万葉集 (Manyoshu) :: :: University of Virginia Library

万葉集 (Manyoshu)

第一巻

10.

11.

12.

13.

14.

15.

16.

17.

18.

19.

20.

Collapse All | Expand All expand section

相聞

1766

[題詞]振田向宿祢退筑紫國時歌一首

[原文]吾妹兒者久志呂尓有奈武左手乃吾奥手<二> 纒而去麻師乎

[訓読]我妹子は釧にあらなむ左手の我が奥の手に巻きて去なましを

[仮名],わぎもこは,くしろにあらなむ,ひだりての,わがおくのてに,まきていなましを

[_]

[左注]

[_]

[校異]歌 [西] 謌 [西（訂正）] 歌 / 尓 → 二 [元][藍][類][紀]

[_]

[ＫＷ],相聞,作者：振田向,恋情,福岡,餞別,離別

1767

[題詞]抜氣大首任筑紫時娶豊前國娘子紐兒作歌三首

[原文]豊國乃加波流波吾宅紐兒尓伊都我里座者革流波吾家

[訓読]豊国の香春は我家紐児にいつがり居れば香春は我家

[仮名],とよくにの,かはるはわぎへ,ひものこに,いつがりをれば,かはるはわぎへ

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：抜氣大首,豊前國娘子紐兒,福岡,恋愛,地名

1768

[題詞]（抜氣大首任筑紫時娶豊前國娘子紐兒作歌三首）

[原文]石上振乃早田乃穂尓波不出心中尓戀流<比>日

[訓読]石上布留の早稲田の穂には出でず心のうちに恋ふるこのころ

[仮名],いそのかみ,ふるのわさだの,ほにはいでず,こころのうちに,こふるこのころ

[_]

[左注]

[_]

[校異]此 → 比 [元][類][紀][温]

[_]

[ＫＷ],相聞,作者：抜氣大首,豊前國娘子紐兒,恋情,福岡,地名

1769

[題詞]（抜氣大首任筑紫時娶豊前國娘子紐兒作歌三首）

[原文]如是耳志戀思度者霊剋命毛吾波惜雲奈師

[訓読]かくのみし恋ひしわたればたまきはる命も我れは惜しけくもなし

[仮名],かくのみし,こひしわたれば,たまきはる,いのちもわれは,をしけくもなし

[_]

[左注]

[_]

[校異]

[_]

[ＫＷ],相聞,作者：抜氣大首,豊前國娘子紐兒,恋情,枕詞

1770

[題詞]大神大夫任長門守時集三輪河邊宴歌二首

[原文]三諸乃 <神>能於婆勢流泊瀬河水尾之不断者吾忘礼米也

[訓読]みもろの神の帯ばせる泊瀬川水脈し絶えずは我れ忘れめや

[仮名],みもろの,かみのおばせる,はつせがは,みをしたえずは,われわすれめや

[_]

[左注]（右二首古集中出）

[_]

[校異]歌 [西] 謌 [西（訂正）] 歌 / <> → 神 [西（右書）][元][類][古][紀]

[_]

[ＫＷ],相聞,三輪高市麻呂,古集,餞別,宴席,地名

1771

[題詞]（大神大夫任長門守時集三輪河邊宴歌二首）

[原文]於久礼居而吾波也将戀春霞多奈妣久山乎君之越去者

[訓読]後れ居て我れはや恋ひむ春霞たなびく山を君が越え去なば

[仮名],おくれゐて,あれはやこひむ,はるかすみ,たなびくやまを,きみがこえいなば

[_]

[左注]右二首古集中出

[_]

[校異]集 [西（右書）] 謌集

[_]

[ＫＷ],相聞,三輪高市麻呂,古集,餞別,宴席,地名

1772

[題詞]大神大夫任筑紫國時阿倍大夫作歌一首

[原文]於久礼居而吾者哉将戀稲見野乃秋芽子見都津去奈武子故尓

[訓読]後れ居て我れはや恋ひむ印南野の秋萩見つつ去なむ子故に

[仮名],おくれゐて,あれはやこひむ,いなみのの,あきはぎみつつ,いなむこゆゑに

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],相聞,三輪高市麻呂,作者：阿倍大夫,阿倍広庭,餞別,宴席,地名,植物

1773

[題詞]獻弓削皇子歌一首

[原文]神南備神依<板>尓為杉乃念母不過戀之茂尓

[訓読]神なびの神寄せ板にする杉の思ひも過ぎず恋の繁きに

[仮名],かむなびの,かみよせいたに,するすぎの,おもひもすぎず,こひのしげきに

[_]

[左注]（右三首柿本朝臣人麻呂之歌集出）

[_]

[校異]歌 [西] 謌 [西（訂正）] 歌 / 杉 → 板 [西（右書）][元][類][紀]

[_]

[ＫＷ],相聞,作者：柿本人麻呂歌集,献呈歌,弓削皇子,恋情,非略体,植物,地名

1774

[題詞]獻舎人皇子歌二首

[原文]垂乳根乃母之命乃言尓有者年緒長憑過武也

[訓読]たらちねの母の命の言にあらば年の緒長く頼め過ぎむや

[仮名],たらちねの,ははのみことの,ことにあらば,としのをながく,たのめすぎむや

[_]

[左注]（右三首柿本朝臣人麻呂之歌集出）

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：柿本人麻呂歌集,舎人皇子,献呈歌,恋情,女歌,非略体,枕詞

1775

[題詞]（獻舎人皇子歌二首）

[原文]泊瀬河夕渡来而我妹兒何家門近舂二家里

[訓読]泊瀬川夕渡り来て我妹子が家の金門に近づきにけり

[仮名],はつせがは,ゆふわたりきて,わぎもこが,いへのかなとに,ちかづきにけり

[_]

[左注]右三首柿本朝臣人麻呂之歌集出

[_]

[校異]

[_]

[ＫＷ],相聞,作者：柿本人麻呂歌集,舎人皇子,献呈歌,恋情,奈良,川渡り,非略体,地名

1776

[題詞]石川大夫遷任上京時播磨娘子贈歌二首

[原文]絶等寸笶山之<峯>上乃櫻花将開春部者君<之>将思

[訓読]絶等寸の山の峰の上の桜花咲かむ春へは君し偲はむ

[仮名],たゆらきの,やまのをのへの,さくらばな,さかむはるへは,きみをしのはむ

[_]

[左注]

[_]

[校異]歌 [西] 謌 [西（訂正）] 歌 / 岑 → 峯 [元][類][紀][温] / 乎 → 之 [元][藍]

[_]

[ＫＷ],相聞,作者：石川君子,播磨娘子,餞別,別れ,姫路,兵庫,枕詞,植物

1777

[題詞]（石川大夫遷任上京時播磨娘子贈歌二首）

[原文]君無者奈何身将装餝匣有黄楊之小梳毛将取跡毛不念

[訓読]君なくはなぞ身装はむ櫛笥なる黄楊の小櫛も取らむとも思はず

[仮名],きみなくは,なぞみよそはむ,くしげなる,つげのをぐしも,とらむともおもはず

[_]

[左注]

[_]

[校異]

[_]

[ＫＷ],相聞,作者：石川君子,播磨娘子,餞別,別れ,姫路,兵庫

1778

[題詞]藤井連遷任上京時娘子贈歌一首

[原文]従明日者吾波孤悲牟奈名欲<山石>踏平之君我越去者

[訓読]明日よりは我れは恋ひむな名欲山岩踏み平し君が越え去なば

[仮名],あすよりは,あれはこひむな,なほりやま,いはふみならし,きみがこえいなば

[_]

[左注]

[_]

[校異]歌 [西] 謌 [西（訂正）] 歌 / 岩 → 山石 [西（訂正）][元][藍][類]

[_]

[ＫＷ],相聞,作者：娘子,遊行女婦,藤井広成,藤井大成,餞別,別れ,大分県,地名

1779

[題詞]藤井連和歌一首

[原文]命乎志麻勢久可願名欲山石踐平之復亦毛来武

[訓読]命をしま幸くもがも名欲山岩踏み平しまたまたも来む

[仮名],いのちをし,まさきくもがも,なほりやま,いはふみならし,またまたもこむ

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：藤井広成,藤井大成,大分県,餞別,再会,娘子,地名

1780

[題詞]鹿嶋郡苅野橋別大伴卿歌一首[并短歌]

[原文]<牡>牛乃三宅之<滷>尓指向鹿嶋之埼尓狭丹塗之小船儲玉纒之小梶繁貫夕塩之満乃登等美尓三船子呼阿騰母比立而喚立而三船出者濱毛勢尓後奈<美 >居而反側戀香裳将居足垂之泣耳八将哭海上之其津乎指而君之己藝歸者

[訓読]ことひ牛の三宅の潟にさし向ふ鹿島の崎にさ丹塗りの小舟を設け玉巻きの小楫繁貫き夕潮の満ちのとどみに御船子を率ひたてて呼びたてて御船出でなば浜も狭に後れ並み居てこいまろび恋ひかも居らむ足すりし音のみや泣かむ海上のその津を指して君が漕ぎ行かば

[仮名],ことひうしの,みやけのかたに,さしむかふ,かしまのさきに,さにぬりの,をぶねをまけ,たままきの,をかぢしじぬき,ゆふしほの,みちのとどみに,みふなこを,あどもひたてて,よびたてて,みふねいでなば,はまもせに,おくれなみゐて,こいまろび,こひかもをらむ,あしすりし,ねのみやなかむ,うなかみの,そのつをさして,きみがこぎゆかば

[_]

[左注]（右二首高橋連蟲麻呂之歌集中出）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 牝 → 牡 [元 ][藍][紀] / 酒 → 滷 [万葉考] / <> → 美 [万葉略解]

[_]

[ＫＷ],相聞,作者：高橋虫麻呂歌集,茨城県,鹿島,大伴旅人,大伴道足,送別歌,餞別,宴席 ,地名

1781

[題詞]（鹿嶋郡苅野橋別大伴卿歌一首[并短歌]）反歌

[原文]海津路乃名木名六時毛渡七六加九多都波二船出可為八

[訓読]海つ道のなぎなむ時も渡らなむかく立つ波に船出すべしや

[仮名],うみつぢの,なぎなむときも,わたらなむ,かくたつなみに,ふなですべしや

[_]

[左注]右二首高橋連蟲麻呂之歌集中出

[_]

[校異]歌 [西] 謌 [西（訂正）] 歌 / 歌集 [元][類][紀]（塙）歌 / 歌 [西] 謌 [西（訂正） ] 歌

[_]

[ＫＷ],相聞,作者：高橋虫麻呂歌集,茨城県,鹿島,大伴旅人,大伴道足,送別歌,餞別,宴席 ,地名

1782

[題詞]与妻歌一首

[原文]雪己曽波春日消良米心佐閇消失多列夜言母不徃来

[訓読]雪こそば春日消ゆらめ心さへ消え失せたれや言も通はぬ

[仮名],ゆきこそば,はるひきゆらめ,こころさへ,きえうせたれや,こともかよはぬ

[_]

[左注]（右二首柿本朝臣人麻呂之歌集中出）

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：柿本人麻呂歌集,恨み歌,妻,非略体

1783

[題詞]妻和歌一首

[原文]松反四臂而有八羽三栗中上不来麻呂等言八子

[訓読]松返りしひてあれやは三栗の中上り来ぬ麻呂といふ奴

[仮名],まつがへり,しひてあれやは,みつぐりの,なかのぼりこぬ,まろといふやつこ

[_]

[左注]右二首柿本朝臣人麻呂之歌集中出

[_]

[校異]歌 [西] 謌 [西（訂正）] 歌 / 歌 [西] 謌 [西（訂正）] 歌

[_]

[ＫＷ],相聞,作者：柿本人麻呂歌集,戯歌,妻,夫,非略体,枕詞

1784

[題詞]贈入唐使歌一首

[原文]海若之何神乎齊祈者歟徃方毛来方毛 <船>之早兼

[訓読]海神のいづれの神を祈らばか行くさも来さも船の早けむ

[仮名],わたつみの,いづれのかみを,いのらばか,ゆくさもくさも,ふねのはやけむ

[_]

[左注]右一首渡海年<記>未詳

[_]

[校異]歌 [西] 謌 [西（訂正）] 歌 / 舶 → 船 [元][藍][紀] / 紀 → 記 [元][類]

[_]

[ＫＷ],相聞,遣唐使,餞別,送別,無事,安全,贈答

1785

[題詞]神龜五年戊辰秋八月歌一首[并短歌]

[原文]人跡成事者難乎和久良婆尓成吾身者死毛生毛 <公>之随意常念乍有之間尓虚蝉乃代人有者大王之御命恐美天離夷治尓登朝鳥之朝立為管群鳥之群立行者留居而吾者将戀奈不見久有者

[訓読]人となることはかたきをわくらばになれる我が身は死にも生きも君がまにまと思ひつつありし間にうつせみの世の人なれば大君の命畏み天離る鄙治めにと朝鳥の朝立ちしつつ群鳥の群立ち行かば留まり居て我れは恋ひむな見ず久ならば

[仮名],ひととなる,ことはかたきを,わくらばに,なれるあがみは,しにもいきも,きみがまにまと,おもひつつ,ありしあひだに,うつせみの,よのひとなれば,おほきみの,みことかしこみ,あまざかる,ひなをさめにと,あさとりの,あさだちしつつ,むらとりの,むらだちゆかば,とまりゐて,あれはこひむな,みずひさならば

[_]

[左注]（右件五首笠朝臣金村之歌中出）

[_]

[校異]歌 [西] 謌 [西（訂正）] 歌 / 短歌 [西] 短哥 / 君 → 公 [元][藍][紀][温]

[_]

[ＫＷ],相聞,作者：笠金村歌集,神亀５年８月,年紀,女歌,送別,枕詞

1786

[題詞]（神龜五年戊辰秋八月歌一首[并短歌]）反歌

[原文]三越道之雪零山乎将越日者留有吾乎懸而小竹葉背

[訓読]み越道の雪降る山を越えむ日は留まれる我れを懸けて偲はせ

[仮名],みこしぢの,ゆきふるやまを,こえむひは,とまれるわれを,かけてしのはせ

[_]

[左注]（右件五首笠朝臣金村之歌中出）

[_]

[校異]歌 [西] 謌 [西（別筆訂正）] 歌

[_]

[ＫＷ],相聞,作者：笠金村歌集,神亀５年８月,年紀,女歌,送別,地名,餞別

1787

[題詞]天平元年己巳冬十二月歌一首[并短歌]

[原文]虚蝉乃世人有者大王之御命恐弥礒城嶋能日本國乃石上振里尓紐不解丸寐乎為者吾衣有服者奈礼奴毎見戀者雖益色二山上復有山者一可知美冬夜之明毛不得呼五十母不宿二吾歯曽戀流妹之直香仁

[訓読]うつせみの世の人なれば大君の命畏み敷島の大和の国の石上布留の里に紐解かず丸寝をすれば我が着たる衣はなれぬ見るごとに恋はまされど色に出でば人知りぬべみ冬の夜の明かしもえぬを寐も寝ずに我れはぞ恋ふる妹が直香に

[仮名],うつせみの,よのひとなれば,おほきみの,みことかしこみ,しきしまの,やまとのくにの,いそのかみ,ふるのさとに,ひもとかず,まろねをすれば,あがきたる,ころもはなれぬ,みるごとに,こひはまされど,いろにいでば,ひとしりぬべみ,ふゆのよの,あかしもえぬを,いもねずに,あれはぞこふる,いもがただかに

[_]

[左注]（右件五首笠朝臣金村之歌中出）

[_]

[校異]歌 [西] 謌 [西（別筆訂正）] 歌 / 短歌 [西] 短謌 [西（別筆訂正）] 短歌 / 色

[_]

[西（右書）] 色色 [ＫＷ],相聞,作者：笠金村歌集,天平１年１２月,年紀,天理,奈良,羈旅,恋情,地名,枕詞

1788

[題詞]（天平元年己巳冬十二月歌一首[并短歌]）反歌

[原文]振山従直見渡京二曽寐不宿戀流遠不有尓

[訓読]布留山ゆ直に見わたす都にぞ寐も寝ず恋ふる遠くあらなくに

[仮名],ふるやまゆ,ただにみわたす,みやこにぞ,いもねずこふる,とほくあらなくに

[_]

[左注]（右件五首笠朝臣金村之歌中出）

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：笠金村歌集,天平１年１２月,年紀,天理,奈良,羈旅,恋情,地名

1789

[題詞]（（天平元年己巳冬十二月歌一首[并短歌]）反歌）

[原文]吾妹兒之結手師紐乎将解八方絶者絶十方直二相左右二

[訓読]我妹子が結ひてし紐を解かめやも絶えば絶ゆとも直に逢ふまでに

[仮名],わぎもこが,ゆひてしひもを,とかめやも,たえばたゆとも,ただにあふまでに

[_]

[左注]右件五首笠朝臣金村之歌中出

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：笠金村歌集,天平１年１２月,年紀,天理,奈良,羈旅,恋情

1790

[題詞]天平五年癸酉遣唐使舶發難波入海之時親母贈子歌一首[并短歌]

[原文]秋芽子乎妻問鹿許曽一子二子持有跡五十戸鹿兒自物吾獨子之草枕客二師徃者竹珠乎密貫垂齊戸尓木綿取四手而忌日管吾思吾子真好去有欲得

[訓読]秋萩を妻どふ鹿こそ独り子に子持てりといへ鹿子じもの我が独り子の草枕旅にし行けば竹玉を繁に貫き垂れ斎瓮に木綿取り垂でて斎ひつつ我が思ふ我子ま幸くありこそ

[仮名],あきはぎを,つまどふかこそ,ひとりこに,こもてりといへ,かこじもの,あがひとりこの,くさまくら,たびにしゆけば,たかたまを,しじにぬきたれ,いはひへに,ゆふとりしでて,いはひつつ,あがおもふあこ,まさきくありこそ

[_]

[左注]

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌

[_]

[ＫＷ],相聞,作者：遣唐使母,母親,愛情,送別,羈旅,餞別,安全,天平５年,年紀,植物,動物 ,枕詞

1791

[題詞]（天平五年癸酉遣唐使舶發難波入海之時親母贈子歌一首[并短歌]）反歌

[原文]客人之宿将為野尓霜降者吾子羽Ｌ天乃鶴群

[訓読]旅人の宿りせむ野に霜降らば我が子羽ぐくめ天の鶴群

[仮名],たびひとの,やどりせむのに,しもふらば,あがこはぐくめ,あめのたづむら

[_]

[左注]

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：遣唐使母,母親,愛情,送別,羈旅,餞別,安全,天平５年,年紀,動物

1792

[題詞]思娘子作歌一首[并短歌]

[原文]白玉之人乃其名矣中々二辞緒<下>延不遇日之數多過者戀日之累行者思遣田時乎白土肝向心摧而珠手次不懸時無口不息吾戀兒矣玉釧手尓取持而真十鏡直目尓不視者下桧山下逝水乃上丹不出吾念情安虚歟毛

[訓読]白玉の人のその名をなかなかに言を下延へ逢はぬ日の数多く過ぐれば恋ふる日の重なりゆけば思ひ遣るたどきを知らに肝向ふ心砕けて玉たすき懸けぬ時なく口やまず我が恋ふる子を玉釧手に取り持ちてまそ鏡直目に見ねばしたひ山下行く水の上に出でず我が思ふ心安きそらかも

[仮名],しらたまの,ひとのそのなを,なかなかに,ことをしたはへ,あはぬひの,まねくすぐれば,こふるひの,かさなりゆけば,おもひやる,たどきをしらに,きもむかふ,こころくだけて,たまたすき,かけぬときなく,くちやまず,あがこふるこを,たまくしろ,てにとりもちて,まそかがみ,ただめにみねば,したひやま,したゆくみづの,うへにいでず,あがおもふこころ,やすきそらかも

[_]

[左注]（右三首田邊福麻呂之歌集出）

[_]

[校異]歌 [西] 謌 [西（訂正）] 歌 / 短歌 [西] 短謌 [西（訂正）] 短歌 / 不 → 下 [元 ][藍][紀]

[_]

[ＫＷ],相聞,作者：田辺福麻呂歌集,恋情,枕詞

1793

[題詞]（思娘子作歌一首[并短歌]）反歌

[原文]垣保成人之横辞繁香裳不遭日數多月乃經良武

[訓読]垣ほなす人の横言繁みかも逢はぬ日数多く月の経ぬらむ

[仮名],かきほなす,ひとのよここと,しげみかも,あはぬひまねく,つきのへぬらむ

[_]

[左注]（右三首田邊福麻呂之歌集出）

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：田辺福麻呂歌集,恋情,うわさ

1794

[題詞]（（思娘子作歌一首[并短歌]）反歌）

[原文]立易月重而難不遇核不所忘面影思天

[訓読]たち変り月重なりて逢はねどもさね忘らえず面影にして

[仮名],たちかはり,つきかさなりて,あはねども,さねわすらえず,おもかげにして

[_]

[左注]右三首田邊福麻呂之歌集出

[_]

[校異]歌 [西] 謌 [西（訂正）] 歌

[_]

[ＫＷ],相聞,作者：田辺福麻呂歌集,恋情