24. Mary moder, cum and se
Thy swet son nayled on a tre.
1
Thys blessyd babe þat thou hast born,
Hys blessyd body ys all to-torne,
To bye vs a-gayn þat were forlorne,
Hys hed ys crownyd with a thorn.
Mari [moder, cum and se
Thy swet son nayled on a tre].
2
“Crownyd, alas, with thorn or breer,
Or why shuld my sun thus hang here,
To me thys ys a carefull chere;
Swet son, thynke on thy moder dere.”
Mari [moder, cum and se
Thy swet son nayled on a tre].
3
“Thes wykyd Jewes with ther falshed,
Vnder ther fete they gan hym tred,
They wovndyd hym thorowgh hond & hed,
They left hym not, till he was ded.”
Mari [moder, cum and se
Thy swet son nayled on a tre].
4
“Alas, alas, now may I crye,
Why myght I not with my son dye?
My hart ys replenyshed with petye,
Fulfylled with payn most pytuysly.”
Mari [moder, cum and se
Thy swet son nayled on a tre].
5
Mary moder, greve you not yll,
From hevyn he cam this to fulfyll;
Be-cavse mankynd shuld not spill,
He toke hys deth with parfitt gud will.
Mari [moder, cum and se
Thy swet son nayled on a tre].
Explicit.
