87. [How! we shall have game & sport ynow!]
1
As I walked by a forest side,
I met with a foster; he bad me a-bid,
At a place wher he me sett,
He bad me, what tyme an hart I met,
That I shuld let slyppe & say “go bett”;
With “hay go bet, hay go bett, hay go bett,”
How! we shall haue game & sport ynow.
2
I had not stond ther but a while,
Ye, not þe montenance of a myle,
But a gret hart cam rennyng, withowt any gile;
With “Þer he goth, þer he goth, þer he gothe”!
How! we shall haue game & sport ynow.
3
I had no sonner my howndis lat goo,
But the hart was over-throwe,
Than euery man began to blowe,
With “trororo, trororo, trororo,”
How! we shall haue game & sport ynow.