten
mid þæm þe unriht æghwær wyrceað;
sibb si Israhelum symble ofer ealle.
| The Paris Psalter | |