31. Now haue gud day, now haue gud day!
I am Crystmas, & now I go my way.
1
Here haue I dwellyd with more & lasse
From Halowtyde till Candylmas,
And now must I from you hens passe;
Now haue gud day!
2
I take my leve of Kyng & knyght,
& erle, baron, & lady bryght,
To wildernes I must me dyght;
Now haue gud day!
3
& at þe gud lord of this hall
I take my leve, & of gestis all.
Me thynke I here, Lent doth call;
Now haue gud day!
4
& at euery worthy offycer,
Marchall, panter & butler,
I take my leve as for this yere;
Now haue gud day!
5
A-noder yere I trust I shall
Make mery in this hall,
Yf rest & pease in Ynglond may fall;
Now haue gud day!
6
But oftyn tymys I haue hard say
Þat he ys loth to part a-way,
Þat oftyn byddyth ‘haue gud day’;
Now haue gud day!
7
Now fare ye well, all in fere!
Now fare ye well for all this yere!
Yet for my sake, make ye gud cher;
Now haue gud day!
Explicit.