University of Virginia Library

I.

[Vnkynde man, gif kepe til me]

Vnkynde man, gif kepe til me
and loke what payne I suffer for þe.
Synful man, on þe I cry,
alanly for þi lufe I dy.
Behalde þe blode fra me downe rennes,
noght for my gylt, bot for þi synnes.
My hende, my fete, with nayles er fest,
syns & vayns al to-brest.
Þe blode owt of my hert-rote,
loke it falles downe to my fote.
Of al þe payne þat I suffer sare,
with-in my hert it greues me mare
Þe vnkyndenes þat I fynd in þe,
þat for þi lufe þus hynged on tre.
Alas, why lufes þou me noght:
and I þi lufe sa dere hase boght?
Bot þou me lufe, þou dose me wrang,
sen I haue loued þe lang.
Twa & thyrty ȝere & mare
I was for þe in trauel sare,
With hungyr, thirst, hete & calde;
For þi lufe bath boght & salde,
Pyned, nayled & done on tre:
All, man, for þe lufe of þe.
Lufe þou me, als þe wele aw,
And fra syn þou þe draw.
I gyf þe my body with woundes sare,
And þare-to sall I gyf þe mare:
Ouer all þis I-wysse,
In erth mi grace, in heuen my blysse.