Yorkshire writers :: :: University of Virginia Library

Yorkshire writers

Rolle, Richard (1290?-1349)

Poems of Ms. Cambr. Dd V. 64, fol. 134–142.

II.

III.

IV.

VI.

VII.

VIII.

IX.

XI.

XII.

XIV.

Poems of Ms. Thornton.

Appendix I. (2 Charms for the tooth-ache.)

Collapse All | Expand All expand section

III. [My trewest tresowre sa trayturly taken]

My trewest tresowre sa trayturly taken,
Sa bytterly bondyn wyth bytand bandes;
How sone of þi seruandes was þou forsaken,
And lathly for my lufe hurld with þair handes.

My well of my wele sa wrangwysly wryed,
Sa pulled owt of preson to Pylate at prime;
Þaire dulles & þaire dyntes ful drerely þou dreed,
When þai schot in þi syght bath slauer & slyme.

My hope of my hele sa hyed to be hanged,
Sa charged with þi crosce & corond with thorne;
Ful sare to þi hert þi steppes þa stanged,
Me thynk þi bak burd breke, it bendes for-borne.

My salue of my sare sa saryful in syght,
Sa naked and nayled, þi ryg on þe rode
Ful hydusly hyngand; þai heued þe on hyght,
Þai lete þe stab in þe stane, all stekked þat þar stode.

My dere-worthy derlyng sa dolefully dyght,
Sa straytly vpryght streyned on þe rode:
For þi mykel mekenes, þi mercy þi myght,
Þow bete al my bales with bote of þi blode.

My fender of my fose sa fonden in þe felde,
Sa lufly lyghtand at þe euensang-tyde;
Þi moder and hir menȝhe vnlaced þi scheld,
All weped þat þar were, þi woundes was sa wyde.

My pereles prynce, als pure I þe pray:
Þe mynde of þis myrour þou lat me noght mysse:
Bot wynd vp my wylle to won wyth þe ay,
Þat þou be beryd in my brest, & bryng me to blysse. AmeN.