55. He is wise, so most I goo,
That can be mery, & suffer woo.
1
Be mery & suffer, as I the vise,
Wher-euer thow sytt or rise;
Be well ware, whom thow despise,
Þou shalt kysse who is thy foo.
He is wise, [so most I goo,
That can be mery, & suffer woo.]
2
Beware, to whom þou spek thy will,
For thy speche may greve the yll;
Here & see, & goo than still,
But well is he þat can do soo.
He is wise, [so most I goo,
That can be mery, & suffer woo.]
3
Many a man holdyth hym so stowght,
What so euer he thynk, he seyth it owt;
But if he loke well a-bowt,
His tonge may be his most foo.
He is wise, [so most I goo,
That can be mery, & suffer woo.]
4
Be mery, now is all my songe,
Þe wise man tawght both old & yonge;
Who can suffer & hold his tonge,
He may be mery & no thyng woo.
He is wise, [so most I goo,
That can be mery, & suffer woo.]
5
Yff any man displese the owght,
Suffer with a mery thowght;
Let care away & greve þe nowght,
& shake thy lappe & lat it go.
He is wise, [so most I goo,
That can be mery, & suffer woo.]
Explicit.
